34 C
Phnom Penh

លោក ហ៊ុន សែន ស្ងៀមស្ងាត់​​​ខុស​​​ធម្មតា​​​ពេល​​​មាន​​​ភាព​​​ជាប់​​​គាំង

ដោយ ឌឹ ខេមបូឌា ដេលី

បទវិភាគ

អំឡុង​​​រយៈ​​​ពេល​​​បី​​​សប្តាហ៍​​​ចុង​​​ក្រោយ​​​នេះ ​​​ការខ្វែង​​​គំនិត​​​​​​រវាង​​​គណ​​​បក្ស​​​ប្រជាជន​​​កម្ពុជា និង​​​គណ​​​បក្ស​​​សង្គ្រោះ​​​ជាតិ បាន​​​ធ្វើ​​ឲ្យ​​​បរិយាកាស​​​នយោបាយ​​​មាន​​​ភាព​​​តាន​​​តឹង​​​កាន់​​​តែ​​​ខ្លាំង​​​ឡើង​​​។

ប៉ុន្តែ អ្វី​​​ដែល​​​គួរ​​​ឲ្យ​​​កត់​​​សម្គាល់​​​ជាង​​​នេះ​​​ទៅ​​​ទៀត​​​នោះ គឺ​​​ភាព​​​​​​ស្ងៀមស្ងាត់​​​របស់​​​លោក​​​នាយក​​​រដ្ឋ​​​មន្ត្រី ហ៊ុន សែន​​​ ដែល​​​បាន​​​បង្ហាញ​​​ខ្លួន​​​ជា​​​សាធារណៈ​​​កាល​​​ពី​​​១៨​​​ថ្ងៃ​​​មុន​​​ នៅ​​​ពេល​​​​​​លោក​​​ថ្លែង​​​ទៅ​​​កាន់​​​ប្រជា​​​កសិករ​​​នៅ​​​ក្នុង​​​ខេត្ត​​​កណ្តាល​​​ ហើយ​​​បាន​​​ព្រមាន​​​គណ​​​បក្ស​​​ប្រឆាំង​​​ថា ការ​​​មិន​​​ទទួល​​​យក​​​អាសនៈ​​​របស់​​​ខ្លួន​​​នៅ​​​សភា​​​អាច​​​ធ្វើ​​​ឲ្យ​​​អាសនៈ​​​ទាំង​​​នោះ​​​បាន​​​មក​​​លើ​​​គណ​​​បក្ស​​​ប្រជា​​​ជន​​​កម្ពុជា។​​​

ផ្ទុយ​​​ពី​​​សព្វដង​​​ ពេល​​​លោក​​​ថ្លែង​​​សុន្ទរកថាដែល​​​ត្រូវ​​​បាន​​​ចាក់​​​ផ្សាយ​​​តាម​​​ទូរទស្សន៍​​​ស្ទើរ​​​រាល់​​​ថ្ងៃ លោក​​​នាយក​​​រដ្ឋ​​​មន្ត្រី​​​​​​បាន​​​បាត់​​​មុខ​​​ពី​​​សាធារណជន​​​តាំង​​​ពី​​​ថ្ងៃ​​​ទី​​​២ ខែ​​​សីហា​​​មក។

លោក​​​នាយក​​​រដ្ឋ​​​មន្ត្រីបាន​​​រក្សា​​​ភាព​​​ស្ងៀមស្ងាត់អំឡុង​​​ពេល​​​មាន​​​ការ​​​ពង្រឹង​​​សន្តិសុខ​​​ជា​​​បន្ត​​​បន្ទាប់​​​ក្នុង​​​រាជ​​​ធានី​​​ភ្នំ​​​ពេញ បន្ទាប់​​​ពី​​​គណ​​​​​​បក្ស​​​សង្គ្រោះ​​​ជាតិ​​​បាន​​​សន្យា​​​រៀប​​​ចំ​​​មហា​​​បាតុ​​​​​​កម្ម​​​ ប្រសិន​​​បើ​​​គណ​​​បក្ស​​​ប្រជា​​​ជន​​​មិន​​​ផ្ទេរ​​​អំណាច​​​ និង​​​ប្តេជ្ញា​​​ធ្វើ​​​ការ​​​ស៊ើប​​​អង្កេត​​​ដោយ​​​ឯករាជ្យមួយអំ​​​ពីភាព​​​មិន​​​ប្រក្រតី​​​ក្នុង​​​ការ​​​បោះ​​​ឆ្នោត​​​ទេ​​​នោះ​​​។

ភាព​​​​​​ស្ងៀម​​​ស្ងាត់នេះក៏​​​ត្រូវ​​​គេ​​​កត់​​​សម្គាល់​​​ឃើញថា​​​បន្ទាប់​​​ពី​​​គណ​​​បក្ស​​​ប្រជា​​​ជន​​​​​​បាន​​​ទទួល​​​លទ្ធ​​​ផល​​​អាក្រក់​​​បំផុតនៅ​​​ក្នុង​​​ការ​​​បោះ​​​ឆ្នោត​​​ជ្រើស​​​តាំង​​​តំណាង​​​រាស្ត្រ​​​​​​គិត​​​ចាប់​​​​​​តាំង​​​ពី​​​ឆ្នាំ​​​១៩៩៨​​​មក គឺ​​​រយៈ​​​ពេល​​​ត្រឹម​​​តែ​​​មួយ​​​ឆ្នាំ​​​តែ​​​ប៉ុណ្ណោះ​​​ បន្ទាប់​​​ពី​​​លោក ហ៊ុន សែន​​​ បាន​​​ទម្លាក់​​​អតីត​​​នាយក​​​រដ្ឋ​​​មន្ត្រី​​​ នរោត្តម រណឫទ្ធិ ពី​​​អំណាច​​​ក្នុង​​​​​​ការ​​​ប្រយុទ្ធ​​​គ្នា​​​នៅតាម​​​ដង​​​ផ្លូវ​​​ក្នុង​​​​​​រាជ​​​ធានី​​​ភ្នំ​​​ពេញ​​​។

ទោះ​​​ជា​​​យ៉ាង​​​ណា​​​ មន្ត្រី​​​គណ​​​បក្ស​​​ប្រជា​​​ជន​​​បាន​​​អះអាង​​​កាល​​​ពី​​​ម្សិល​​​មិញ​​​ថា លោក​​​នាយក​​​​​​រដ្ឋ​​​មន្ត្រី​​​ ហ៊ុន សែន រក្សា​​​ភាព​​​ស្ងៀម​​​ស្ងាត់​​​ព្រោះ​​​​​​តែ​​​ចង់​​​ទុក​​​ឱកាស​​​ឲ្យ​​​គណ​​​បក្ស​​​ទាំង​​​ពីរ​​​បង្កើត​​​រដ្ឋា​​​ភិបាល​​​ និង​​​រៀប​​​ចំ​​​ផែន​​​ការ​​​សម្រាប់​​​ការ​​​កាន់​​​អំណាច​​​របស់​​​គណ​​​បក្ស​​​ប្រជាជន​​​កម្ពុជា​​​រយៈ​​​ពេល​​​ប្រាំ​​​ឆ្នាំ​​​បន្ទាប់​​​នេះ។

លោក ផៃ ស៊ីផាន អ្នក​​​នាំ​​​ពាក្យ​​​ទី​​​ស្តីការ​​​គណៈ​​​រដ្ឋ​​​មន្ត្រី​​​ បាន​​​លើក​​​ឡើង​​​ថា ក្នុង​​​នាម​​​ជា​​​ប្រមុខ​​​រដ្ឋា​​​ភិបាល​​​​​​អំឡុង​​​ពេល​​​មាន​​​ភាព​​​ជាប់​​​គាំង​​​ផ្នែក​​​នយោ​​​បាយ​​​ និង​​​អំឡុង​​​ពេល​​​ដែល​​​អាច​​​កើត​​​មាន​​​អស្ថិរភាព​​​សង្គម​​​ វា​​​ជា​​​រឿង​​​សំខាន់​​​សម្រាប់​​​នាយក​​​រដ្ឋ​​​មន្ត្រី​​​​​​ក្នុង​​​ការ​​​ដក​​​ឃ្លា​​​ពី​​​រឿង​​​នយោ​​​បាយ​​​។ លោក​​​មាន​​​ប្រសាសន៍​​​ថា “គាត់​​​ [លោក ហ៊ុន សែន] តែង​​​​​​រក្សា​​​ភាព​​​​​​ស្ងៀម​​​​​​ស្ងាត់​​​អំឡុង​​​ពេល​​​មាន​​​ភាព​​​តាន​​​តឹង​​​កើន​​​ឡើង។ សម្តេច​​​នាយក​​​រដ្ឋ​​​មន្ត្រី​​​បន្ត​​​រក្សា​​​អព្យា​​​ក្រឹត​​​ភាព​​​ និង​​​ទុក​​​ឲ្យ​​​គណ​​​បក្ស​​​ទាំង​​​ពីរ​​រួម​​​គ្នាដោះ​​​ស្រាយ​​​បញ្ហា”។

ចាប់​​​តាំង​​​ពី​​​មាន​​​កិច្ច​​​ចរចា​​​នៅ​​​ថ្ងៃ​​​ទី​​​៩ ខែ​​​សីហា ស្តី​​​ពីការ​​​បង្កើត​​​គណៈ​​​កម្មា​​​ធិការ​​​រួម​​​មួយ​​​ដើម្បី​​​ស៊ើប​​​អង្កេត​​​ភាព​​​មិន​​​ប្រក្រ​​​តី​​​ក្នុង​​​ការ​​​បោះ​​​ឆ្នោត​​​ កិច្ច​​​សហការ​​​រវាង​​​​​គណ​​​បក្ស​​​ប្រជា​​​ជន និង​​​គណបក្ស​​​សង្គ្រោះ​​​ជាតិ​​​ បាន​​​ជាប់​​​គាំង​។ លោក ផៃ ស៊ីផាន បាន​​​ឲ្យ​​​ដឹង​​​ថា ប្រសិន​​​បើ​​​ការ​​​​​​ចរចា​​​នៅ​​​តែ​​​បន្ត​​​ជាប់​​​គាំង​​​ទៀត​​​ លោក​​​ហ៊ុន សែន ​​​​​ប្រហែល​​​ជា​​​លូក​​​ដៃ​​​​​​ហើយ​​​ចរចា​​​ជាមួយ​​​លោក សម រង្ស៊ី តែ​​​ម្តង​​​។ លោក​​​បាន​​​មាន​​​ប្រសាសន៍ថា “ប្រសិន​​​បើ​​​គណៈ​​​កម្មា​​​ធិការ​​​ [រួម​​​រវាង​​​គណ​​​បក្ស​​​ប្រជា​​​ជន​​​ កម្ពុជា និង​​​គណ​​​បក្ស​​​សង្គ្រោះ​​​ជាតិ] មិន​​​អាច​​​ដោះ​​​ស្រាយ​​​​​​បញ្ហា​​​នេះ​​​បាន​​​ទេ​​​នោះ​​​ លោក សម រង្ស៊ី និង​​​សម្តេច នឹង​​​ជួប​​​ពិភាក្សា​​​គ្នា​​​”។

លោក ជាម យៀប សមាជិក​​​សភា​​​ជាន់​​​ខ្ពស់​​​គណ​​​បក្ស​​​ប្រជា​​​ជន​​​ បាន​​​អះ​​​អាង​​​ថា លោក ហ៊ុន សែន បាន​​​រក្សា​​​ភាព​​​​​​ស្ងៀម​​​ស្ងាត់​​​​​​​​​ចាប់​​​តាំង​​​ពី​​​ថ្ងៃ​​​បោះ​​​ឆ្នោត​​​មក ពីព្រោះ​​​គាត់​​​ជាប់​​​រវល់​​​ត្រៀម​​​ខ្លួន​​​សម្រាប់​​​ការ​​​ដឹក​​​នាំ​​​ប្រទេសក្នុង​​​នាម​​​ជា​​​នាយក​​​រដ្ឋ​​​មន្ត្រី​​​​​​​​​រយៈ​​​ពេល​​​ប្រាំ​​​ឆ្នាំ​​​ទៀត។ លោក​​​បាន​​​មាន​​​ប្រសាសន៍ថា “គាត់​​​ជាប់​​​រវល់​​​​​​ត្រៀម​​​ខ្លួន​​​អនុវត្ត​​​គោល​​​នយោ​​​បាយ​​​បក្ស​​​ ដើម្បីធានា​​​ថា ការ​​​អនុវត្ត​​​នេះ​​​ស្រប​​​តាមអ្វី​​​ដែល​​​បាន​​​សន្យា​​​អំឡុង​​​យុទ្ធនាការ​​​ឃោស​​​នា​​​បោះ​​​ឆ្នោត​​​” ដោយ​​​លោក​​​បាន​​​បន្ថែម​​​ថា គណ​​​បក្ស​​​នេះ​​​ក៏​​​កំពុងតែ​​​ព្យាយាម​​​ស្វែង​​​យល់​​​អំពី​​​​​​មូល​​​ហេតុ​​​ដែល​​​ធ្វើ​​​ឲ្យ​​​ប្រជា​​​ប្រិយ​​​ភាព​​​របស់​​​ខ្លួន​​​ធ្លាក់​​​ចុះ​​​យ៉ាង​​​ខ្លាំង​​​ផង​​​ដែរ។ លោក​​​បាន​​​ថ្លែង​​​ថា “យើងកំពុង​​​តែស្វែង​​​យល់ពី​​​មូល​​​ហេតុ​​​ដែលធ្វើ​​​ឲ្យ​​​យើង​​​បាត់​​​បង់​​​ការ​​​គាំទ្រ​​​”។

ក្រុមអ្នក​​​វិភាគ​​​នយោ​​​បាយ​​​បាន​​​លើក​​​ឡើង​​​កាល​​​ពី​​​ម្សិល​​​មិញ​​​ថា ការ​​​ដោះ​​​ស្រាយ​​​បញ្ហា​​​ផ្ទៃ​​​ក្នុង​​​របស់​​​គណ​​​បក្ស​​​មួយ​​​​​​ដែល​​​បាន​​​បាត់​​​បង់​​​ប្រជា​​​ប្រិយ​​​ភាព​​​យ៉ាង​​​ខ្លាំង​​​ រួម​​​ជាមួយ​​​នឹង​​​ការ​​​ប្រុង​​​ប្រយ័ត្ន​​​ក្នុង​​​ការ​​​ដោះ​​​ស្រាយ​​​បញ្ហា​​​ជាមួយ​​​បក្ស​​​ប្រឆាំង​​​ គឺ​​​ទំនង​​​ជា​​​មូល​​​ហេតុ​​​ដែល​​​ធ្វើ​​​ឲ្យ​​​នាយក​​​រដ្ឋ​​​មន្ត្រី​​​រូប​​​នេះ​​​រក្សា​​​ភាព​​​ស្ងៀមស្ងាត់​​​។

លោក កែម ឡី អ្នក​​​វិភាគនយោ​​​បាយ​​​ឯករាជ្យ​​​ បាន​​​មាន​​​ប្រសាសន៍ថា “នាយក​​​រដ្ឋ​​​មន្ត្រី​​​រូប​​​នេះតែង​​​ទុក​​​ឲ្យ​​​គេ​​​​​​ពិភាក្សា​​​អំពី​​​បញ្ហា​​​ទាំង​​​ប៉ុន្មាន​​​ រួចហើយ​​​ទើប​​​គាត់​​​វិភាគ​​​ និង​​​ស្វែង​​​​​​រក​​​​​យុទ្ធសាស្ត្រ​​​វាយ​​​បក​​​វិញ​​​” ដោយ​​​បន្ថែម​​​ថា មាន​​​ផ្លូវ​​​ពីរ​​​ដែល​​​លោក ហ៊ុន សែន អាច​​​ជ្រើស​​​​​​យក​​​ដើម្បី​​​ឆ្លើយ​​​តប​​​ទៅ​​​នឹង​​​ការ​​​អំពាវ​​​នាវ​​​របស់​​​គណ​​​បក្ស​​​សង្គ្រោះ​​​ជាតិ​​​ឲ្យ​​​មាន​​​ការ​​​ធ្វើ​​​កំណែ​​​ទម្រង់​​​។

លោក​​​បាន​​​ថ្លែង​​​ថា “ផ្លូវល្អ គឺលោក ហ៊ុន សែន​​​ មាន​​​​​​ឱកាស​​​ដ៏​​​ប្រសើ​​​រមួយ​​ក្នុង​​​ការ​​​ធ្វើ​​​ជា​​​មនុស្ស​​​ឆ្លាត​​​វៃ​​​តាម​​​រយៈ​​​ការ​ពង្រឹង​​​លទ្ធិ​​​ប្រជា​​​ធិប​​​តេយ្យ​​​ និង​​​នីតិ​​​រដ្ឋ​​​ ចំណែក​​​ឯផ្លូវ​​​អាក្រក់​​​វិញ​​​គឺការ​​​​​​បង្ក្រាប​​​គណ​​​បក្ស​​​ផ្សេងៗ​​​ទៀត​​​ដើម្បី​​​យក​​​ឈ្នះ”។

អ្នក​​​វិភាគ​​​នយោ​​​បាយ​​​ម្នាក់​​​ទៀត គឺ​​​លោក ឡៅ ម៉ុងហៃ បានលើក​​​ឡើង​​​ថា ការ​​​គិត​​​គូរ​​​ឡើង​​​វិញ​​​បន្ទាប់​​​ពី​​​មាន​​​ការ​​​ធ្លាក់​​​ចុះ​​​ប្រជា​​​ប្រិយ​​​ភាព​​​បែប​​​នេះ​​​ អាច​​​ជា​​​មូលហេតុ​​​ដែល​​​ធ្វើ​​​ឲ្យ​​​លោកនាយក​​​រដ្ឋ​​​មន្ត្រី​​​ ហ៊ុន សែន មិន​​​សូវជា​​​និយាយ​​​ស្តី​​​ជា​​​សាធា​​​រ​​​ណៈ​​​ក្នុង​​​រយៈ​​​ពេល​​​ប៉ុន្មាន​​​​​​សប្តាហ៍​​​ថ្មីៗ​​​នេះ។ លោក​​​​​​មាន​​​ប្រសា​​​សន៍​​​បន្ត​​​ថា “យើង​​​សង្កេត​​​ឃើញថា ក្រៅ​​​ពី​​​លោក ស ខេង ថ្នាក់​​​ដឹក​​​នាំ​​​កំពូល​​​របស់​​​គណ​​​បក្ស​​​ប្រជា​​​​​​ជន​​​មិន​​​បាន​​​ថ្លែង​​​ជា​​​សាធារណៈ​​​សោះ​​​។ វា​​​ស្តែង​​​​​​ឲ្យ​​​ឃើញ​​​ថា ប្រហែល​​​ជា​​​មាន​​​ការ​​​លំបាក​​​​​​​ក្នុង​​​ការ​​​កំណត់​​​តួនាទី​​​នៅ​​​ក្នុង​​​បក្ស​​​ ហើយ​​​​បញ្ហា​​​នេះ​​​ចាំ​​​បាច់​គឺ​​ត្រូវ​​​មាន​​​ការ​​​ដោះ​​​ស្រាយ​​​”។

លោក​​​បាន​​​មាន​​​ប្រសាសន៍ថា “សមាជិក​​​បក្ស​​​នេះ គឺ​​​សុទ្ធ​​​តែមាន​​​វ័យ​​​ចំណាស់អស់​​​ហើយ ហើយ​​​ពួក​​​គេ​​​​​​ចាំ​​​បាច់​​​ត្រូ​​វ​​​ផ្លាស់​​​ប្តូរ។​​​គណ​​​បក្ស​​​ប្រជា​​​ជន​​​ចាំ​​​បាច់ត្រូវ​​​ផ្លាស់​​​ប្តូរ​​​ដើម្បី​​​ទទួល​​​បាន​​​ប្រជា​​​ប្រិយ​​​ភាព​​​មក​​​វិញ។ ប៉ុន្តែ ការ​​​ផ្លាស់​​​ប្តូរ​​​មិន​​​មែន​​​ជា​​​រឿង​​​ងាយ​​​ស្រួល​​​ទេ” ដោយ​​​បាន​​​បន្ថែម​​​ថា គណ​​​បក្ស​​​កាន់​​​អំណាច​​​នៅ​​​តែ​​​ត្រូវ​​​ពន្យល់​​​ពី​​​សកម្ម​​​ភាព​​​ជា​​​សាធារណៈ​​​ ដូចជា​​​ការ​​​ចល័ត​​​កង​​​ទ័ព និង​​​រថក្រោះ​​​ជា​​​ដើម​​​។ លោក​​​បាន​​​ថ្លែង​​​ថា “អំឡុង​​​ពេល​​​បែប​​​នេះ គួរ​​​តែ​​​មាន​​​នរណាម្នាក់​​​​​​ដែល​​​មាន​​​ឋានៈ​​​ស្មើ​​​រដ្ឋ​​​មន្ត្រី​​​ចេញ​​​មុខ​​​ពន្យល់​​​ប្រាប់​​​សាធារណ​​​ជន​​​ថា​​​ ការ​​​ធ្វើ​​​បែបនេះ​​​គឺ​​​ដើម្បី​​​អ្វី​​​”៕

ប្រែ​​​សម្រួល​​​ដោយ ភួន ច័ន្ទសេរីវុធ

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស