29 C
Phnom Penh

កម្មករ​រោង​ចក្រនាំគ្នា​បោះ​បង់​ការ​ងារ​ដោយសារ​​ភ័យ​ខ្លាច​​ស្ថាន​ភាព​ចលា​ចល​

ដោយ ឌឹ ខេមបូឌា ដេលី

បទវិភាគ

រោង​ចក្រ​កាត់​ដេរ​នានានៅ​​​​ក្នុង​រាជ​ធានី​ភ្នំពេញ​កំពុង​​ដំណើរ​ការ​​ដោ​យ​ខ្វះ​កម្លាំ​ង​កម្មករ​យ៉ាង​​ច្រើន នៅ​ពេល​កម្មករលើក​​​គ្នា​​​​វិល​ត្រឡប់​​ទៅ​ស្រុក​កំណើត​នៅ​តាម​ខេត្ត​​ ដោយ​​​​សារ​រដ្ឋាភិបាល​ចេញ​សេចក្ដី​​សម្រេច​បង្កើន​វិធាន​​​ការ​ការ​ពារ​សន្ដិសុខ​ បន្ទាប់​ពី​បក្ស​ប្រឆាំង​បាន​ព្រមាន​ថា ពួក​គេ​គ្រោង​ធ្វើ​មហា​បាតុកម្ម​ជំទាស់​នឹង​លទ្ធ​ផល​​បោះ​ឆ្នោត​​​។

លោក កែន លូ អគ្គលេខា​ធិការ​សមាគម​រោង​ចក្រ​កាត់​ដេរ​នៅ​កម្ពុជា​ ​មាន​ប្រសា​សន៍​ថា ស្ថាន​ភាព​នា​ពេល​បច្ចុប្បន្ន​ដែល​​​កម្មករ​មក​ពី​រោង​ចក្រ​នានា​លើ​ក​គ្នា​ឈប់​​ពី​ការ​ងារ​ទៅ​ស្រុក​កំណើត​បែប​នេះ​អាច​ “ធ្វើ​ឲ្យ​ប៉ះ​​​ពាល់​ខ្លាំង” ​ដល់​ឧស្សាហកម្ម​កាត់​ដេរ​។

លោក​បាន​មាន​ប្រសាសន៍​ថា “ ជាក់​ស្ដែង​​កត្តានេះ​ មាន​សក្ដានុពល​ធ្វើ​ឲ្យ​ប៉ះ​​​ពាល់​ខ្លាំង​ដល់​ឧស្សាហកម្មកាត់​ដេរ ប៉ុន្តែ​រដ្ឋាភិបាល​ និង​សហជីព​កំពុង​ធ្វើ​អ្វីៗ​ដែល​ខ្លួន​អាច​ធ្វើ​បាន​​ដើម្បី​ធ្វើ​ឲ្យ​កម្មករ​រក្សា​ភាព​ស្ងាត់​ស្ងៀម​ និង​ធានា​អះអាង​ចំពោះ​ពួក​គាត់​ថា ពួក​គាត់​មាន​សុវត្ថិភាព​។ ប៉ុន្តែ នៅ​ទីបំផុត​មាន​តែ​កម្មករ​ទេ​ដែល​អាច​សម្រេច​ចិត្ត​បាន​ថា ខ្លួន​ត្រូវ​ធ្វើ​យ៉ាង​ណា”។

កាល​ពី​ម្សិលមិញ​បណ្ដា​រោង​ចក្រ​ និង​សហ​ជីព​​របស់​កម្មករ​កាត់​ដេរ​ បាន​លើក​ឡើង​ថា នៅ​ក្នុង​ករណី​មួយ​ចំនួន​ កម្មករ​ជិត​៨០​ភាគ​រយ​បាន​ឈប់​ពី​ការ​ងារ​របស់​ខ្លួន​វិល​ត្រឡប់​ទៅ​ស្រុក​កំណើត​នៅ​តាម​ខេត្ត​វិញ​ ដោយ​ភាគ​ច្រើន​​ស្ដាប់​តាម​ការព្រមាន​​​របស់​គ្រួសារ​ខ្លួន​អំពី​ស្ថាន​ភាព​ចលាចល​ក្នុង​សង្គម​ ប្រសិន​បើ​គណបក្ស​សង្គ្រោះ​ជាតិ​​ដែល​ជា​គណបក្ស​ប្រឆាំង ​សម្រេច​ចិត្ត​ធ្វើ​មហា​បាតុ​កម្ម​​ជំទាស់​នឹង​លទ្ធផល​នៃ​ការ​បោះ​ឆ្នោត​កាល​ពី​ខែ​មុន​។ ពេល​នេះ ក្រុមហ៊ុន​កាត់​ដេរ​ក្បាល​កោះ​ខូអិល​ធីឌី​ ក្នុង​ខណ្ឌ​មាន​ជ័យ​​​កំពុង​ដំណើរ​ការ​ដោយ​មាន​កម្មករធ្វើ​ការ​​តិច​តួច​ប៉ុណ្ណោះ​​​។

លោក ឃិត វ៉ាន ប្រធាន​រដ្ឋបាល​ក្រុមហ៊ុន​កាត់​ដេរ​នេះ​ បាន​​មាន​​​ប្រសាសន៍​ថា “ចំនួន​កម្មករ​​​ជា​ធម្មតា​របស់​យើង​ គឺ​៩០០​នាក់ ហើយ​បច្ចុប្បន្ន​យើង​កំពុង​​ដំណើរ​ការ​ដោយ​មាន​កម្មករ​ធ្វើ​ការ​តែ​២០០​នាក់​ប៉ុណ្ណោះ​។ អំឡុង​ពេល​បោះឆ្នោត​ យើង​គ្មាន​ការ​ងារ​ធ្វើ​ច្រើន​ទេ​ ដូច្នេះ​យើង​ក៏​បាន​អនុញ្ញាត​ឲ្យ​កម្មករ​​​​មួយ​ចំនួន​របស់​យើង​ឈប់​សម្រាក ប៉ុន្តែ​កម្មករ​ជា​ច្រើន​បាន​ទៅ​ស្រុកកំណើត​​កាល​ពី​ពីរបី​ថ្ងៃ​មុន​ ពីព្រោះ​ពួក​គាត់​ភ័យ​ខ្លាច​បាតុកម្ម​ផ្ទុះ​អំពើ​ហិង្សា”។

លោក​​​ស្រី មាស វណ្ណី មន្ត្រី​​​ផ្នែក​​​ច្បាប់​​​នៅ​​​សម្ព័ន្ធ​​​សហ​​​ជីព​​​ប្រជា​​​ធិបតេយ្យ​​​កម្មកាត់​​​ដេរ​​​កម្ពុជា (ស៊ីខៅឌូ) ជា​​​ស្ថាប័ន​​​សហ​​​ជីព​​​ឯករាជ្យ​​​តែ​​​មួយ​​​គត់​​​ក្នុង​​​ប្រទេស​​​កម្ពុជា​​​ បាន​​​អះអាង​​​ថា កម្មករ​​​កាត់​​​ដេរ​​​​​កំពុង​​​នាំ​​​គ្នា​​​សម្រុក​​​ទៅ​​​ស្រុក​​​​​​កំណើត​​​របស់​​​ខ្លួន​​​នៅ​​​តាម​​​ខេត្ត​​​ ដោយ​​​សារ​​​តែ​​​​​​គិត​​​ថា  បាតុកម្ម​​​ដឹក​​​នាំ​​​ដោយ​​​គណបក្ស​​​ប្រឆាំង​​​ នឹង​​​ធ្វើ​​​ឲ្យ​​​មាន​​​ចលាចល​​​ក្នុង​​​សង្គម​​​។

លោក​​​ស្រី​​​បាន​​​មាន​​​ប្រសាសន៍​​​ថា  “ខ្ញុំ​​​ទទួល​​​​​​បាន​​​​​​ព័ត៌មាន​​​ពី​​​តំណាង​​​របស់​​​យើង​​​នៅ​​​ក្នុង​​​រោង​​​ចក្រ​​​នីមួយ​​​ៗ ហើយ​​​ពួក​​​គេ​​​បាន​​​ប្រាប់​​​យើង​​​ថា ក្នុង​​​មួយ​​​ថ្ងៃ​​​ៗ​​​ មាន​​​កម្មករ​​​ យ៉ាង​​​ហោច​​​​​​​​​ណាស់​​​២០​​​នាក់​​​សុំ​​​ច្បាប់​​​ឈប់​​​សម្រាក​​​​​​មួយ​​​សប្ដាហ៍​​​​​​ដោយ​​​សារ​​​តែឪពុក​​​ម្ដាយ​​​អង្វរករ​​​កូន​​​ប្រុស​​​កូន​​​ស្រី​​​របស់​​​ពួក​​​គាត់​​​ឲ្យ​​​ត្រឡប់​​​ទៅ​​​ស្រុក​​​​​​កំណើត​​​វិញ​​​”។

តំណាង​​​របស់​​​ស៊ីខៅឌូ​​​ឈ្មោះ កែវ ចិន្តា ប្រចាំ​​​នៅ​​​រោង​​​ចក្រ​​​កាត់​​​ដេរ​​​ ថប់​​​ វើល ដែល​​​បាន​​​បាក់​​​រលំ​​​ដោយ​​​អន្លើ​​​កាល​​​ពី​​​ខែ​​​ឧសភា បណ្ដាល​​​ឲ្យ​​​កម្ម​​​ករ​​​ចំនួន​​​២៣​​​នាក់​​​រង​​​របួស​​​នោះ បាន​​​លើក​​​ឡើង​​​កាល​​​ពី​​​ម្សិលមិញ​​​ថា បច្ចុប្បន្ន​​​​​​រោង​​​ចក្រ​​​នេះនៅ​​​សល់​​​កម្មករតែ​​​​​​១៥០​​​នាក់​​​ប៉ុណ្ណោះ​​​ក្នុង​​​ចំណោម​​​កម្មករ​​​ចំនួន​​​៨៥០​​​នាក់​​​ដែល​​​មាន​​​នៅ​​​មុន​​​ការ​​​បោះ​​​ឆ្នោត​​​ ប៉ុន្តែ កម្ម​​​ករ​​​មួយ​​​ចំនួន​​​ត្រូវ​​​បាន​​​អនុញ្ញាត​​​ឲ្យ​​​ឈប់​​​សម្រាក​​​ពី​​​រោង​​​ចក្រ​​​ដែល​​​ស្ថិត​​​នៅ​​​ក្នុង​​​សង្កាត់​​​ក្បាល​​​កោះ​​​នេះ​​​ដោយ​​​សារ​​​តែ​​​ការ​​​បញ្ជា​​​​​​​​​ទិញ​​​ធ្លាក់​​​ចុះ​​​។

លោក ញឹម ប៊ុនរិទ្ធ នាយក​​​គ្រប់​​​គ្រង​​​ទូទៅ​​​នៅ​​​ក្រុមហ៊ុន​​​កាត់​​​ដេរ​​​អប្សរា​​​ ខូអិលធីឌី ក្នុង​​​សង្កាត់​​​ចោម​​​ចៅ​​​ ខណ្ឌ​​​ពោធិ៍​​​សែន​​​ជ័យ​​​ បាន​​​មាន​​​ប្រសាសន៍​​​ថា រោង​​​ចក្រ​​​របស់​​​លោក​​​ជួល​​​កម្មករ​​​ជាង​​​១.០០០​​​នាក់​​​ ក៏ប៉ុន្តែ ​​​កម្ម​​​ករ​​​ប្រហែល​​​៤០​​​ភាគរយ​​​បាន​​​វិល​​​ត្រឡប់​​​ទៅ​​​ស្រុក​​​កំណើត​​​នៅ​​​ក្នុង​​​រយៈ​​​ពេល​​​បីឬបួន​​​ថ្ងៃ​​​ចុងក្រោយ​​​នេះ។​​​​​​

លោក​​​បា​​ន​​មាន​​​ប្រសាសន៍​​​ថា  “វា​​​កំពុង​​​ធ្វើ​​​ឲ្យ​​​ប៉ះពាល់​​​​​​ដល់​​​ការ​​​រក​​​ស៊ី​​​របស់​​​ខ្ញុំ​​​យ៉ាង​​​ខ្លាំង​​​ ពី​​​ព្រោះ​​​ខ្ញុំ​​​មាន​​​កិច្ច​​​សន្យា​​​ជាមួយ​​​អ្នក​​​បញ្ជា​​​ទិញ​​​ ប៉ុន្តែ ទោះ​​​បី​​​ជា​​​ខ្ញុំ​​​មិន​​​អាច​​​បំពេញ​​​តាម​​​ចំនួន​​​កំណត់​​​របស់​​​ពួក​​​គេ​​​បាន​​​ក៏ដោយ ក៏​​​ក្នុង​​​មួយ​​​ថ្ងៃ​​​ខ្ញុំ​​​នៅ​​​តែ​​​ត្រូវ​​​ចំណាយ​​​៥.០០០​​​ដុល្លារ​​​​​​ដដែល​​​សម្រាប់​​​ការ​​​ចំណាយ​​​ក្នុង​​​រោង​​​ចក្រ​​​”។ លោក​​​បានមាន​​​ប្រសាសន៍​​​ទៀត​​​ថា កម្មករ​​​​​​ស្ដាប់​​​តាម​​​ឪពុក​​​​​​ម្ដាយ​​​របស់​​​ខ្លួន​​​​​​ដែល​​​ចង​​​ចាំ​​​យ៉ាង​​​ច្បាស់​​​នូវ​​​​​​ព្រឹត្តិការ​​​ណ៍​​​ផ្ទុះ​​​អំពើ​​​ហិង្សា​​​ក្នុង​​​រាជ​​​ធានី​​​ភ្នំពេញ​​​ក្រោយ​​​ការ​​​បោះ​​​ឆ្នោត​​​ឆ្នាំ​​​១៩៩៨​​​ និង​​​​​​សង្គ្រាម​​​ស៊ីវិល​​​​​​រាប់​​​ទសវត្សរ៍​​​នៅ​​​មុន​​​នោះ​​​។

ដោយ​​​សម្លៀក​​​បំពាក់​​​មាន​​​ចំនួនស្មើនឹង​​​៨០​​​ភាគរយ​​​នៃ​​​ការ​​​នាំ​​​ចេញ​​​សរុប​​​ វិស័យ​​​នេះ​កំពុង​​​ប្រឈម​​​នឹង​​​កង្វះ​​​កម្មករ​​​រួច​​​ទៅ​​​ហើយ​​​ សូម្បី​​​នៅ​​​ពេល​​​កម្មករ​​​ទាំង​​​អស់​​​ក្នុង​​​ឧស្សាហ​​​កម្ម​​​កាត់​​​ដេរ​​​​​​មាន​​​វត្ត​​​មាន​​​ក៏ដោយ​​​។ គ្រាន់​​​តែ​​​នៅ​​​ក្នុង​​​ឆមាស​​​ដំបូង​​​នៃ​​​ឆ្នាំ​​​នេះ​​​ ការ​​​នាំ​​​ចេញ​​​សម្លៀក​​​បំពាក់ និង​​​វាយនភ័ណ្ឌ​​​​​​មាន​​​ទំហំ​​​ទឹក​​​ប្រាក់​​​១,៥៥៨​​​ពាន់​​​លាន​​​ដុល្លារ​​​ ពោ​​​ល​​​គឺ​​​កើន​​​ឡើង​​​៣២​​​ភាគ​​​រយ​​​បើ​​​ធៀប​​​នឹង​​​រយៈ​​​ពេល​​​ដូច​​​គ្នា​​នេះ​​​កាល​​​ពី​​​ឆ្នាំ​​​មុន​​​។

កាល​​​ពី​​​សប្ដាហ៍​​​មុន​​​ លោក អ៊ិត សំហេង រដ្ឋ​​​មន្ត្រី​​​ក្រសួង​​​សង្គម​​​កិច្ច​​​ បាន​​​ចេញ​​​សេចក្ដី​​​ថ្លែង​​​ការ​​​ណ៍​​​មួយ​​​អំពាវ​​​នាវ​​​ដល់​​​កម្មករ​​​និយោ​​​ជិត​​​ សហជីព​​​ និង​​​និយោជក​​​កុំ​​​ឲ្យ​​​ចាប់​​​អារម្មណ៍​​​នឹង​​​ពាក្យ​​​ចចាមអារ៉ាម​​​ដែល​​​ថា បាតុកម្ម​​​របស់​​​គណបក្ស​​​ប្រឆាំង​​​នឹង​​​ធ្វើ​​​ឲ្យ​​​មាន​​​ស្ថាន​​​ភាព​​​ចលាចល​​​តាម​​​ផ្លូវ​​​នា​​​នា​​​ក្នុង​​​រាជ​​​ធានី​​​ភ្នំពេញ ហើយ​​​បាន​​​សុំ​​​ឲ្យ​​​ផលិត​​​កម្ម​​​នៅ​​​តាម​​​រោង​​​ចក្រ​​​បន្ត​​​ដូច​​​ធម្មតា។ លោក​​​ថ្លែងថា “សូម​​​កុំ​​​ជឿ​​​ពាក្យ​​​​​​ចចាម​​​អារ៉ាម​​​​​​ ហើយ​​​ផ្សព្វ​​​ផ្សាយ​​​វា​​​បន្ត​​​អី​​​”។

លោក​​​ស្រី​​​ ជីល ថាក់ឃើ (Jill Tucker) ទីប្រឹក្សា​​​ជាន់​​​ខ្ពស់​​​ផ្នែក​​​បច្ចេកទេស​​​សម្រាប់​​​កម្មវិធី​​​រោង​​​ចក្រ​​​ល្អ​​​ប្រសើរ​​​នៅ​​​កម្ពុជា​​​ របស់​​​អង្គការ​​​ពលកម្ម​​​អន្តរជាតិ (អាយឡូ) ក៏​​​បាន​​​អះអាង​​​ដែរ​​​ថា កម្មករ​​​កំពុង​​​ឈប់​​​សម្រាក​​​ពី​​​រោងចក្រ​​​ដើម្បី​​​ត្រឡប់​​​ទៅ​​​ស្រុក​​​កំណើត​​​​​​វិញ​​​។

លោក​​​ស្រី​​​​​​​មាន​​​ប្រសាសន៍​​​ថា “សំណាក​​​តូច​​​មួយ​​​ដែល​​​បុគ្គលិក​​​របស់​​​យើង​​​​​​យក​​​ពី​​​រោងចក្រ​​​ចំនួន​​​ពីរ​​​នៅ​​​ថ្ងៃ​​​នេះ បាន​​​បង្ហាញ​​​ថា កម្មករ​​​ពី​​​៣០​​​ទៅ​​​៤០​​​ភាគរយ​​​បាន​​​មក​​​បើក​​​ប្រាក់​​​ខែ​​​ [ នៅ​​​សប្ដាហ៍​​​នេះ] ហើយ​​​មិន​​​បាន​​​ត្រឡប់​​​ទៅ​​​ធ្វើ​​​ការ​​​វិញ​​​ទេ”។ លោក​​​ស្រី​​​បាន​​​មាន​​​ប្រសាសន៍​​​ទៀត​​​ថា ដោយ​​​សារ​​​តែ​​​​​​នៅ​​​តាម​​​រោង​​​ចក្រ​​​ភាគ​​​ច្រើន​​​ខ្វះ​​​កម្មករ​​​ស្រាប់​​​ទៅ​​​ហើយ​​​នោះ ស្ថាន​​​ភាព​​​នេះ​​​គឺ​​​ជា​​​បញ្ហា​​​ដ៏ធ្ងន់​​​សម្រាប់​​​ឧស្សាហកម្ម​​​កាត់​​​ដេរ​​​ដែរ​​​។

លោក ម៉ៅ ថូរ៉ា រដ្ឋ​​​លេខាធិការ​​​ក្រសួង​​​ពាណិជ្ជកម្ម​​​ បាន​​​សម្ដែង​​​ការ​​​ព្រួយ​​​បារម្ភ​​​កាល​​​ពី​​​ម្សិលមិញ​​​អំពី​​​និន្នាការដែល​​​​​​កម្មករលើក​​​គ្នា​​​​​​ឈប់​​​ពី​​​រោង​​​ចក្រ​​​នានា​​​ក្នុង​​​រាជ​​​ធានី​​​ភ្នំពេញ​​​។ លោក​​​បាន​​​មាន​​​ប្រសាសន៍ថា “ប្រសិន​​​បើ​​​កម្មករ​​​វិល​​​ត្រឡប់​​​ទៅ​​​ស្រុក​​​វិញ​​​ រោង​​​ចក្រ​​​នានា​​​នឹង​​​ប្រឈម​​​ការ​​​បិទ​​​ទ្វារ​​​ ដោយ​​​សារ​​​តែ​​​ពួក​​​គេ​​​មិន​​​អាច​​​បំពេញបាន​​​​​​តាម​​​កិច្ច​​​សន្យា​​​ហើយ​​​ប្រសិន​​​បើ​​​ក្រុមហ៊ុន​​​នានា​​​គ្មាន​​​ទំនិញ​​​នាំ​​​ចេញ​​​ទេនោះ ពេល​​​នោះ​​​ក្រសួង​​​ពាណិជ្ជ​​​កម្ម​​​​​​នឹង​​​បាត់​​​បង់​​​ចំណូល​​​។ ដូច្នេះ​​​យើង​​​នឹង​​​ធ្វើ​​​អ្វី​​​ៗ​​​គ្រប់​​​យ៉ាង​​​ដែល​​​យើង​​​អាច​​​ធ្វើ​​​បាន ​​​ដើម្បី​​​ធ្វើ​​​ឲ្យ​​​​​​ប្រជា​​​ពល​​​រដ្ឋ​​​ជឿ​​​ទុក​​​ចិត្ត​​​ថា រដ្ឋាភិបាល​​​គ្រាន់​​​តែ​​​ព្យាយាម​​​ការ​​​ពារ​​​សន្ដិសុខ​​​របស់​​​ប្រជា​​​​​​ពល​​​រដ្ឋ​​​ប៉ុណ្ណោះ​​​ នេះ​​​គឺជា​​​ចំណុច​​​​​​​​​ដ៏​​​សំខាន់​​​​​​មួយ​​​ដែល​​​អ្នក​​​គ្រប់​​​គ្នា​​​ត្រូវ​​​ដឹង​​​”។

ក្រោយ​​​ព​​​ីការ​​​បោះ​​​ឆ្នោត​​​ជាតិ រដ្ឋាភិបាល​​​បាន​​ចល័ត​​​ទាហាន​​​រាប់​​​រយ​​​នាក់​​​នៅ​​​ក្បែរ​​​​​​រាជ​​​ធានី​​​​​​ភ្នំពេញ​​​ ហើយគេ​​​​​​​​​ប្រទះ​​​ឃើញ​​​​​​រថ​​​ក្រោះ​​​ និង​​​រថ​​​ពាស​​​ដែក​​​​​កំពុង​​​ធ្វើ​​​ដំណើរ​​​ឆ្ពោះ​​​មកកាន់​​​​​​រាជ​​​ធានី​​​ភ្នំពេញ។ មន្ត្រី​​​បាន​​​​​​លើក​​​ឡើង​​​ថា ទាហាន​​​ រថក្រោះ និង​​​រថពាស​​​ដែក​​​ទាំង​​​នោះ​​​ ​​​នឹង​​​ត្រូវ​​​ប្រើ​​​ប្រាស់​​​ដើម្បី​​​ទប់​​​ស្កាត់​​​ស្ថាន​​​ភាព​​​ចលាចល​​​ ប្រសិន​​​បើ​​​គណបក្ស​​​ប្រឆាំង​​​សម្រេច​​​ធ្វើ​​​មហា​​​បាតុកម្ម​​​មែន​​​នោះ​​​។

យុវតី​​​ ស៊ី ស្រីណូ អាយុ​​​១៩​​​ឆ្នាំ​​​ដែល​​​ធ្វើ​​​ការ​​​នៅ​​​រោង​​​ចក្រ​​​កាត់​​​ដេរ​​​បាយ័ន​​​ ក្នុង​​​ខណ្ឌ​​​ឫស្សី​​​កែវ បាន​​​និយាយ​​​ថា នាង​​​បាន​​​វិល​​​ត្រឡប់​​​​​​ទៅ​​​ស្រុក​​​កំណើត​​​របស់​​​នាង​​​ នៅ​​​​​​ស្រុក​​​ដង​​​ទង់​​​ ខេត្ត​​​កំពត កា​​​ល​​​ពី​​​ថ្ងៃ​​​អង្គារ​​​ បន្ទាប់​​​ពី​​​បើក​​​ប្រាក់​​​​​​ខែ​​​រួច​​​នៅ​​​មួយ​​​ថ្ងៃ​​​មុន​​​នោះ​​​។ នាង​​​បាន​​​និយាយថា “ឪពុក​​​របស់​​​ខ្ញុំ​​​បាន​​​ទូរស័ព្ទ​​​មក​​​ខ្ញុំ​​​​​​ព្រមាន​​​អំពី​​​បាតុកម្ម​​​ ដូច្នេះ​​​ខ្ញុំ​​​ក៏​​​សម្រេច​​​ចិត្ត​​​ត្រឡប់​​​ទៅ​​​ស្រុក​​​វិញ​​​”៕

ប្រែ​​​សម្រួល​​​ដោយ​​ តែម សុខុម  ​​   

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស