29 C
Phnom Penh

គ.ជ.ប.​បញ្ឈប់​ការ​ស៊ើប​អង្កេត​​និង​ច្រាន​ចោលពាក្យ​​​​បណ្ដឹង​គណបក្សប្រឆាំង​

ដោយ ឌឹ ខេមបូឌា ដេលី

បទវិភាគ

គណៈកម្មាធិការ​ជាតិ​រៀប​ចំ​ការ​បោះ​ឆ្នោត​​​​ហៅ​កាត់​ ( គ .ជ .ប.) បានឲ្យដឹង​កាលពី​ម្សិល​មិញ​ថា ខ្លួន​ឈប់​ពាក់​ព័ន្ធ​ក្នុង​ការ​សម្រប​សម្រួល​​​​ជម្លោះ​រវាង​គណបក្ស​ប្រជាជន​កម្ពុជា​កំពុង​កាន់​អំណាច​ និង​គណបក្ស​សង្គ្រោះ​ជាតិ​ជា​គណបក្ស​ប្រឆាំង​ជុំ​វិញ​លទ្ធផល​នៃ​ការ​បោះ​ឆ្នោតជាតិ​​កាលពី​ខែមុន​ទៀត​ហើយ​។

សេចក្ដី​ប្រកាស​នេះ បាន​កើត​ឡើង​បន្ទាប់​​​​ពី​គណៈកម្មាធិការ​ជាតិ​រៀប​ចំ​ការ​បោះ​ឆ្នោត​ កាល​ពី​ចុង​សប្ដាហ៍​មុន​បាន​ច្រាន​ចោល​ពាក្យ​បណ្ដឹង​ចំនួន​១៧​ករណី​ពាក់​ព័ន្ធ​នឹងការ​​ចោទ​ប្រកាន់​ពីការ​លួច​បន្លំ​សន្លឹក​ឆ្នោត និង​ការ​​បន្លំ​​ពេល​បោះ​​ឆ្នោត​ដែល​គណបក្ស​សង្គ្រោះ​ជាតិ​បាន​ប្ដឹង​កាល​ពី​សប្ដាហ៍​មុន​​។

លោក អ៊ឹម សួស្តី ប្រធាន​គណៈកម្មាធិការ​ជាតិ​រៀប​ចំ​ការ​បោះ​ឆ្នោត​បាន​មាន​ប្រសាសន៍​​​​ថា ពាក្យ​បណ្ដឹង​ជុំ​វិញ​លទ្ធផល​នៃ​ការ​បោះ​ឆ្នោតជាតិ​​កាលពី​ថ្ងៃ​ទី​២៨ ខែ​កក្កដា​នោះ​ ឥឡូវ​​​​នេះ​គួរ​តែ​បញ្ជូន​ទៅ​កាន់​ក្រុម​ប្រឹក្សា​ធម្មនុញ្ញ​​កម្ពុជា​​​ជា​ស្ថាន​​​ប័ន​​ដែល​នឹង​​​ធ្វើ​សេច​​​ក្តី​​​សម្រេច​​ចុង​ក្រោយ​​ស្តី​ពី​ភាព​ស្រប​  ច្បាប់​នៃ​លទ្ធផល​បោះ​ឆ្នោត​របស់ ​គ.ជ.ប.​ដែល​​ផ្ដល់​ឲ្យ​គណបក្ស​ប្រជាជន​កម្ពុជា​នូវ​សំឡេង​ភាគ​​ច្រើន​ដាច់​ខាត​ក្នុង​សភា។

នៅ​ពេល​សួរ​ថា តើ គ.ជ.ប.អាច​ពិចារណា​​​​ពីកិច្ច​សហការ​ក្នុង​ការ​ស៊ើប​អង្កេត​ពី​​ភាព   ​មិន​ប្រក្រតី​នៃ​ការ​បោះ​ឆ្នោត​​បន្ថែម​ទៀត​​​ឬ​​​យ៉ាង​ណា​​​នោះ​ លោក អ៊ឹម សួស្តី បាន​មាន​ប្រសាសន៍​ថា “អ្វី​ៗ​ទាំង​អស់​គឺ​ផុត​ពី​ដៃ​របស់​ខ្ញុំ​ហើយ។​ឥឡូវ​នេះ​ វាជា​ការ​ទទួល​ខុស​ត្រូវ​របស់​ក្រុម​ប្រឹក្សា​ធម្មនុញ្ញ”។

យោង​តាម​លោក ហឿ រុង នាយក​ប្រតិបត្តិ​​​​នៃ​នាយក​ដ្ឋាន​សហ​ប្រតិបត្តិការ​នៃ​ គ.ជ.ប.​​ បាន​​​ឲ្យ​ដឹង​ថា គណៈកម្មាធិការ​ជាតិ​រៀប​ចំ​ការ​បោះ​ឆ្នោត​បាន​ច្រាន​ចោល​នូវ​រាល់​ពាក្យ​បណ្ដឹង​របស់​គណបក្ស​ប្រឆាំង​ទាំង​អស់​ដែល​បាន​ប្ដឹង​​កាលពី​ថ្ងៃ​ព្រហស្បតិ៍​ និង​ថ្ងៃសុក្រ ដោយ​សារ​ពាក្យ​បណ្ដឹង​ទាំង​នោះ​មិន​មាន​ភ័ស្តុតាង​គ្រប់​គ្រាន់​។

លោក ហឿ រុង បាន​​​មាន​ប្រសាសន៍​ថា “គ.ជ.ប. បាន​ច្រាន​ចោល​នូវ​ពាក្យ​បណ្ដឹង​របស់​​​​គណបក្ស​ប្រឆាំង​ទាំង​អស់​ដោយ​សារ​មិន​មាន​ភ័ស្តុតាង​បញ្ជាក់​ពី​ការ​ចោទ​ប្រកាន់​ណា​មួយ​របស់​ពួកគេ​ប្រឆាំង​នឹង​គ.ជ.ប.​​​ឡើយ​”។

គណបក្ស​សង្គ្រោះ​ជាតិ​​នៅ​តែ​លើក​ឡើង​​​​ថា​ គ.ជ.ប. បាន​សហការ​ជាមួយ​គណបក្ស​ប្រជាជន​កម្ពុជា​ក្នុង​ការ​រៀប​ចំ​ការ​​​លួច​បន្លំ​សន្លឹក​ឆ្នោត​អំឡុង​ពេល​បោះ​ឆ្នោត ​​និង​​​បាន​លុប​ឈ្មោះ​ប្រជាពលរដ្ឋ​គាំ​ទ្រ​​គណបក្ស​ប្រឆាំង​ចេញ​ពី​បញ្ជី​ឈ្មោះ​បោះ​ឆ្នោត​នៅ​មុន​ថ្ងៃ​បោះ​ឆ្នោត​។

លទ្ធផល​បឋម​ដែល​ចេញ​ដោយ​ គ.ជ.ប. បាន​គាំទ្រ​នូវ​ការ​អះអាង​របស់​គណបក្ស​ប្រជា​​​ជន​កម្ពុជា​ដែល​ថា ខ្លួន​ទទួល​បាន​៦៨​អាសនៈ ហើយ​គណបក្ស​សង្គ្រោះ​ជាតិ​ទទួល​បាន​៥៥អាសនៈ។ ប៉ុន្តែ​ ទោះ​ជា​យ៉ាង​ណា​គណបក្ស​សង្គ្រោះ​ជាតិ​បាន​អះ​អាង​ថា ខ្លួន​ជា​អ្នក​ទទួល​បាន​ជ័យ​ជម្នះ​ក្នុង​ការ​បោះ​ឆ្នោត​នេះ​ដោយ​ទទួល​បាន​៦៣អាសនៈ ហើយ​គណបក្ស​ប្រជាជន​ទទួល​បាន​៦០​អាសនៈ​ នេះ​​បើ​យោង​តាម​ទិន្នន័យ​​ប្រមូល​បាន​ដោយ​សមាជិក​គណបក្ស​បក្ស​របស់​ខ្លួន​នៅ​តាម​ការិយាល័យ​បោះ​ឆ្នោត។

ក្រុម​ប្រឹក្សា​ធម្មនុញ្ញ​កាលពី​ថ្ងៃសុក្រ បាន​ចេញ​សេច​ក្តី​ថ្លែង​ការណ៍​មួយ​ស្វាគមន៍​​រាល់​​ពាក្យ​បណ្ដឹង​ពី​បណ្តា​​​គណបក្ស​នយោបាយ​ទាំង​អស់​ ហើយ​លោក សុន ឆ័យ ប្រធាន​ក្រុម​តំណាង​រាស្ត្រ​គណបក្ស​សង្គ្រោះ​ជាតិ​មាន​ប្រសាសន៍​​​​កាល​ពី​ម្សិល​មិញ​ថា គណបក្ស​ប្រឆាំង​​​​​​​​​​បាន​ដាក់​ពាក្យ​បណ្ដឹង​​ទៅ​ក្រុម​ប្រឹក្សា​ធម្មនុញ្ញ ​រួច​​ហើយ​កាល​ពី​ថ្ងៃ​​​សៅរ៍​​​។

លោក អ៊ុត ឈន អ្នក​នាំ​ពាក្យ​ក្រុម​ប្រឹក្សា​ធម្មនុញ្ញ​បាន​បដិសេធ​មិន​ធ្វើ​សេចក្ដី​អត្ថា​​​ធិ​​​ប្បាយ​ទេ​កាលពី​ម្សិល​មិញ។​

គណបក្ស​សង្គ្រោះ​ជាតិ​បាន​ធ្វើ​សន្និសីទ​មួយ​កាល​ពី​ម្សិល​មិញ​​ដែល​នៅ​ក្នុង​នោះ ប្រធាន​គណបក្ស​នេះ​បាន​បង្ហាញ​ភ័ស្តុតាង​​អំពី​អ្វី​ដែល​ខ្លួន​បាន​ចោទ​ថា ជា​ការ​លួច​បន្លំ​​​ក្រោយ​ការ​បោះ​ឆ្នោត​ក្នុង​ការ​រាប់​សន្លឹក​ឆ្នោត​ដោយ ​គ.ជ.ប.​ ការ​លួច​បន្លំ​ក្នុង​ការ​ប្រើ​ប្រាស់​​ទម្រង់​ឯកសារ​មិន​ផ្លូវ​ការ​នៅ​ថ្ងៃ​បោះ​ឆ្នោត​ និង​ករណី​ជា​ច្រើន​ទៀត​ដែល​មាន​​អ្នក​បោះ​ឆ្នោត​ត្រូវ​បាន​ចុះ​ឈ្មោះ​នៅ​​ការិយា​​​ល័យ​​​​បោះ​ឆ្នោត​ជាច្រើន​កន្លែង​​។

ប្រធាន​គណបក្ស​សង្គ្រោះ​ជាតិ​ លោក សម​ រង្ស៊ី​ បាន​អំពាវ​នាវ​ឲ្យ​ គ.ជ.ប. ​ផ្ដល់​ទម្រង់​១១០២​​ច្បាប់​ដើម​ដែល​​ត្រូវ​​បាន​​ចុះ​ហត្ថ​​​លេខា​​​​ដោយ​តំណាង​គណបក្ស​នយោបាយ​ និង​អ្នក​សង្កេត​ការណ៍​ការ​​បោះ​ឆ្នោត​នៅ​តាម​ការិយាល័យ​បោះ​ឆ្នោត​នានា​​ ហើយ​បន្ទាប់​មក​បាន​ដាក់​ក្នុង​​កញ្ចប់​សុវត្ថិភាព​​ដើម្បី​ធ្វើការ​ប្រៀប​ធៀប​ជា​មួយ​ទម្រង់​១១០៨​ ដែល​ គ.ជ.ប.បាន​ប្រើ​ប្រាស់​​ក្នុង​ការ​​​គាំទ្រ​លទ្ធ​​​ផល​របស់​ខ្លួន​នោះ​។

លោក សម រង្ស៊ី បាន​មាន​ប្រសាសន៍​ថា   “យើង​កំពុង​ស្នើ​ឲ្យ​​​​ គ.ជ.ប. បើក​​ប្រ​អប់​​សុវត្ថិភាព “ក” ​​[ដែល​ទម្រង់​១១០២ត្រូវ​បាន​គេ​ទុក​ក្នុង​ប្រ​អប់​សុវត្ថិភាព​នេះ​]​ដូច្នេះ​​យើង​អាច​ពិនិត្យមើល​​ទម្រង់​​១១០៨​[ជា​ទម្រង់​មិន​ផ្លូវ​ការសម្រាប់​កត់​ត្រា​សន្លឹក​ឆ្នោត​នៅ​ពេល​រាប់​សន្លឹក​ឆ្នោត​នៅ​​តាម​ការិយា​​​ល័យ​​​​នីមួយៗ​]។ ប្រសិន​បើ​យើង​ផ្ទៀង​ផ្ទាត់​ទម្រង់​នេះ ហើយ​យើង​ពិត​ជា​រក​ឃើញ​នូវ​ការ​ពិត​មិន​ខាន​ ហើយ​យើង​អាច​ផ្ដល់​យុត្តិធម៌​ជូន​ដល់​ម្ចាស់​ឆ្នោត​បាន​”។

ប៉ុន្តែ លោក ហឿ រុង បាន​មាន​ប្រសាសន៍​នៅ​ឯ​គណៈកម្មាធិការ​ជាតិ​រៀប​ចំ​ការ​បោះ​ឆ្នោត​ថា​មិន​មាន​ភ័ស្តុតាង​​​គ្រប់​គ្រាន់​បញ្ជាក់​ពី​បទ​ល្មើស​​ ដើម្បី​ឲ្យ​ គ.ជ.ប. ​បើក​កញ្ចប់​សុវត្ថិភាព​ផ្ទៀង​ផ្ទាត់​ទម្រង់​១១០២​នោះ​ឡើយ។ លោក​ថ្លែង​បន្ត​ថា “ យើង​អាច​បើក​​ប្រអប់​​សុវត្ថិភាព​ “ក” ​បាន​ប្រសិន​បើ​មាន​ភ័ស្តុតាង​​ត្រឹម​ត្រូវ​​បញ្ជាក់​ពី​ករណី​ទាំង​នេះ​។ គេមិន​អាច​ធ្វើការ​បើក​​ប្រអប់​​សុវត្ថិភាព​ដោយ​គ្រាន់​តែ​ពួកគេ​ចង់​ផ្ទៀង​ផ្ទាត់​លទ្ធផល​នោះ​ឡើយ​”។

លោក គល់ បញ្ញា នាយក​ប្រតិបត្តិ​នៃ​គណៈ​​​កម្មាធិការ​សម្រាប់​ការ​បោះ​ឆ្នោត​ដោយ​សេរី​ និង​យុត្តិធម៌​នៅ​កម្ពុជា​បាន​មាន​ប្រសាសន៍​ថា ក្នុង​រយៈពេល​បី​សប្ដាហ៍​បន្ទាប់​ពី​ការ​បោះ​ឆ្នោត​ជាតិ​កន្លង​មក​ គ.ជ.ប. ប ច្ចុប្បន្ន​នេះ​បាន​បញ្ចប់​​ការ​ស៊ើប​អង្កេត​ពី​ភាព​មិន​ប្រក្រតី​ ហើយ​បាន​ដក​ខ្លួន​ចេញ​ពី​វិបត្តិ​​​នយោ​​​បាយ​ដោយ​មិន​មាន​កិច្ច​ប្រឹង​ប្រែង​បំពេញ​តួនាទី​របស់​ខ្លួន​ជា​អ្នក​សម្រប​សម្រួល​ជម្លោះ​ដែល​កើត​ចេញ​ពី​ការ​បោះ​ឆ្នោត​ទេ​។

លោក​មាន​ប្រសាសន៍​បន្ត​ថា “ពួកគេ​មិន​បាន​ប្រឹង​ប្រែង​ដើម្បី​ធ្វើ​ឲ្យ​អ្នក​បោះ​ឆ្នោត​ពេញ​ចិត្ត​​​ក្នុង​ការ​ដោះ​ស្រាយ​ករណី​ទាំង​នេះ​ទេ​។ពួកគេ​បាន​ព្យាយាម​ជំរុញ​​ឲ្យ​អ្វី​ៗគ្រប់​យ៉ាង​​បាន​លឿន​ទៅ​មុខ​ក្នុង​ការ​ដោះ​ស្រាយ​ជម្លោះ​នេះ​ឲ្យ​បាន​ឆាប់​តាម​ដែល​អាច​ធ្វើ​ទៅ​បាន និង​បាន​ផ្ដល់​អ្វី​ៗ​ទាំង​អស់​ទៅ​ឲ្យ​ក្រុម​ប្រឹក្សា​ធម្មនុញ្ញ​វិញ​” ដោយ​បន្ថែម​ថា ក្រុម​ប្រឹក្សា​ធម្មនុញ្ញ​​ច្បាស់​ជាគាំ​ទ្រ​​គណៈកម្មាធិការ​ជាតិ​រៀប​ចំ​ការ​បោះ​ឆ្នោត។

លោក​ថ្លែង​បន្ថែម​ថា “គ.ជ.ប. មិន​មាន​កិច្ច​ប្រឹង​ប្រែង​ និង​ស្ដាប់​គណបក្ស​នយោបាយ​ដែល​មាន​កង្វល់​អំពី​ភាព​ខុស​គ្នា​នៃ​លទ្ធផល​បោះ​ឆ្នោត​ ឬ​ភាព​មិន​ប្រក្រតី​ក្នុង​ការ​បោះ​ឆ្នោត​ឡើយ​”។ ដោយគណបក្ស​ប្រជាជន​កម្ពុជា​បញ្ជាក់​ថា គ.ជ.ប. ដឹក​នាំ​ការ​ស៊ើប​អង្កេត​ណា​មួយ​លើ​ភាព​មិន​ប្រក្រតី​ក្នុង​ការ​បោះ​ឆ្នោតនោះ​ ការ​ចរចា​រវាង​គណបក្ស​ប្រជាជន​ និង​គណ​​​បក្ស​ប្រឆាំង​​​​ជុំ​វិញ​ការ​បង្កើត​គណៈ​​​កម្មការ​រួម​មួយ​ដើម្បី​ពិនិត្យ​មើល​ពាក្យ​បណ្ដឹង​របស់​គណបក្ស​ប្រឆាំង​​​​នោះ​បាន​ទទួល​បរាជ័យ​។

លោក ជាម យៀប ​អ្នក​ដឹក​នាំ​ប្រតិភូ​របស់​គណបក្ស​ប្រជាជននៅ​​​​ក្នុង​ការ​ចរចា​ជាមួយ   ​គណ​​​បក្ស​សង្គ្រោះ​ជាតិ​បាន​មាន​ប្រសាសន៍​ថា លោក​នៅ​តែ​បើក​ចំហ​ក្នុង​ការ​ជជែក​គ្នា​ថែម​​​​ទៀត​ ប៉ុន្តែ ត្រូវ​ស្ថិត​នៅ​ក្រោម​អាជ្ញាធរ​នៃ​គណៈកម្មាធិការ​ជាតិ​រៀប​ចំ​ការ​បោះ​ឆ្នោត​។ លោក​បាន​ថ្លែង​​​ថា  គណបក្ស​អាច​ជួុប​​គ្នា​ពេល​ណា​ក៏​បាន​ ពេល​ថ្ងៃ ឬពេល​យប់​ ប៉ុន្តែ សូម​អនុញ្ញាត​ឲ្យ​ គ.ជ.ប. ដឹក​នាំ​កិច្ច​ប្រជុំ​នេះ​ពី​ព្រោះ​ច្បាប់​បាន​ផ្ដល់​អំណាច​ឲ្យ​ គ.ជ.ប. ដោះ​ស្រាយ​នូវ​ភាព​មិន​ប្រក្រតី​ទាំង​អស់​”។

ចំណែក​ គ.ជ.ប. បាន​រក្សា​គោល​ជំហរ​របស់​ខ្លួន​ក្នុង​ការ​ប្រកាស​លទ្ធផល​ចុង​ក្រោយ​តាម​គម្រោង​របស់​ខ្លួន​ដែល​នឹង​ត្រូវ​ចេញ​នៅ​ថ្ងៃ​ទី​៨ ខែ​កញ្ញា ស្រប​ពេល​គណបក្ស​ប្រជាជន​កម្ពុជា​បាន​ចល័ត​កម្លាំង​ និង​រថ​ពាស​ដែក​នៅ​ទូទាំង​ប្រទេស​ក្នុង​អ្វី​ដែល​លោក ​​​ជាម យៀប មាន​ប្រសាសន៍​ថា គឺ​ជា​ការ​ស្រប​ច្បាប់​ក្នុង​ការ​ចល័ត​កម្លាំង​នេះ​ដើម្បី​ការ​ពារ​សន្តិសុខ​ជាតិ​ក្នុង​ករណី​​ប្រឈម​នឹង​ការ​គំរាម​កំហែង​ធ្វើ​មហា​បាតុកម្ម​ប្រឆាំង​នឹង​លទ្ធផល​ឆ្នោត​របស់​គណបក្ស​សង្គ្រោះ​ជាតិ​។

លោក ជាម យៀប​ ​បាន​ថ្លែង​បន្ត​ថា “ការ​ដាក់​ពង្រាយ​កម្លាំង​យោធា​ និង​រថ​ពាស​ដែក​​​នៅ​ពេល​នេះ​គឺ​ជា​សិទ្ធិ​ស្រប​ច្បាប់​របស់​រដ្ឋា​​​ភិបាល​ដើម្បី​ធានា​សន្តិសុខ​សាធារណៈ។ ពី​ព្រោះ​គណបក្ស​សង្គ្រោះ​ជាតិ​បាន​ចាញ់​ឆ្នោត​ ហើយ​គណបក្ស​នេះ​បាន​លើក​ឡើង​ពី​លទ្ធ​​​ភាព​ក្នុង​ការ​ធ្វើ​មហា​បាតុកម្ម​ដូច្នេះ​យើង​ចង់​ការពារ​កុំឲ្យ​មាន​ភាព​ចលាចល​នៅ​ក្នុង​សង្គម​”។

ទោះ​ជា​យ៉ាង​ណា​ អនុ​ប្រធាន​គណបក្ស​សង្គ្រោះ​ជាតិ​ លោក កឹម សុខា កាល​ពី​ម្សិល​មិញ​បាន​អំពាវ​នាវ​ឲ្យ​គណបក្ស​ប្រជាជន​កម្ពុជា​​​ “ឈប់​លេង​ល្បែង​ដោយ​គំរាម​កំហែង​ប្រជាពលរដ្ឋ​ដោយ​ប្រើ​ប្រាស់​រថក្រោះ​​  ការ​ចាប់​ខ្លួន​ប្រជាពលរដ្ឋ​ ការ​បំភិត​ភ័យ​ និង​ការ​គំរាម​កំហែង​សកម្មជន​គណបក្ស​សង្គ្រោះ​ជាតិ​នៅ​តាម​​តំបន់​ជន​បទ​”។

លោក កឹម សុខា មាន​ប្រសាសន៍​បន្ទាប់​ពី​សន្និសីទ​កាសែត​កាល​ពីម្សិលមិញ​ថា ជិត​អស់​ពេលវេលា​​​សម្រាប់​គណបក្ស​ប្រជាជន​កម្ពុជា​​​អង្គុយ​​​​​ជាមួយ​គណបក្ស​សង្គ្រោះ​ជាតិ​ដើម្បី​ស្វែង​រក​ដំណោះ​ដែល​អាច​ធ្វើ​ឲ្យ​អ្នក​គាំទ្រ​គណបក្ស​ប្រឆាំង​ទទួល​យក​បាន​ និងធ្វើ​​​ឲ្យ​គណបក្ស​ប្រឆាំង​​ចូល​រួម​​ក្នុង​កិច្ច​ប្រជុំ​សភា​នៅ​ខែក្រោយ​ និង​បង្កើត​រដ្ឋាភិបាល​ថ្មី​មួយ​ដោយស្រប​ច្បាប់​ហើយ។

លោក​ថ្លែង​បន្ត​ទៀត​ថា “ពេល​វេលា​គឺ​ស្ថិត​នៅ​ខាង​យើង​។ ពេលវេលា​កាន់​តែ​ខ្លី​​ទៅ​​​​ហើយ​សម្រាប់​គណបក្ស​ប្រជាជន​។ ការពិត​ដែល​ថា គណបក្ស​ប្រជាជនកម្ពុជា​មិន​ទទួល​ខុស​ត្រូវ​បាន​បញ្ជាក់​ច្បាស់​​​ចំពោះ​​​សហ​​​គមន៍​អន្តរជាតិ​  អង្គការ​សង្គម​ស៊ីវិល​ និង​​​​ប្រជាពលរដ្ឋ​​​​ថា ​ពួកគេ​គ្មាន​ឆន្ទៈ​​ឆ្លើយ​តប​ទៅ​នឹង​ស្ថានការណ៍​បែប​​នេះ​ឡើយ​”៕

ប្រែសម្រួលដោយ ឃិន ណៃ​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស