31 C
Phnom Penh

​យុ​វ​ជន​គាំ​ទ្រម​ហា​បា​តុ​កម្ម​ស្ងប់​ស្ងាត់​ដោយ​​សារ​ការ​ភ័យ​ខ្លាច

ដោយ ឌឹ ខេមបូឌា ដេលី

បទវិភាគ

ទិដ្ឋភាព​មួយ​ក្នុង​ចំណោម​ទិដ្ឋភាព​សំខាន់​បំផុត​ និង​ដែល​គួរ​ឲ្យ​ចង​ចាំ​បំផុត​នៃ​ការ​បោះ​ឆ្នោត​ជាតិ​កាល​ពី​ថ្ងៃ​ទី​២៨ ខែ​កក្កដា ដែល​មាន​ការ​ប្រកួត​ប្រជែង​យ៉ា​ង​ខ្លាំង​ក្លា​នោះ គឺ​ការ​ផ្ទុះ​សកម្មភាព​ចូល​រួម​របស់​យុវជន​ អំឡុង​​រដូវ​ធ្វើ​យុទ្ធនាការ​ឃោសនា​បោះ​ឆ្នោត ដោយ​​ក្រុម​យុវជន​កម្ពុជា ​បើក​ម៉ូតូ​តាម​ផ្លូវ​នានា​ស្រែក​​​ឲ្យ​មាន​ការ​ផ្លាស់​ប្ដូរ​។ 

ការ​បោះ​ឆ្នោត​របស់​យុវជន​ត្រូវ​បាន​កោត​​សរសើរ​យ៉ាង​ខ្លាំង​ថា ជា​ហេតុផល​មួយ​​ធ្វើ​ឲ្យ​គណបក្ស​សង្គ្រោះ​ជាតិ​ទទួល​បាន​សំឡេ​ង​​គាំទ្រ​យ៉ាង​ច្រើន​ ដោយ​លទ្ធផល​បឋម​បង្ហាញ​​ថា គណបក្ស​សង្គ្រោះ​ជាតិ​ទទួល​​បាន​អាសនៈ​សភា​ចំនួន​៥៥អាសនៈ រីឯ​គណ​បក្ស​ប្រជា​​​ជន​កម្ពុជា​ទទួល​បាន​៦៨​អាសនៈ។

ប៉ុន្តែ ដោយ​ប្រទេស​កម្ពុជា​កំពុង​ស្ថិត​ក្នុង​ស្ថាន​ភាព​ជាប់​គាំង ​ ខណៈ​ពេល​វិវាទ​ជុំ​វិញ​លទ្ធផល​បោះឆ្នោត​ចេះ​តែ​បន្ត និង​គណ​បក្ស​សង្គ្រោះ​ជាតិ​គំរាម​ធ្វើ​មហា​បាតុ​កម្ម​នោះ អារម្មណ៍​ក្លាហាន​នៅ​ក្នុង​ចំណោម​យុវ​ជន​បានថយ​ចុះ​។ នៅ​ក្នុង​ពេល​ថ្មីៗ​នេះគេ​ឃើញ​មាន​ការ​បង្កើន​វត្ត​មាន​យោធា​ក្នុង​រាជា​ធានី​ភ្នំពេញ​ក្រោយ​ពីការ​បោះ​ឆ្នោត​ ដើម្បី​​ធានា​សុវត្ថិ​ភាព​ក្នុង​ករណី​​​មាន​បាតុកម្ម​ជា​យ​ថា​ហេតុ​ ហើយ​ផល​ប៉ះពាល់​នៃ​ការ​បង្កើន​វត្ត​មាន​យោធា​នៅ​​ជុំ​វិញ​​បរិវេណ​សាកល​វិទ្យាល័យ​នានា​នៅ​​​ក្នុង​រាជ​ធានីភ្នំពេញ​​ បាន​​បង្ហាញ​ឲ្យ​​​​ឃើញ​​ជាក់​ស្ដែង​កាល​ពី​ម្សិល​មិញ។

យុវជន​ អ៊ុង កញ្ញា អាយុ​២២​ឆ្នាំ​ ជា​និស្សិត​​ផ្នែក​អក្សរសាស្ត្រ​​អង់គ្លេស​ នៅ​វិទ្យា​ស្ថាន​ខ្មែរ​ជំនាន់​ថ្មី​​​ បាន​និយាយ​ថា រូប​គេ​ចង់​​ចូល​រួម​ក្នុង​បាតុកម្ម​ប្រឆាំង​លទ្ធផល​បោះ​ឆ្នោត​ ប៉ុន្តែ ​នឹង​មិន​ចូល​រួម​ទេ​ ដោយ​សារតែ​ខ្លាច​ការ​សង​សឹក​ពី​អាជ្ញាធរ​។ យុវជន​រូប​នេះ​​បាន​និយាយ​ទៀត​ថា “ ខ្ញុំ​គិត​ថា សកម្មភាព​របស់​គណបក្ស​ប្រជា​ជន​កម្ពុជា ក្នុង​ការ​យក​កង​ទ័ព​ចូល​មក​​​សម្ញែងនេះ​​​មិន​មែន​ជា​គំនិត​ល្អ​ទេ ពីព្រោះវា​ជា​ការ​បំភិត​បំភ័យ​ធ្វើ​ឲ្យ​ប្រជា​ពល​រដ្ឋ​មាន​ការ​ភ័យ​ខ្លាច។ ខ្ញុំ​ចង់​ចូល​រួម​បាតុកម្ម​ ប៉ុន្តែ ខ្ញុំ​នឹង​មិន​ចូល​រួម​ទេ ពីព្រោះ​ខ្ញុំ​បារម្ភ​ចំពោះ​អំពើ​ហិង្សា ហើយ​ឪពុក​ម្ដាយ​របស់​ខ្ញុំ​ក៏​នឹង​មិន​អនុញ្ញាត ឲ្យ​ខ្ញុំ​ចូល​រួម​ដែរ​”។

នៅ​មុន​ការ​បោះ​ឆ្នោត គ្រប់គ្នា​សុទ្ធ​តែ​បាន​ឃើញ​ហើយ​នូវ​ការ​​មិន​ខ្លាច​រអា​របស់​អ្នក​ធ្វើ​យុទ្ធនាការ​​វ័យ​ក្មេង  ដែល​នោះ​ប្រហែល​ជា​ដោយ​សារ​តែ​ពួក​គេ​មិន​ចងចំា​ពីស្ថាន​ភាព​ចលាចល​នយោ​បាយ​កាល​ពី​អតីតកាល​។ ប៉ុន្តែ ការ​សម្ភាស​និស្សិត​កាល​ពី​ម្សិលមិញ​ បាន​បង្ហាញ​ថា ពួក​គេ​មាន​ការ​ប្រុង​ប្រយ័ត្ន​​យ៉ាង​​​​ខ្លាំង​ក្នុង​រយៈ​ពេល​ប៉ុន្មាន​ថ្ងៃ​ថ្មីៗ​នេះ។

យុវជន​ម្នាក់​ទៀត​ឈ្មោះ លៀម សុវណ្ណ​​រតនា​ អាយុ​២០​ឆ្នាំ ជា​និស្សិត​គណនេយ្យ​នៅ​សាកល​វិទ្យាល័យ​មេគង្គ​កម្ពុជា​ ក្នុង​ខណ្ឌ​សែន​សុខ និយាយ​ថា “​ ខ្ញុំ​បាន​ឮ​ថា និស្សិត​ភាគ​ច្រើន​គាំទ្រ​បាតុកម្ម​ ប៉ុន្តែ ខ្ញុំ​មិន​ច្បាស់​​​ថា ប៉ុន្មាន​នាក់​នឹង​ទៅ​ចូល​រួមឲ្យ​ពិត​ប្រាកដ​​នោះ​ទេ”។

យុវជន​រូប​នេះ​បាន​បន្ត​ថា “មិត្ត​ភក្ដិ​​របស់​ខ្ញុំ​មួយ​ចំនួន​បាននិយា​យ​ថា ពួក​គេ​ចង់​ទៅ​ស្រុក​ដើម្បី​គេច​វេះ​ ហើយ​ឪពុក​ម្ដាយ​របស់​​ខ្ញុំ​បាន​ប្រាប់​ឲ្យ​ខ្ញុំ​ចាក​​​ចេញ​ពី​សាកល​វិទ្យាល័យ ប៉ុន្តែ ខ្ញុំ​និយាយ​ថា ខ្ញុំ​នៅ​រង់​ចាំ​មើល​សិន​។ ការ​បោះ​ឆ្នោត​នេះ​គឺ​ជា​ការ​លួច​បន្លំ ហើយ​បក្ស​ប្រជា​ជន​កម្ពុជា​ដឹង​ពី រឿង​នេះ​ ដូច្នេះ​វា​សំខាន់​ខ្លាំង​ណាស់​ក្នុង​ការ​ធ្វើ​បាតុកម្ម​”។ ទោះ​ជាយ៉ាង​ណា​ យុវជន​រូប​នេះ​ បាន​លើក​ឡើង​​​​បន្ថែម​ទៀត​ថា រូប​គេ​មិន​ប្រាកដ​ថា តើ​ខ្លួន​នឹង​ចូល​រួម​ដែរ​ ឬ​យ៉ាង​ណា​នោះទេ ពី​ព្រោះ​​​​រូប​គេ​ក៏​ខ្លាច​អំពើ​ហិង្សា​ដែរ​​។

នៅ​ខាង​ក្រៅ​សាកល​វិទ្យាល័យភូមិន្ទ​​នីតិសាស្ត្រ និង​វិទ្យាសាស្ត្រ​សេដ្ឋកិច្ច​ និស្សិត​បាន​ប្រមូល​ផ្ដុំ​គ្នា​ជា​ក្រុម​ៗ​ត្រៀម​​ចូ​ល​ប្រឡង​។​យុវតី​មួយ​ក្រុម​មាន​គ្នា​បី​នាក់​អាយុ​ខ្ទង់​២០​ឆ្នាំ ដែល​សុទ្ធ​តែ​ជា​និស្សិត​ច្បាប់​ និង​ដែល​ខ្លាច​មិន​ហ៊ាន​បញ្ចេញ​ឈ្មោះ​ដោយ​សារ​តែ​មាន​សន្ដិសុខ​ម្នាក់​ឈ​រ​នៅ​ក្បែរ​និយាយ​អាយកូម​​​នោះ បាន​និយាយ​ថា ការ​បោះ​ឆ្នោត​​នេះ​មិន​សេរី​​និង​យុត្តិធម៌​ទេ ហើយ​ពួក​គេ​សង្ឃឹម​ថា បាតុកម្ម​ណាមួយ​រប​ស់​គណបក្ស​ប្រឆាំង​នឹង​ទាក់​ទាញ​អ្នក​ចូល​រួម​យ៉ាង​ច្រើន​។

ប៉ុន្តែ ក្នុង​ចំណោម​យុវតី​ទាំង​បី​នាក់​នេះ​មាន​តែ​ម្នាក់​ប៉ុណ្ណោះ​ដែល​និយាយ​ថា នាង​នឹង​ចូល​រួម​។ យុវតី​ម្នាក់​នោះ​បាន​និយាយ​ថា “ប្រជា​ពល​រដ្ឋ​​មាន​កំហឹង​កាន់​តែ​ខ្លាំង​បន្ទាប់​ពីការ​បោះ​ឆ្នោត ហើយ​នេះ​​ជាមូល​ហេតុ​ដែល​រដ្ឋាភិបាល​បញ្ចេញ​កង​ទ័ព​ និង​​រថ​ពាស​ដែក​ ពី​ព្រោះ​ពួក​គេ​ខ្លាច​ប្រជា​ពល​រដ្ឋ​​ដែល​បាន​បោះ​ឆ្នោត​ ប្រឆាំង​នឹ​ង​ពួក​គេ​”។

មុន​ពេល​អ្នក​យក​ព័ត៌មាន​ត្រូវ​បាន​​គណៈ​គ្រប់​​​គ្រង​សាកល​វិទ្យា​ល័យនិង​សន្ដិសុខ​បណ្ដេញ​ចេញ​ពី​បរិវេណ​សាកល​វិទ្យា​ល័យ ដោយ​សារតែ​​​​មិនទទួល​​​បាន​​​លិខិត​សុំ​ច្បាប់​អនុញ្ញាត​ជាមុន​ដើម្បី​ចូល​ទៅ​ក្នុង​បរិវេណ​នោះ​ នាង​បាន​និយាយ​ថា “ទោះ​ជា​យ៉ាង​​ណា​​​​បញ្ហា​ដែល​គណបក្ស​សង្គ្រោះ​ជាតិ​មាន​គឺ​ថា បាតុកម្ម​ណាមួយ​នឹងត្រូវ​បំបែក​ជា​ពីរ​ក្រុម​​​ដែល​ចង់​បាន​រឿង​ពីរ​ផ្សេងគ្នា  គឺ​មួយ​ក្រុម​តវ៉ា​នឹង​ការ​បោះ​ឆ្នោត​មិន​យុត្តិធម៌​ និង​ស្នើ​ឲ្យ​មាន​ការ​ស៊ើប​អង្កេត ហើយអ្នក​ដែល​គិត​ថាយើងបាន​​ឈ្នះ​ការ​បោះ​ឆ្នោត​នឹង​អំពាវ​​នាវ​ឲ្យ​លោក​ [ នាយក​រដ្ឋ​មន្ត្រី] ហ៊ុន សែន ចុះ​ចេញពីអំណាច” ។

លោក អ៊ូ ឫទ្ធី ជា​អ្នក​បង្កើត​គេហទំព័រ​បញ្ចេញ​ទស្សន​នយោបាយ​មួយ​រូប​ បាន​និយាយ​ថា បញ្ហា​ដែល​គណបក្ស​សង្គ្រោះ​ជាតិ​កំពុង​ប្រឈម​​គឺ​ថា នៅ​មុន​ការ​បោះ​ឆ្នោត ​សាររបស់​ខ្លួន​គឺសាមញ្ញ​ណាស់​ នោះ​គឺ​ការ​ផ្លាស់​ប្ដូរ​ ហើយ​ពេល​នេះ​វា​កាន់​តែ​ស្មុគ​ស្មាញ​ឡើង​។ លោក​បាន​មាន​ប្រសាសន៍​ថា “លោក សម រង្ស៊ី កំពុង​អំពាវ​នាវ​ឲ្យ​មាន​មហា​បាតុកម្ម​​ ប៉ុន្តែ ​នៅ​ក្នុង​គណបក្ស​សង្គ្រោះ​ជាតិ​គ្មាន​អ្នក​ណា​អំពាវ​នាវ​ឲ្យ​ប្រ​ជា​ពល​រដ្ឋ​ធ្វើ​រឿង​នេះ​ទេ ពួកគេ​កំពុង​និយាយ​អំពី​ការ​ឆ្លើយតប​ដោយ​សន្តិវិធី ដូច្នេះសូម្បី​នៅ​ខាង​ក្នុង​គណ​បក្ស​សង្គ្រោះ​ជាតិ​ ពួកគេមិន​យល់ស្រប​គ្នា​ថា​​​​ត្រូវ​ធ្វើ​ការ​តវ៉ា​ដោយ​វិធី​ណា​នោះ​ដែរ”​។

លោក​ស្រី មូរ សុខហួរ បេក្ខ​ជន​តំណាង​រាស្ត្រមក​ពី​គណបក្ស​សង្គ្រោះ​ជាតិ​ បាន​មាន​ប្រសា​សន៍​កាល​ពី​ម្សិលមិញ​ថា គណបក្សនៅ​តែ​​បន្ត​ចូល​រួម​ជាមួយ​អ្នក​គាំទ្រ​ជាយុវជន​របស់​ខ្លួន​ ពីព្រោះ​នេះ​គឺ​ជា​ការ​បោះ​ឆ្នោត​របស់​ពួក​គេ​។ តែ​ទោះ​ជា​យ៉ាង​ណា​ លោក​ស្រី​​បាន​គូស​បញ្ជាក់​ថា មហាបាតុកម្ម​គឺ​ជា​ជម្រើស​ចុង​ក្រោយ​។

លោក​ស្រី​បាន​មាន​ប្រសាសន៍​ថា “ប្រជា​ពល​រដ្ឋ​បាន​និយាយ​ហើយ ​​ការ​ផ្លាស់​ប្ដូរ​ក៏​មាន​ហើយដែរ ហើយ​ពួក​គាត់​​​​នឹង​មិន​ទទួល​យកអ្វី​ក្រៅ​ពី​ការ​ផ្លាស់​ប្តូរ​ឡើយ​។ ទោះ​ជា​យ៉ាង​ណា យើង​នឹង​មិន​ធ្វើ​មហា​បាតុកម្ម​ដែល​ជា​ជម្រើ​ស​ចុង​ក្រោយ​ទេ។ ជា​ដំបូង​ យើង​ត្រូវ​ដោះ​ស្រាយ​ភាព​មិន​ប្រក្រតី​​នានា​សិន បន្ទាប់​មក​អង្គុយ​រួម​គ្នា​ដោះ​ស្រាយ​ការ​ខ្វែង​គំនិត​គ្នា​របស់​យើង​”។

លោក​ស្រី​​​ថ្លែង​ថា ប៉ុន្តែ ទោះ​ជា​បាតុកម្ម​​​ត្រូវ​កើត​ឡើងមែន​ក៏​ដោយ​ ក៏​រដ្ឋា​ភិបាល​​​នៅ​តែ​គ្មាន​ហេតុផល​អីត្រូវ​ឆ្លើយ​តប​ដោយ​ការ​សម្ញែងកម្លាំង​បែប​នេះ​ទេ។

លោក​ស្រី​បាន​មាន​ប្រសាសន៍​បន្ត​ទៀត​ថា “​ កន្លង​មក​យើងធ្លាប់​ធ្វើ​​បាតុកម្ម​ជា​ច្រើន​ដង​រួច​មក​ហើយនៅ​មុន​ការ​បោះឆ្នោត​ដោយ​មាន​ប្រជា​ពល​រដ្ឋ​ជា​ច្រើន​ពាក់​នាក់​ចូល​រួម​ ហើយ​តើ​មានអំពើ​ហិង្សា​ទេ​នៅ​ពេល​នោះ​? គឺ​គ្មាន​ទេ​ ដូច្នេះ​តាម​រយៈ​ការ​យក​រថ​ពាស​ដែក​មក​សម្ញែង​នេះ​ វា​បង្ហាញ​យ៉ាង​​ច្បាស់​ថារដ្ឋាភិបាល​នៅ​ខាង​ណា”។

លោក​ស្រីបាន​មាន​ប្រសាសន៍​ទៀត​ថា ប្រជា​​ពល​រដ្ឋ​ទាម​ទា​រ​ឲ្យ​មាន​ការ​ផ្លាស់​ប្ដូររបប​ដឹក​នាំ​បែប​នេះ​ ហើយរបបដឹក​នាំ​នេះបែរ​ជា​​យករថ​ពាស​ដែក​មក​ដាក់​សម្ញែង​តាម​ផ្លូវ​បែប​នេះ​ទៅវិញ​។ តើ​នេះ​ជា​ការ​ផ្លាស់​ប្ដូរ​ដែល​ពួក​គេ​គិត​ថា ប្រជា​ពល​រដ្ឋ​ចង់​បាន​?” ទោះ​ជា​យ៉ាងណា​  សម្រាប់​យុវជន​ ប៊ូ វាសនា ​អាយុ​២១​ឆ្នាំ ជា​និស្សិត​ច្បាប់​យល់​ថា ការ​ចូល​រួម​បាតុកម្ម​គឺ​មិន​ទាន់​ច្បាស់​ទេ​។

យុវជន​រូប​នេះ​បាន​និយា​យ​នៅ​ខាង​ក្រៅ​វិទ្យាស្ថាន​បច្ចេកទេ​ស​កាល​ពី​ម្សិលមិញ​ថា “វា​ជា​សិទ្ធិ​របស់​គណបក្ស​ប្រឆាំង​ក្នុង​ការ​ធ្វើ​ការ​តវ៉ា ពីព្រោះ​សូម្បី​តែ​គណៈកម្មាធិការ​ជាតិ​​រៀប​ចំ​ការ​បោះ​ឆ្នោត​​ក៏​បាន​ប្រកាស​លទ្ធ​ផល​ហើយ​ដែរ​ យើង​មិន​ទាន់​ជឿ​វាទេ ប៉ុន្តែ [ខ្ញុំ] មិន​ចង់​ចូល​រួម​ទេ ពីព្រោះ​ខ្ញុំ​មិន​អាច​ព្យាករ​ដឹង​មុន​ថា ​នឹង​មាន​អ្វី​កើត​ឡើង​ឡើយ”៕

ប្រែ​​​សម្រួល​​​ដោយ​​ តែម សុខុម    ​​   

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស