កាលពីម្សិលមិញ អ្នកសង្កេតការណ៍បោះឆ្នោតបានចេញសេចក្ដីថ្លែងការណ៍រួមមួយពាក់ព័ន្ធនឹងលទ្ធផលនៃការបោះឆ្នោតជាតិដែលមានជម្លោះ ដោយអំពាវនាវឲ្យមានការរាប់សន្លឹកឆ្នោតឡើងវិញនៅក្នុងក្រុងតាខ្មៅ ខេត្តកណ្ដាល ដែលកើតមានភាពមិនប្រក្រតីយ៉ាងច្រើន។
អង្គការ Situation Room ជាសម្ពន្ធនៃអង្គការក្រៅរដ្ឋាភិបាល និងអ្នកឃ្លាំមើលការបោះឆ្នោត ដែលត្រូវបានបង្កើតឡើង ដើម្បីត្រួតពិនិត្យការបោះឆ្នោតជាតិ កាលពីថ្ងៃទី២៨ ខែកក្កដា បានរកឃើញភាពមិនប្រក្រតីជាង១០.០០០ករណីនៅទូទាំងប្រទេស ប៉ុន្តែខេត្តកណ្ដាលគឺជាខេត្ត ដែលមានរបាយការណ៍ថា កើតមានភាពមិនប្រក្រតីច្រើនជាងគេ។ ខេត្តកណ្ដាលនេះ គឺជាខេត្តដែលលោកនាយករដ្ឋមន្ត្រី ហ៊ុន សែន បានឈរឈ្មោះជាបេក្ខជនតំណាងរាស្ត្ររបស់គណបក្សប្រជាជនកម្ពុជានៅលេខរៀងលំដាប់ទី១។
សេចក្ដីថ្លែងការណ៍នេះបានលើកឡើងថា “ភាពមិនប្រក្រតីនៅក្នុងខេត្តកណ្ដាល គឺគួរឲ្យព្រួយបារម្ភខ្លាំងណាស់ ជាពិសេសនៅការិយាល័យបោះឆ្នោតលេខ១២០៤ នៅក្នុងភូមិស្អាងភ្នំ ស្រុកស្អាង ដែលត្រូវបានបិទនៅមុន [ម៉ោង៣] រសៀល”។ សេចក្ដីថ្លែងការណ៍នេះបានលើកឡើងបន្ថែមថា ទម្រង់១១០៨ ដែលគេប្រើសម្រាប់កត់ត្រាសំឡេងឆ្នោត ត្រូវបានគេប្ដឹងពីការិយាល័យបោះឆ្នោតមួយទៀតក្នុងក្រុងតាខ្មៅ។
សេចក្ដីថ្លែងការណ៍នេះបានលើកឡើងបន្តទៀតថា “[អង្គការ Situation Room] ចង់ស្នើឲ្យក្រុមប្រឹក្សាធម្មនុញ្ញ និងគណៈកម្មាធិការជាតិរៀបចំការបោះឆ្នោត (គ.ជ.ប.) ត្រួតពិនិត្យការិយាល័យបោះឆ្នោតលេខ១២០៤ ហើយរាប់សន្លឹកឆ្នោតនៅក្នុងសង្កាត់តាខ្មៅឡើងវិញ”។
លោក ទេព នីថា អគ្គលេខាធិការ គ.ជ.ប. បានលើកឡើងម្ដងទៀតកាលពីម្សិលមិញថា គ.ជ.ប. លែងជាប់ពាក់ព័ន្ធនៅក្នុងដំណើរការ ដោះស្រាយពាក្យបណ្ដឹងទៀតហើយ។ លោកបានមានប្រសាសន៍ថា “ក្រុមប្រឹក្សាធម្មនុញ្ញឥឡូវនេះកំពុងតែដោះស្រាយបញ្ហាទាំងនេះ វាស្ថិតនៅក្រៅសមត្ថកិច្ចរបស់ គ.ជ.ប.”។ លោកបានបន្ថែមថា “សន្លឹកឆ្នោតត្រូវបានរាប់រួចហើយ រីឯលទ្ធផលបឋមនៃការបោះឆ្នោតក៏ត្រូវបានចេញរួចហើយដែរ ហើយឥឡូវនេះយើងកំពុងតែរង់ចាំក្រុមប្រឹក្សាធម្មនុញ្ញធ្វើការ”។
សេចក្ដីថ្លែងការណ៍រួមនេះបានលើកឡើងថា ក្នុងចំណោមភាពមិនប្រក្រតីជាង១០.០០០ករណី ដែលកើតមាននៅថ្ងៃបោះឆ្នោត មាន៤៨ភាគរយ គឺជាករណី ដែលប្រជាពលរដ្ឋបានទៅដល់ការិយាល័យបោះឆ្នោតរួចហើយ ប៉ុន្តែមិនមានសិទ្ធិបោះឆ្នោតឡើយ ដោយសារតែឈ្មោះរបស់ពួកគាត់បានបាត់ពីបញ្ជីឈ្មោះបោះឆ្នោត ឬក៏មានទិន្នន័យមិនត្រឹមត្រូវស្ដីពីឯកសារបញ្ជាក់ពីអត្តសញ្ញាណ។
គណបក្សសង្គ្រោះជាតិបានច្រានចោលលទ្ធផលបឋមនៃការបោះឆ្នោត ដែលបង្ហាញថា គណបក្សប្រជាជនកម្ពុជាទទួលបាន៦៨អាសនៈ រីឯគណបក្សសង្គ្រោះជាតិទទួលបាន៥៥អាសនៈ។ គណបក្សសង្គ្រោះជាតិបានចោទប្រកាន់ថា មានការលួចបន្លំសន្លឹកឆ្នោតច្រើន ហើយបានអះអាងថា ខ្លួនពិតជាឈ្នះការបោះឆ្នោតនេះ។
គណបក្សប្រឆាំងបានស្នើឲ្យមានការស៊ើបអង្កេតឯករាជ្យលើភាពមិនប្រក្រតីទាំងនេះ ហើយបានគំរាមធ្វើមហាបាតុកម្ម ប្រសិនបើការស៊ើបអង្កេតឯករាជ្យមិនត្រូវបានធ្វើឡើងក្នុងពេលឆាប់ៗ។ ហើយការគំរាមនេះបានធ្វើឲ្យរដ្ឋាភិបាលដាក់ពង្រាយនគរបាលនិងយោធានៅក្នុងនិងជុំវិញរាជធានី ជាបញ្ហាមួយទៀតដែលអង្គការ Situation Room បានលើកឡើងកាលពីម្សិលមិញ។ សេចក្ដីថ្លែងការណ៍នេះបានលើកឡើងថា “ [យើង] ចង់ស្នើឲ្យរដ្ឋាភិបាលដកចេញវិញនូវកងកម្លាំងប្រដាប់អាវុធ និងអាវុធនានា ដែលត្រូវបានដាក់ពង្រាយ ដើម្បីបំភិតបំភ័យប្រជាពលរដ្ឋ”៕
ប្រែសម្រួលដោយ ស៊ា ស៊ុយឈាង