កាលពីថ្ងៃសុក្រ សមាជិកសភាមកពីគណបក្សប្រជាជនកម្ពុជា លោក ឈាង វុន បានលើកឡើងថា ទ្វារនៅតែបើកចំហសម្រាប់លោក សម រង្ស៊ី មេដឹកនាំគណបក្សប្រឆាំង ដើម្បីក្លាយជាសមាជិកសភាក្នុងនីតិកាលទី៥ បើទោះបីជាអភ័យឯកសិទ្ធិសភារបស់លោកមិនទាន់ត្រូវបានប្រគល់ឲ្យវិញ ហើយលោកមិនមែនជាបេក្ខជននៅក្នុងការបោះឆ្នោតជាតិកាលពីខែមុនក៏ដោយ។
មានប្រសាសន៍ទៅកាន់អ្នកយកព័ត៌មាននៅឯសន្និសីទសារព័ត៌មានមួយនៅឯរដ្ឋសភាលោក ឈាង វុន បានលើកឡើងថា លោក សម រង្ស៊ី អាចនឹងត្រូវអនុញ្ញាតឲ្យធ្វើជាសមាជិកសភា បន្ទាប់ពីការចុះឈ្មោះសមាជិកសភាចាប់ផ្តើមនៅខែតុលា ហើយបើសិនសមាជិកសភាគណបក្សសង្គ្រោះជាតិរូបណាផ្សេងយល់ព្រមលាលែងពីមុខតំណែងរបស់ខ្លួន។
លោកបានមានប្រសាសន៍ដោយសំដៅដល់មាត្រា១៨នៃច្បាប់ស្តីពីការបោះឆ្នោតជ្រើសតាំងតំណាងរាស្ត្រ ដែលត្រូវបានធ្វើវិសោធនកម្មថា “ពិតមែនហើយ[ឯកឧត្តម សម រង្ស៊ី ] អាចជាសមាជិកនៃរដ្ឋសភាក្នុងនីតិកាលទី៥នេះ តាមច្បាប់ស្តីពីការបោះឆ្នោតជ្រើសតាំងតំណាងរាស្ត្រ”។
លោក សម រង្ស៊ី មិនមែនជាបេក្ខជននៅក្នុងការបោះឆ្នោតកាលពីថ្ងៃទី២៨ ខែកក្កដានោះទេ ពីព្រោះលោកជាពិរុទ្ធជនដែលត្រូវបានកាត់ទោសនៅពេលបញ្ជីឈ្មោះបេក្ខជនរបស់គណបក្សលោកត្រូវបានបញ្ជូនទៅឲ្យគណៈកម្មាធិការជាតិរៀបចំការបោះ ឆ្នោត។ ប៉ុន្តែ ប្រសិនបើសមាជិកសភារូបណារបស់គណបក្សសង្គ្រោះជាតិដែលទើបត្រូវបានជ្រើសតាំងថ្មី និងបេក្ខជនបម្រុងទាំងអស់របស់គណបក្សនេះនៅក្នុងមណ្ឌលបោះឆ្នោតលាលែងពីតំណែងនោះ លោក សម រង្ស៊ី អាចមានអាសនៈនៅក្នុងរដ្ឋសភា។
លោក ឈាង វុន បានមានប្រសាសន៍ថា “បន្ទាប់ពីការចុះឈ្មោះ ទាំងបេក្ខជនពេញសិទ្ធិ និងបេក្ខជនបម្រុងរបស់គណបក្សគាត់ត្រូវតែលាលែងពីតំណែង ប្រសិនពួកគេចង់ឲ្យឯកឧត្តម សម រង្ស៊ី មានឈ្មោះនៅលើបញ្ជីបេក្ខជន”។
ការលើកឡើងរបស់ លោក ឈាង វុន នេះធ្វើឡើងបន្ទាប់ពីលោក ជាម យៀប សមាជិកសភាជាន់ខ្ពស់មកពីគណបក្សប្រជាជនកម្ពុជា លើកឡើងកាលពីសប្តាហ៍មុនថា លោក សម រង្ស៊ី “ គ្មានឱកាស” ធ្វើជាសមាជិកនៃរដ្ឋសភាជាតិក្នុងនីតិកាលទី៥នេះទេ។ លោក ឈាង វុន បន្ថែមថា រាល់សេចក្តីសម្រេចក្នុងការបញ្ចូលលោក សម រង្ស៊ី ឲ្យធ្វើជាសមាជិកសភាវិញមិនមែនជាបញ្ហានៃការសម្របសម្រួលរវាងគណបក្សប្រជាជនកម្ពុជា និងគណបក្សសង្គ្រោះជាតិនោះទេ ពីព្រោះមានបទប្បញ្ញតិ្តដែលចែងរួចជាស្រេចនៅក្នុងច្បាប់សម្រាប់បញ្ហាបែបនេះ។
កាលពីថ្ងៃសុក្រនេះដែរលោក ឈាង វុន បានស្វាគមន៍សេចក្តីសម្រេចរបស់ក្រុមប្រឹក្សាធម្មនុញ្ញ ដែលត្រូវបានធ្វើឡើងនៅថ្ងៃដដែលនេះស្តីពីការបើកកញ្ចប់សុវត្ថិភាព “ក” ដែលផ្ទុកឯកសារបោះឆ្នោត ដែលបង្ហាញពីចំនួនសន្លឹកឆ្នោតនៅតាមការិយាល័យបោះឆ្នោតនីមួយៗ។ គណបក្សសង្គ្រោះជាតិបានលើកឡើងថា គេចាំបាច់ត្រូវតែពិនិត្យមើលឯកសារនៅក្នុងកញ្ចប់សុវត្ថិភាពនេះ ដើម្បីឲ្យការស៊ើបអង្កេតគួរឲ្យទុកចិត្តបានលើភាពមិនប្រក្រតីនានា៕
ប្រែសម្រួលដោយ ហួង កុកទៀន