29 C
Phnom Penh

បុរស​ខ្មែរ​​អូស្ត្រាលី​ត្រូវ​បាន​ចោទប្រកាន់​ពីបទ​មនុស្ស​ឃាត​ក្នុង​ជម្លោះ​ដី​ធ្លី

ដោយ ឌឹ ខេមបូឌា ដេលី

បទវិភាគ

នគរ​បាល​បាន​និយាយ​កាល​ពី​ម្សិល​មិញ​ថា បុរស​សញ្ជាតិ​អូស្ត្រាលី​ដើម​កំណើត​ខ្មែរ​ម្នាក់​ត្រូវ​បាន​ចាប់​ខ្លួន​កាល​ពី​ថ្ងៃ​ពុធ ពាក់​ព័ន្ធ​នឹង​ឃាតកម្ម​មួយ​ ដែល​កើត​ចេញ​ពី​វិវាទ​ដី​ធ្លី​មួយនៅ​ក្នុង​ខេត្ត​កំពង់​ស្ពឺ។

ឈ្មោះ អ៊ុក រុន អាយុ​៥២​ឆ្នាំ ត្រូវ​បាន​ចាប់​ខ្លួន​កាល​ពី​ល្ងាច​ថ្ងៃ​ពុធ​ ដែល​តាម​ចោទ​ថា បាន​បញ្ជា​ឲ្យ​ធ្វើ​ឃាត​ឈ្មោះ សាន សឿន អាយុ​៣៦​ឆ្នាំ ដែល​ត្រូវ​បាន​បាញ់​ត្រូវ​ចំ​ក្បាល​ពី​ក្រោយ​នៅ​ឯ​ផ្ទះ​សំណាក់​មួយ​​​​ក្នុង​ស្រុក​ត្រែង​ត្រយឹង​ កាល​ពី​ថ្ងៃ​ច័ន្ទ។

លោក ស្វាយ យឿន​ នាយ​នគរ​បាល​ព្រហ្ម​​ទណ្ឌ​ខេត្ត​​ បាន​មាន​ប្រសាសន៍​ថា “លោក រុន បាន​សារភាព​ថា ខ្លួន​ពិត​ជា​បាន​ពាក់​ព័ន្ធ​នឹង​ការ​ធ្វើ​ឃាត​នេះ​មែន”។

បុរស​ពីរ​នាក់​នេះមាន​ការ​ពាក់​ព័ន្ធ​ក្នុង​ជម្លោះ​កំពុង​កើត​ឡើង​មួយ​ជំុ​វិញ​ដី​មួយ​ហិកតា។ ជន​សង្ស័យ​បាន​អះ​អាង​ថា ខ្លួន​បាន​ទិញ​ដី​នេះ​តម្លៃ​៤.០០០​ដុល្លារ ក៏​ប៉ុន្តែ ត្រូវ​បាន​ជន​រង​គ្រោះ​បដិសេធ​ថា​គាត់​គ្មាន​​សិទ្ធិ​ធ្វើ​កសិកម្ម​នៅ​លើ​ដី​េនះ​ទេ​ដោយជន​រង​គ្រោះ​ទាម​ទារ​លុយ​បន្ថែម​ទៀត​។

លោក​  យឿន បាន​ថ្លែង​ថា “វា​ជា​ការ​សម្លាប់​​សង​សឹក​មួយ​កើត​ឡើង​ដោយ​សារ​តែ​ជម្លោះ​​ដី​ធ្លី​”។ កាល​ពី​ថ្ងៃ​អង្គារ នគរ​បាល​បាន​ចាប់​ខ្លួន​ឈ្មោះ ដុង វណ្ណៈ អាយុ​៣៣​ឆ្នាំ និង​ឈ្មោះ​ ទ្រី គន្ធរ អាយុ៣២ឆ្នាំ នៅ​ក្នុង​ខេត្ត​កំពត​​ពី​បទ​មនុស្ស​ឃាត​។ លោក​ យឿន បាន​បន្ត​ថា “លោក រុន បាន​ចំណាយ​ប្រាក់​ឲ្យ​ពួកគេ​សម្លាប់​លោក សាន សឿន។ វណ្ណៈបាន​បាញ់​ជន​រង​គ្រោះ​ ហើយ​ គន្ធ​រ និង​​​ជ​ន​ដៃ​ដល់​បាន​បើក​ម៉ូតូ​ចេញ​ពី​ទី​កន្លែង​កើត​ហេតុ”៕

ប្រែ​សម្រួល​ដោយ ចេវ ប៊ុននី

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស