យោងតាមលោកស្រី មូរ សុខហួរ បេក្ខជនតំណាងរាស្ត្រគណបក្សប្រឆាំង ដែលបានរៀបចំវេទិកាសាធារណៈបានឲ្យដឹងថា មន្ត្រីនគរបាលប្រហែល៥០នាក់បានរារាំងអ្នកភូមិមិនឲ្យចូលរួមនៅក្នុងវេទិកាសាធារណៈមួយដែលរៀបចំឡើងដើម្បីពិភាក្សាអំពីភាពមិនប្រក្រតីនៃការបោះឆ្នោត នៅក្នុងខេត្តបាត់ដំបងកាលពីម្សិលមិញ។
លោកស្រី មូរ សុខហួរ បានមានប្រសាសន៍កាលពីម្សិលមិញថា វេទិកានេះត្រូវបានរៀបចំឡើងនៅក្នុងភូមិតូចមួយស្ថិតនៅក្នុងសង្កាត់អូរចារ ក្រុងបាត់ដំបងដើម្បីពិភាក្សាអំពីភាពមិនប្រក្រតីពាក់ព័ន្ធនឹងការបោះឆ្នោត ប៉ុន្តែចៅសង្កាត់ក្នុងមូលដ្ឋាននេះបានប្រាប់លោកស្រីថា ពួកគាត់មិនអាចរៀបចំវេទិកានេះបានទេ។
លោកស្រីបានមានប្រសាសន៍ថា “គេបានប្រាប់ពួកយើងថា យើងមិនអាចរៀបចំវេទិកានេះបានទេ ហើយនៅពេលនោះនគរបាលបានចាប់ផ្ដើមរារាំងអ្នកភូមិដែលមកពីតំបន់នានានៅក្នុងភូមិមិនឲ្យធ្វើដំណើរមកកាន់កន្លែងដែលយើងបានរៀបចំវេទិកានៅក្នុងផ្ទះឯកជនមួយឡើយ”។
លោកស្រី មូរ សុខហួរ បានពន្យល់ថា ពីដំបូង សមត្ថកិច្ចប្រើខែលរបស់ខ្លួនរុញច្រានអ្នកភូមិចេញ ពេលដែលពួកគាត់ព្យាយាមចូលទៅក្នុងផ្ទះនោះ ដោយធ្វើឲ្យអ្នកភូមិមួយចំនួនរងរបួស ហើយបន្ទាប់មកសមត្ថកិច្ចនៅតែឈរជើងនៅខាងក្រៅដើម្បីឃ្លាំមើលវេទិកានេះដដែល បន្ទាប់ពីអ្នកភូមិបានសម្រុកចូលទៅខាងក្នុង។
លោកស្រីបានមានប្រសាសន៍ថា “នគរបាលស្ថិតនៅខាងក្រៅកន្លែងរៀបចំវេទិកាដដែល ហើយបានថតរូបអ្នកភូមិគ្រប់គ្នាដែលបានចូលរួមក្នុងវេទិកានេះ ហើយថតរូបអ្នកភូមិណាដែលឡើងនិយាយ”។
លោក មួន សារ៉ាត់ សកម្មជនគណបក្សសង្គ្រោះជាតិនៅក្នុងខេត្តបាត់ដំបង បានមានប្រសាសន៍ខាងក្រៅវេទិកាកាលពីម្សិលមិញថា នគរបាលបានបន្តបិទផ្លូវចូលទៅកាន់ផ្ទះដែលជាកន្លែងរៀបចំវេទិកានោះ បន្ទាប់ពីអ្នកភូមិបានសម្រុកចូលទៅខាងក្នុង។ លោកបានមានប្រសាសន៍ថា “មានជម្លោះបន្តិចបន្តួច ហើយឥឡូវនេះ [ក្រុមអ្នកភូមិ] បានមកចូលរួមហើយ ប៉ុន្តែ នៅតែមានការបិទផ្លូវផ្សេងទៀតដដែល ហើយពួកគេមិនអនុញ្ញាតឲ្យនរណាម្នាក់ដើរកាត់មកកាន់ទីនេះឡើយ”។
លោក ទូច រ៉ា អធិការនគរបាលក្រុងបាត់ដំបង បានមានប្រសាសន៍ថា វេទិកានេះត្រូវបានរៀបចំឡើងដោយខុសច្បាប់ ពីព្រោះអ្នករៀបចំមិនបានសុំការអនុញ្ញាតពីអាជ្ញាធរឲ្យបានត្រឹមត្រូវឡើយ។ លោកបានមានប្រសាសន៍ថា “ពួកគាត់បានមកជួបជុំគ្នាដោយគ្មានសុំការអនុញ្ញាតឡើយ។ ពួកគាត់បានស្នើសុំអាជ្ញាធរសង្កាត់ ហើយអាជ្ញាធរសង្កាត់បានប្រាប់ពួកគាត់ឲ្យទៅសុំអាជ្ញាធរខេត្ត ហើយពួកគាត់មិនបានធ្វើតាមឡើយ”។
លោក ទូច រ៉ា បានបន្ថែមថា នគរបាលប្រហែល៥០នាក់ ត្រូវបានដាក់ពង្រាយនៅកន្លែងរៀបចំវេទិកានោះក្រែងលោមានបញ្ហាកើតឡើង។ លោកបានមានប្រសាសន៍ថា “យើងបានធ្វើដំណើរទៅកាន់ទីនោះតាំងពីម៉ោង៧ និង៣០នាទីព្រឹក ហើយយើងបានអនុញ្ញាតឲ្យពួកគាត់រៀបចំវេទិកានោះ។ យើងឈរជើងនៅខាងក្រៅក្រែងលោមានបញ្ហាអ្វីកើតឡើង”។លោកបដិសេធថា នគរបាលមិនបានវាយអ្នកភូមិទេ”។
លោកបានមានប្រសាសន៍បន្ថែមថា “[ក្រុមអ្នកភូមិ] បានដើរចូលទៅក្នុងផ្ទះនោះ ហើយបានរុញច្រាននគរបាល ហើយពួកគាត់បែរជានិយាយថា នគរបាលបានវាយពួកគាត់ទៅវិញ។ ខ្ញុំមិនយល់ពីអ្វីដែលពួកគាត់បានធ្វើឡើយ”។
លោក គឹម ជង ចៅសង្កាត់អូរចារ បានយល់ស្របថា វេទិកានេះត្រូវបានរៀបចំឡើងដោយខុសច្បាប់ ដោយមានប្រសាសន៍ថា អ្នករៀបចំកម្មវិធីមានការយល់ច្រឡំ ដោយបានមកទាក់ទងសុំការអនុញ្ញាតពីរូបលោកទៅវិញ។ លោកបានមានប្រសាសន៍ថា “ខ្ញុំមិនមានសិទ្ធិអនុញ្ញាតទេ ពីព្រោះវាគឺជាវេទិកាទ្រង់ទ្រាយធំដោយមានប្រជាជនច្រើនមកចូលរួម មានទាំងសមាជិកសភាផងដែរ”។
លោក យិន ម៉េងលី អ្នកសម្របសម្រួលប្រចាំខេត្តរបស់អង្គការសិទ្ធិមនុស្សអាដហុក បានមានប្រសាសន៍ថា អ្នករៀបចំវេទិកាមិនចាំបាច់សុំការអ នុញ្ញាតពីអាជ្ញាធរក្នុងការរៀបចំវេទិការបស់ខ្លួនទេ។ លោកបានមានប្រសាសន៍ថា “ការនិយាយបែបនេះគឺខុសទាំងស្រុង។ វាមិនមែនជាការធ្វើបាតុកម្មទេ វាគ្រាន់តែជាការរៀបចំវេទិកានៅក្នុងផ្ទះតែប៉ុណ្ណោះ”។
លោក ហង្ស ពុទ្ធា នាយកគណៈកម្មាធិការអព្យាក្រឹត និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា (និកហ្វិច) បានមានប្រសាសន៍ថា តំណាងគណៈកម្មាធិការ និកហ្វិច បានមកចូលរួមវេទិកានេះ និងបានបញ្ជាក់ពីប្រសាសន៍របស់លោកស្រី មូរ សុខហួរ ហើយលោកបានបន្ថែមថា ក្នុងប្រទេសកម្ពុជាមិនចាំបាច់សុំការអនុញ្ញាតសម្រាប់រៀបចំវេទិកាទេ។
លោកបានមានប្រសាសន៍ថា “ ពួកគេមិនចាំបាច់សុំការអនុញ្ញាតទេ។ វេទិកានេះគ្រាន់តែដើម្បីផ្ដល់ព័ត៌មានអំពីការបោះឆ្នោតតែប៉ុណ្ណោះ។ ខ្ញុំគិតថា វេទិកានេះគឺទាក់ទងទៅនឹងការជួបជុំគ្នារបស់គណបក្សប្រឆាំង ពីព្រោះពួកគេខ្លាចថា វេទិកានេះនឹងផ្សព្វផ្សាយពីការជួបជុំគ្នា”៕
ប្រែសម្រួលដោយ សោម សារុន