31 C
Phnom Penh

លោក​ សម រង្ស៊ី ​ដើរ​កៀង​គរ​​ការ​គាំទ្រ​នៅ​​តាម​ផ្សារ​មុនពេលជួប​ជុំ​

ដោយ ឌឹ ខេមបូឌា ដេលី

បទវិភាគ

កាល​ពីថ្ងៃ​សុក្រ លោក​ សម រង្ស៊ី មេដឹក​នាំ​គណបក្ស​ប្រឆាំង​បាន​ចុះ​ទៅ​សួរសុខ​ទុក្ខ​អាជីវករលក់​ដូរ​នៅ​តាម​ផ្សារ​ទួល​ទំពូង និង​ផ្សារអូឡាំពិក​ ក្នុង​រាជធានីភ្នំពេញ ហើយ​បាន​អំពាវ​នាវ​ឲ្យ​អ្នក​បោះឆ្នោត​ដែល​ខក​ចិត្ត​ដោយ​សារ​លទ្ធផល​បឋម​នៃ​ការ​បោះឆ្នោត​បាន​ផ្តល់​ជ័យ​ជម្នះ​ទៅ​ឲ្យគណបក្ស​ប្រជាជន​កម្ពុជា​ ឲ្យ​ចូល​រួម​ការ​ជួប​ជុំគ្នា​ដែល​គ្រោង​នឹង​ធ្វើ​ឡើង​នៅ​សួន​សេរីភាព​នៅ​ថ្ងៃ​ច័ន្ទ។

លោក សម រង្ស៊ី មេ​​​ដឹក​​​នាំ​​​គណបក្ស​​​ប្រឆាំង​​​ ទៅ​​​សួរ​​​សុខ​​​ទុក្ខអាជីវករ​​​លក់​​​ដូរ​​​នៅ​​​ផ្សារ​​​អូរ​​​​​​ឡាំពិក ក្នុង​​​រាជ​​​ធានី​​​ភ្នំពេញ​​​​​​ កាល​​​ពី​​​​​​ថ្ងៃ​​​សុក្រ​​​ ដើម្បី​​​ទាក់​​​ទាញ​​​ការ​​​គាំទ្រ​​​​​​​​​ឲ្យ​​​បាន​​​ច្រើន​​​មុន​​​ថ្ងៃ​​​ជួប​​​ជុំ​​​គ្នា​​​ ដែល​​​គ្រោង​​​​​​ធ្វើ​​​ឡើង​​​ក្នុង​​​ថ្ងៃ​​​ច័ន្ធ​​​ នៅ​​​សួន​​​សេរីភាព​​​។ (ស៊ីវ ចាន់ណា)
លោក សម រង្ស៊ី មេ​​​ដឹក​​​នាំ​​​គណបក្ស​​​ប្រឆាំង​​​ ទៅ​​​សួរ​​​សុខ​​​ទុក្ខអាជីវករ​​​លក់​​​ដូរ​​​នៅ​​​ផ្សារ​​​អូរ​​​​​​ឡាំពិក ក្នុង​​​រាជ​​​ធានី​​​ភ្នំពេញ​​​​​​ កាល​​​ពី​​​​​​ថ្ងៃ​​​សុក្រ​​​ ដើម្បី​​​ទាក់​​​ទាញ​​​ការ​​​គាំទ្រ​​​​​​​​​ឲ្យ​​​បាន​​​ច្រើន​​​មុន​​​ថ្ងៃ​​​ជួប​​​ជុំ​​​គ្នា​​​ ដែល​​​គ្រោង​​​​​​ធ្វើ​​​ឡើង​​​ក្នុង​​​ថ្ងៃ​​​ច័ន្ធ​​​ នៅ​​​សួន​​​សេរីភាព​​​។ (ស៊ីវ ចាន់ណា)

នៅពេល​លោកចុះ​តាម​ផ្សារ​ទាំង​ពីរ​នេះ​លោក សម រង្ស៊ី បាន​ឱប និង​ចាប់​ដៃ​​អ្នក​គាំទ្រ​​ របស់​លោក​ ខណៈ​មនុស្ស​ជាច្រើន​ជូន​ផ្កាទៅ​លោក  រីឯ​មនុស្ស​ជាច្រើន​ទៀត​ប្រជ្រៀត   ​គ្នា​ដើម្បី​ថត​រូប និងរូបភាព​វីដេអូ​មេដឹកនាំ រូប​​​នេះ​។ លោក សម រង្ស៊ី  ដែលបាន​ដើរ​ជុំ​វិញ​ផ្សារ​​​ពោរពេញ​ទៅ​ដោយ​មនុស្ស​​យ៉ាង​ច្រើន​កុះករ​ដោយ​គ្មាន​ការ​រារាំង​ពីនគរបាល​ ឬ​សន្តិ​សុខ​ណា​ម្នាក់​បាន​មាន​ប្រសាសន៍ថា “ខ្ញុំ​​ សប្បាយ​រីករាយ​ និង​រំភើប​ខ្លាំង​ណាស់​ដែល​បាន​ជួប​ជាមួយ​បង​ប្អូន​អាជីវករ​លក់​ដូរ​ទាំង​អស់​នៅ​ថ្ងៃ​នេះ ពី​ព្រោះ​អ្នក​ទាំ​ងអស់​គ្នាមាន​ទំនាក់​ទំនង​ជា​ពិសេស​ជាមួយ​ខ្ញុំ យើង​ដូច​ជា​ប្អូន​បង្កើត​អ៊ីចឹង”។

ថ្លែង​ទៅកាន់​អ្នក​យក​ព័ត៌មាន​នៅ​ឯផ្សារ​ទួល​ទំពូង​ដែល​លោក​ចុះ​ទៅ​សួរ​សុខ​ទុក្ខ​អំឡុង​ពេល​ព្រឹក​ លោក​ សម រង្ស៊ី បាន​លើក​ឡើង​ម្តង​ទៀត​ពីគោល​ជំហ​របស់​គណបក្ស​​លោក​ថា សមាជិក​សភា​របស់​គណ​បក្ស​សង្គ្រោះជាតិ​នឹង​មិន​ចូល​ទៅ​អង្គុយ​នៅ​ក្នុង​រដ្ឋ​សភា​ឡើយ​​  រហូត​ដល់​ភាព​ជាប់​គាំង​ចំពោះការ​ចោទ​ប្រកាន់​ពី​ភាព​មិន​ប្រក្រតី​អំឡុង​ការ​បោះឆ្នោត​ជាតិ​ កាល​ពីថ្ងៃទី ២៨​ ខែ​កក្កដា​ត្រូវ​បាន​ដោះស្រាយ​។

លោក​បាន​ថ្លែង​ថា “នៅ​ពេល​យើង​ទទួល​បាន​យុត្តិធម៌​សម្រាប់​ប្រជាពល​រដ្ឋ​ ហើយ​ទទួល​បាន​ការទុក​ចិត្ត​ពី​ប្រជាពល​រដ្ឋ​ដោយ​មិន​អនុញ្ញាត​ឲ្យ​ [គណបក្ស​ប្រជាជនកម្ពុជា] លួច​បន្លំ​សន្លឹក​ឆ្នោត​ និង​ទទួល​បាន​ជ័យជម្នះ​នៅ​ក្នុ​ងការ​បោះឆ្នោត​ដែល​មាន​ការ​ទទួល​ស្គាល់​ពី​ប្រជាពល​រដ្ឋ​ នៅ​ពេល​នោះយើង​នឹង​ចូល​រួម​កិច្ច​ប្រជុំ​នៅ​ក្នុ​ងរដ្ឋ​សភា​”។

លោក សម រង្ស៊ី ក៏បាន​ប្រាប់​ទៅ​កាន់​អាជី​វករ​លក់​ដូរ​ដែរថា លោក​សង្ឃឹម​ថា ប្រជា​ពល​រដ្ឋ​នឹង​គាំទ្រគោល​បំណង​របស់​គណ​បក្ស​លោកដែល​ចង់​ធ្វើ​ឲ្យការ​បោះ​ឆ្នោតមាន​​តម្លា​ភាព​ដោយ​ចូលរួ​មការ​ជួបជុំ​គ្នា​នៅ​​សួន​សេរី​ភាព​ក្នុង​រាជធានីភ្នំពេញក្នុង​ថ្ងៃច័ន្ទ  ទោះ​ជា​យ៉ាងណា លោក​បានមាន​ប្រសាសន៍​​​បន្ត​ទៀត​​ថា ព្រឹត្តិ​ការណ៍​នេះ​មិន​គួរ​ត្រូវ​បាន​ចាត់​ទុក​ជា បាតុ​កម្ម​ប្រឆាំង​លទ្ធផល​ការ​បោះ​ឆ្នោត​ឡើយ​ ប៉ុន្តែ​ វា​គឺជាឱកាស​ដើម្បី​ជំរាប​ជូន​អ្នក​គាំទ្រទាំង​អស់​​ឲ្យដឹង​ពី​ស្ថានភាព​នយោ​បាយ​បច្ចុប្បន្ន​នៅ​កម្ពុជា​។

លោក​បាន​ថ្លែង​ថា “ខ្ញុំ​សង្ឃឹម​ថា មនុស្ស​ជាច្រើន​នឹង​ចូល​រួម​​ក្នុងការ​ជួប​ជុំ​គ្នា​នេះ​ ប៉ុន្តែ ការ​ជួប​ជំុនេះ​មិន​មែន​ជាបាតុកម្ម​ឡើយ​”។
នៅ​ពេល​គណបក្ស​សង្គ្រោះជាតិ​រំពឹង​ថា នឹង​មាន​មនុស្ស​យ៉ាង​តិចណាស់​ ១០.០០០​នាក់​មក​ចូលរួម​​ការ​ជួប​ជុំ​នេះ​ អាជ្ញាធរ​បាន​​ចាត់​វិធាន​ការ​ប្រឆាំង​ដើម្បី​បន្លាច​ប្រជាពល​រដ្ឋ​មិន​ឲ្យ​ចូល​រួម​​ដូចជា មាន​ការ​ដាក់​ពង្រាយ​កង​សន្តិសុខ​ និង​ការ​ប្រើ​ពាក្យ​គំរាម​​ដើម្បី​បំភិត​បំភ័យ​អ្នក​គាំទ្រ​កុំ​ឲ្យចូល​រួម​​ការ​ជួប​ជុំ​នេះ​ជាដើម​។

អាជ្ញាធរ​ក៏បាន​យក​ញត្តិ​ទៅ​តាម​ផ្សា​រ​នានា​ក្នុង​រាជធានី​ភ្នំពេញផង​ដែរ​ ដើម្បី​ស្នើ​ឲ្យ​ប្រជាពល​គាំទ្រ​លទ្ធផល​បឋម​នៃការ​បោះ​ឆ្នោត​ដែល​បង្ហាញថា គណបក្ស​ប្រជាជន​កម្ពុជា​បាន​ឈ្នះ​ឆ្នោត​ និង​ស្នើ​ឲ្យ​ប្រជាពល​រដ្ឋ​សន្យា​មិន​ចូល​រួម​រាល់​បាតុកម្ម​ណាមួយ​ដែល​នឹង​ធ្វើឡើង​ដោយគណបក្ស​ប្រឆាំង​។

អាជីវករលក់​ដូរ  អ្នក​រត់​ម៉ូតូឌុប និ​ងអ្នក​ធាក់​ស៊ីក្លូ ជុំវិញផ្សារ​​អូប្ញស្សីបានឲ្យ​ដឹង​ថា បុគ្គ​លិកផ្សារ​បាន​ដើរ​ប្រមូល​ស្នាម​ផ្តិត​មេដៃកាល​ពីថ្ងៃច័ន្ទ​ និ​ង​បាន​បំភិត​បំភ័យ​​ប្រជា​ពល​រដ្ឋ​ឲ្យផ្តិត​មេដៃ  រីឯ​អង្គការ​ក្រៅ​រដ្ឋាភិបាល​ក៏​បាន​លើក​ឡើង​ផង​ដែរថា ប្រជា​ពល​រដ្ឋ​ក្នុង​សង្កាត់​ជាច្រើន​ផ្សេងៗ​ទៀត​នៅ​ក្នុង​រាជធានី​ភ្នំពេញ​ក៏មានការ​រអ៊ូរទាំ​​ពី​បញ្ហា​ស្រដៀង​គ្នា​នេះ​ដែរ។

ប៉ុន្តែ កា​លពីម្សិលមិញ​ អាជីវករ​លក់​ដូរ​នៅ​ផ្សារ​អូឡាំពិក និ​ងផ្សារ​ទូល​ទំពូង​មិន​បាន​បង្ហាញ​ពីអារម្មណ៍​ភ័យ​ខ្លាច​ដូចនោះ​ឡើយ​ ហើយ​បាន​បង្ហាញ​ពី​សុទិដ្ឋិនិយម​ថា លោក​ សម​ រង្ស៊ី​ និង​គណបក្ស​របស់​លោក​នឹងអាច​ជួយ​​បញ្ចប់​ភាព​ជាប់​គាំង​ផ្នែក​នយោបាយ​ក្នុង​ពេល​បច្ចុប្បន្ន​។

អាជីវករ​ម្នាក់​អាយុ​៥៦ឆ្នាំ​ ដែល​ប្រាប់​ឈ្មោះ​ត្រឹម​តែ​ថា  ជាអ្នក​ស្រី ឡុង ព្រោះ​ខ្លាច​​មានការ​សងសឹក​បាន​មាន​ប្រសាសន៍ថា “ខ្ញុំ​គាំទ្រ​លោក សម រង្ស៊ី ហើយ​លោក​បាន​មក​ផ្សារនេះ​ គឺ​ដើម្បីសួរ​សុខ​ទុក្ខ​យើង​”។ អ្នក​ស្រី​បាន​មាន​ប្រសាសន៍​បន្ថែម​ថា “ប្រជា​ពល​រដ្ឋ​ជឿជាក់​ថា គណបក្ស​សង្គ្រោះជាតិ​បាន​ឈ្នះការ​បោះឆ្នោត​នេះ​ ប៉ុន្តែ យើង​មិន​ដឹង​ថា ហេតុ​អ្វី​បាន​ជាមាន​ការ​​ប្រែ​ប្រួល​ដូច​នេះឡើយ​”។

អាជីវករ​លក់​សាច់​ជ្រូក​អាយុ​២៨ឆ្នាំ​ម្នាក់​នៅផ្សារ​ទួល​ទំពូង​ដែល​បដិសេធ​មិន​ប្រាប់​ឈ្មោះ​របស់​គាត់​​បាន​និយាយថា គាត់​សង្ឃឹម​ថា លោក​ សម រង្ស៊ី អាចនឹង​ក្លាយ​ជា​នាយក​រដ្ឋ​មន្ត្រី ពីព្រោះលោក​នឹង​ធ្វើ​ឲ្យការ​រកស៊ី​​របស់​គាត់​កាន់​តែ​មាន​ភាព​រីកចម្រើន​។ អាជីវកររូប​នេះ បាន​និយាយបន្តទៀត​ថា “ខ្ញុំ​គិត​ថា លោក​គឺ​ជា​មេដឹកនាំ​ល្អបំផុត​សម្រាប់​ប្រទេស​កម្ពុជា​ ហើយ​ខ្ញុំ​សង្ឃឹម​ថា លោក​នឹង​ជួយ​អាជីវករ​លក់​ដូរ​របស់​យើង​ឲ្យលក់​កាន់​តែ​ដាច់​ជាង​មុន​”។

កាល​ពីថ្ងៃ​សុក្រ  មន្ត្រីគណបក្ស​សង្គ្រោះ​ជាតិ​​បាន​ជួប​ពិភាក្សា​ជាមួយ​លោក​ ប៉ា សុជាតិ​រង្ស​ អភិបាល​រាជធានី​ភ្នំពេញ​ដើម្បីពិភាក្សា​ពី​ការ​រៀបចំ​សន្តិសុខ​ចុងក្រោយ​សម្រាប់​ការ​ជួប​​ជំុ​នៅ​ថ្ងៃ​ច័ន្ទ​​ ដែល​គ្រោង​នឹង​ចាប់​ផ្តើម​នៅ​ម៉ោង​៤​រសៀល​។ បន្ទាប់​ពី​ការ​ជួប​ពិភាក្សា​លោក​ ប៉ា​ សុជាតិ​វង្ស បាន​មាន​ប្រសាសន៍ថា  លោក​​បាន​បញ្ជូន​សំណើ​របស់​គណបក្ស​ប្រឆាំង​ទៅ​កាន់​ក្រសួង​មហា​ផ្ទៃ​ដោយបាន​កំណត់​ថា ការ​ជួប​ជុំ​នេះ​ត្រូវ​បញ្ចប់នៅម៉ោង​៦​ល្ងាច​​យ៉ាង​យូរ​។

លោក​ឧត្តម​សេនីយ៍​ឯក ខៀវ​ សុភ័គ អ្នក​នាំពាក្យ​ក្រសួង​មហាផ្ទៃបាន​លើក​ឡើង​ថា លោក​បាន​ទទួល​សំណើ​​របស់​គណបក្ស​ប្រឆាំង​ហើយ​ ហើយ​​បាន​បន្ថែមច្បាប់​មួយ​ចំនួន​ទៀត​​មុនការ​ជួប​ជុំ​នេះ។ លោក​បាន​មាន​ប្រសាសន៍​បន្ថែម​ទៀត​ថា “យើង​ឯក​ភាព​គ្នា​លើ៣ចំណុច៖ ការ​ជួបជុំត្រូវ​តែ​បញ្ចប់​យ៉ាង​យូរ​បំផុត​នៅ​ម៉ោង​៦ល្ងាច​ យើង​នឹង​អនុញ្ញាត​ឲ្យមាន​តែ​មនុស្ស​ចំនួន​៦.០០០នាក់​ប៉ុណ្ណោះ​ចូល​រួម ​ ហើយ​ប្រជា​ពល​រដ្ឋ​មក​ពី​បណ្តា​ខេត្ត​នានា​មិន​អនុ​ញ្ញាត​ឲ្យ​ចូល​រួម​ឡើយ​”។

លោក​ឧត្តម​សេនីយ៍​ឯក ខៀវ សុភ័គ បាន​ថ្លែងដោយ​​បដិសេធមិន​និយាយថា តើ​វិធាន​ការណ៍អ្វី​នឹង​ត្រូវ​យក​មក​ប្រើ​ប្រសិន​បើ​មាន​​មនុស្ស​​ច្រើន​ជាង​៦.០០០នាក់​មក​ចូល​រួម​ការ​ជួបជុំ​នៅ​ថ្ងៃច័ន្ទ​ថា “ យើង​មិន​អនុញ្ញាតឲ្យ​​ពួកគេ​ដើរក្បួន​តាម​ផ្លូវ​ឡើយ​ ហើយ​គណ​បក្ស​សង្គ្រោះជាតិ​ត្រូវ​តែមាន​កង​សន្តិសុខ​ផ្ទាល់​ខ្លួន​ដើម្បី​គ្រប់​គ្រង​អ្នក​មក​ចូល​រួម​ ហើយ​ត្រូវ​ចូល​រួម​សហ​ការ​ជាមួយ​កង​កម្លាំង​របស់​យើង​នៅខាង​ក្រៅ​”។

លោកស្រី មូរ សុខហួរ សមាជិក​សភា​មក​ពីគណបក្ស​សង្គ្រោះជាតិ​បាន​លើក​ឡើង​ថា វា​ជារឿង​លំបាក​ណាស់​ដែល​ហាម​ឃាត់​​មិន​ឲ្យ​ប្រជាពល​រដ្ឋ​មក​ចូល​រួម​ការ​ជួប​ជុំ​គ្នា​នេះ​។ លោក​ស្រីមាន​ប្រសាសន៍ថា “ប្រសិន​​បើ​ប្រជាពលរដ្ឋ​​ចេះ​តែមក   មក អ៊ីចឹង  តើ​យើង​​បញ្ឈប់​ពួកគាត់​យ៉ាង​ដូចម្តេច​?​ ហើយ​ខ្ញុំ​ដឹង​ថា ប្រជាពល​រដ្ឋ​ជាច្រើន​នឹង​មក​ចូល​រួម​”។

លោកឧត្តម​សេនីយ៍ត្រី​ ខេង​ ទីតូ អ្នក​នាំ​ពាក្យ​របស់​កង​រាជអាវុធ​លើ​ផ្ទៃប្រទេស​បាន​មាន​ប្រសាសន៍នៅក្នុង​សប្តាហ៍នេះថា រាល់​ការ​ប៉ុនប៉ង​ណាមួយ​ដើម្បី​បង្ក​ចលាចល​នៅ​កន្លែង​ជួបជុំ​នឹង​គ្មានការលើក​លែងឡើយ​ ហើយ​កង​កម្លាំង​សន្តិសុខ​បាន​ត្រៀម​រួចរាល់​ហើយ​ដើម្បី​បង្ក្រាបអំពើ​ហិង្សា​៕

ប្រែ​​​សម្រួល​​​ដោយ ឈ៊ា ស៊ុយ​ឈាង​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស