កាសែតថៃមួយបានឲ្យដឹងកាលពីម្សិលមិញថា ក្រុមហ៊ុនថៃមួយដែលបានប្រកាសពីគម្រោងសាងសង់រោងចក្រផលិតថាមពលអគ្គិសនីដើរដោយថាមពលធ្យូងថ្មក្នុងរង្វង់ទឹកប្រាក់៣.០០០លានដុល្លារក្នុងខេត្តកោះកុងជាមួយក្រុមហ៊ុនរបស់លោក លី យ៉ុងផាត់ សមាជិកព្រឹទ្ធសភាគណបក្សប្រជាជនកាលពីឆ្នាំមុននោះបានដកខ្លួនចេញពីគម្រោងនេះហើយ។
កាសែត ឌឹ ណេសិន ដែលមានមូលដ្ឋាននៅទីក្រុងបាងកក បានធ្វើសេចក្តីរាយការណ៍ថា ក្រុមហ៊ុនអគ្គិសនី Ratchaburi Electricity Generating Holding បានលប់ចោលគម្រោងរកស៊ីរួមគ្នាជាមួយក្រុមហ៊ុនអគ្គិសនី KK របស់លោក លី យ៉ុងផាត់ ដោយសារកង្វះតម្រូវការទាំងនៅក្នុងប្រទេសថៃ និងប្រទេសកម្ពុជា។
លោក ប៉ុងឌិត ពុតចាណា នាយកប្រតិបត្តិក្រុមហ៊ុន Ratchaburi Electricity ត្រូវបានដកស្រង់សម្ដីថា ដោយសារតែពេលនេះតំបន់ភាគខាងកើតនៃប្រទេសថៃបានទទួលការផ្គត់ផ្គង់ថាមពលអគ្គិសនីគ្រប់គ្រាន់ពីក្រុមហ៊ុនផលិតថាមពលអគ្គិសនីក្នុងស្រុកទៅហើយនោះ អាជ្ញាធរអគ្គិសនីជាតិនៃប្រទេសថៃ ទំនងជានឹងមិនសាងសង់បណ្ដាញអគ្គិសនីរវាងខេត្តកោះកុងនិងប្រទេសថៃឡើយ។
លោក ប៉ុងឌិត មានប្រសាសន៍ថា “យើងជឿថា អាជ្ញាធរអគ្គិសនីនៃប្រទេសថៃ (Egad) នឹងមិនដំឡើងបណ្ដាញអគ្គិសនីសម្រាប់តភ្ជាប់ជាមួយរោងចក្រអគ្គិសនី ដែលបានគ្រោងទុកនៅកោះកុងដើម្បីទិញអគ្គិសនីទៅផ្គត់ផ្គង់តំបន់នោះ ពេលវាបានទទួលការផ្គត់ផ្គង់អគ្គិសនីគ្រប់គ្រាន់ទៅហើយទេ”។
ក្រុមហ៊ុន Ratchaburi Electricity ដែលកាន់កាប់មួយផ្នែកដោយអាជ្ញាធរអគ្គិសនី Egad បានប្រកាសកាលពីខែកុម្ភៈឆ្នាំមុនថា ខ្លួនបានទិញភាគហ៊ុន៥០ភាគរយក្នុងក្រុមហ៊ុនអគ្គិសនី KK Power Company ដើម្បីចាប់ផ្ដើមសាងសង់រោងចក្រផលិតថាមពលអគ្គិសនីមួយដែលអាចផលិតថាមពលអគ្គិសនីបាន១,៨ជីហ្គាវ៉ាត់ ក្នុងនោះ១,៦ជីហ្គាវ៉ាត់នឹងត្រូវលក់ឲ្យថៃវិញ។
ទោះជាយ៉ាងណា យោងតាមសេចក្ដីរាយការណ៍របស់កាសែត ឌឹ ណេសិន បានឲ្យដឹងថា ប្រសិនបើគ្មានបណ្ដាញតភ្ជាប់ទៅប្រទេសថៃទេនោះ រោងចក្រផលិតថាមពលអគ្គិសនីនេះនឹងផលិតអគ្គិសនីលើសពីតម្រូវការនៅក្នុងប្រទេសកម្ពុជា។ អត្ថបទកាសែតនេះបានឲ្យដឹងថា “រោងចក្រអគ្គិសនីនៅកោះកុងនេះនឹងផ្គត់ផ្គង់តម្រូវការនៅកម្ពុជាជាចម្បង ក៏ប៉ុន្តែ តាមការវាយតម្លៃរបស់ក្រុមហ៊ុនឃើញថា តម្រូវការនៅទីនោះគឺប្រហែលជាមិនខ្ពស់ល្មមសម្រាប់ការបង្កើតរោងចក្រផលិតអគ្គិសនីកម្លាំង១,៨ជីហ្គាវ៉ាត់ទេ”។
លោក ស៊ុន ដារ៉ា អភិបាលរងខេត្តកោះកុង បានឲ្យដឹងថា ការសាងសង់រោងចក្រថាមពលអគ្គិសនីនេះនៅមិនទាន់ចាប់ផ្ដើមនៅឡើយទេ ហើយលោកមិនដឹងច្បាស់អំពីអនាគតរបស់រោងចក្រនេះឡើយ។ លោកមានប្រសាសន៍ថា “យើងត្រូវបានគេជូនដំណឹងថា មានផែនការសាងសង់រោងចក្រផលិតអគ្គិសនីដើរដោយថាមពលធ្យូងថ្មនៅទីនេះ ប៉ុន្តែ នៅមិនទាន់ដឹងច្បាស់ថា តើមានការសិក្សាអំពីផលប៉ះពាល់បរិស្ថាន និងផលប៉ះពាល់សង្គមហើយឬនៅទេ” ដោយលោកបន្ថែមថា លោកមិនបានដឹងពីសេចក្ដីរាយការណ៍ពីការលប់ចោលគម្រោងរកស៊ីរួមគ្នារបស់ក្រុមហ៊ុន Ratchaburi Electricity ឡើយ។
លោក ស៊ុយហ្ស៊ុយគី ហ៊ីរ៉ូស៊ី នាយកប្រតិបត្តិវិទ្យាស្ថានស្រាវជ្រាវធុរកិច្ចសម្រាប់កម្ពុជា បានឲ្យដឹងថា ខេត្តកោះកុងមិនទាន់ភ្ជាប់បណ្ដាញអគ្គិសនីជាតិដែលនឹងតភ្ជាប់រោងចក្រផលិតថាមពលអគ្គិសនីក្នុងរង្វង់ទឹកប្រាក់៣.០០០ពាន់លានដុល្លារនេះមករាជធានីភ្នំពេញ ដែលមានការប្រើអគ្គិសនីច្រើនបំផុតទេ។
លោក ហ៊ីរ៉ូស៊ី បានថ្លែងបន្តថា “ពីខេត្តកោះកុងមករាជធានីភ្នំពេញ ការភ្ជាប់បណ្ដាញមិនទាន់បានបញ្ចប់នៅឡើយទេ” ដោយលោកបានបន្ថែមថា រាជធានីភ្នំពេញត្រូវការការផ្គត់ផ្គង់អគ្គិសនីប្រហែល៤០០មេហ្គាវ៉ាត់។ ប្រហែល៧០ភាគរយនៃការផ្គត់ផ្គង់អគ្គិសនីនៅរាជធានីភ្នំពេញក្នុងពេលបច្ចុប្បន្ននេះគឺត្រូវបាននាំចូលពីប្រទេសវៀតណាម។
លោក លី យ៉ុងផាត់ និងតំណាងក្រុមហ៊ុន Ratchaburi Electricity មិនអាចទាក់ទងសុំការអត្ថាធិប្បាយបានទេកាលពីម្សិលមិញ៕
ប្រែសម្រួលដោយ ចេវ ប៊ុននី