មន្ត្រីនគរបាលមូលដ្ឋានបានឲ្យដឹងថា កសិករអាយុ១៩ឆ្នាំម្នាក់ នៅក្នុងស្រុកសាលាក្រៅ ខេត្តប៉ៃលិន បានបាត់បង់ជើងទាំងពីរនៅពេលដែលខ្លួនបានជាន់គ្រាប់មីនផលិតនៅប្រទេសប៊ុលហ្គារីមួយគ្រាប់ កាលពីម្សិលមិញ ខណៈដែលយុវជនវ័យក្មេងរូបនេះដើរបេះបន្លែក្នុងព្រៃ។
យោងតាមលោក ប៊ូ សារិន ស្នងការរងនគរបាលខេត្តបានឲ្យដឹងថា ជនរងគ្រោះបាននិងកំពុងតែជីកត្រពាំងជាមួយម្តាយរបស់ខ្លួនស្រាប់តែពេលនោះក៏បានជាន់មីនប្រឆាំងមនុស្សមួយគ្រាប់។ ជនរងគ្រោះត្រូវបានបញ្ជូនទៅមន្ទីរពេទ្យខេត្តបាត់ដំបង ជាទីដែលជើងរបស់គាត់ត្រូវបានកាត់ឲ្យនៅសល់ត្រឹមលើជង្គង់។
លោក សារិន បានថ្លែងថា “យុវជនរូបនេះបានជាន់គ្រាប់មីនប្រឆាំងមនុស្ស ដែលធ្វើឲ្យជើងរបស់គាត់ទាំងពីរត្រូវដាច់” ។ លោកបន្ថែមថា មានស្លាកសញ្ញាព្រមានអំពីគ្រាប់មីននៅក្នុងតំបន់នោះ។ លោកបានមានប្រសាសន៍ថា “ មានគ្រាប់មីនជាច្រើនកប់នៅក្នុងដី ហើយមជ្ឈមណ្ឌលសកម្មភាពកម្ចាត់មីនកម្ពុជា បានដាក់សញ្ញាគ្រោះថ្នាក់ ក៏ប៉ុន្តែ អ្នកភូមិរបស់យើងនៅតែបរបាញ់សត្វព្រៃ ឬដើរបេះបន្លែព្រៃនៅលើភ្នំដោះក្រមុំដដែល”។
លោក ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា បានមានប្រសាសន៍ថា អ្នកភូមិមិនសូវអើពើនឹងស្លាកសញ្ញាព្រមាននេះទេ។ លោក រតនា បានមានប្រសាសន៍ថា “ពួកគេមិនអើពើ និងស្លាកសញ្ញាទេ ពីព្រោះវាជាផ្លូវកាត់សម្រាប់ការធ្វើដំណើរ ឬព្រោះតែមានបញ្ហាជីវភាព ដូច្នេះពួកគេត្រូវប្រថុយនឹងគ្រោះថ្នាក់” ។ លោកបន្ថែមទៀតថា តំបន់មានមីនទាំងអស់ មានស្លាកសញ្ញាព្រមាន។
លោកបានមានប្រសាសន៍បន្តទៀតថា “យើងស្គាល់តំបន់ភាគច្រើនបំផុតដែលទទួលរងនូវផលប៉ះពាល់ដោយសារគ្រាប់មីន ប៉ុន្តែ យើងមិនអាចដៅសញ្ញាកំណត់តំបន់ទាំងនោះអស់ទេ ពីព្រោះវាត្រូវចំណាយប្រាក់ និងពេលវេលា ព្រមទាំងធនធានរបស់យើងដែលមានកំណត់”។
បើគិតមកដល់ពេលនេះ ឆ្នាំនេះ មនុស្សចំនួន១២នាក់ហើយបានស្លាប់ដោយសារគ្រាប់មីន ឬគ្រាប់យុទ្ធភណ្ឌសល់ពីសង្គ្រាមផ្សេងទៀត ១៦នាក់បានបាត់បង់អវយវៈលើរាង្គកាយ និង៤៧នាក់ទៀតរងរបួស នេះបើយោងតាមអាជ្ញាធរមីន និងជំនួយជនរងគ្រោះកម្ពុជា។
ក្នុងចំណោមករណីស្លាប់ទាំងអស់ មានប្រាំមួយករណីកើតឡើងដោយសារតែការផ្ទុះគ្រាប់មីនប្រឆាំងរថក្រោះ កាលពីសប្តាហ៍មុន នៅក្នុងខេត្តព្រះវិហារ៕
ប្រែសម្រួលដោយ ចេវ ប៊ុននី