35 C
Phnom Penh

ក្រុមប្រឹក្សា​ធម្មនុញ្ញ​បើក​សម័យ​ប្រ​ជុំ​ដើម្បី​ដោះ​ស្រាយ​​បណ្ដឹង​នៃ​ការ​បោះ​ឆ្នោត​

ដោយ ឌឹ ខេមបូឌា ដេលី

បទវិភាគ

ក្រុម​ប្រឹក្សា​ធម្មនុញ្ញ​កម្ពុជា​នឹង​បើក​សម័យ​ប្រជុំ​ពេញ​អង្គ​នៅ​ថ្ងៃ​នេះ​ដើម្បី​ពិភាក្សា​លើ​ពាក្យ​បណ្ដឹង​ពាក់​ព័ន្ធ​នឹង​ការចោទ​ប្រ​កាន់​ពី​ភាព​មិន​ប្រក្រតី​​ក្នុង​ការ​បោះ​ឆ្នោត​យ៉ាង​ហោច​​​​​​​ណាស់​ចំនួន​១៩​ករណី រួម​ទាំង​ពាក្យ​បណ្ដឹង​ជា​ច្រើន​ករណី​ទៀត​​ជុំវិញ​លទ្ធផល​នៃ​ការ​បោះ​ឆ្នោត​​ដែល​ទទួលបានបន្ទាប់​ពី​​មាន​ការ​សម្រេច​ពីគណៈកម្មាធិការ​ជាតិ​រៀប​ចំ​ការ​បោះ​ឆ្នោត ​(គ.ជ.ប.)។

ក្រុម​ប្រឹក្សា​ធម្មនុញ្ញ​បាន​លើក​ឡើង​​ក្នុង​​សេច​ក្តី​ថ្លេង​ការណ៍​មួយ​​ដែល​ទទួល​បាន​កាល​ពី​ម្សិល​មិញ​​​ថា​ “ក្រុម​ប្រឹក្សា​ធម្មនុញ្ញ​​​កំពុង​ដោះ​ស្រាយ​​ពាក្យ​បណ្ដឹង​ទាំង១៩​ករណី​​នេះដែល​​ពាក្យ​បណ្ដឹង​ចំនួន​៩​​បាន​ប្ដឹង​​​កាល​ពី​ថ្ងៃ​ទី​១៧​ខែ​សីហា​ ឆ្នាំ​២០១៣​ ប្រឆាំង​​​​​​​នឹង​​សេចក្តី​សម្រេច​​របស់​​គណៈកម្មាធិការ​ជាតិ​រៀប​ចំ​ការ​បោះ​ឆ្នោត​​ដែល​បាន​​ច្រាន​ចោល​នូវ​ពាក្យ​បណ្ដឹង​ប្រឆាំង​នឹង​​លទ្ធ​ផល​បឋម​នៃ​ការ​បោះ​ឆ្នោត​ជ្រើស​តាំង​តំណាង​រាស្រ្ត​នីតិកាល​ទី​៥នេះ​”។

លោក ឯក សំអុល ប្រធាន​ក្រុម​ប្រឹក្សា​ធម្ម​នុញ្ញ​បាន​បញ្ជាក់​ថា ​ក្រុម​ប្រឹក្សា​ធម្ម​នុញ្ញ​​ដែល​មាន​សមាជិក​ប្រាំបួន​រូប​នេះ​ នឹង​កោះ​ប្រជុំ​នៅ​ថ្ងៃ​នេះ ដើម្បី​ពិនិត្យ​មើល​ពាក្យ​បណ្ដឹង​ពាក់​ព័ន្ធ​នឹង​ការ​បោះ​ឆ្នោត​​ ប៉ុន្តែ បាន​បង្វែរ​សំណួរ​​ទៅ​អ្នក​នាំ​ពាក្យ​ក្រុម​ប្រឹក្សា​ធម្ម​នុញ្ញ​គឺ លោក អ៊ុត ឈន​ ដែល​មិន​អាច​ទាក់​ទង​សុំ​ការ​បំភ្លឺ​បាន​ទេ។

លោក គួយ ប៊ុនរឿន តំណាង​រាស្ត្រ​មក​ពី​គណបក្ស​សង្គ្រោះ​ជាតិ​បាន​មាន​ប្រសាសន៍​ថា គណបក្ស​ប្រឆាំង​បាន​​ដាក់​ពាក្យ​បណ្ដឹង​ចំនួន​១៥​​ទៅ​​ក្រុម​ប្រឹក្សា​ធម្ម​នុញ្ញ​​រួច​ហើយ ហើយ​​មាន​គម្រោង​ដាក់​ពាក្យ​បណ្ដឹង​ចំនួន​​ពីរ​​ទៀត​នៅ​ព្រឹក​នេះ នៅ​មុន​ពេល​​ក្រុម​ប្រឹក្សា​ធម្ម​នុញ្ញ​ធ្វើការ​កោះ​ប្រជុំ។

លោក​មាន​ប្រសាសន៍​បន្ត​ថា ពាក្យ​បណ្ដឹង​មួយ​ក្នុង​ចំណោម​ពាក្យ​បណ្ដឹង​ទាំង​នោះ​គឺ​ប្តឹង​ទាម​ទារ​ឲ្យ​មាន​ការ​បោះ​ឆ្នោត​ឡើង​វិញ​នៅ​​ការិយាល័យ​បោះ​ឆ្នោត​មួយ​កន្លែង​នៅ​ក្នុង​ឃុំ​ស្អាងភ្នំ​ ក្នុង​ខេត្ត​កណ្ដាល​ដែល​នៅ​ទី​នោះ​ការិ​​យា​ល័យ​នេះ​បាន​បិទ​មុន​​ពេល​​កំណត់​ ហើយ​ធ្វើឲ្យ​​ប្រជា​ពល​រដ្ឋដែលមាន​សិទ្ធិ​បោះ​ឆ្នោត​រាប់​រយ​នាក់​មិន​បាន​បោះ​ឆ្នោត​។

នៅ​ខេត្ត​កណ្ដាល ​គណ​បក្ស​សង្គ្រោះ​ជាតិ​ត្រូវ​ការ​សំឡេង​បន្ថែម​​​ត្រឹម​តែ​​១៦៨​សំឡេង​​​​ទៀត​ប៉ុណ្ណោះ ដើម្បី​ទទួល​បាន​៧អាសនៈ​​នៅ​ក្នុង​ខេត្ត​នេះ​ ដែល​​លទ្ធផល​បឋម​របស់​គណៈ​កម្មា​ធិការ​ជាតិ​រៀប​ចំ​ការ​បោះ​ឆ្នោត​បាន​បង្ហាញ​ថា​  គណ​បក្ស​សង្គ្រោះ​ជាតិ​ទទួល​បាន៦​អាសនៈ​​​​​​​ក្នុង​ចំណោម​អាសនៈ​ចំនួន​១១។

លោក ប៊ុនរឿន បាន​​​មាន​ប្រសាសន៍​បន្ត​ថា “នៅខេត្ត​សៀម​រាប យើង​ស្នើ​ឲ្យ​មាន​ការ​​ស៊ើប​អង្កេត​មួយ​ឲ្យបានល្អិតល្អន់​​នៅ​តាម​ការិយា​ល័យ​បោះ​ឆ្នោត​មួយ​ចំនួន​ ដែល​​កង​យោធពល​ខេមរ​ភូមិន្ទ​ជា​ច្រើន​នាក់​ស្លៀក​ពាក់​ស៊ីវិល​ ត្រូវ​បាន​គេ​ដឹក​តាម​​​រថយន្ត​យោធា​​​​​​​​​​ទៅ​បោះ​ឆ្នោត​នៅ​ក្នុង​ឃុំ​ទាំង​នោះ”។

លោក សុន ឆ័យ ប្រធាន​ក្រុម​តំណាង​រាស្ត្រ​​​​គណ​បក្ស​សង្គ្រោះ​ជាតិ​​បាន​មាន​ប្រសា​សន៍​​កាល​ពី​ថ្ងៃ​អាទិត្យ​ថា​ គណ​បក្ស​ប្រឆាំង​មិន​រំពឹង​ថា ក្រុម​ប្រឹក្សា​ធម្ម​នុញ្ញ​នឹង​ធ្វើ​ការ​ពិចារ​​​ណា​​​​ឲ្យ​បាន​ហ្មត់​ចត់​លើ​​ពាក្យ​បណ្ដឹង​របស់​ខ្លួន​ឡើយ​ ប៉ុន្តែ​ ស្ថាប័ននេះកំពុង​​តែអនុវត្ត​​តាម​នីតិ​​​​​​​​​វិធី​ត្រឹម​ត្រូវ​ដើម្បី​បង្ហាញ​ពី​ភាព​លម្អៀង​ទៅរក​ស្ថាប័ន​រដ្ឋ​​ ដែល​ទទួលបន្ទុក​ពិនិត្យ​មើល​​ដំណើរ​​ការ​បោះ​ឆ្នោត​​ក្នុង​​ប្រទេស​កម្ពុជា​។

លោក​​ សុន ឆ័យ​ ថ្លែង​បន្ត​ថា “ក្រុម​ប្រឹក្សា​ធម្ម​នុញ្ញ​គឺ​នៅ​តែ​ជា​ឧបករណ៍​របស់​គណ​បក្ស​ប្រជាជន​កម្ពុ​ជា​កំពុង​កាន់​អំណាចដដែល។ យើង​​មិន​ដែលឃើញ​ក្រុម​ប្រឹក្សា​ធម្ម​នុញ្ញ​​​សម្រេច​​​​​ខុស​ពី​គោល​បំណង​​​របស់​លោក​នាយក​​រដ្ឋ​មន្ត្រី​ ហ៊ុន សែន ឬ​ ការ​សម្រេច​​របស់​គណៈ​​កម្មា​ធិការ​ជាតិ​រៀប​ចំ​ការ​បោះ​ឆ្នោតឡើយ​។​ដូច្នេះ​ហើយ​ យើង​គ្មាន​សង្ឃឹម​ឡើយ”។ លោក​​ថ្លែង​បន្ថែម​​ថា​ “ប៉ុន្តែ ​​​យើង​ត្រូវ​តែ​ដើរ​តាម​​ប្រព័ន្ធ​ដ៏​អន់​​សម្រាប់​រឿង​​​នេះ​​ ហើយ​ទុក​ឲ្យ​សហគមន៍​អន្តរ​ជាតិ​និង​ប្រជា​ពល​រដ្ឋ​វិនិច្ឆ័យ​លើ​អាកប្បកិរិយា​របស់​ពួក​គេ​ចុះ​”។

ទោះ​ជា​យ៉ាង​ណា​លោក ផៃ ស៊ីផាន អ្នក​នាំ​​ពាក្យ​ទី​ស្តី​ការ​គណៈ​រដ្ឋ​មន្ត្រី​​បាន​លើក​ឡើង​​កាល​ពី​ថ្ងៃ​អាទិត្យ​ថា​ បើ​​យល់​ព្រម​​​ចូល​រួម​ក្នុង​ការ​បោះ​ឆ្នោត​ដែល​រៀប​ចំ​ឡើង​ដោយ​គណៈ​​កម្មាធិ​ការ​ជាតិ​រៀប​ចំ​ការ​បោះ​ឆ្នោត​ ដោយ​មាន​​​ក្រុម​ប្រឹក្សា​ធម្ម​នុញ្ញ​ជា​អ្នក​​​សម្រេច​ចុង​ក្រោយ​នោះ​​ គណ​បក្ស​សង្គ្រោះ​ជាតិ​ត្រូវ​តែ​ទទួលយក​​​នូវ​រាល់​ការ​សម្រេច​របស់​ក្រុម​ប្រឹក្សា​ធម្មនុញ្ញ​។ លោក ថ្លែង​បន្ត​ថា “ប្រសិន​បើ​ពួក​គេ​ [គណបក្ស​សង្គ្រោះ​ជាតិ]​មិន​ទុក​ចិត្ត​ប្រព័ន្ធ​នេះ​ទេ​នោះ​ ហេតុអ្វី​បាន​ជា​ពួក​គេ​ចូល​​រួម​ក្នុង​ការ​បោះ​ឆ្នោត​? នៅ​ពេល​ពួក​គេ​ចូល​រួម​ក្នុង​ការ​បោះ​ឆ្នោត​ ពួក​គេ​ត្រូវ​តែ​គោរព​តាម​ច្បាប់​​បោះ​ឆ្នោត”៕

(រាយការណ៍​បន្ថែម ដោយ Colin Meyn)
ប្រែសម្រួលដោយ ឃិន ណៃ

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស