28 C
Phnom Penh

អ្នក​ធ្វើ​របាយការណ៍​ពិសេស​របស់​សហប្រជាជាតិ​ថា ប្រជា​ធិ​ប​​តេយ្យ​​នៅ​កម្ពុជា​មាន​កម្រិត​

ដោយ ឌឹ ខេមបូឌា ដេលី

បទវិភាគ

យោង​តាម​របាយការណ៍​ចុង​ក្រោយ​បំផុត​​​​​របស់​លោក​ សុរិយា ស៊ូបេឌី ប្រេសិត​​សិទ្ធិ​មនុស្ស​​​​​​របស់​អង្គការ​សហប្រជាជាតិ​ស្ដី​ពី​កម្ពុជា​​​​បាន​ឲ្យ​ដឹង​ថា ប្រទេស​កម្ពុជា​​គ្មាន​​លទ្ធិ​ប្រជា​​​ធិប​​​តេយ្យ​ពេញ​លេញ​ ដូច​ដែល​មាន​​​​ចែង​នៅ​ក្នុង​​រដ្ឋ​ធម្មនុញ្ញ​របស់​ខ្លួនទេ​ ដោយ​រដ្ឋា​​​ភិបាល​​​កាន់​​តែ​លែង​អត់​ឱន​​ចំពោះ​ការ​រិះគន់​ដើម្បី​ស្ថាបនា ចំណែក​ឯកំណែ​ទម្រង់​​ប្រព័ន្ធ​​​​តុលា​ការ​​​ រដ្ឋ​សភា និង​ប្រព័ន្ធ​បោះ​​​ឆ្នោត​​​​​មាន​ការ​យឺត​យ៉ាវ។

របាយការណ៍​ដ៏​វែង​ផ្ញើជូន​ក្រុម​ប្រឹក្សា​សិទ្ធិ​មនុស្ស​ក្នុង​ទីក្រុង​ហ្សឺណែវ ស្ដី​ពី​ស្ថាន​ភាព​សិទ្ធិ​មនុស្ស​​នៅ​ក្នុង​ប្រទេស​កម្ពុជា​ ដែល​ចុះ​​ថ្ងៃ​ទី​៥ ខែ​សីហា ប៉ុន្តែ​​ដែល​ត្រូវ​បាន​ព្រាង​​ឡើង​នៅ​មុន​ថ្ងៃ​បោះ​ឆ្នោត​​កាលពី​ថ្ងៃ​ទី​២៨ ខែ​កក្កដា​ កន្លង​ទៅ​នោះ​ ធ្វើ​ឡើង​បន្ទាប់ពី​​បេសកកម្ម​លើក​ទី​៨​របស់​លោក​មក​កាន់​ប្រទេស​កម្ពុជា​ កាលពី​ខែ​ធ្នូ​ ឆ្នាំ​២០១២ ដែល​អំឡុង​ពេល​នោះ​លោក​ត្រូវ​បាន​មន្ត្រី​រដ្ឋា​ភិបាល​ព្រងើយ​កន្ដើយ​ដាក់​ ចំណែក​​ឯបេស​កកម្ម​លើក​ទី​៩​របស់​លោក​ កាលពី​ខែ​ឧសភា ​លោក​ សុរិយា ស៊ូបេឌី ចាត់​ទុក​ថា​ “ មិន​ល្អ​”។

របាយការ​ណ៍​នេះ ដែល​ជា​របាយ​ការណ៍​ទី​៥​របស់​លោក​​ចាប់​​តាំ​ងពី​លោក​​ចូល​កាន់​​តំណែង​នេះ​កាលពី​ខែ​មីនា​ ឆ្នាំ​២០០៩​មក​នោះ​​ មាន​លទ្ធផ​ល​នៃ​បេសក​កម្ម​ស្វែង​រក​ការពិត​​លើក​មុន​ៗ​ទាំង​អស់​របស់​លោក​ ដែល​បាន​​ផ្ដោត​លើ​កំណែទម្រង់​ប្រព័ន្ធ​តុលាការ​ រដ្ឋ​​​សភា និង​ប្រព័ន្ធ​បោះ​ឆ្នោត​ និង​គោល​នយោ​​​បាយ​​របស់​ប្រទេស​កម្ពុជា​ពាក់​ព័ន្ធ​នឹង​ដី​សម្បទាន​សេដ្ឋ​កិច្ច​។

លោក​ សុរិយា ស៊ូបេឌី បាន​​លើក​ឡើង​នៅ​​​​​​​ក្នុង​របាយការណ៍​របស់​លោក​​ដោយ​សំដៅ​​​​​លើ​រូប​លោក​ផ្ទាល់ជា​ជន​​ទី៣ថា “ការ​ទទួល​ស្វាគមន៍​របស់​រដ្ឋាភិបាល​ចំពោះ​អ្នក​ធ្វើ​របាយការណ៍​ពិសេស​អំឡុង​បេសកកម្ម​របស់​លោក​មក​កាន់ប្រទេស​នេះ​កាលពី​ខែ​ធ្នូ​ ឆ្នាំ​២០១២ គឺ​​ជា​ការ​ស្វាគមន៍​សោះ​ក​ក្រោះ​ដែល​​​​អំឡុង​ពេល​នោះ គ្មាន​មន្ត្រី​រដ្ឋាភិបាល​ជាន់​ខ្ពស់​ណាម្នាក់​ជួប​ជាមួយ​លោក​ឡើយ​។

ក្រោយ​​​​ពី​ការ​ចេញ​ផ្សាយ​របាយការណ៍​សំខាន់​​​​ពី​រដោយ​អ្នក​ធ្វើ​របាយការណ៍​ពិសេស​រូប​នេះ​ របាយ​ការណ៍​មួយ​ស្ដី​ពី​​កំណែ​ទម្រង់​ប្រព័ន្ធ​បោះឆ្នោត​ និង​មួយ​ទៀត​​ស្ដី​​ពី​​សម្ប​​​ទាន​ដីធ្លី​ផ្សេងៗ​ទៀត​នោះ​ លោក​​បាន​ទទួល​​​រង​​ពាក្យ​សម្ដី​មិន​សមរម្យ​មួយ​ចំនួន​។ នេះជា​រឿង​គួរ​ឲ្យ​សោក​ស្ដាយយ៉ាង​ខ្លាំង ​នៅ​ពេល​ដែល​​ការ​ផ្ដោត​លើ​កិច្ច​ពិភាក្សា​រវាង​​​អ្នក​ធ្វើ​របាយការណ៍​ពិសេស​រូប​នេះ​ និង​រដ្ឋាភិបាល​​ផ្ដោត​​ខ្លាំង​តែ​ទៅ​​លើ​​កិច្ច​ការ​ ដែល​អង្គការ​សហប្រជាជាតិ​ប្រាប់​ឲ្យ​លោក​ធ្វើ​ និង​មិន​មែន​ផ្ដោត​លើ​រូប​លោក​ក្នុង​នាម​លោក​ជា​មនុស្ស​ម្នាក់​”។

លោក​ សុរិយា ស៊ូបេឌី ទំនង​ជា​សំដៅ​​ដល់​​​​ពាក្យ​​សម្ដី​របស់​លោក​ ឱម យ៉ិនទៀង​ ប្រធាន​​​គណៈកម្មាធិការ​សិទ្ធិ​មនុស្ស​កម្ពុជា​របស់​​រដ្ឋា​​​ភិបាល​ កាល​ពី​ខែ​កញ្ញា​ឆ្នាំ​មុន​ ដែល​បាន​ចោទ​ប្រកាន់​លោក​ សុរិយា ស៊ូបេឌី ថា ធ្វើ​ការ​ឲ្យ​គណ​​​​​​បក្ស​ប្រឆាំង​។ មួយ​ខែ​ក្រោយ​មក​​លោក​​​​​​​​​​នាយក​រដ្ឋមន្ត្រី​ ហ៊ុន សែន បាន​មាន​ប្រសា​​​សន៍​​​​អំឡុង​សុន្ទរកថា ​ក្នុង​ពិធី​ប្រគល់​សញ្ញា​​​បត្រ​មួយ​ថា របាយការណ៍​របស់​លោក​ សុរិយា ស៊ូបេឌី “ មិន​គួរ​ឲ្យ​ជឿ​” ហើយ​បាន​មាន​ប្រសា​​​សន៍​ថា លោក​ “សោក​ស្ដាយ​” ដែល​អ្នក​ធ្វើ​របាយការណ៍​ពិសេស​រូប​នេះ​គិត​ថា ចំា​បាច់​ត្រូវ​ធ្វើ​របាយការណ៍​បែប​នេះ​។

បុពា្វធិការី (អ្នក​កាន់​តំណែង​មុន​) របស់​លោក​ក៏​ធ្លាប់​ជួប​រឿង​បែប​នេះ​ដែរ​។ លោក​ យ៉ាស ហ្គាយ សាស្ត្រាចារ្យ​ច្បាប់​កេនយ៉ា​ បាន​​អត់​ទ្រាំ​​នឹង​ពាក្យ​បៀតបៀន​យ៉ាង​ច្រើន​ពី​​​សំណាក់​​មន្ត្រី​រដ្ឋាភិបាល​ ជាពិសេស​លោក​​នាយក​រដ្ឋ​មន្ត្រី ហ៊ុន សែន​ តែ​ម្តងអំឡុង​​រយៈ​ពេល​បី​ឆ្នាំ​​ ដែលលោក​កាន់​តំណែង​​ជា​អ្នក​ធ្វើ​របាយ​​​ការណ៍​ពិសេស​ ហើយ​លោក​បាន​លា​ឈប់​ពី​តំណែង​​កាលពី​ឆ្នាំ​២០០៨ ដោយ​លើក​ឡើង​​​​​ពី​កង្វះ​ការ​គាំទ្រ​ពី​អង្គការ​សហ​ប្រជាជាតិ​​។​

លោក​ ភីតធើ ឡឺព្រិច សាស្ត្រាចារ្យ​ច្បាប់​អូស្ត្រាលី ដែល​ជា​បុពា្វធិការី​របស់​លោក​ យ៉ាស ហ្គាយ​ បាន​​ចុះ​ចេញ​ពី​តំណែង​​បន្ទាប់​ពី​កាន​់​តំណែង​​បាន​ប្រាំ​ឆ្នាំ​ និង​មាន​ជម្លោះ​ជា​ច្រើន​​ជាមួយ​រដ្ឋាភិបាល​។

បន្ទាប់​ពី​ត្រូវ​រដ្ឋាភិបាល​ព្រងើយ​កន្ដើយ​​ដាក់​កាល​ពី​​ខែ​ធ្នូ​ ឆ្នាំ​២០១២ លោក​ សុរិយា ស៊ូបេឌី  បាន​លើក​ឡើង​​នៅ​ក្នុង​របាយ​ការណ៍​​​​ចុង​ក្រោយ​របស់​លោក​ថា “ឱកាស​​ខក​ខាន​សម្រាប់​​ការ​ពិភាក្សា​ជាមួយ​រដ្ឋា​ភិបាល​គឺ​ជា​ឱកាស​​​​​សំខាន់​”។​​

ទោះបី​ជា​លោក សុរិយា ស៊ូបេឌី អាច​ជួប​ជាមួយ​មន្ត្រី​រដ្ឋាភិបាល​សំខាន់ៗ​បាន ​នៅ​ពេល​​​​លោក​​វិល​ត្រឡប់​មក​វិញ​ កាលពី​ខែ​ឧសភា​ក៏ដោយ​ ក៏​បេសកកម្ម​នេះ​​ត្រូវ​បាន​​ធ្វើ​ឲ្យ​ខូច​​ជា​ថ្មី​ម្ដង​ទៀត​ដោយ​សារ​តែ​​ពាក្យ​សម្ដី​មិន​ពិរោះ​​​ស្តាប់​របស់​រដ្ឋាភិបាល​ ការ​ចោទ​ប្រកាន់​ចំពោះ​​​បម្រាម​​មិន​ឲ្យ​ប្រព័ន្ធ​ផ្សព្វផ្សាយ​​ផ្សាយ​ពី​​សកម្ម​ភាព​របស់​លោក​ និង​ការ​តវ៉ា​របស់​និស្សិត​ម្នាក់​ អំឡុង​ពេល​​លោក​ធ្វើ​បាឋកថា ស្ដី​ពី​​ការ​វិនិ​​​យោគ​ ដែលជាការ​​រៀប​ចំឡើង​ដោយ​ចលនា​​​​យុវជន​របស់​​គណបក្ស​ប្រជាជន​កម្ពុជា ​កំពុង​កាន់​អំណាច​ និង​បាន​អំពាវនាវឲ្យ​លោក​​បញ្ចប់​​​​អាណត្តិ​របស់​ខ្លួន​ក្នុង​ការ​ឃ្លាំ​មើល​​ស្ថាន​ភាព​សិទ្ធិ​មនុស្ស​នៅ​ក្នុង​ប្រទេស​កម្ពុជា​។​

របាយការណ៍​របស់​លោក​បាន​លើក​ឡើង​ថា “អ្នក​ធ្វើ​របាយការណ៍​ពិសេស​​សោក​ស្ដាយ​​​​ដែល​លោក​ត្រូវ​ជួប​​ហេតុ​ការណ៍​មិន​ល្អ​​មួយ​ចំនួន​អំឡុង​បេសកកម្ម​នេះ​។ការ​តវ៉ា​ទាំង​​​នេះ​​​​គឺ​ជា​ការ​តវ៉ា​រៀប​ចំឡើង​ក្នុង​បំណង​បំភិត​បំភ័យ​និង​​បៀតបៀន​​អ្នក​ធ្វើ​របាយការណ៍​ពិសេស​រូប​នេះ​ ដើម្បី​បង្វែរ​ការ​ចាប់​អារម្មណ៍​​​របស់​​លោក​​លើ​បញ្ហា​​សំខាន់​ៗ​។​ លោក​​ក៏​បាន​រង​ការ​​​​ចោទ​ប្រកាន់​គ្មាន​​មូលដ្ឋាន​ថា ​​ប្រឆាំង​រដ្ឋា​​​ភិបាល​​​ទាំង​លម្អៀង​ផង​ដែរ​”។ របាយ​ការណ៍​នេះ​បាន​បន្ត​ថា “នេះ​ជា​បទ​ពិសោធ​​​ដ៏​អាក្រក់​”។

ទោះ​ជាយ៉ាង​ណា​ លោក​ សុរិយា ស៊ូបេឌី បាន​មាន​ប្រសាសន៍​ថា ហេតុការណ៍​ទាំង​នេះ​បាន​​ធ្វើ​ឲ្យ​​ការ​ប្ដេជ្ញាចិត​្ត​របស់​លោក​កាន់​តែ​រឹង​មាំ​ទៅ​វិញទេ​ ហើយលោក​​ត្រូវ​បាន​ជំរុញ​លើ​ក​ទឹក​ចិត្ត​ដោយ​សារ​គាំទ្រ​​ចំពោះ​អាណត្តិ​របស់​លោក​។

នៅ​ក្នុង​របាយការណ៍​របស់​លោក​ សុរិយា​ ស៊ូបេឌី បាន​​​ថ្លែងថា លោក​ក៏​ត្រូវ​បាន​ជំរុញ​លើក​ទឹក​ចិត្ត​ដែរ​ ដោយ​សារ​ការ​ដោះ​លែង​​លោក​ ម៉ម សូណង់ដូ ម្ចាស់​ស្ថានីយ​​​​វិទ្យុ​សម្បុក​​​​ឃ្មុំ​ចេញ​ពី​ពន្ធ​នាគារ​កាលពី​ខែ​មីនា បន្ទាប់​ពី​លោក​​ត្រូវ​បាន​តុលាការ​ផ្ដន្ទាទោស​​ឲ្យ​ជាប់​ពន្ធនាគារ​រយៈ​ពេល​២០​ឆ្នាំ​ពី​បទ​​បង្ក​ចលនា​អបគមន៍​​តាម​ការ​​ចោទ​​ប្រកាន់​ ដែល​មជ្ឈ​​​ដ្ឋាន​ជា​ច្រើន​ជឿថា ត្រូវ​បាន​ប្រឌិត​ឡើង​។​

លោក​ក៏​បាន​ស្វាគមន៍​ដែរ ចំពោះ​សេចក្ដី​​សម្រេច​​​របស់​​​​រដ្ឋាភិ​បាល​​កាលពី​ពាក់​កណ្ដាល​ខែ​កក្កដា ដើម្បី​​អនុញ្ញាត​ឲ្យ​លោក​ សម រង្ស៊ី មេដឹក​នាំ​គណបក្ស​ប្រឆាំង​បាន​វិល​ត្រឡប់​មក​ប្រទេស​កម្ពុជា​​វិញ​ ដើម្បី​ចូល​រួម​នៅ​ក្នុងការ​ធ្វើ​យុទ្ធ​នាការ​ឃោសនា​បោះ​ឆ្នោត​​សម្រាប់​​គណ​​​បក្ស​សង្គ្រោះ​ជាតិ​​នៅ​មុន​ការ​បោះ​ឆ្នោត​​ជាតិ​​។

លោក​បាន​មាន​ប្រសាសន៍​ថា ទោះ​ជា​យ៉ាង​ណា​​ “ប្រទេស​កម្ពុជា​​នៅ​តែ​មាន​ចំណុច​មួយ​ចំនួន​ដែល​ត្រូវ​បំពេញ​នៅ​ក្នុង​ការជំរុញ​​និង​ការពារ​សិទ្ធិ​មនុស្ស​ ​​ការ​ពង្រឹង​អភិបាល​កិច្ច​ល្អ ពង្រឹង​ឯករាជ​ភាព​និង​សមត្ថភាព​របស់​ស្ថាប័ន​ដ្ឋ​ ដែល​ទទួល​ខុសត្រូវ​ចំពោះ​ការ​ការពារ​សិទ្ធិ​របស់​ប្រជាពលរដ្ឋ​”។

លោក​ សុរិយា ស៊ូបេឌី បាន​មាន​ប្រសា​សន៍​​​​ថា ខណៈ​ពេល​រដ្ឋាភិបាល​​ទទួល​ស្គាល់​​បញ្ហា​ទាំង​នេះ​ ជា​អ្វី​​ដែល​លោក​ចាត់ទុក​​​ជា “សញ្ញា​រីក​ចម្រើន​” នោះ រដ្ឋាភិបាល​​នៅ​​​តែ​​​ចាំបាច់​ត្រូវ​ធ្វើ​ឲ្យប្រសើរ​ឡើងនូវ​ស្ថាន​ភាព​មួយ​ចំនួន​​​ដើម្បី​ធ្វើ​ឲ្យ​ប្រាកដ​ថា ប្រទេស​កម្ពុជា​​​​​​​​មាន​លទ្ធិប្រជាធិបតេយ្យ​ពេញ​លេញ​។

លោក​​​បាន​​​មាន​​​ប្រសាសន៍ថា “ ខណៈ​​​​​​រដ្ឋ​​​ធម្មនុញ្ញ​​​នៃ​​​ប្រទេស​​​កម្ពុជា​​​ចែង​​​អំពី​​​លទ្ធិ​​​ប្រជា​​​ធិបតេយ្យ​​​សេរី​​​និយម​​​នោះ​​​ ជាក់​​​ស្តែង​​​ស្ថាន​​​ភាព​​​លទ្ធិ​​​ប្រជា​​​ធិ​​ប​​​តេយ្យ​​​នៅ​​​ទី​​​នេះនៅ​​​មាន​​​កម្រិត​​​នៅ​​​ឡើយ។ ស្របពេល​ដែល​​ដំណើរ​ការ​​នៃ​ការ​ធ្វើ​កំណែ​ទម្រង់​ប្រព័ន្ធ​តុលាការ ​​សភា​ និង​ប្រព័ន្ធ​បោះឆ្នោត​​មាន​ការ​យឺត​យ៉ាវ​នោះ​ រដ្ឋាភិបាល​​នៅ​មិន​ទាន់​អនុវត្តតាម​អនុ​សាសន៍​ភាគ​​ច្រើន​ពាក់​ព័ន្ធ​នឹង​​ការ​ផ្ដល់​​ និង​ការ​គ្រប់​គ្រង​ដី​សម្បទាន​សេដ្ឋកិច្ច​ ដី​សម្ប​​​ទាន​ផ្សេងៗ​ទៀត​ នៅ​​​ឡើយ​​​ទេ”។

នៅ​ក្នុង​អនុ​សាសន៍​របស់​លោក​ លោក​ សុរិយា ស៊ូបេឌី ​បាន​ផ្ដោត​​លើ​សមត្ថភាព​របស់​រដ្ឋាភិបាល​ក្នុង​ការ​បង្រាបការ​រិះគន់​ដើម្បីស្ថាបនា​​ ដែល​លោក​បាន​មាន​ប្រសា​​​សន៍​ថា កំពុង​ធ្លាក់​​ចុះ​។ លោក​បាន​មាន​ប្រសាសន៍​ថា “សម្រាប់​ប្រជាធិបតេយ្យ​ដំណើរ​ការ​បាន​ល្អ​នៅ​ក្នុង​ប្រទេស​កម្ពុជា​ និង​សម្រាប់​វប្បធម៌​ប្រជា​ធិបតេយ្យ​​ចាក់​ប្ញស​នៅ​​ក្នុង​សង្គម ​អ្នក​​ដែល​កាន់​​មុខ​ងារ​​សាធារណៈ​​ត្រូវ​តែ​​មាន​ឆន្ទៈ​ក្នុង​ការ​ទទួល​ស្គាល់គុណ​វិបត្តិ ពេល​នោះ​ទើប​អាច​រក​ដំណោះ​ស្រាយ​ឃើញ​ ដែល​អ្នក​គ្រប់​គ្នា​អាច​ទទួល​យក​បាន។ ការ​យល់​ដឹង​នេះ​ ហាក់​ដូច​ជា​មិន​ទាន់​ទូលំទូលាយ​ទេ​​នៅ​ក្នុង​សង្គម​កម្ពុជា​បច្ចុប្បន្ន​។​

ក្នុង​នាម​ជា​អ្នក​ធ្វើ​របាយ​ការណ៍​ពិសេស​​យល់​ថា​ ការ​​រិះគន់​មិន​មែន​ជា​​បទ​ល្មើស​ទេ​ ប៉ុន្តែ​គឺ​ជា​ការ​ប្រើប្រាស់​​សេរី​ភាព​នៃ​មន​​​សិការ​ ​​​ជា​ទង្វើ​ឆ្លាត​វ័យ​។ ទាំង​​​​​នេះ​គឺ​ជា​​គុណ​សម្បត្តិ​មិន​អាច​​កាត់​ផ្ដាច់​ពី​គ្នា​បាន​​នៃ​លទ្ធិ​​​ប្រជា​​​ធិប​​​តេយ្យ​។ អវត្តមាន​​របស់​វា​ជា​​ហេតុផល​មួយ​ ដែល​​ធ្វើ​​​ឲ្យកម្ពុជា​ខ្វះ​លទ្ធិប្រជាធិបតេយ្យ​ពេញ​លេញ​ ដែល​មាន​ចែង​នៅ​ក្នុង​រដ្ឋធម្ម​​​នុញ្ញ​​​​​​​នៅ​ប្រទេស​នេះ​”។

លោក​បាន​មាន​ប្រសាសន៍​​បន្ថែម​ថា រដ្ឋា​ភិបាល​ចាំបាច់​​ត្រូវ​អនុវត្ត​​ច្បាប់​ដែល​មាន​ចែង​​​​នៅ​ក្នុង​រដ្ឋ​ធម្មនុញ្ញ​​ស្ដីពីការ​គ្រប់គ្រង​ប្រព័ន្ធ​តុលាការ​ដើម្បី​ធ្វើ​ឲ្យ​វាស្ថិត​នៅ​លើ​​​មាគ៌ា​​​ឆ្ពោះ​ទៅ​ឯករាជ​ភាព​ ខណៈ​ដែល​ “ត្រូវ​ចាត់​វិធានការ​សមស្រប​​ ដើម្បី​​ពង្រឹង​ឯករាជភាព​និង​សមត្ថភាព​របស់​គណៈ​កម្មា​ធិ​ការ​ជាតិ​រៀប​ចំ​ការ​បោះឆ្នោត (គ.ជ.ប.) ដើម្បី​ធ្វើ​ឲ្យ​ស្ថាប័នទទួល​បាន​ការ​ជឿទុក​ចិត្ត​​ទាំង​ស្រុង​​ពី​អ្នក​បោះ​​​ឆ្នោត​ទំាងអស់​នៅ​ក្នុង​ប្រទេស​កម្ពុជា​នៅ​ក្នុង​ការ​បោះឆ្នោត​​​លើក​ក្រោយៗ​”។

លោក​ សុរិយា សូ៊បេឌី បាន​មាន​ប្រសា​សន៍​កាលពី​លើក​មុន​ថា ការ​មិន​អនុវត្ត​កំណែ​ទម្រង់​សមស្រប​លើ​​គ.ជ.ប. ធ្វើ​ឲ្យ​អ្នក​បោះ​​​ឆ្នោត​​មិន​ជឿទុក​ចិត្ត​ ហើយ​អាច​ឈាន​ទៅ​ការ​ផ្ទុះអំពើ​ហិង្សា​។

លោក​ ផៃ ស៊ីផាន​ អ្នក​នាំពាក្យ​ទីស្ដីការ​គណៈ​រដ្ឋ​មន្ត្រី​បាន​មាន​ប្រសាសន៍​ថា លោក​យល់​ស្រប​នឹង​ការ​វាយ​តម្លៃ​របស់​លោក​ សុរិយា ស៊ូបេឌី  ដែល​ថា លទ្ធិ​ប្រជាធិប​តេយ្យ​​របស់​កម្ពុជា​នៅ​មាន​កម្រិត​ ប៉ុន្តែ​បាន​មាន​ប្រសាសន៍​ថា “ខ្ញុំ​គិត​ថា អ្នក​គ្រប់គ្នា​ដែល​​​​យល់​​ពី​លទ្ធិ​ប្រជាធិបតេយ្យ​នៅ​ក្នុង​ពិភព​លោក​នេះ​ដឹង​ថា លើ​លោក​នេះគ្មាន​នរណា​ម្នាក់​ល្អ​ឥត​ខ្ចោះ​ទេ​។​ [ លោក​ ស៊ូបេឌី] មក​ទី​នេះ​ក្នុង​ឋានៈ​ជា​ដៃ​គូ​ មិន​មែន​ជា​​នគរបាល​ឡើយ។គាត់​មិន​មែន​ជា​សាស្ត្រាចារ្យ​ ដែល​មាន​ជំនាញ​ខាង​កម្ពុជា​ទេ​ គាត់​​មក​ទី​នេះ​ដើម្បី​​​​ជួយ​កម្ពុជា ​ឆ្ពោះ​ទៅ​រក​ចំណុច​មួយ​ដែល​​​​អ្នក​គ្រប់​គ្នា​ចង់​បាន។ ជា​ការ​ពិត​ពួក​គេ​និយាយ​ថា  លទ្ធិ​​​​ប្រជា​​​ធិបតេយ្យ​របស់​កម្ពុជា​នៅ​មាន​កម្រិត​​ ខ្ញុំ​យល់​ស្រប​។ នោះ​ជា​មូល​​​ហេតុ​​ដែល​យើង​ចាំបាច់​ត្រូវ​ចាប់​​ដៃ​គូ​ជា​​​មួយ​​​​គ្នា​​ ដើម្បី​ធ្វើ​ឲ្យ​វា​ប្រសើរឡើង​។ អ្នក​គ្រប់គ្នា​​កំពុង​ស្វែង​​​​​​​រក​ស្ថិរភាព និង​សន្ដិភាព​ក្រោយ​ពី​សង្គ្រាម​”។

នៅ​ពេល​និយាយ​ដល់​​ចំណុច​​ថា តើ​ទំនាក់​ទំនង​រវា​ងរដ្ឋាភិបាល​និង​លោក​ សុរិយា ស៊ូបេ​ឌី បន្ត​ឆ្ពោះ​ទៅ​មុខ​ដោយ​របៀប​ណា​នោះ​ លោក​ ផៃ​ ស៊ីផាន​ បាន​មាន​ប្រសាសន៍​ថា “យើងគិត​ថា គាត់​ត្រូវ​តែ​សាង​ទំនុក​ចិត្ត​ និង​ការ​ជឿជាក់​រវាង​រូប​គាត់​ និង​ប្រទេស​​កម្ពុជា​ដើម្បី​ធ្វើ​ការ​រួម​គ្នា”៕

ប្រែសម្រួលដោយ​ តែម សុខុម

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស