30 C
Phnom Penh

ក្រុមអ្នកគាំទ្រ​គណបក្ស​ប្រឆាំង​នៅ​​​សហរដ្ឋអាមេរិក​ ធ្វើ​ការតវ៉ាចំពោះលទ្ធផលបោះឆ្នោត

ដោយ ឌឹ ខេមបូឌា ដេលី

បទវិភាគ

ប្រជា​ពល​រដ្ឋ​ខ្មែរ​ និង​​ខ្មែរ​សញ្ជាតិ​អាមេរិក​​រាប់​ពាន់នាក់​បាន​នាំ​គ្នា​​ធ្វើ​ការតវ៉ា​នៅ​ក្នុង​ទីក្រុង​មួយ​ចំនួន​នៅ​ទូ​ទាំង​សហ​រដ្ឋ​អាមេរិក​​កាលពី​ថ្ងៃ​ច័ន្ទ​ ដើម្បី​គំាទ្រ​ការ​អះអាង​របស់​​គណបក្ស​ប្រឆាំង​ ដែល​ថាការ​បោះឆ្នោត​ជាតិ​កាល​ពី​ថ្ងៃ​ទី​២៨ ខែ​កក្កដា ​ត្រូវ​បានលួចបន្លំ​ដើម្បី​ជួយ​ឲ្យ​លោក​ ហ៊ុន សែន និង​គណ​បក្ស​ប្រជាជន​កម្ពុជា​របស់​លោក​​ បន្ត​ការដឹក​នាំ​ប្រទេស​តទៅ​ទៀត​។

លទ្ធផល​បឋម​នៃ​ការ​បោះឆ្នោត​បង្ហាញ​​​ថា គណបក្ស​ប្រជាជន​កម្ពុជា​​ទទួល​បាន​៦៨​អាសនៈ ​រី​ឯ​គណបក្ស​សង្គ្រោះ​ជាតិ​ទទួល​បាន​៥៥​អាសនៈ​ ប៉ុន្តែ​គណ​បក្ស​ប្រឆាំង​បាន​លើក​ឡើង​ថា ការ​បោះឆ្នោត​នេះ​ គឺ​មាន​ការ​លួច​បន្លំ​សន្លឹក​ឆ្នោត​ ហើយ​ក៏​បាន​អះអាង​​ពី​ជ័យ​ជម្នះ​នៃ​ការ​បោះឆ្នោត​ផង​ដែរ​។ គណ​បក្ស​​ប្រឆាំង​បាន​អំពាវ​នា​វឲ្យ​មាន​ការ​ស៊ើប​អង្កេត​​ឯក​រាជ្យ​មួយ​លើ​ភាព​មិន​ប្រក្រតី​ទាំង​នេះ​។

ប្រជាពល​រដ្ឋ​ខ្មែរ​រាប់​ពាន់​នាក់​ ដែល​រស់​នៅ​​ក្នុង​ទីក្រុង​ឡុងប៊ិច ទីក្រុង​សាន​ហ្វ្រាន​ស៊ី​ស្កូ រដ្ឋ​កាលីហ្វ័រញ៉ា ​ទី​ក្រុង​ស៊ីអា​ថល និង​ទីក្រុង​វ៉ាស៊ីន​តោន សុទ្ធ​តែ​បាន​នាំ​គ្នា​​ចេញ​មក​ធ្វើ​ការតវ៉ា រី​ឯ​នៅ​ក្នុង​ទីក្រុង​ញូវយ៉ក​ឯណោះ​​វិញ​​​ មាន​ប្រជាពលរដ្ឋ​ខ្មែរ​ប្រមាណ​១.៥០០​នាក់​​បាន​ប្រមូល​ផ្ដុំ​គ្នា​នៅ​ខាង​ក្រៅ​ទី​ស្នាក់​ការ​កណ្ដាល​​​របស់​អង្គការ​សហ​ប្រជា​ជាតិ​ ដើម្បី អំពាវនាវ​ឲ្យ​​អង្គការ​នេះ​ជួយ​ជំរុញ​​ឲ្យ​មាន​ការ​ស៊ើប​អង្កេត​ឯករាជ្យមួយ ​លើ​ភាព​មិន​ប្រក្រតី​​នៃ​ការ​បោះឆ្នោតជាតិ​កន្លងមក។

លោក​ សម រង្ស៊ី ដែល​បាន​ត្រឡប់​ពី​សហ​រដ្ឋ​អាមេរិក​វិញ​កាលពី​ថ្ងៃ​សុក្រ​ បន្ទាប់​ពី​បាន​ទៅ​ចូល​រួម​ពិធី​មង្គលការ​របស់​កូន​ស្រី​លោក​ បាន​លើក​ឡើង​ថា “ប្រជាពលរដ្ឋ​ខ្មែរ​ ដែល​រស់​នៅ​សហរដ្ឋ​អាមេរិក​ចង់​​បាន​អ្វី​ដូច​ដែល​ប្រជា​ពលរដ្ឋ​ខ្មែរ​នៅ​​កម្ពុជា​អ៊ីចឹង​ដែរ​”។ លោក​បាន​ថ្លែង​ថា “វា​ជា​រឿង​​ធម្មតា​ទេ​ ដែល​ប្រជាពល​រដ្ឋ​​ចង់​បង្ហាញ​ពី​ការ​ពិត ដែល​គណបក្ស​ប្រជាជន​កម្ពុជា​កំពុង​លាក់​បាំង។ ​​ប្រជាពល​រដ្ឋ​​ទាម​ទារ​​ឲ្យ​យើង​រក​មធ្យោបាយ​ដោះ​ស្រាយ​បញ្ហា​នេះ​ ហើយ​ស៊ើប​អង្កេត​​លើ​ភាព​មិន​ប្រក្រតី​ និង​ទាម​ទារ​ឲ្យ​គណៈ​កម្មាធិការ​ជាតិ​រៀប​ចំ​ការ​បោះ​ឆ្នោត​ (គ.ជ.ប.) បង្ហាញ​ឯក​សា​រ​ទាំង​អស់​”។

វីដេអូនៅ​លើ​គេហទំព័រ​យូធ្យូប​​កាល​ពី​ម្សិលមិញ​​បាន​បង្ហាញ​ថា អ្នក​តវ៉ា​​បាន​នាំ​គ្នា​លើក​បដា​ ដោ​យ​ទាម​ទារ​ឲ្យ​រដ្ឋាភិបាល​កម្ពុជា​​គោរព​​​កិច្ច​ព្រម​ព្រៀងសន្ដិ​ភាព​​​ក្រុង​ប៉ារីស​ ហើយ​នាំ​គ្នា​​និយាយ​​ថា “ លោក ហ៊ុន សែន​ ត្រូវ​តែ​ចុះ​ចេញ​”។

មួយ​ខែ​មុន​ការ​បោះឆ្នោត មូល​និធិ​​​សង្គ្រោះ​ជាតិ​​​មាន​មូលដ្ឋាន​នៅ​សហរដ្ឋ​អាមេ​រិក​ ដែល​ជា​មូលនិធិ​ផ្ដល់​ជំនួយដល់​គណបក្ស​សង្គ្រោះ​ជាតិ​ បាន​រៀប​ចំ​ការ​តវ៉ា​ទ្រង់​ទ្រាយ​ធំ​មួយ​នៅ​ខាង​មុខ​សេតវិមានរបស់​​លោក​ បារ៉ាក់​ អូបាម៉ា ប្រធា​នាធិបតី​សហរដ្ឋ​អាមេរិក​ ដោយ​ស្នើ​ឲ្យ​​លោក​ បារ៉ាក់​ ​​អូបាម៉ា​ ដាក់​សម្ពាធ​លើ​គណបក្ស​ប្រជាជន​កម្ពុជា​ ដើម្បី​ឲ្យ​គោរព​លទ្ធិ​ប្រជា​ធិបតេយ្យ​​ និង​ធានា​​ថា ការ​បោះ​ឆ្នោត​ពិត​ជា​ប្រព្រឹត្តទៅ​ប្រកប​ដោយ​សេរី​ និង​យុត្តិធម៌​។

ហើយ​ឥឡូវ​នេះ​ អ្នក​ឃ្លាំ​មើល​ការ​បោះ​ឆ្នោត​ដូចជា​គណៈកម្មាធិការ​ ដើម្បី​​ការ​បោះ​ឆ្នោត​​ដោយសេរី និង​យុត្តិធម៌​នៅ​កម្ពុជា​ ហៅ​កាត់​ថា ខុមហ្វ្រែល​ និង​វិទ្យាស្ថាន​ជាតិ​ប្រជាធិបតេយ្យ​ បាន​លើក​ឡើង​ថា ​មាន​ភាព មិន​ប្រក្រតីយ៉ាង​ខ្លាំង​​ រី​ឯ​សកម្មជន​របស់​គណ​ប្រឆំាង​នៅ​ក្នុង​សហរដ្ឋ​អាមេរិក​​ បាន​ប្ដេជ្ញា​ចិត្ត​ធ្វើ​ឲ្យ​សាធារណ​ជន​ដឹង​ឮ​ពី​រឿង​នេះ​។

នៅ​ក្នុង​ការតវ៉ា​​ក្នុង​ទីក្រុង​ឡុង​ប៊ិច​ អតីត​សមាជិក​គណបក្ស​ប្រជាជន​កម្ពុជា​ម្នាក់​បាន​លើ​ក​ឡើង​ថា លោក​​បាន​ដឹង​យ៉ាង​ច្បាស់​ពី​ដំណោះ​ស្រាយ​​ដ៏​​សមស្រប​ចំពោះ​ការ​ប្រឈម​មុខ​ដាក់​គ្នា​​​ផ្នែក​​នយោបាយ​សព្វថ្ងៃ​។

លោក​​ សូ ណា​រ៉ូ អតី​តជំនួយ​ការ​ផ្ទាល់​របស់​លោក​​ ហ៊ុន​ សែន​ ត្រូវ​បាន​ដក​ស្រង់​សម្ដី​ដោយ​កាសែត​​មួយនៅសហរដ្ឋអាមេរីក​ថា “គណៈ​កម្មាធិការ​ជាតិ​រៀប​ចំ​ការ​បោះ​ឆ្នោត​ គឺពោ​រ​ពេញ​ទៅ​ដោយ​មនុស្ស​មក​ពី​គណបក្ស​កាន់​អំណាច​។ នេះ​គឺ ជា​បញ្ហា​ដ៏​ធំ​​ ដែល​តម្លា​ភាព​​ចាំបាច់​ត្រូវ​តែ​ធ្វើ​ឲ្យ​មាន​ ហើយ​​​កា​រស៊ើ​ប​អង្កេត​ដែល​យុត្តិធម៌​​មិន​ត្រូវ​​ធ្វើ​ឡើង ​​គ.ជ.ប.​នោះ​ឡើយ​”៕

ប្រែសម្រួលដោយ ស៊ា ស៊ុយ​ឈាង​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស