34 C
Phnom Penh

មនុស្ស​ប្រាំមួយ​នាក់​ស្លាប់​​ដោយ​សារការ​ផ្ទុះ​មីន​តោនក្នុង​ខេត្ត​ព្រះ​វិហារ​

ដោយ ឌឹ ខេមបូឌា ដេលី

បទវិភាគ

មន្ត្រី​ខេត្ត​ព្រះ​វិហារ​​បាន​ឲ្យ​ដឹង​កាល​ពី​ម្សិល​មិញ​ថា ការ​ផ្ទុះ​មីន​ប្រឆាំង​រថក្រោះ​​បាន​សម្លាប់​​មនុស្ស​ចំនួន​ប្រាំ​មួយ​នាក់​ និង​ធ្វើ​ឲ្យ​មនុស្ស​ប្រាំពីរ​នាក់​ផ្សេង​ទៀត​​រង​របួស​ធ្ងន់​នៅ​ក្នុង​ស្រុក​ជាំក្សាន្ត​ ខេត្ត​ព្រះ​វិហារ​កាល​ពី​ម្សិលមិញ​ ខណៈ​​ជន​​រងគ្រោះ​ទាំង​នេះ​កំពុង​ធ្វើ​ដំណើរ​ត្រឡប់​ទៅ​ផ្ទះ​វិញ​ បន្ទាប់​ពី​បាន​ធ្វើ​ស្រែ​អស់​មួយ​ថ្ងៃ​។

លោក​ សុខ ហៃ អភិបាល​ស្រុក​ជាំក្សាន្ត​បាន​លើក​ឡើង​ថា ជន​រងគ្រោះ​ទាំង​នេះ​ ដែល​​មាន​អាយុ​​ចន្លោះ​ពី​២០​ឆ្នាំ​ ដល់​៤៩​ឆ្នាំ​​បានជិះ​​នៅ​ផ្នែក​ខាង​ក្រោយ​នៃ​គោយន្ត​ ដែល​​ធ្វើ​ដំណើរ​តាម​​ផ្លូវលំ​មួយ​ក្នុង​​ឃុំ​យាង​ នៅ​ម៉ោង​ប្រហែល​៧​​យប់​ ខណៈ​នោះ​​មីន​ប្រឆាំង​​រថក្រោះ​​មួយ​គ្រាប់​បាន​ផ្ទុះ​ឡើង​តែ​ម្ដង​ ដោយ​​បណ្ដាល​ឲ្យ​បុរស​​ចំនួន​ប្រាំ​មួយ​នាក់​ស្លាប់​  ភ្លាមៗ។លោក​បាន​ថ្លែង​កាល​​ពី​ម្សិលមិញ​ថា “ បុរស​​ចំនួន​ប្រាំ​មួយ​នាក់​បាន​ស្លាប់​ និង​​ម្នាក់​ទៀត​រង​របួស​ធ្ងន់​ ដោយ​សារ​មីន​ប្រឆាំង​រថក្រោះ​ ដែល​បាន​ផ្ទុះ​ឡើង​ រួច​​ធ្វើ​ឲ្យ​​សាក​សព​ជន​រងគ្រោះ​បែក​ជា​បំណែក​”។

លោក​ សាយ ស៊ីន អធិការ​រង​​នគរបាល​​ស្រុក ​​បាន​រៀប​រាប់​ពី​​ហេតុ​ការណ៍​ដ៏​គួរ​ឲ្យ​រន្ធត់​​នោះ​ថា  បំណែក​សាក​សពរបស់​​ជន​រង​គ្រោះ​​​បាន​​ខ្ទាត​ចេញ​ឆ្ងាយ​ពី​​កន្លែង​​ផ្ទុះ​។ លោក​បានថ្លែង​​ថា “ក្រុម​គ្រួសារជន​រង​គ្រោះ​​​បាន​ទៅ​កន្លែង​កើត​ហេតុ​​នោះ​ ដើម្បី​រើស​បំណែក​សាកសព​​យក​ទៅ​បូជា​… មាន​​ឈាម​​ជា​ច្រើន​​​នៅ​កន្លែង​​​ផ្ទុះ​”។

យោង​តាម​តួលេខ​ពី​អាជ្ញាធរ​សកម្ម​ភាព​កម្ចាត់​មីន​ និង​ជួយ​ជន​រងគ្រោះ​នៅ​កម្ពុជា​បាន​ឲ្យ​ដឹង​ថា  កាល​ពី​ឆ្នាំ​មុន ​មាន​មនុស្ស​ចំនួន​១១៩​នាក់​បាន​រង​របួស​​ ដោយ​សារ​មីន​ ឬ​យុទ្ធ​​ភណ្ឌ​មិន​ទាន់​​ផ្ទុះ ហើយ​​មាន​មនុស្ស​ចំនួ​ន​៤៣​នាក់​បាន​ស្លាប់​។​ នៅ​ក្នុង​ចំណោម​​អ្នក​ស្លាប់​ទាំង​​នោះ​មាន​​២៣​នាក់​​បាន​ស្លាប់​​ដោយ​សារ​មីន​ប្រឆាំង​រថក្រោះ ដែល​គេ​ផលិត​ឡើង​​ដើម្បី​កម្ទេច​រថពាសដែក និង​រថក្រោះ​។

យោង​តាម​​តួលេខ​នេះ​ បាន​ឲ្យ​ដឹង​បន្ត​ថា តាំង​ពី​ដើម​ឆ្នាំ​រហូត​ដល់​​ពេល​ឥឡូវ​​​មាន​​មនុស្ស​៤៧​នាក់​បាន​រង​របួស​​ដោយ​សារ​មីន ឬ​យុទ្ធភណ្ឌ​មិន​ទាន់​ផ្ទុះ​ និង​​មាន​មនុស្ស​ប្រាំ​មួយ​នាក់​បាន​ស្លាប់​។ ការ​​ផ្ទុះ​មី​ន​ប្រឆាំង​រថក្រោះ​នេះ​​បាន​ធ្វើ​ឲ្យ​តួ​លេខ​​នៃ​អ្នក​ស្លាប់​​បាន​កើនឡើង​ដល់​១២​នាក់​។

លោក​ ហេង​ រតនា អគ្គនាយក​​មជ្ឈ​មណ្ឌល​សកម្ម​ភាព​កម្ចាត់​​មីន​កម្ពុជា​​បាន​លើក​ឡើង​ថា  ដោយ​ជឿជាក់​ថា មាន​គ្រោះ​ថ្នាក់​តិច​តួច​​ ហើយ​​ផ្លូវ​ធ្វើ​ដំណើរ​ជា​រឿយៗ​តែ​ង​តែ​មាន​សុវត្ថិភាព​នោះ​ កសិករ​​​បាន​ដើរ​ ឬ​ក៏​បើក​បរ​ជា​ធម្មតា​នៅ​លើ​ផ្លូវ​លំ ដែល​មាន​មីន​នេះ​​​​។

លោក​ ហេង​ រតនា បាន​ថ្លែង​ថា តែ​ទោះ​ជា​យ៉ាង​ណា​ អំឡុង​​រដូវ​វស្សា​នៅ​ពេល​មាន​ភ្លៀង​ធ្លាក់​ខ្លាំង​ ហើយ​មាន​ទឹក​ជំនន់​​ម្ដងម្កាល​នោះ​ វា​បាន​ធ្វើ​ឲ្យ​ដី​ជ្រាយ​ ហើយ​ទម្ងន់​​គោ​យន្ត​​និង​អ្នក​ដំណើរ​បូក​រួម​ចូល​គ្នា​អាច​មាន​ទម្ងន់​គ្រប់គ្រាន់​​ក្នុង​ការ​ធ្វើ​ឲ្យ​មីន​ប្រឆាំង​រថក្រោះ​នេះ​ផ្ទុះ​បាន​។ មីន​ប្រឆាំង​រថក្រោះ​នេះ​ត្រូវ​បាន​គេ​កប់​ក្នុង​ដី​តាំង​ពី​​ទសវត្សរ៍​ឆ្នាំ​១៩៨០ និង​ឆ្នាំ​១៩៩០​មក​ម្លេះ ​នៅ​ពេល​ខ្មែរ​ក្រហម​​បាន​​ប្រយុទ្ធ​គ្នា​​ជាមួយ​កង​កម្លាំង​រដ្ឋាភិបាល​​នៅ​តំបន់​នោះ​។

លោក​ ហេង​​ រតនា បាន​មាន​ប្រសាសន៍​កាលពី​ម្សិលមិញ​ថា “តំបន់​នេះ​  ដែល​មាន​ផ្លូវ​តូច​ គឺ​មាន​​ចម្ងាយ​ប្រហែល​៣០គីឡូម៉ែត្រ​ពី​ផ្លូវ​ជាតិ​ ហេតុ​ដូច្នេះ​ហើយ​​ គេ​មិន​បាន​ដោះ​​មីននៅតំបន់នេះទេ​​”។ លោក​បាន​បន្ថែម​ថា មជ្ឈមណ្ឌលសកម្មភាព​​កម្ចាត់​មីន​កម្ពុជា​ និង​អង្គការ​ដោះមីន​ផ្សេង​ៗ​ទៀត​​បាន​កាត់​បន្ថយ​​ជំនួយ​​របស់​ខ្លួន​ជា​បន្ត​បន្ទាប់​​ ពីព្រោះ​ម្ចាស់​ជំនួយ​​ឥឡូវ​នេះ​បាន​ផ្ដោត​​ទៅ​លើ​​តំបន់​​ដែល​កំពុង​កើត​មាន​ជម្លោះ​​​ ដូចជា​ ប្រទេស​លីប៊ី និង​ប្រទេស​​អ៊ីរ៉ាក់​​ច្រើន​ជាង​។ ហើយ​ដោយ​សារ​​តែ​ការ​​ផ្ដល់​ជំនួយ​នេះ​បាន​ធ្លាក់​ចុះ វា​​បាន​ធ្វើ​ឲ្យ​ក្រុម​ដោះ​មីន​​ចំនួន​ពីរ​ក្រុម​ ដែល​មាន​សមាជិក​​សរុប​ប្រហែល​១០០​នាក់​ នោះ​មាន​តែ​នៅ​ក្នុង​ខេត្ត​ចំនួន​​ពីរ​ប៉ុណ្ណោះ​ គឺ​ខេត្ត​ព្រះ​វិហារ​ និង​ខេត្ត​កំពង់ធំ​។

លោ​ក ហេង​ រតនា បាន​ថ្លែង​ថា “យើង​​ដោះ​មីន​​នៅ​តំបន់​ជុំវិញ​ភូមិ​ដែល​មាន​មនុស្ស​រស់​នៅ​ជាមុន​​ ប៉ុន្តែ​គ្មាន​ធនធាន​ដើម្បី​ដោះ​មីន​​នៅ​តំបន់​ដាច់​ស្រយាល​នោ​ឡើយ​  ហើយ​​ធន​ធាន​សម្រាប់​ខេត្ត​ព្រះវិហារ​ក៏​មាន​កំណត់​ដែរ​”។ លោក​​បាន​បន្ថែម​​ថា ដីទំហំ​១.៩០០​គីឡូម៉ែត្រ​ក្រឡា​នៅ​ទូទាំង​ប្រទេស​​កម្ពុជា​ គឺ​នៅ​មាន​មីន​នៅ​ឡើយ​។ ចាប់​តាំង​ពី​ឆ្នាំ​១៩៩២​​មក​ មជ្ឈ​មណ្ឌល​សកម្ម​ភាព​កម្ចាត់​មីន​កម្ពុជា​​បាន​កម្ទេច​មីន​ និង​យុទ្ធ​ភណ្ឌ​មិន​ទាន់​ផ្ទុះ​​ ដែល​មាន​នៅ​លើ​ដី​ទំហំ​៥០០​គីឡូម៉ែត្រ​ក្រឡាបាន​ប្រហែល​៣,៥​លាន​គ្រាប់​”៕

ប្រែសម្រួលដោយ ស៊ា ស៊ុយឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស