ក្រុម​​ប្រឹក្សា​ធម្មនុញ្ញ​ច្រានចោល​ពាក្យ​បណ្តឹ​ងចំនួន​បួន​​ពីភាព​មិន​ប្រក្រតី

កាល​ពី​ម្សិល​មិញ ក្រុម​ប្រឹក្សា​ធម្មនុញ្ញ បាន​តម្កល់​សេចក្តី​សម្រេច​របស់​គណៈកម្មាធិការ​ជាតិរៀប​ចំ​ការ​បោះ​ឆ្នោត (គ.ជ.ប.) ដែល​បាន​​ច្រាន​ចោល​ពាក្យ​បណ្តឹង​ចំនួន​បួន​របស់​គណ​បក្ស​សង្គ្រោះ​ជាតិអំពី​ភាព​មិន​ប្រក្រតី​ដែល​កើត​ឡើង​អំឡុង​ការ​បោះ​ឆ្នោត​កាល​ពី​ថ្ងៃទី​២៨ខែ​កក្កដា។

ក្រុម​ប្រឹក្សា​ធម្មនុញ្ញ​បាន​ផ្ញើ​លិខិតចំនួន ​​បួន​ច្បាប់​ដាច់​ដោយ​ឡែក​ពីគ្នា​ទៅ​លោក នូ ចំរើន និង​លោក រស់ សួ តំ​ណាង​គណបក្ស​សង្គ្រោះ​ជាតិ​ថា ក្រុម​ប្រឹក្សា​ធម្មនុញ្ញបាន​បើក​កិច្ច​ប្រជុំ​កាល​ពី​ម្សិលមិញ ហើយ​បាន​ច្រាន​ចោល​ពាក្យ​​បណ្តឹង​​ទាំង​បួន​របស់​គណបក្ស​ប្រឆាំង​ជំទាស់​ទៅ​នឹង​សេចក្តីសម្រេច​​របស់​​ គ.ជ.ប.​​ដែល​បាន​ច្រា​ន​ចោល​​​ពាក្យប​ណ្តឹង​នេះ​កាល​ពី​ដើម​​ខែ​​នេះ​។

លិខិត​​នីមួយៗ​លើកឡើង​​យោង​តាម​លិខិត​​​របស់ គ.ជ.ប. ​កាលពី​ពេលមុន ដែល​បាន​ច្រាន​ចោល​ពាក្យ​បណ្តឹង​ទាំង​នេះ​ថា “ក្រុម​ប្រឹក្សា​ធម្មនុញ្ញគិត​ថា លិខិត​ចុះ​ថ្ងៃទី​១០ ខែ​សីហា ឆ្នាំ​២០១៣​របស់​គណៈ​កម្មាធិការ​ជាតិ​រៀប​ចំការ​បោះ​ឆ្នោត​អនុវត្ត​ត្រឹមត្រូវតាម​ច្បាប់​ហើយ”។ លិខិត​ទាំង​នេះ​មិន​បាន​សរសេរ​លម្អិត​ពី​ការ​ចោទ​ប្រកាន់​ពាក់ព័ន្ធ​ភាព​មិន​ប្រក្រតីទេ ប៉ុន្តែបាន​សំដៅ​ដល់​ករណី​ចំ​នួន​ពីរ​កើត​​ឡើង​នៅក្នុង​រាជធានី​ភ្នំពេញ​ និង​ពីរ​ករណីទៀត​កើ​ត​ឡើង​​​នៅក្នុង​ខេត្ត​សៀម​រាប។

ពាក្យ​បណ្តឹង​ទាំង​នេះ​មិន​ទាក់​ទង​​នឹង​ការ​ប្រកាស​លទ្ធផល​បឋម​របស់​​គណៈកម្មាធិការ​ជាតិ​រៀប​ចំ​ការ​បោះ​ឆ្នោតដែល​បាន​បង្ហាញ​ថា គណបក្ស​ប្រជា​ជន​កម្ពុជា​កំពុង​កាន់​អំណាច​ទទួល​បាន​ចំនួន​៦៨​អាសនៈនិង​គណ​បក្ស​​សង្គ្រោះ​ជាតិ​ទទួល​បានចំនួន​​៥៥​អាសនៈ​ទេ ប៉ុន្តែ​ ផ្ទុយ​ទៅ​វិញគឺ​លើក​ឡើង​  ពី​បញ្ហា​ដែល​កើត​ឡើង​នៅ​ថ្ងៃ​បោះ​ឆ្នោត​តែប៉ុណ្ណោះ។

លោក អ៊ុត ឈន អ្នក​នាំពាក្យ​ក្រុម​ប្រឹក្សា​ធម្មនុញ្ញ​បាន​មាន​ប្រសាសន៍ថា “កិច្ច​ប្រជុំនៅ​ថ្ងៃ​នេះ​គឺ​មិន​មែន​ដើម្បី​ដោះ​ស្រាយ​ពាក្យ​បណ្តឹង​ដែល​ជំទាស់​នឹង​ការ​ប្រកាស​លទ្ធផល​បោះ​ឆ្នោត​បឋមឡើយ”។​ លោក​បាន​មាន​ប្រសាសន៍​បន្ថែម​ទៀត​ថា សមាជិកក្រុម​ប្រឹក្សា​ធម្មនុញ្ញ​​ប្រាំ​បី​រូប​ក្នុង​ចំណោម​សមាជិក​ប្រាំបួន​រូបបាន​ចូល​រួម​ក្នុង​កិច្ច​ប្រជុំ​កាលពី​ម្សិលមិញ។

លោក យឹម សុវណ្ណ អ្នក​នាំពាក្យ​គណបក្ស​សង្គ្រោះ​ជាតិ​​បាន​មាន​ប្រសា​សន៍ថា ពាក្យ​បណ្តឹង​ទាំងបួន​ដែលក្រុម​ប្រឹក្សា​ធម្មនុញ្ញបាន​ច្រាន​ចោលនោះ គឺ​ជា​ពាក្យ​បណ្តឹង​តូចតាច​តែ​ប៉ុណ្ណោះ ហើយ​ថា ពាក្យ​បណ្តឹង​ពាក់​ព័ន្ធ​ភាព​មិន​ប្រក្រតី​ដែលរឹត​តែ​ធ្ងន់ធ្ងរជាងនេះ​នោះ​​មិន​ទាន់​ត្រូវ​បានធ្វើ​ការ​​ដោះ​ស្រាយ​នៅ​ឡើយ​ទេ។

លោក​បាន​មាន​ប្រសាសន៍ថា “សម្រាប់​ពាក្យ​បណ្តឹង​ដែល​ធ្ងន់​ធ្ងរ​បំផុត​នោះ យើង​មិន​​ទាន់​ទទួល​បាន​ការ​ឆ្លើយ​តប​នៅឡើយ​ទេ ប៉ុន្តែ យើង​​មាន​ភ័ស្តុតាង​គ្រប់​គ្រាន់​ពាក់ព័ន្ធ​ភាព​មិន​ប្រក្រតី​ទាំងនោះ”។​ លោក​បាន​ប​ន្ថែម​ថាគណបក្ស​សង្គ្រោះ​ជាតិដែល​​និយាយ​ថា ​គេ​​បាន​លួច​បន្លំ​សន្លឹក​ឆ្នោត​របស់​ខ្លួន​នោះ នឹង​នៅ​តែ​ជំរុញឲ្យ​មាន​ការ​ស៊ើប​អង្កេត​ដោយ​ឯករាជ្យ​អំពី​ភាព​មិន​ប្រក្រតី​ពាក់ព័ន្ធ​ការ​បោះ​ឆ្នោត​ដដែល​ក្រៅ​ពី​ គ.ជ.ប. និង​ក្រុម​ប្រឹក្សា​ធម្មនុញ្ញ។

លោក គល់ បញ្ញា នាយក​គណៈ​កម្មាធិការ​ដើម្បី​ការ​បោះ​ឆ្នោត​ដោយ​សេរី​និង​​យុត្តិធម៌​នៅកម្ពុជា​បាន​មាន​ប្រសាសន៍​កាល​ពី​ម្សិល​មិញថា សេចក្តី​សម្រេច​ដ៏ឆាប់​រហ័ស​របស់​ក្រុម​ប្រឹក្សា​នេះ​នៅថ្ងៃដំបូង​នៃការ​ពិនិត្យ​សើ​រើលើពាក្យ​បណ្តឹង​ទាំង​នេះ​ បាន​ចាត់​ទុក​ស្ថាប័ន​នេះថា ជាស្ថាប័ន​ប្រថាប់ត្រា​លើ​សេចក្តី​​សម្រេ​ច​របស់​​គណៈកម្មាធិការ​ជាតិ​រៀប​ចំ​ការ​បោះ​ឆ្នោតប៉ុណ្ណោះ។

លោក​បាន​មាន​​ប្រសាសន៍ថា “ចាំបាច់​ត្រូវ​មាន​ដំណើរ​ការ​ត្រឹមត្រូវ​មួយ​ចំនួន​។ ពួកគេ​មិន​អាច​គ្រាន់​តែ​ច្រានចោល​ពាក្យ​បណ្តឹង​​ទាំងនេះ​ ហើយ​មិន​អនុញ្ញាត​ឲ្យ​នរណា​​ម្នាក់​ដឹង​ពី​មូលហេតុ​ដែល​ខ្លួន​ច្រាន​ចោល​ពាក្យ​​បណ្តឹង​ទាំង​នោះ​ឡើយ”។

“វា​នឹង​ប៉ះពាល់ដល់ជំនឿទុកចិត្ត​លើ​ក្រុម​ប្រឹក្សា​នេះទៅវិញទេ ពីព្រោះឥឡូវ​នេះ​ការ​បោះ​ឆ្នោត​បាន​ធ្វើឡើង​​ជា​សាធារណៈ ហើយ​​សហគមន៍អន្ត​រជាតិ​កំពុង​ឃ្លាំមើល​ដំណើរ​ការ​របស់គណៈកម្មាធិការ​ជាតិ​រៀប​ចំ​ការ​បោះ​​ឆ្នោតនិង​​ក្រុម​ប្រឹក្សា​ធម្មនុញ្ញក្នុង​ការ​ដោះ​ស្រាយរាល់​ពាក្យ​បណ្តឹង​ ហើយ​វា​ហាក់ដូច​ជា​ពួកគេ​មិន​បាន​ចាត់​វិធានការ​ឲ្យ​បាន​ហ្ម​ត់​ចត់​អ៊ីចឹង”។

គណៈកម្មាធិការ​ជាតិ​រៀប​ចំ​ការ​បោះ​ឆ្នោត​ទទួលបាន​ពាក្យ​បណ្តឹង​សរុប​ចំនួន​១២៥បណ្តឹង​ពាក់ព័ន្ធ​ការ​បោះ​ឆ្នោត​ និង​ការ​​រាប់​សន្លឹក​ឆ្នោត​កាល​ពី​ថ្ងៃ​ទី​២៨ ខែ​កក្កដា រួមមាន​បណ្តឹង​ចំនួន​៩០​ត្រូវ​បាន​ដាក់​ជូន​ដោយ​​គណបក្ស​សង្គ្រោះ​ជាតិ បណ្តឹង​ចំនួន​១៥​ត្រូវ​បាន​ដាក់ជូន​ដោយ​គណបក្ស​ប្រជា​ជន​កម្ពុជា បណ្តឹង​ចំនួន​១២​ត្រូវ​បាន​ដាក់​ជូន​ដោយ​ប្រជា​ពលរដ្ឋនិង​បណ្តឹង​ដែលនៅ​សេស​​សល់​ពីនោះ​ត្រូវ​បាន​ដាក់ជូន​ដោយ​អ្នក​សង្កេតការ​បោះ​ឆ្នោត​មន្ត្រីក្នុង​មូលដ្ឋាន និង​​គណបក្ស​នយោបាយ​តូចៗ។

ក្នុង​​ចំណោម​ពាក្យ​បណ្តឹង​ទាំង​១២៥​ដែល​ គណៈកម្មាធិការ​ជាតិ​រៀប​ចំ​ការ​បោះ​ឆ្នោត​ទទួលបាននោះ បណ្តឹង​ចំនួន​២៥ត្រូវ​បាន​​ដោះ​ស្រាយរួច​ហើយ ហើយ​បណ្តឹង​ចំនួន ២៤​ត្រូវ​បាន​ច្រានចោល និង​បណ្តឹង​​​ចំនួន​៣២​ទៀត​ត្រូវ​បាន​បដិសេធ​មិន​ធ្វើការ​ដោះ​ស្រាយ​​​ដោយ​សារ​គ្មាន​ការ​ជូន​ដំណឹង​ឲ្យ​បាន​មុន​ពេល​​បិទ​ការ​ទទួល​របាយ​ការណ៍ស្តីពី​ភាព​មិន​ប្រក្រតី​​នៅ​​ថ្ងៃទី​៦ខែ​សីហា​នោះ​ឡើយ​៕

(រាយការ​ណ៍បន្ថែមដោយ Alex Willemyns)
ប្រែសម្រួលដោយ សោម សារុន

© 2013, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.