28 C
Phnom Penh

សមត្ថកិច្ចកំពុង​ស្វែង​រក​​ជន​សង្ស័យ​​​ពាក់​ព័ន្ធ​នឹង​​ការកាត់តខ្សែ​អាត់​សំឡេង​​​

ដោយ ឌឹ ខេមបូឌា ដេលី

បទវិភាគ

មន្ត្រី​មួយ​រូប​បាន​លើក​ឡើង​កាល​ពី​ម្សិល​មិញ​ថា នគរបាល​​កំពុង​តែ​ស្វែង​រក​​មនុស្ស​ ដែល​​ទទួល​ខុសត្រូវ​ចំពោះការ​​បង្កើត​ និង​បង្ហោះ​ខ្សែ​អាត់​សំឡេង​​តាម​អ៊ីនធើណិត​ ដែល​​លោក​​​​​នាយក​រដ្ឋ​មន្ត្រី​ ហ៊ុន សែន​ ទំនង​ជា​បាន​​សារភាព​ថា គណបក្ស​របស់​លោក​​បាន​​ចាញ់​​ការ​បោះឆ្នោត​ជាតិ​កាល​ពី​ខែ​មុន​។

នៅ​ក្នុង​ខ្សែ​អាត់​សំឡេង​​ ដែល​បង្ហោះ​នៅ​លើ​គេហទំព័រ​​ហ្វេស​ប៊ុក​ គេ​ឮ​លោក​ ហ៊ុន សែន​ បាន​មាន​ប្រសាសន៍​ថា “គណ​បក្ស​​ប្រជាជន​កម្ពុជា​​បាន​ចាញ់​​​ឆ្នោត​​ទៅ​ហើយ​” ហើយ​បាន​អំពាវនាវ​ឲ្យ​មន្ត្រី​ថ្នាក់​ក្រោម​ទទួល​​ស្គាល់​ការ​ពិត​នេះ​។

កាល​ពី​ថ្ងៃ​អង្គារ គណបក្ស​ប្រជាជន​កម្ពុជា​​​​​កំពុង​កាន់​អំណាច​​​បាន​អំពាវនាវ​​ឲ្យ​ស្វែង​រក​​ជន​ណា​ ដែល​បាន​​កាត់​ត​ខ្សែ​អាត់​​សំឡេង​​ទាក់​ទិន​នឹង​សុន្ទរកថា​កាល​ពី​ខែ​ឧសភា​ ដែល​​លោក​ ហ៊ុន សែន​ បាន​លើក​ឡើង​​ពី​ព្រះ​អង្គ​ម្ចាស់​​ ស៊ីសុវត្ថិ​​ ធម្មិកោ បេក្ខជន​ឈរ​ឈ្មោះ​ជា​​តំណាង​រាស្ត្រ​របស់​គណបក្ស​ប្រឆាំង​​យក​មក​ដាក់​ទោស​។

លោកឧត្តម​សេនីយ៍ឯក​ ខៀវ​ សុភ័គ​ អ្នក​នាំ​ពាក្យ​ក្រសួង​មហាផ្ទៃ​បាន​​ថ្លែង​​ថា ទោះ​បី​ជា​​គ្មាន​​ពាក្យ​ណ្ដឹង​ផ្លូវ​ការ​​​ក៏ដោយ​ ក៏​ការ​ស៊ើប​អង្កេត​​​នៅ​តែ​ត្រូវ​​ធ្វើ​ឡើង​ដែរ​។ លោក​បាន​មាន​ប្រសាសន៍​ដោយ​មិន​លើក​ឡើង​ថា តើ​នគរបាល​​នឹង​ត្រូវ​​ស្វែង​រក​ជន​កាត់​​ត​ខ្សែ​អាត់​សំឡេង​នេះ​​ដោយ​របៀប​​ណា​​ថា  “មាន​ការ​ស៊ើ​ប​អង្កេត​​លើ​​បញ្ហា​នេះ​” ។ លោក​បាន​ថ្លែង​ថា “មាន​តែ​អ្នក​ស៊ើប​អង្កេត​ជំនាញ​ទេ​​ ដែល​ដឹង​ពី​​ [វិធី​សាស្ត្រ​កាត់​ត​របស់​​ពួក​គេ​]”។ លោក​ឧត្តម​សេនីយ៍​ឯក ខៀវ សុភ័គ បាន​មាន​ប្រសាសន៍​ថា “ ទង្វើ​នេះ​​ចូល​​ក្នុង​ច្បាប់​​ស្ដីពី​​ការ​ផ្ដល់​ព័ត៌មាន​​មិន​ពិត​​”។​ លោក​បាន​បន្ត​ថា “ប្រទេស​កម្ពុជា​គ្មាន​ច្បាប់​ស្ដី​អំពី​​បណ្ដាញ​ភ្ជាប់​ទំនាក់​ទំនង​សង្គម​និង​ហ្វេសប៊ុក​ឡើយ​”។

លោក​ សុក សំអឿន មេធាវី និង​​ជា​នាយក​​ប្រតិបត្តិ​នៃ​ក្រុម​អ្នក​ច្បាប់​ការពារ​សិទ្ធិ​កម្ពុជា ដែល​ជា​អង្គការ​ផ្ដល់​ជំនួយ​ផ្នែក​ច្បាប់​ បាន​មាន​​ប្រសាសន៍​ថា  ការ​ចោទ​ប្រកាន់​ពី​បទ​​ផ្ដល់​​ព័ត៌​មាន​មិន​ពិត​អាច​នឹង​កើត​មាន​ ប្រសិន​បើ​កេរ្តិ៍​ឈ្មោះ​របស់​នរណា​ម្នាក់​ត្រូវ​បាន​ធ្វើ​ឲ្យ​ខូច​ ដោយសារ​តែ​ការលើក​ឡើង​មិន​ពិត​។

​ទោះ​ជាយ៉ាង​ណា លោក​បាន​មាន​​ប្រសា​សន៍​ថា អត្ថបទ​អម​នឹង​ខ្សែ​អាត់​នេះ​ចាំបាច់​ត្រូវ​តែ​មាន​ ដើម្បី​ចោទ​ប្រកាន់​លើ​អ្នក​កាត់​ត​ខ្សែអាត់សំឡេង​​ ដោយ​សារ​តែ​ខ្លឹម​សារ​របស់​​​ខ្សែ​អាត់​នេះ​ គឺ​ត្រូវ​បាន​គេ​កាត់​ត​ឡើង​​ដោយ​​ភាព​ប៉ិនប្រសប់បំផុត​។

លោក សុក សំអឿន ​បាន​មាន​ប្រសាសន៍​បន្ថែម​ទៀត​ថា “ការ​ថត​ចម្លង​ [ ខ្សែ​អាត់​សំឡេង] គឺ​វា​មិន​អី​ទេ ប៉ុន្តែ​ប្រសិន​បើ​ [ជន​ប្រព្រឹត្ត​បទ​ល្មើស​] សរសេរ ​អ្វីៗ​នៅ​តាម​គេហ​ទំព័រ​ហ្វេសប៊ុក​នោះ ​វា​អាច​ជា​​ការ​ផ្ដល់​ព័ត៌​មាន​​​មិន​ពិត​”៕

ប្រែសម្រួលដោយ ស៊ា ស៊ុយឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស