កាលពីថ្ងៃសុក្រ ក្រុមប្រឹក្សាធម្មនុញ្ញកម្ពុជាបានប្រកាសថា ខ្លួនបានសម្រេចបើកកញ្ចប់សុវត្ថិភាពសរុបចំនួន១៣ ដែលផ្ទុកច្បាប់ដើមនៃឯកសារបោះឆ្នោតសំខាន់ៗ ដើម្បីស៊ើបអង្កេតពីភាពមិនប្រក្រតីនៅការិយាល័យបោះឆ្នោតនានាក្នុងខេត្តក្រចេះ។
លោក អ៊ុត ឈន អ្នកនាំពាក្យក្រុមប្រឹក្សាធម្មនុញ្ញ បានលើកឡើងថា ស្ថាប័នរបស់លោក នឹងអញ្ជើញសាធារណជនឲ្យមកទីស្នាក់ការកណ្តាលរបស់គណៈកម្មាធិការជាតិរៀបចំការបោះឆ្នោត (គ.ជ.ប.) នៅថ្ងៃអាទិត្យដើម្បីធ្វើ ជាសាក្សីពេលបើកកញ្ចប់សុវត្ថិភាពនេះ។
លោក អ៊ុត ឈន បានមានប្រសាសន៍ថា “[កាលពីថ្ងៃសុក្រ] ក្រុមប្រឹក្សាធម្មនុញ្ញបានសម្រេចថា គ.ជ.ប. នឹងបើកកញ្ចប់សុវត្ថិភាពចំនួន១៣ ដែលបានមកពីការិយាល័យបោះឆ្នោតនានានៅក្នុងឃុំស្វាយជ្រះ ស្រុកស្នួលដើម្បីផ្ទៀងផ្ទាត់លទ្ធផលនៃការបោះឆ្នោត។លោកបានបន្ថែមថា ការបើកកញ្ចប់សុវត្ថិភាពនេះនឹងត្រូវធ្វើឡើងនៅម៉ោង៨ព្រឹក។
ការសម្រេចដើម្បីផ្ទៀងផ្ទាត់ឯកសារបោះឆ្នោតនៅក្នុងកញ្ចប់សុវតិ្ថភាព ដែលនឹងបង្ហាញឯកសារបោះឆ្នោតដើម និងចំនួនសន្លឹកឆ្នោតសរុប បន្ទាប់ពីសន្លឹកឆ្នោតត្រូវបានរាប់កាលពីថ្ងៃទី ២៨ខែកក្កដានោះ គឺផ្តោតសំខាន់លើខេត្តក្រចេះ។
បន្ទាប់ពីលទ្ធផលបោះឆ្នោតមិនផ្លូវការត្រូវបានប្រកាសភ្លាម គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (ខុមហ្វ្រែល) បានលើកឡើងថា តាមពិតគណបក្សសង្គ្រោះជាតិបានឈ្នះមួយអាសនៈបន្ថែមទៀតនៅក្នុងខេត្តនេះ ដែលគួរតែធ្វើឲ្យគណបក្សនេះទទួលបានអាសនៈសរុបចំនួន៥៦នៅក្នុងរដ្ឋសភានោះ។
លោក កែវ ភិរម្យ បេក្ខជនឈរឈ្មោះជាតំណាងរាស្ត្រដែលជាប់ឆ្នោតរបស់គណបក្សសង្គ្រោះជាតិនៅមណ្ឌលខេត្តក្រចេះបានកោតសរសេើរការសម្រេចរបស់ក្រុមប្រឹក្សាធម្មនុញ្ញកម្ពុជា ប៉ុន្តែ លោកបានលើកឡើងថា គណបក្សរបស់លោកទាមទារឲ្យបើកកញ្ចប់សុវត្ថិភាព ដែលបានមកពីការិយាល័យពីរបន្ថែមទៀតនៅក្នុងឃុំកំពង់ដំរី និងឃុំដំរីផុង ក្នុងស្រុកឆ្លូង ខេត្តក្រចេះ។
លោកថ្លែងថា “ យើងរីករាយនឹងការសម្រេចនេះ ប៉ុន្តែ យើងនឹងទាមទារឲ្យមានការបើកកញ្ចប់សុវត្ថិភាពដែលបានមកពីការិយាល័យបោះឆ្នោតពីរផ្សេងទៀតជាកន្លែងដែលយើងមានការសង្ស័យខ្លាំងចំពោះសន្លឹកឆ្នោតមិនបានការចំនួន១០០សន្លឹក”។
កាលពីថ្ងៃអង្គារ ក្រុមប្រឹក្សាធម្មនុញ្ញបានចាប់ផ្តើមត្រួតពិនិត្យឡើងវិញចំពោះការសម្រេចរបស់ គ.ជ.ប. ដែលបានច្រានចោលបណ្តឹងទាំងអស់ដែលដាក់ជូនដោយគណបក្សប្រឆាំងពាក់ព័ន្ធនឹងភាពមិនប្រក្រតីនៅតាមការិយាល័យបោះឆ្នោតនានា។ ហើយកាលពីថ្ងៃព្រហស្បតិ៍ ក្រុមប្រឹក្សាធម្មនុញ្ញបានលើកឡើងថា ខ្លួនបានដោះស្រាយបណ្តឹងចំនួន២៤ករណីក្នុងចំណោមបណ្តឹងចំនួន៣៩ករណីរួចហើយ។
ការសម្រេចភ្លាមៗរបស់ក្រុមប្រឹក្សាធម្មនុញ្ញនេះ បានធ្វើឲ្យមានការព្រួយបារម្ភក្នុងចំណោមអ្នកឃ្លាំមើលការបោះឆ្នោត ខ្លាចក្រែងបណ្តឹងទាំងនេះមិនត្រូវបានដោះស្រាយដោយម៉ត់ចត់ ប៉ុន្តែ លោក អ៊ុត ឈន កាលពីម្សិលមិញ បានធានាថា បណ្តឹងនៅសល់ទាំង១៥ករណីដែលជាប់ពាក់ព័ន្ធ នឹងលទ្ធផលបឋមនៃការបោះឆ្នោត នឹងត្រូវដោះស្រាយឲ្យបានម៉ត់ចត់ពីមួយករណីទៅមួយករណី។
លោកបានមានប្រសាសន៍ថា “យើងនឹងធ្វើតាមនីតិវិធីឲ្យបានម៉ត់ចត់បំផុតពីព្រោះនេះមិនមែនជាល្បែងនោះទេ ជាពិសេសនោះយើងគឺជាស្ថាប័នចុងក្រោយដែលនឹងត្រូវសម្រេចបណ្តឹងទាំងនេះ”។ លោកបានបន្ថែមថា ក្រុមប្រឹក្សាធម្មនុញ្ញបច្ចុប្បន្នកំពុងសំរាំងយកករណីធំៗដែលនឹងត្រូវយកទៅបើកសវការជាសាធារណៈ។ លោកបានមានប្រសាសន៍បន្ថែមថា “រាល់បណ្តឹងនីមួយៗនឹងត្រូវស៊ើបអង្កេត និងត្រួតពិនិត្យឡើង វិញឲ្យបានម៉ត់ចត់បំផុត ដោយយោងទៅតាមនីតិវិធីក្រុមប្រឹក្សាធម្មនុញ្ញកម្ពុជា៕
ប្រែសម្រួលដោយ ឈ៊ា ស៊ុយឈាង