អ្នកភូមិជនជាតិភាគតិចចារ៉ាយពីរនាក់នៅក្នុងខេត្តរតនគិរីបានស្វែងរកការជ្រកកោនជាមួយអង្គការសិទ្ធិមនុស្សអាដហុក កាលពីម្សិលមិញ នៅពេលដែលពួកគាត់ត្រូវបានបង្ខំឲ្យចាកចេញពីផ្ទះសំបែងរបស់ខ្លួន បន្ទាប់ពីមានការគំរាមកំហែងពីអ្នកជិតខាងដែលបានចោទប្រកាន់ពួកគាត់ថា ចេះអំពើអាបធ្មប់មក។
យោងតាមលោក រម៉ាស ឈឿន ជាចៅរបស់ប្តីប្រពន្ធទាំងពីរនាក់នេះបានឲ្យដឹងថា លោក រម៉ាស វេម អាយុ៨០ឆ្នាំ និងអ្នកស្រី សេវ សយ អាយុ៥០ឆ្នាំត្រូវជាប្រពន្ធរបស់គាត់ត្រូវបានអ្នកភូមិរស់នៅក្នុងភូមិសោមត្រកចាស់ និងភូមិសោមត្រកថ្មីនៅក្នុងស្រុកអូរយ៉ាដាវ ចោទប្រកាន់ថា បានធ្វើអំពើអាបធ្មប់ឲ្យអ្នកភូមិជាច្រើននាក់ធ្លាក់ខ្លួនឈឺ។ លោក រម៉ាស ឈឿន និយាយថា “ប្រសិនបើពួកគាត់មិនចាកចេញពីភូមិនេះទេនោះពួកគាត់នឹងត្រូវអ្នកភូមិសម្លាប់មិនខានឡើយ”។
លោក ឆាយ ធី អ្នកសម្របសម្រួលរបស់អង្គការសិទ្ធិមនុស្សអាដហុកប្រចាំខេត្តនេះ បានមានប្រសាសន៍ថា ប្តីប្រពន្ធទាំងពីរនាក់នេះ គឺជាជនរងគ្រោះដោយរងការគំរាមកំហែងជាច្រើនថ្ងៃមកហើយ ដោយអ្នកភូមិបានទទូចឲ្យពួកគាត់ចាកចេញម្តងហើយម្តងទៀត ហើយបានបំផ្លាញដំណាំ របស់ពួកគាត់ចោលកាលពីថ្ងៃទី១២ ខែសីហា ។
លោក ឆាយ ធី បានបន្ថែមថា “ ការជួបប្រជុំរវាងមនុស្សចាស់ៗនៅក្នុងភូមិ និងប្តីប្រពន្ធទាំងពីរនាក់នេះត្រូវបានធ្វើឡើងកាលពីថ្ងៃសុក្រ ហើយអំឡុងកិច្ចប្រជុំនោះប្តីប្រពន្ធទាំងពីរនាក់នេះត្រូវបានបង្ខំឲ្យផ្តិតមេដៃលើឯកសារដោយសន្យាថា នឹងចាកចេញពីភូមិនេះ”។ លោកបានពន្យល់ថា ប្តីប្រពន្ធដែលរងការចោទប្រកាន់នេះត្រូវបានចោទប្រកាន់ថា បានយកប្រទាលមកប្រសិទ្ធីដើម្បីប្រើប្រាស់ជាមន្តអាគម។
លិខិតដែលលោក រម៉ាស វេម បានផ្តិតមេដៃនោះមានខ្លឹមសារថា “យើងជាអ្នកភូមិមកពីភូមិសោមត្រកថ្មីបានធ្វើកិច្ចសន្យាជាមួយលោក រម៉ាស វេម ពីព្រោះលោកមានប្រទាលដើម្បីធ្វើឲ្យអ្នកភូមិធ្លាក់ខ្លួនឈឺ”។
លិខិតដដែលនេះបានលើកឡើងទៀតថា “ប្រសិនបើយើងមិនព្យាបាលអ្នកដែលធ្លាក់ខ្លួនឈឺទេនោះ ពួកគាត់នឹងស្លាប់មិនខាន។ហេតុដូច្នោះហើយយើងត្រូវតែបណ្តេញគាត់ចេញពីភូមិរបស់យើង”។
ឃាតកម្មឬការបណ្តេញប្រជាជនដែលត្រូវបានចោទប្រកាន់ថា បានធ្វើអំពើអាបធ្មប់ ចេញពីភូមិនោះមិនមែនជារឿងប្លែកទេនៅតាមតំបន់ជនបទក្នុងប្រទេសកម្ពុជា ដោយអ្នកដែលត្រូវគេចោទថា ចេះអំពើអាបធ្មប់នោះតាមធម្មតាគឺជាអ្នកដែលត្រូវគេទម្លាក់កំហុសចំពោះការកើតមានជំងឺផ្សេងៗ និងដោយសារប្រទាល។
លោក ម៉ា វិចិត្រ អធិការនគរបាលស្រុក អូរយ៉ាដាវបានមានប្រសាសន៍ថា លោកបានបញ្ជាឲ្យមន្ត្រីនគរបាលក្រោមឱវាទរបស់លោករៀបចំកិច្ចប្រជុំមួយជាមួយអ្នកភូមិដើម្បីពន្យល់ប្រាប់ពួកគាត់ថា ការបណ្តេញមនុស្សចេញនោះគឺផ្ទុយនឹងច្បាប់ហើយ។ លោក ម៉ា វិចិត្រ បានមានប្រសាសន៍ថា “ក្រោយមកមិនមានការចោទប្រកាន់ច្រើនពីអំពើអាបធ្មប់ច្រើននោះទេ ប៉ុន្តែ ឥឡូវនេះការចោទប្រកាន់ទាំងនេះកើតមានជាថ្មីទៀតហើយ”។
លោកបានបន្ថែមថា កាលពីពេលមុននគរបាលបានរៀបចំកិច្ចប្រជុំមួយដោយមានការចូលរួមពីអ្នកភូមិជនជាតិភាគតិចរាប់រយនាក់ ហើយអំឡុងកិច្ចប្រជុំនោះនគរបាលបានប្រាប់ពួកគាត់ថា ការសម្លាប់នរណាម្នាក់ដោយចោទប្រកាន់ថា ចេះអំពើអាបធ្មប់នោះនឹងត្រូវផ្តន្ទាទោសតាមច្បាប់”។លោកបានមានប្រសាសន៍ថា ប៉ុន្តែ “ជំនឿរបស់អ្នកភូមិពិបាកផ្លាស់ប្តូរណាស់”៕
ប្រែសម្រួលដោយ សោម សារុន