មន្ត្រីមូលដ្ឋានបានឲ្យដឹងថា សាកសពក្មេងប្រុសជំទង់ដែលបាត់ខ្លួនម្នាក់ត្រូវបានប្រទះឃើញនៅក្នុងប្រឡាយទឹកមួយកន្លែងដែលបានលិចលង់ដោយទឹកជំនន់កាលពីថ្ងៃច័ន្ទ ធ្វើឲ្យចំនួនមនុស្សស្លាប់ដោយសារការលង់ទឹកនៅក្នុងខេត្តបន្ទាយមានជ័យក្នុងឆ្នាំនេះកើនដល់ប្រាំបួននាក់ហើយ។
ក្មេងប្រុសឈ្មោះ ឈួយ តុលា អាយុ១៣ឆ្នាំ ដែលរស់នៅជាមួយម្តាយមីងរបស់ខ្លួនក្នុងឃុំម៉ាឡៃ ស្រុកម៉ាឡៃ បានទៅហែលទឹកលេងតែម្នាក់ឯងកាលពីថ្ងៃអាទិត្យហើយបានបាត់ដំណឹងតាំងពីពេលនោះមក នេះបើយោងតាមលោក សៀង សុផាត មេឃុំឫស្សីក្រោក នៅក្នុងស្រុកមង្គលបុរីក្បែរខាង ។
លោកបានមានប្រសាសន៍ថា “ប្រជាជនដែលបានឃើញហេតុការណ៍នេះ មិនអាចជួយជនរងគ្រោះបានទេ ព្រោះទឹកជំនន់នៅហូរខ្លាំងនៅឡើយ។ ប្រឡាយនេះមានជម្រៅជាងបួនម៉ែត្រក្នុងទឹកជំនន់”។ លោកបានបន្ថែមថា សាកសពក្មេងប្រុសរូបនេះត្រូវបានគេប្រទះឃើញនៅខ្សែរទឹកខាងក្រោម ប្រហែលមួយគីឡូម៉ែត្រពីកន្លែងដែលក្មេងនេះទៅហែលទឹកលេង។
លោក កែវ វី អនុប្រធាននាយកដ្ឋានព័ត៌មាននៅគណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងថា មនុស្សប្រាំនាក់ក្នុងចំណោមប្រាំបួននាក់ដែលបានលង់ទឹកស្លាប់នៅក្នុងខេត្តបន្ទាយមានជ័យនាឆ្នាំនេះ គឺជាកុមារ។ ក្មេងពីរនាក់ទៀតបានលង់ទឹកស្លាប់នៅក្នុងខេត្តកំពង់ធំ ដែលតំបន់មួយចំនួនបានលិចលង់ ខណៈស្ទឹងសែនបានឡើងដល់កម្រិតប្រកាសអាសន្នកាលពីសប្តាហ៍មុន៕
ប្រែសម្រួលដោយ ចេវ ប៊ុននី