32 C
Phnom Penh

គណ​​​បក្ស​​​សង្គ្រោះ​​​ជាតិ​​​អំពាវ​​​នាវ​​​ឲ្យ​​​មាន​​​ការចូលរួមពិធី​​​ជួប​​​ជុំ​​​នៅ​​​ភ្នំពេញ

ដោយ ឌឹ ខេមបូឌា ដេលី

បទវិភាគ

គណ​​​បក្ស​​​សង្គ្រោះ​​​ជាតិ​​​បាន​​​អំពាវ​​​នាវ​​​ឲ្យ​​​ក្រុម​​​អ្នក​​​គាំ​​​ទ្រ​​​របស់​​​ខ្លួនធ្វើការ​​​ជួប​​​ជុំ​​​គ្នា​​​នៅ​​​​​​​​​ទី​​​លាន​​​ប្រជា​​​ធិប​​​តេយ្យ​​​​​​ក្នុង​​​រាជ​​​ធានី​​​ភ្នំ​​​ពេញ​​​នៅ​​​ថ្ងៃ​​​ច័ន្ទខាងមុខនេះ​​​ ប៉ុន្តែ​​​ថ្នាក់​​​ដឹក​​​នាំ​​​គណ​​​បក្ស​​​នេះ​​​បាន​​​បញ្ជាក់​​​ថា ព្រឹត្តិការណ៍​​​នេះ​​​នឹង​​​ប្រព្រឹត្ត​​​ទៅ​​​ដោយ​​​សន្តិ​​​វិធី​​​ និង​​​មិន​​​ត្រូវ​​​បាន​​​ចាត់​​​ទុក​​​ថា ជា​​​បាតុកម្ម​​​ប្រឆាំង​​​នឹង​​​លទ្ធ​​​ផល​​​នៃ​​​ការ​​​បោះ​​​ឆ្នោត​​​ទេ។

ក្នុង​​​សេចក្តី​​​ជូន​​​ដំណឹង​​​មួយ​​​ដែល​​​ចុះ​​​ហត្ថ​​​លេខា​​​ដោយ​​​លោក យឹម សុវណ្ណ អ្នក​​​នាំ​​​ពាក្យ​​​គណ​​​បក្ស​​​សង្គ្រោះ​​​ជាតិ​​​កាល​​​ពី​​​ម្សិល​​​មិញថា​​​ គណ​​​បក្ស​​​នេះ​​​បាន​​​អំពាវ​​​នាវ​​​ឲ្យ “ជន​​​រួម​​​ជាតិ​​​ ជា​​​ពិសេស​​​យុវជន​​​ យុវតី ចូល​​​រួម​​​ក្នុង​​​ពិធី​​​សំណេះ​​​សំណាលនេះ​​​​​​ឲ្យ​​​បាន​​​ច្រើន​​​កុះករ”។

ទោះ​​​បីជា​​​សេចក្តី​​​ជូន​​​ដំណឹង​​​នេះ​​​ពុំមាន​​​ការ​​​បញ្ជាក់​​​ច្បាស់​​​ពី​​​មូល​​​ហេតុ​​​ពិត​​​ប្រាកដ​​​នៃ​​​ការ​​​រៀប​​​ចំពិធី​​​ជួប​​​ជុំ​​​នេះក៏ដោយ ប៉ុន្តែលោក យឹម សុវណ្ណ​​​ បាន​​​លើក​​​ឡើង​​​កាល​​​ពី​​​ម្សិល​​​មិញ​​​ថា លោក សង្ឃឹម​​​ថា នឹង​​​មានមនុស្ស​​​​​​ច្រើន​​​ចូល​​​រួម​​​ក្នុង​​​ពិធី​​​​​​សំណេះ​​​សំណាល​​​ជាមួយ​​​លោក សម រង្ស៊ី និង​​​ លោក កឹម សុខា​​​ ដែល​​​ពិធី​​​នេះ​​​នឹង​​​ត្រូវ​​បាន​​​​​​ផ្សព្វ​​​ផ្សាយ​​​តាម​​​ហ្វេស​​​ប៊ុក​​​ វិទ្យុ និងតាម​​​រយៈ​​​​​​សកម្ម​​​ជន​​​គណ​​​បក្ស​​​នៅ​​​តាម​​​មូល​​​ដ្ឋាន​​​។

សេចក្តី​​​ជូន​​​ដំណឹ​​​ងនេះ​​​ក៏​​​បាន​​​ឲ្យ​​​ដឹង​​​ផង​​​ដែរថា លោក សម រង្ស៊ី និង លោក កឹម សុខា នឹង​​​ចំណាយ​​​ពេល​​​បី​​​ថ្ងៃ​​​សម្រាប់​​​ពិធី​​​ជួប​​​ជំុ​​​​​​នៅ​​​ក្នុង​​​ខេត្តកណ្តាល កំពង់ចាម កំពង់​​​ធំ និង​​​ខេត្ត​​​សៀមរាប​​​ មុន​​​ពេល​​​មាន​​​​​​ពិធី​​​ជួប​​​ជុំ​​​នៅ​​​ក្នុង​​​រាជ​​​ធានី​​​ភ្នំ​​​ពេញ​​​។

លោក សម រង្ស៊ី បាន​​​ឲ្យ​​​ដឹង​​​កាល​​​ពី​​​ម្សិល​​​មិញ​​​ថា ពិធី​​​ជួប​​​ជុំនៅ​​​ក្នុង​​​រាជ​​​ធានី​​​ភ្នំពេញនេះ ត្រូវ​​​បាន​​​រៀប​​​ចំ​​​ឡើង​​​ដើម្បីជូន​​​ដំណឹង​​​ដល់ក្រុម​​​​​​អ្នក​​​គាំទ្រ​​​​​​គណ​​​បក្ស​​​សង្គ្រោះជាតិ​​​អំពី​​​ស្ថាន​​​ភាព​​​នយោ​​​បាយ​​​បច្ចុប្បន្ន​​​ និង​​​​​ដើម្បី​​​ពន្យ​​​ល់​​​ពី​​​ផែន​​​ការ​​​របស់​​​បក្ស​​​​​​ក្នុង​​​រយៈ​​​ពេល​​​ប៉ុន្មាន​​​សប្តាហ៍​​​បន្ទាប់មក​​​នេះ។

លោក សម រង្ស៊ី បាន​​​ថ្លែង​​​ថា “យើង​​​គ្រាន់​​​តែ​​​ចង់​​​ជូន​​​ដំណឹង​​​ប្រាប់​​​ម្ចាស់​​​ឆ្នោត​​​ថា ស្ថាន​​​ភាព​​​ [នយោ​​​បាយ] បាន​​​ជាប់​​​គាំង​​​ ហើយថា គណ​​​បក្ស​​​ប្រជា​​​ជន​​​កម្ពុជាពុំ​​​មាន​​​ឆន្ទៈ​​​ល្អ​​​ក្នុង​​​ការ​​​ជំរុញ​​​ គ.ជ.ប. ឬ​​​ធានា​​​ថា ក្រុម​​​ប្រឹក្សា​​​ធម្ម​​​នុញ្ញ​​​ នឹង​​​បង្គាប់​​​ឲ្យ​​​ គ.ជ.ប.” ធ្វើ​​​កិច្ច​​​សហប្រតិបត្តិការ​​​ក្នុង​​​ការ​​​ស៊ើប​​​អង្កេ​​​​​​តឲ្យ​​​មាន​​​តម្លា​​​ភាព​​​ឡើយ។

ក្រុម​​​ប្រឹក្សា​​​ធម្ម​​​នុញ្ញ​​​ត្រូវ​​​បាន​​​រំពឹងថា នឹង​​​ចេញ​​​សេចក្តី​​​សម្រេច​​​លើ​​​លទ្ធ​​​ផល​​​​​​បឋម​​​នៃ​​​ការ​​​​​​បោះ​​​ឆ្នោត​​​​​​ដែល​​​ចេញ​​​ដោយ គ.ជ.ប. មុន​​​ថ្ងៃ​​​ទី​​​៨ ខែ​​​កញ្ញា ពេល​​​មាន​​​លទ្ធផល​​​ជា​​​ស្ថាពរ​​​។ រដ្ឋ​​​សភា​​​ជាតិ​​​នីតិកាល​​​ថ្មី​​​គ្រោង​​​បើក​​​សម័យ​​​ប្រជុំ នៅ​​​មុន​​​ ឬ​​​ត្រឹម​​​ដំណាច់​​​ខែ​​​កញ្ញា​​​ គឺ​​​រយៈ​​​ពេល​​​ពីរ​​​ខែ​​​ក្រោយ​​​ការ​​​បោះ​​​ឆ្នោត​​​ជ្រើស​​​តាំង​​​​តំណាង​​​រាស្ត្រ។

លោក​​​ សម រង្ស៊ី បាន​​​លើក​​​ឡើង​​​ថា ពិធី​​​ជួប​​​ជុំ​​​នៅ​​​ថ្ងៃ​​​ច័ន្ទ​​​ គឺ​​​មិន​​​មែន​​​ជា​​​ “បាតុកម្ម” ទេ ប៉ុន្តែ​​​ជា​​​ពិធី​​​ “ជួបជុំ” ព្រោះ​​​គណ​​​បក្ស​​​ប្រឆាំង​​​នៅ​​​តែ​​​សង្ឃឹម​​​ថា គណ​​​បក្ស​​​ប្រជា​​​ជន​​​នឹង​​​បោះ​​​ជំហាន​​​ទៅ​​​មុខ​​​​​​ជាមួយ​​​គណ​​​បក្ស​​​សង្គ្រោះ​​​ជាតិ​​​ក្នុង​​​ការ​​​​​​ស៊ីប​​​អង្កេត​​​ប្រកប​​​ដោយ​​​តម្លា​​​ភាព​​​ពីភាព​​​មិន​​​ប្រក្រតី​​​ក្នុង​​​ការ​​​បោះ​​​ឆ្នោត​​​ កាល​​​ពី​​​ថ្ងៃ​​​ទី​​​២៨ ខែ​​​កក្កដា។

លោក​​​បាន​​​ថ្លែង​​​ថា “នេះ​​​មិន​​​មែន​​​ជា​​​ការ​​​ដង្ហែក្បួន​​​ទេ​​​។ ការ​​​ដង្ហែ​​​ក្បួន​​​គឺ​​​ជា​​​ប្រភេទ​​​មួយ​​​នៃ​​​បាតុកម្ម ពោល​​​គឺ​​​ការ​​​តវ៉ា​​​ដែល​​​អាច​​​បង្ក​​​ផល​​​លំបាក​​​មួយ​​​ចំនួន​​​ហួស​​​ពី​​​ការ​​​រំពឹង​​​ទុក​​​។ក៏​​ ប៉ុន្តែ​​​ នេះ​​​ជា​​​ការ​​​ជួប​​​ជុំ​​​នៅ​​​មួយ​​​កន្លែង​​​ យើង​​​ដឹង​​​ថា​​​ ត្រូវ​​​ធ្វើ​​​យ៉ាង​​​ណា​​​ហើយ​​​។ អាជ្ញា​​​ធរ​​​ដឹង​​​ថា ព្រឹត្តិការ​​​ណ៍នេះនឹង​​​ប្រព្រឹត្ត​​​ទៅ​​​ដោយ​​​​​​សន្តិ​​​​​​​វិធីទាំង​​​ស្រុង វា​​​មិន​​​បង្ក​​​ហានិភ័យ [​​​នៃ​​​ការ​​​​កើត​​​មាន​​​​​​អំពើ​​​ហិង្សា​​​] សោះ​​​ឡើយ”។

ខណៈដែលលោក​​​នាយក​​​រដ្ឋ​​​មន្ត្រី ហ៊ុន សែន និង​​​​​​រដ្ឋ​​​មន្ត្រី​​​ក្រសួង​​​មហា​​​ផ្ទៃ​​​ គឺលោក ស ខេង​​​ ​​​បាន​​​ព្រមាន​​​ពី​​​ភាព​​​ចលាចល​​​ និង​​​បញ្ហា​​​ប្រសិន​​​បើ​​​ការ​​​ជួប​​​ជុំរបស់​​​គណ​​​បក្ស​​​ប្រឆាំង​​​​​​ប្រែ​​​ក្លាយ​​​ជា​​​ហិង្សា​​​នោះ នគរ​​​បាល​​​ និងក្រុម​​​មន្ត្រី​​​ក្រសួង​​​​​​មហា​​​ផ្ទៃ​​​បាន​​​ឲ្យ​​​ដឹង​​​កាល​​​ពី​​​ម្សិល​​​មិញ​​​ថា ពិធី​​​ជួប​​​ជុំ​​​​​​​​ដែល​​​បាន​​​គ្រោង​​​ទុក​​​របស់​​​គណ​​​បក្ស​​​សង្គ្រោះជាតិ​​​គឺ​​​មិន​​​ល្មើស​​​នឹង​​​ច្បាប់​​​ទេ។

ឧត្តម​​​សេនីយ៍​​​ត្រី ខេង ទីតូ អ្នក​​​នាំ​​​ពាក្យ​​​កង​​​រាជ​​​អាវុធ​​​ហត្ថ​​​ បាន​​​ថ្លែង​​​ថា “ខ្ញុំ​​​យល់​​​ថា ប្រជា​​​ពល​​​រដ្ឋ​​​គួរ​​​មាន​​​លទ្ធ​​​ភាព​​​បញ្ចេញ​​​មតិ​​​យោ​​​បល់​​​របស់​​​ខ្លួន​​​ ប៉ុន្តែ​​​ កុំ​​​ប្រើ​​​អំពើ​​​ហិង្សា។ ប្រសិន​​​បើ​​​មាន​​​ការ​​​តវ៉ា សូម​​​តវ៉ា​​​ដោយ​​​សន្តិ​​​វិធី និង​​​កុំធ្វើឲ្យ​​​មាន​​​អំពើ​​​ហិង្សា​​​”។ ឧត្តម​​​សេនីយ៍​​​ត្រី ខេង ទី​​​តូ​​​ បាន​​​បញ្ជាក់​​​ថា ប្រសិន​​​បើ​​​អំពើ​​​ហិង្សា​​​កើត​​​មាន​​​​​​មែន​​​នោះ កង​​​កម្លាំង​​​សន្តិ​​​សុខ​​​ត្រៀម​​​រួច​​​ជា​​​ស្រេច​​​ក្នុង​​​ការ​​​ស្តារ​​​សណ្តាប់​​​ធ្នាប់​​​ឡើង​​​វិញ​​​។

លោក​​​បាន​​​មាន​​​ប្រសាសន៍ថា “យើង​​​បាន​​​ត្រៀម​​​ឧបករណ៍​​​ដែល​​​រួម​​​មាន​​​ទាំង​​​រថយន្ត​​​ពន្លត់​​​អគ្គិភ័យ គ្រឿង​​​ចក្រ និង​​​កង​​​កម្លាំង​​​នគរ​​​បាល​​​ និង​​​កង​​​រាជ​​​អាវុធហត្ថ​​​រាប់​​​ពាន់​​​នាក់​​​​​​ ដើម្បី​​​រក្សា​​​សន្តិ​​​សុខ និង​​​សណ្តាប់​​​ធ្នាប់​​​សាធារណៈ​​​ ហើយ​​​យើងបាន​​​ត្រៀម​​​រួច​​​ជា​​​ស្រេច​​​ក្នុង​​​ការ​​​បង្ក្រាប​​​ ប្រសិន​​​បើ​​​មាន​​​អំពើ​​​ហិង្សា​​​ណា​​​មួយ​​​កើត​​​ឡើង​​​”។

ឧត្តម​​​សេនីយ៍​​​ឯក សុខ​​​ ផល អគ្គ​​​ស្នង​​​ការ​​​រង​​​នគរ​​​បាល​​​ជាតិ​​​ បាន​​​ឲ្យ​​​ដឹងថា លោក​​​មិន​​​​​​​​​បារម្ភ​​​​​​ពី​​​ជម្លោះ​​​​​​ផ្តើម​​​ចេញ​​​ពី​​​ការ​​​ជួប​​​ជុំនេះ​​​ទេ​​​។ លោក​​​បាន​​​មាន​​​ប្រសាសន៍ថា “ដូច​​​ជា​​​មិន​​​ទំនង​​​ថា នឹង​​​មាន​​​រឿង​​​អ្វី​​​កើត​​​ឡើង​​​ទេ​​​។ ខ្ញុំ​​​គិត​​​ថា វា​​​គឺ​​​ជា​​​ការ​​​ជួប​​​ជុំ​​​ថ្នាក់​​​ក្រុង”។

បន្ទាប់​​​ពី​​​មាន​​​ការ​​​គំរាម​​​ធ្វើ​​​មហា​​​បាតុកម្ម​​​ ប្រសិន​​​បើ​​​ពុំមាន​​​ការ​​​​​​ធ្វើ​​​តាម​​​ការ​​​ទាមទារ​​​ឲ្យ​​​មាន​​​ការ​​​ស៊ើប​​​អង្កេត​​​ពី​​​ការ​​​បោះ​​​ឆ្នោត​​​នោះ​​​ លោក ស ខេង រដ្ឋ​​​មន្ត្រី​​​ក្រសួង​​​មហា​​​ផ្ទៃ​​​បាន​​​ឆ្លើយ​​​តប​​​ថា ការ​​​ជួប​​​ជុំ​​​របស់​​​គណ​​​បក្ស​​​សង្គ្រោះ​​​​​​ជាតិ​​​ត្រូវ​​​តែ​​​ធ្វើ​​​ឡើង​​​នៅ​​​ឯទី​​​លាន​​​ប្រជា​​​ធិប​​​តេយ្យ​​​​​​ជា​​​កំហិត ហើយក៏​​​បាន​​​ព្រមាន​​​ថា អ្នក​​​ដឹក​​​​​​នាំ​​​ការ​​​តវ៉ា​​​ដែល​​​ប្រែ​​​ក្លាយ​​​ជា​​​ហិង្សា​​​ នឹង​​​ប្រឈម​​​នឹង​​​បញ្ហា​​​តាម​​​ផ្លូវ​​​ច្បាប់​​​។

ឧត្តម​​​សេនីយ៍ឯក ខៀវ សុភ័គ អ្នក​​​នាំ​ពាក្យ​​​​​ក្រសួង​​​មហា​​​ផ្ទៃ​​ បាន​​​លើក​​​ឡើង​​​កាលពី​​​ម្សិល​​​មិញ​​​ថា ដរាប​​​ណា​​​ការ​​​ជួប​​​ជុំ​​​របស់​​​គណ​​​បក្ស​​​សង្គ្រោះ​​​ជាតិ​​​​​​មាន​​​លក្ខណៈ​​​ស្រប​​​ច្បាប់​​​នោះ​​​​​​ វា​​​អាច​​​ប្រព្រឹត្តទៅ​​​បាន​​​។ លោក​​​បាន​​​ថ្លែង​​​ថា “ប្រសិន​​​បើ​​​បាតុកម្ម​​​ គោរព​​​តាម​​​ច្បាប់​​​នោះ​​​វា​​​មិន​​​អី​​​ទេ​​​ ប៉ុន្តែ យើង​​​សង្ឃឹម​​​ថា នឹង​​​ពុំ​​​មាន​​​ការ​​​ប្រើ​​​អំពើ​​​ហិង្សា​​​ទេ។ គ្រប់គ្នា​​​ត្រូវ​​​តែ​​​គោរព​​​ច្បាប់​​​ដែល​​​ក៏​​​ផ្តល់​​​សុវត្ថិ​​​ភាព​​​សម្រាប់​​​ពួក​​​គេ​​​ខ្លួន​​​ឯង​​​”។

លោក សម រង្ស៊ី បាន​​​បញ្ជាក់​​​សា​​​ជា​​​ថ្មី​​​កាល​​​ពីម្សិល​​​មិញ​​​ថា គណ​​​បក្ស​​​ប្រឆាំង​​​នឹង​​​អំពាវ​​​នាវ​​​ឲ្យ​​​មាន​​​ការ​​​ធ្វើ​​​មហា​​​បាតុកម្ម​​​តែ​​​ក្នុង​​​ករណី​​​វាជា​​​ជម្រើស​​​ចុង​​​ក្រោយ​​​ប៉ុណ្ណោះ​​​ ពោល​​​គឺ​​​ប្រសិន​​​បើ​​​ “ស្ពាន​​​ទាំង​​​ប៉ុន្មាន​​​ទៀត​​​ត្រូវ​​​បាន​​​កាត់​​​ផ្តាច់​​​” ធ្វើ​​​ឲ្យ​​​រាំង​​​ស្ទះ​​​ដល់​​​កិច្ច​​​ប្រឹង​​​ប្រែង​​​របស់​​​គណ​​​បក្ស​​​សង្គ្រោះ​​​ជាតិ​​​ក្នុង​​​ការ​​​ស៊ើប​​​អង្កេត​​​ពី​​​អ្វី​​​ដែល​​​ខ្លួន​​​ចោទ​​​ថា ជា​​​ការ​​​លួច​​​បន្លំ​​​សន្លឹក​​​ឆ្នោត​​​ជា​​​ទូទៅដោយ​​​គណ​​​បក្ស​​​ប្រជា​​​ជន​​​កម្ពុជា​​​ក្រោម​​​ការ​​​សហការ​​​ជាមួយ ​​​គ.ជ.ប.។

លោក​​​បាន​​​មាន​​​ប្រសាសន៍ថា “ឧបមា​​​ថា ពុំមាន​​​អ្វី​​​កើត​​​ឡើង​​​សោះ​​​។ ក្នុង​​​រយៈ​​​ពេល​​​២០​​​​​​ថ្ងៃ​​​ ក្រុម​​​ប្រឹក្សា​​​ធម្មនុញ្ញ​​​​​​ប្រកាស​​​លទ្ធ​​​ផល​​​ដូច​​​គ្នា​​​ទាំង​​​ស្រុង​​​ទៅ​​​នឹង​​​អ្វី​​​ដែល គ.ជ.ប. បាន​​​ប្រកាស ​​​​​​គឺ​​​ដូច​​​គ្នា​​​ទាំង​​​ស្រុង​​​ទៅ​​​នឹង​​​អ្វី​​​ដែល​​​គណ​​​បក្ស​​​ប្រជា​​​ជន​​​បាន​​​ប្រកាស​​​ដែរ ហើយ​​​ពុំ​​​មាន​​​ជម្រើស​​​ណា​​​ផ្សេង​​​សោះ​​​។ ពុំមាន​​​ការ​​​​ចរចា​​​អ្វី​​​ទាំង​​​អស់​​​ ហើយ​​​ស្ពាន​​​ទាំង​​​អស់​​​ត្រូវ​​​បាន​​​កាត់​​​ផ្តាច់​​​។ បើ​​​ដូច្នេះ​​​មែន​​​​​​វា​​​ជា​​​ជម្រើស​​​ចុង​​​ក្រោយ​​​ហើយ”៕

ប្រែ​​​សម្រួល​​​ដោយ ភួន ច័ន្ទសេរីវុធ

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស