កាលពីម្សិលមិញ អ្នកជំនាញផ្នែកច្បាប់បានច្រានចោលការព្រមានរបស់គណបក្សប្រជាជនកម្ពុជាកាលពីថ្ងៃអង្គារថា អាចមានការចាត់វិធានការផ្លូវច្បាប់ប្រឆាំងគណបក្សសង្គ្រោះជាតិប្រសិនបើគណបក្សនេះមិនព្រមឈប់និយាយថា គណបក្សកំពុងកាន់អំណាចគ្រប់គ្រងគណៈកម្មាធិការជាតិរៀបចំការបោះឆ្នោត (គ.ជ.ប.)។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានមានប្រសាសន៍កាលពីថ្ងៃអង្គារថា ការអះអាងរបស់គណបក្សសង្គ្រោះ ជាតិដែលថា គ.ជ.ប. ជាឧបករណ៍របស់គណ បក្សប្រជាជនកម្ពុជានោះ គឺជា “ការនិយាយបរិហារកេរ្តិ៍”។
ប៉ុន្តែ លោក សុក សំអឿន នាយកប្រតិបត្តិក្រុមអ្នកច្បាប់ការពារសិទ្ធិកម្ពុជាបានមានប្រសាសន៍កាលពីម្សិលមិញថា គណបក្សសង្គ្រោះជាតិអាចការពារខ្លួនចំពោះការចោទប្រកាន់បែបនេះបានដោយស្រួល។ លោកបានមានប្រសាសន៍ថា “តាមច្បាប់បរិហារកេរ្តិ៍របស់ប្រទេសកម្ពុជា ប្រសិនបើគណបក្សសង្គ្រោះជាតិមានភ័ស្តុតាងតែមួយដើម្បីគាំទ្រការអះអាងរបស់ខ្លួន [ថា គ.ជ.ប. ប្រើល្បិចបន្លំក្នុងការបោះឆ្នោតដើម្បីគាំទ្រគណបក្សប្រជាជនកម្ពុជា] គណបក្សនេះគឺជាអ្នកឈ្នះនៅក្នុងរឿងក្តីនេះ”។
លោកមានប្រសាសន៍ថា “ឧទាហរណ៍ ប្រសិនបើគណបក្សសង្គ្រោះជាតិអាចបង្ហាញថា មានតែមន្ត្រី គ.ជ.ប. មួយរូបប៉ុណ្ណោះ គឺជាសមាជិករបស់គណបក្សប្រជាជនឬថា សមាជិកម្នាក់បានធ្វើអ្វីៗដើម្បីជួយគណបក្សប្រជាជនឲ្យឈ្នះឆ្នោតនោះ ដូច្នេះហើយគេនឹងពេញចិត្តដោយសារមិនមានការបរិហារកេរ្តិ៍ឡើយ។ ខ្ញុំគិតថា វាជាករណីងាយស្រួលបំផុតសម្រាប់គណបក្សសង្គ្រោះជាតិត្រូវបង្ហាញ”។
គ.ជ.ប. ដែលមានសមាជិកប្រាំបួនរូបមានទំនាក់ទងមិនអាចប្រកែកបានចំពោះគណបក្សប្រជាជនកម្ពុជា។ តួយ៉ាង លោក អ៊ឹម សួស្តី ប្រធាន គ.ជ.ប. គឺជាប្អូនប្រុសរបស់លោក អ៊ឹម សិទ្ធី រដ្ឋមន្ត្រីក្រសួងអប់រំមកពីគណបក្សប្រជាជនកម្ពុជា ហើយលោកធ្លាប់ធ្វើជាអនុប្រធានសមាគមយុវជនរបស់គណបក្សប្រជាជនកម្ពុជាទៀតផង។
កង្វល់ជុំវិញឯករាជភាពរបស់ គ.ជ.ប. ក៏ត្រូវបានលើកឡើងដោយលោក សុរិយា ស៊ូបេឌី (Surya Subedi) អ្នកធ្វើរបាយការណ៍ពិសេសផ្នែកសិទ្ធិមនុស្សរបស់អង្គការសហប្រជាជាតិប្រចាំប្រទេសកម្ពុជា។
លោក គល់ បញ្ញា នាយកប្រតិបត្តិគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ដែលនៅខែតុលាលោកមានគម្រោងចេញផ្សាយរបាយការណ៍ពេញលេញស្តីពីសមាសភាព ការជ្រើសរើស និងការអនុវត្តរបស់ គ.ជ.ប. នោះបានមានប្រសាសន៍ថា ការជ្រើសតាំងសមាជិក គ.ជ.ប. ត្រូវបានគ្រប់គ្រងទាំងស្រុងដោយគណបក្សកំពុងកាន់អំណាច។
លោកបានថ្លែងថា “ការជ្រើសរើសសមាជិក គ.ជ.ប. ទាំងអស់ឆ្លងកាត់ក្រសួងមហាផ្ទៃ ទីស្តីការគណៈរដ្ឋមន្ត្រី និងរដ្ឋសភា។ស្ថាប័នទាំងអស់នេះសុទ្ធតែស្ថិតនៅក្រោមការគ្រប់គ្រងរបស់គណបក្សប្រជាជនកម្ពុជា”។ លោកបានបន្ថែមថា “ខ្ញុំគិតថា គណបក្សប្រជាជននឹងមិនយករឿងក្តីនេះទៅដោះស្រាយនៅក្នុងតុលាការឡើយ ប៉ុន្តែ ប្រសិនបើពួកគេធ្វើមែន ជាមួយស្ថានភាពបច្ចុប្បន្នរបស់តុលាការ និងបញ្ហាអព្យាក្រឹតភាពនោះ គណបក្សប្រជាជនកម្ពុជានឹងឈ្នះ”។
ប៉ុន្តែ លោក ធន សារាយ ប្រធានអង្គការសិទ្ធិមនុស្សអាដហុកបានមានប្រសាសន៍ថា ការគ្រាន់តែបង្ហាញទំនាក់ទំនងមុនៗរវាងសមាជិក គ.ជ.ប. បច្ចុប្បន្ន និងគណបក្សប្រជាជនកម្ពុជានោះ នឹងមិនអាចចាត់ទុកថា ជាភ័ស្តុតាងរឹងមាំនៅក្នុងតុលាការបានឡើយ។ លោក ធន សារាយ បានមានប្រសាសន៍ថា “វាជាការលំបាកក្នុងការស្វែងរកភ័ស្តុតាងពិតប្រាកដថា សមាជិក គ.ជ.ប. ត្រូវបានណែនាំដោយគណបក្សប្រជាជនកម្ពុជា… ប៉ុន្តែ បើយើងវិនិច្ឆ័យលើសកម្មភាពរបស់ពួកគេ [ដូចជា] ការរៀបចំបញ្ជីឈ្មោះបោះឆ្នោត និងលទ្ធភាព [របស់គ.ជ.ប.] ឬឆន្ទៈក្នុងការដោះស្រាយបញ្ហានានាពាក់ព័ន្ធ [ការបោះឆ្នោត] នោះ យើងអាចមើលឃើញយ៉ាងច្បាស់ថាពួកគេលម្អៀង ឬមិនលម្អៀងហើយ”។
ពេលទាក់ទងកាលពីម្សិលមិញ លោក ផៃ ស៊ីផាន បានរក្សាគោលជំហររបស់លោក។ លោកបានមានប្រសាសន៍ថា “ខ្ញុំមិនមែនជាអ្នកជំនាញផ្នែកច្បាប់ទេ ប៉ុន្តែ ខ្ញុំប្រកាន់តាមការអត្ថាធិប្បាយរបស់ខ្ញុំ។ ខ្ញុំមិនចាំបាច់បន្ថែមចំណុចអ្វីផ្សេងទៀតឡើយ”៕
ប្រែសម្រួលដោយ សោម សារុន