តំណាងគណបក្សប្រជាជនកម្ពុជាកំពុងកាន់អំណាច និងគណបក្សសង្គ្រោះជាតិ បានលើកឡើងកាលពីម្សិលមិញបន្ទាប់ពីការជួបចរចារយៈពេលបីម៉ោងនៅរដ្ឋសភាថា ការចរចាបង្កើតគណៈកម្មាធិការមួយដើម្បីស៊ើបអង្កេតភាពមិនប្រក្រតីនៅក្នុងការបោះឆ្នោតមិនមានការវិវឌ្ឍទេ។
ថ្លែងទៅកាន់ក្រុមអ្នកយកព័ត៌មានបន្ទាប់ពីកិច្ចចរចានោះ លោក សុន ឆ័យ ប្រធានក្រុមតំណាងរាស្ត្រគណបក្សសង្គ្រោះជាតិ បានមានប្រសាសន៍ថា លោកមានមន្ទិលថា គណៈកម្មាធិការនេះនឹងមិនអាចបង្កើតឡើងបានមុនថ្ងៃទី៨ ខែកញ្ញា ជាពេលចេញផ្សាយលទ្ធផលបោះឆ្នោតចុងក្រោយនោះឡើយ។
លោកមានប្រសាសន៍ថា “យើងសង្ឃឹមថា យើងនឹងទទួលបានព័ត៌មានស្ដីពីក្រុមណាមួយដែល [ គណបក្សប្រជាជនកម្ពុជា] ចង់ជ្រើសរើស” ឲ្យធ្វើការស៊ើបអង្កេត។ លោកបន្តទៀតថា តំណាងគណបក្សប្រជាជនកម្ពុជា ដែលមានវត្តមាននៅក្នុងកិច្ចចរចានោះបានលើកឡើងជាថ្មីម្ដងទៀតថា ពួកគេត្រូវជួបជាមួយមេដឹកនាំរបស់ខ្លួនសិនដើម្បីពិភាក្សាអំពីលក្ខខណ្ឌរបស់គណៈកម្មាធិការរួមនេះ មុនពេលអាចបង្កើតវាឡើង។ លោក សុន ឆ័យ បានថ្លែងថា “វាអាស្រ័យលើការប្តេជ្ញាចិត្តរបស់គណបក្សប្រជាជនកម្ពុជាក្នុងការដោះស្រាយបញ្ហានេះ”។
តែទោះជាយ៉ាងណា លោក ព្រំ សុខា រដ្ឋលេខាធិការក្រសួងមហាផ្ទៃ ដែលបានដឹកនាំគណៈប្រតិភូរបស់គណបក្សប្រជាជនកម្ពុជា បានមានប្រសាសន៍ថា ចំណុចដែលកិច្ចចរចានេះកើតឡើងទៅបាន បង្ហាញពីការវិវឌ្ឍនៅក្នុងកិច្ចប្រឹងប្រែងរបស់គណបក្សទាំងពីរដើម្បីបំបែកភាពទាល់ច្រកផ្នែកនយោបាយនាពេលបច្ចុប្បន្ន។
លោកថ្លែងថា “រឿងសំខាន់គឺថា ក្រុមការងារនៃគណបក្សទាំងពីរបានមកជួបគ្នានៅថ្ងៃនេះ។វាបង្ហាញថា យើងមានឆន្ទៈដូចគ្នាក្នុងការដោះស្រាយបញ្ហាពាក់ព័ន្ធការបោះឆ្នោតសកលកាលពីថ្ងៃទី២៨ ខែកក្កដា”។ លោកបន្តថា “ក្រុមការងារនៃគណបក្សទាំងពីរនឹងជូនដំណឹងទៅមេដឹកនាំនៃគណបក្សទាំងពីរដើម្បីសុំយោបល់ និងសិក្សាពីលទ្ធភាពជួបចរចាគ្នាជាថ្មីម្ដងទៀត”។
អំឡុងជុំទី១នៃកិច្ចចរចានៅរដ្ឋសភាកាលពីថ្ងៃទី៩ ខែសីហា គណបក្សប្រជាជនកម្ពុជា និងគណបក្សសង្គ្រោះជាតិបានព្រមព្រៀងជាគោលការណ៍ដើម្បីបង្កើតគណៈកម្មាធិការនេះឡើង និងឲ្យអង្គការសហប្រជាជាតិឃ្លាំមើលការស៊ើបអង្កេតនេះ ប៉ុន្តែ លើកឡើងថា ពួកគេនឹងពិភាក្សាជាមួយមេដឹកនាំបក្សអំពីក្រុមណាមួយឲ្យពិតប្រាកដដែលត្រូវធ្វើការស៊ើបអង្កេតនេះ។
គណបក្សសង្គ្រោះជាតិ បានអះអាងថា ការបន្លំក្នុងពេលបោះឆ្នោតដែលកើតមានគ្រប់ទីកន្លែង និងការលួចបន្លំសន្លឹកឆ្នោត ត្រូវបានគណបក្សប្រជាជនកម្ពុជារៀបចំឡើងដោយឃុបឃិតជាមួយគណៈកម្មាធិការជាតិរៀបចំការបោះឆ្នោត (គ.ជ.ប.) ហើយបានបដិសេធមិនទទួលស្គាល់លទ្ធផលនៃការស៊ើបអង្កេតណាមួយធ្វើឡើង ឬដឹកនាំដោយ គ.ជ.ប. ដែលគណបក្សប្រជាជនកម្ពុជា និយាយថា ជាស្ថាប័នតែមួយគត់ដែលមានអំណាចស្របច្បាប់ក្នុងការដោះស្រាយវិវាទបោះឆ្នោតនោះឡើយ។
គណបក្សសង្គ្រោះជាតិបានលើកឡើងហើយថា ខ្លួននឹងពិចារណាអំពីសមាសភាពអ្នកសង្កេតការណ៍បោះឆ្នោតឯករាជ្យ និងអង្គការសង្គមស៊ីវិលឲ្យដឹកនាំការស៊ើបអង្កេត ខណៈដែលគណបក្សប្រជាជនកម្ពុជាធ្លាប់បានលើកឡើងរួចមកហើយថា ខ្លួននឹងចូលរួមក្នុងការស៊ើបអង្កេតណាមួយដែលដឹកនាំដោយគ.ជ.ប. តែប៉ុណ្ណោះ។
លោក ព្រំ សុខា ថ្លែងកាលពីម្សិលមិញថា “គណបក្សប្រជាជនកម្ពុជាជឿជាក់យ៉ាងខ្លាំងថា យើងអាចឈានដល់ដំណោះស្រាយនយោបាយ ប៉ុន្តែដំណោះស្រាយនយោបាយណាមួយត្រូវដោះស្រាយតាមច្បាប់ដែលមានស្រាប់ និងក្រោមរដ្ឋធម្មនុញ្ញ” ក៏ប៉ុន្តែ លោកបានបដិសេធមិនមានប្រសាសន៍លម្អិតថា តើដំណោះស្រាយនេះជាអ្វីទេ។
ដោយមិនដល់បីសប្ដាហ៍ទៀតផងនឹងត្រូវដល់ពេលចេញផ្សាយលទ្ធផលបោះឆ្នោតចុងក្រោយ និងនៅសល់រយៈពេលជាងមួយខែទៀត មុនពេលរដ្ឋាភិបាលថ្មីត្រូវបង្កើតឡើងនោះ រហូតមកទល់ពេលនេះគណបក្សប្រជាជន មិនបានផ្តល់សញ្ញាណាមួយបង្ហាញថា ខ្លួនមានឆន្ទៈធ្វើតាមការទាមទាររបស់បក្សសង្គ្រោះជាតិ ឲ្យក្រុមមិនលម្អៀងណាមួយស៊ើបអង្កេតប្រកបដោយតម្លាភាពលើភាពមិនប្រក្រតីក្នុងពេលបោះឆ្នោតឡើយ។
គ.ជ.ប.បានប្រកាសកាលពីថ្ងៃអាទិត្យថា ខ្លួនបានច្រានចោលពាក្យបណ្ដឹងចំនួន១៧ទាក់ទិននឹងភាពមិនប្រក្រតីក្នុងពេលបោះឆ្នោត ដែលគណបក្សសង្គ្រោះជាតិបានដាក់ ហើយលោក អ៊ឹម សួស្ដី ប្រធាន គ.ជ.ប. បានមានប្រសាសន៍ថា គ.ជ.ប.នឹងលែងពាក់ព័ន្ធក្នុងការសម្រុះសម្រួលរវាងគណបក្សប្រជាជនកម្ពុជា និងគណបក្សសង្គ្រោះជាតិទៀតហើយជុំវិញការបោះឆ្នោតដែលមានការប្រទាញប្រទង់គ្នានេះ។
ទោះបីជាទាំងលោក សុន ឆ័យ និងលោក ព្រំ សុខា ថ្លែងថា ពួកលោកនឹងបន្តធ្វើការឆ្ពោះទៅរកដំណោះស្រាយនយោបាយក៏ដោយ ក៏គណបក្សទាំងពីរនៅតែបង្ហាញពីជម្រើសរៀងៗខ្លួន បើការចរចាបរាជ័យ។ នៅក្នុងសុន្ទរកថាជាសាធារណៈលើកចុងក្រោយរបស់លោកកាលពីថ្ងៃទី២ ខែសីហា លោកនាយករដ្ឋមន្ត្រី ហ៊ុន សែន បានថ្លែងថា ប្រសិនបើគណបក្សសង្គ្រោះជាតិធ្វើពហិការមិនចូលរួមនៅក្នុងរដ្ឋសភាដើម្បីជំទាស់នឹងលទ្ធផលការបោះឆ្នោតនោះ អាសនៈរបស់ពួកគេនឹងបានទៅលើគណបក្សប្រជាជនកម្ពុជា ជាគណបក្សតែមួយផ្សេងទៀតដែលបានជាប់ឆ្នោតក្នុងសភាដោយស្របច្បាប់។
ប្រសិនបើគណបក្សសង្គ្រោះជាតិសម្រេចមិនស្បថចូលកាន់មុខតំណែង និងធ្វើឲ្យរដ្ឋសភាមានសុពលភាព នៅពេលរដ្ឋសភាកោះប្រជុំនៅខែក្រោយនោះ លោក ហ៊ុន សែន បានសន្យាថា នឹងបន្តបង្កើតរចនាសម្ព័ន្ធដឹកនាំនៅរដ្ឋសភា និងអនុម័តបង្កើតគណៈរដ្ឋមន្ត្រី។
លោក សុន ឆ័យ បានមានប្រសាសន៍បន្ទាប់ពីកិច្ចចរចាកាលពីម្សិលមិញថា អំឡុងពេលចរចានោះ យ៉ាងហោចណាស់គណបក្សសង្គ្រោះជាតិមានឱកាសបង្ហាញគណបក្សប្រជាជនកម្ពុជាថា គណបក្សសង្គ្រោះជាតិគ្មានបំណងដកការទាមទាររបស់ខ្លួនឲ្យមានការស៊ើបអង្កេតឯករាជ្យនោះឡើយ ហើយសង្ឃឹមថា គណបក្សប្រជាជនកម្ពុជា នឹងខិតខំប្រឹងប្រែងពិតប្រាកដដើម្បីធ្វើសហប្រតិបត្តិការនៅក្នុងការស្វែងរកដំណោះស្រាយដែលគណបក្សទាំងពីរអាចទទួលយកបាន មុនពេលប្រជាពលរដ្ឋ “បាត់បង់ក្ដីសង្ឃឹម ហើយនាំគ្នាចេញទៅតវ៉ាតាមដងផ្លូវ”។
លោកបានមានប្រសាសន៍ថា “សព្វថ្ងៃប្រជាពលរដ្ឋមិនខ្លាចការបំភិតបំភ័យឡើយ។ ពួកគាត់ហ៊ានក្រោកឈរឡើងគ្រប់ពេល ប៉ុន្តែ យើងកំពុងជួយសង្គ្រោះប្រទេសតាមរយៈការសុំឲ្យពួកគាត់រង់ចាំរហូតដល់អ្វីៗធ្វើឡើងតាមនីតិវិធី។ ហើយយើងនៅតែបើកចំហរង់ចាំទទួលដំណឹងពីគណប្រជាជនកម្ពុជា ប្រសិនបើពួកគេផ្លាស់ប្ដូរឥរិយាបថនៅរយៈពេលពីរបីសប្ដាហ៍ក្រោយនេះ”៕
ប្រែសម្រួលដោយ តែម សុខុម