31 C
Phnom Penh

ម្ចាស់​ហាង​ម៉ាស្សា​បដិសេធ​ថា មិន​បាន​បើក​កន្លែង​បម្រើ​ផ្លូវ​ភេទទេ

ដោយ ឌឹ ខេមបូឌា ដេលី

បទវិភាគ

កាល​ពីម្សិលមិញ​​ សាលា​ដំបូង​រាជ​ធានី​ភ្នំពេញ​បាន​បើក​សវនាការ​​ជំនុំ​ជម្រះ​ក្ដី​របស់​ស្ត្រី​​ម្ចាស់​ហាង​ម៉ាស្សា​ ដែល​គេ​ចោទ​ប្រកាន់​ថា បាន​បើក​កន្លែង​បម្រើ​សេវាកម្ម​ផ្លូវ​ភេទ​ នៅ​ក្នុង​ហាង​ម៉ាស្សា​ ដែល​ត្រូវ​នគរបាល​ឆ្មក់​ចូលបង្ក្រាប​​កាល​ពី​ខែ​មករា។

អ្នក​ស្រី​ ភីន យុទ្ធី ត្រូវ​បាន​ចោទ​ប្រកាន់​កាល​​ពី​ខែ​មករា ពី​បទ​ផ្ដល់​កន្លែង​​សម្រាប់​ផ្ដល់​សេវា​កម្ម​ផ្លូវ​ភេទ​ គឺ​ពីរ​ថ្ងៃ​បន្ទាប់​ពី​នគរបាល​បាន​ឆ្មក់​ចូល​​ហាង​​ម៉ាស្សា​របស់​គាត់​។អ្នក​ស្រី​ ភីន យុទ្ធី​ ត្រូ​វ​បាន​ចោទ​ប្រកាន់​​​ពីព្រោះ​អ្នក​ស្រី​ គឺ​ជា​ម្ចាស់​ហាង​ម៉ាស្សា​នេះ​។

លោក​ ជួន​ សុរាសី ប្រធាន​ក្រុម​ប្រឹក្សា​អង្គ​ជំនុំ​ជម្រះ​បាន​លើក​​ឡើង​កាលពី​ម្សិល​មិញ​ថា អ្នក​ស្រី​​ ភីន យុទ្ធី បាន​ប្រាប់​តុលាការ​ថា អ្នក​ម៉ាស្សា​ម្នាក់​ក្នុង​ចំណោម​អ្នក​ម៉ាស្សា​​​ចំនួន​ប្រាំពីរ​នាក់​បាន​រួម​ភេទ​ជាមួយ​​ភ្ញៀវ​​របស់​ខ្លួន​​ ប៉ុន្តែ​​អ្នក​ស្រី​បាន​បដិសេធ​ថា មិន​បាន​​បើក​កន្លែង​ផ្ដល់​សេវា​កម្មផ្លូវ​ភេទ​ឡើយ​។

អ្នក​ស្រី​ ភីន យុទ្ធី បាន​និយាយ​ថា “ខ្ញុំ​ដឹង​ថា អ្នក​ម៉ាស្សា​ម្នាក់​​បាន​រួម​ភេទ​​ជាមួយ​ភ្ញៀវ​នៅ​ក្នុង​បន្ទប់​ម៉ាស្សា ហើយ​នៅ​ពេល​នគរ​បាល​បាន​ទៅ​ដល់​​ ពួក​គេ​បាន​ឃើញ​នាង​នៅ​ជាមួយ​ភ្ញៀវ​”។

អ្នក​ស្រី​បាន​និយាយ​ពី​បុគ្គលិក​របស់​គាត់​ថា “ខ្ញុំ​មិន​បាន​បញ្ជា​ឲ្យ​ពួក​គេ​រួម​ភេទ​ជា​មួយ​ភ្ញៀវ​ទាល់​តែ​​សោះ​ ប៉ុន្តែ​ពួក​គេ​បាន​ធ្វើ​រឿង​នេះ​​ដោយ​លួច​លាក់​ ដោយ​ខ្លួន​ឯង​”។ អ្នក​ស្រី​បាន​និយាយ​បន្ត​ថា “ខ្ញុំ​មិនបាន​ដឹង​ទេ​ ហើយ​ខ្ញុំ​មិន​បាន​ទទួល​​អ្វី​ទាល់​តែ​សោះ​​ពី​សេវាកម្ម​ផ្លូវ​ភេទ​នេះ គឺ​មាន​តែ​ប្រាក់​ចំណូល​ពី​ការ​ម៉ាស្សា​ប៉ុណ្ណោះ​”។

លោក​ វ៉ា សក្ដា ព្រះ​រាជ​អាជ្ញារង​​​បាន​លើក​ឡើង​ថា ការ​​ចោទ​ប្រកាន់​នេះ​គឺ​សម​ហេតុ​សមផល​ហើយ​ ពីព្រោះ​បុគ្គលិក​ម្នាក់​ក្នុង​ចំណោម​បុគ្គលិក​ទាំង​អស់​​ត្រូវ​បាន​ចាប់​ខ្លួន​ពេល​រួម​ភេទ​ជាមួយ​ភ្ញៀវ​។ អ្នក​ម៉ាស្សាម្នាក់​ឈ្មោះ តេង​ នារី អាយុ​២៣​ឆ្នាំ​ បាន​ប្រាប់​តុលាការ​ថា ភ្ញៀវ​របស់​នាង​​បាន​ឲ្យ​​លុយ​​១០ដុល្លារ​ ឬ​២០​ដុល្លារ​សម្រាប់​ការ​រួម​ភេទ​ ហើយ​អ្នក​ស្រី​ ភីន យុទ្ធី បាន​កាត់​​យក​លុយ​ខ្លះ​។ លោកចៅ​ក្រម​ សុរាសី​ បាន​មាន​ប្រសា​សន៍​ថា តុលាការ​នឹង​ចេញ​សាល​ក្រម​នៅ​ថ្ងៃ​ទី​១០ ខែ​កញ្ញា​៕

ប្រែសម្រួលដោយ ស៊ា សុ៊យឈាង​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស