29 C
Phnom Penh

តួលេខ​ជំរឿនពាក់​កណ្តាល​ទី​បង្ហាញថា អត្រា​កំណើន​ប្រជាជនខ្មែរ​ និង​នគរូបនីយកម្ម​កើន​ឡើង

ដោយ ឌឹ ខេមបូឌា ដេលី

បទវិភាគ

កាល​ពីម្សិលមិញ វិទ្យាស្ថាន​ជាតិ​ស្ថិតិ​នៃ​ក្រសួង​ផែនការ​បាន​ចេញ​ផ្សាយ​លទ្ធផល​​ជំរឿន​ប្រជាជន​ពាក់​កណ្តាល​ទី​ ដែល​បាន​បង្ហាញពីការ​បន្ត​កើន​ឡើង​នៃ​ចំនួន​ប្រជាជន​​ និង​នគ​​រូបណីយកម្ម​នៅ​ក្នុង​ប្រទេស​នេះ​​។

លទ្ធផល​ជំរឿន​ប្រជាជន​ពាក់​កណ្តាល​ទី​ចន្លោះ​ពី​ឆ្នាំ​២០០៨ ដល់​ឆ្នាំ​២០១៨​នេះ​ដក​ស្រង់​ចេញ​ពីការ​ស្ទង់មតិ​ពីប្រជាជន​ចំនួន​២៨.៦៥០គ្រួសារ​ដែល​បាន​បញ្ចប់​ចន្លោះ​ពី​ថ្ងៃ​ទី​៣ ខែមីនា  ដល់​ថ្ងៃ​ទី​៧​ ខែ​មីនា និង​បង្ហាញ​ពី​កំណើន​ ល្បាយ​ និង​ដង់​ស៊ី​តេ​ប្រជា​ជន​នៅ​ទូទាំង​២៤ខេត្ត​ក្រុង​។

លោក​ អាគីហ៊ីកូ  អ៊ី​តូ​ ដែល​ដឹកនាំ​ការ​ស្ទង់​មតិ​នេះ​ក្នុង​នាម​ជា​តំណាង​ទីភ្នាក់ងារ​សហ​ប្រតិបត្តិការ​អន្តរជាតិ​ជប៉ុន​ដែល​ធ្វើ​ការ​ជាមួយ​ក្រសួង​ផែនការ​ និង​មូលនិធិប្រជា​ជន​​អង្គការ​សហ​ប្រជាជាតិ(U.N. Population Fund)​ផង​ដែរ​នោះ​បា​នមាន​ប្រសាសន៍ថា “ដើម្បី​ទទួល​បាន​ទិន្ន​ន័យ​ប្រជាជន ​យើង​ត្រូវ​ការ​ជំរឿន​ដែល​ត្រូវ​ចំណាយ​លុយ​ច្រើន​”។ លោក​​បាន​បន្ថែ​ម​ថា ក្នុង​ប្រទេស​កំពុ​ង​អភិវឌ្ឍន៍​ ​ពេល​វេលា​នៅចន្លោះ​ការធ្វើ​​ជំរឿន​អាច​ជា​បញ្ហា​សម្រាប់​អ្នក​ធ្វើ​​​គោល​នយោ​បាយ​​ដែល​ពឹង​ផ្អែក​លើ​ទិន្នន័យ​បែបនេះ។

លោក​ អាគីហ៊ីកូ អ៊ីតូ បាន​ឲ្យ​ដឹង​ថា “ជា​ធម្មតា​គេធ្វើ​ជំរឿន​រៀង​រាល់​១០ឆ្នាំម្តង​។ ប៉ុន្តែ យើង​ត្រូវ​ការ​ការស្ទង់​មតិខ្លះៗ​នៅ​ចន្លោះ​​ពេល​នោះ​ដើម្បីធ្វើ​ការប៉ាន់​ប្រមាណ​”។ លោក​ អាគីហ៊ីកូ អ៊ីតូ បាន​បន្ថែមទៀត​​ថា លទ្ធ​ផល​នៃ​ការ​ស្ទង់​មតិនេះ គឺ​ជាតួលេខ​មិន​ទាន់​ច្បាស់​ និង​មិន​ទាន់​បាន​វិភាគ​ឲ្យ​បាន​ត្រឹម​ត្រូវ​ ប៉ុន្តែ លោក​បាន​មាន​ប្រសាសន៍ថា មាន​តួលេខ​មួយ​ចំនួន​នៅ​ក្នុង​ការ​ស្ទង់​មតិនេះ​ដែល​ល្អ។

លោក អាគីហ៊ីកូ អ៊ីតូ បាន​មាន​ប្រសាសន៍​ថា “ទំហំ​គ្រួសារ​កំពុង​ថយ​ចុះ​​ ហើយ​អត្រា​កំណើន​​ប្រជាជន​ឥឡូវ​នេះ​កំពុង​ថយចុះ ដែល​ជា​បាតុភូត​ធម្មជាតិ​សម្រាប់​ប្រទេស​កំពុង​អភិ​វឌ្ឍន៍”។ តាម​ការស្ទង់​មតិនេះ​បង្ហាញថា  ប្រជា​ជន​កម្ពុជា​បាន​កើ​នឡើង​ ៩,៥​ភាគ​រយ​ដល់​  ចំនួន​១៤.៦៧៦.៥៩១នាក់​ពីប្រហែល​​១៣.៣៩៥.៦៨២​នាក់​​នៅក្នុងជំរឿន​ឆ្នាំ​២០០៨​ ជា​ការ​កើន​ឡើង​៤៨​,៧ភាគ​រយ​នៃ​ប្រជាជន​ទាំង​អស់​​ប្រមាណ​៩.៨៧០.០០០​នាក់​នៅ​ក្នុងការ​ធ្វើ​ជំរឿន​សេដ្ឋកិច្ច​សង្គម ពី​ឆ្នាំ​១៩៩៣​ដល់​ឆ្នាំ​១៩៩៤​ដែល​ត្រូវ​ បាន​ចេញ​ផ្សាយ​ បន្ទាប់​ពីការ​ដក​កងកម្លាំង​របស់​អ៊ុន​តាក់​។

កំណើន​ប្រជាជនពីឆ្នាំ​២០០៨ ដល់​ឆ្នាំ​២០១៣​មាន​ការ​យឺត​យ៉ាវ ហើយ​ការ​ស្ទង់​មតិ​ប៉ាន់​ប្រមាណថា កំណើន​ប្រជាជន​ប្រចាំឆ្នាំ ១,៤៦​ភាគរយ​ក្នុង​រយៈពេល​ប្រាំ​ឆ្នាំ​ បើ​ប្រៀបធៀប​ទៅនឹង​ការ​ធ្វើ​ជំរឿន​ចន្លោះ​ពីឆ្នាំ​១៩៩៨ ដល់​ឆ្នាំ​២០០៨​។

វា​ក៏​បង្ហាញ​ពីការ​ធ្លាក់​ចុះ​​នៃ​លទ្ធ​ភាព    ​​បង្ក​កំណើត​​ផងដែរ​។ នៅឆ្នាំ​១៩៩៨​ប្រជា​ជន​៤៣ភាគរយ​មាន​អាយុ​ចន្លោះពី​០ឆ្មាំ​ដល់​១៤​ឆ្នាំ​ ដែល​ឥឡូវ​នេះ​បាន​ធ្លាក់​ចុះ​មក​ដល់​៣៤​ភាគ​រយ​ ចំណែក​ឯ​មនុស្ស​គ្រប់​អាយុ​ធ្វើ​ការ​នៅ​ក្នុង​ប្រទេស​នេះ​ គឺ​អ្នក​ដែល​មាន​អាយុ​ចន្លោះ​១៥ឆ្នាំ​ ដល់​៦៤ឆ្នាំ​បាន​កើន​ឡើង​ពី​៥៤​​ភាគ​រយ​ដល់​៦២ភាគរយ​នៅ​  ក្នុង​រយៈ​ពេល​១៥​ឆ្នាំ​ដូចគ្នា​។

ប្រជាជន​កម្ពុជា​នៅ​តាម​តំបន់​ក្រុង​បាន​កើន​ឡើង​ពី​២.៦១៤.០២៧នាក់នៅ​ក្នុង​    ឆ្នាំ​២០០៨​ដល់​៣.១៤៦.២១២នាក់​ គឺកើន​ឡើង​ពី​១៩,៥ភាគរយ​ដល់​២១,៤ភាគ​រយ​នៃ​ប្រជាជន​ទាំង​អស់​។ ចំណែក​ឯ​នគរូបណីយកម្ម​វិញ​ ខេត្ត​កំពង់​ចាម​ គឺជាខេត្ត​មួយ​ដែល​មាន​ប្រជាជន​​ច្រើន​ជាងគេ​បំផុត​ជាយូរ​មក​ហើយ​​ចំនួន​១១,៩៧​ភាគរយ​នៃ​ប្រជាជន​ទូទាំង​ប្រទេស​ និង​រាជធានី​ភ្នំពេញ​មាន​ចំនួន​ប្រជាជន​ច្រើន​ជាង​គេ​ទី២​ចំនួន​១១,៥​ភាគ​រយ​នៃ​ប្រជា  ជន​ទាំ​ងអស់​។

នៅក្នុង​រាជធានី​ភ្នំពេញ​ចំនួន​ប្រជា​ជន​​​បាន​​កើនឡើង​ ១២,៤​ភាគរយ​ចន្លោះ​ ពី​  ឆ្នាំ​២០០៨​ដល់​ឆ្នាំ​២០១៣  គឺបាន​​​កើន​ ឡើង​ពីចំនួន​​​១.៥០១.៧២៥​នាក់​ដល់​ចំនួន​​១.៦៨៨.០៤៤​នាក់​។ ខេត្ត​ព្រះវិហារ​ដែល​មាន​ប្រជាជនចំនួន​១៧១.១៣៩​នាក់​នៅឆ្នាំ​២០០៨​បាន​​កើន​ឡើង​៣៧,៥​ភាគរយ​ដល់​២៣៥.៣៧០​នាក់​នៅឆ្នាំ​នេះ​។ ប្រជាពល​រដ្ឋ​នៅខេត្ត​ព្រៃ​វែង​បាន​កើន​ឡើង​២២,១​ភាគរយ​ពី​៩៤៧.៣៧២​ នាក់​ដល់​១.១៥៦.៧៣៩​នាក់​។ ខេត្ត​ទាំង​អស់សុទ្ធ​តែ​​មាន​កំណើន​ប្រជា​ជន ​លើក​លែង​តែ​ខេត្ត​ប៉ៃលិន​ ដែល​មាន​ចំនួន​ប្រជា​ជនធ្លាក់ចុះ​៦,៧ភាគរយ​ពី​៧០.៤៨៦នាក់​នៅ​ឆ្នាំ​២០០៨​មក​ត្រឹម​  ចំនួន​៦៥.៧៩៥នាក់​។

លោក​ អ៊ីតូ បាន​មាន​ប្រសាសន៍ថា វគ្គ​បណ្តុះ​បណ្តាល​ដល់​ប្រជាជន​​កម្ពុជា​ដែល​បាន​ជួយ​ប្រមូល​ទិន្នន័យ​នេះ​អាច​ជួយ​រដ្ឋាភិ​​បាល​ធ្វើ​ជំរឿន​បែប​នេះ​ដោយ​ខ្លួន​ឯងបាន​នៅ​ពេល​អនាគត​។ លោក​បាន​មាន​ប្រសាសន៍ថា “នៅ​ពេល​នេះ​រដ្ឋាភិបាល​កម្ពុជា​មិន​អាច​ធ្វើ​ការងារ​បែប​នេះបាន​ទេ​។ ខ្ញុំ​សង្ឃឹម​ថា នៅពេល​អនាគត​រដ្ឋាភិបាល​កម្ពុជា​អាច​ធ្វើ​ការ​ងារ ​នេះ​ដោយ​ខ្លួន​ឯង​បាន​”៕

ប្រែសម្រួល​ដោយ មូល គឹមហឿន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស