គណៈកម្មាធិការក្រុមអ្នកច្បាប់អន្តរជាតិ (International Commission of Jurists ) បានលើកឡើងថា គណៈមេធាវីកម្ពុជាគួរតែពិចារណាពីបទដ្ឋានតឹងរ៉ឹងក្នុងការទទួលសមាជិក ផ្តល់ឪកាសឲ្យមេធាវីទទួលបានវគ្គបណ្តុះបណ្តាលជាប្រចាំ និងបង្កើតគណៈកម្មការវិន័យថ្មីមួយ ដើម្បីធានាឲ្យអ្នកប្រកបវិជ្ជាជីវៈជាមេធាវីនៅក្នុងប្រទេសកម្ពុជាមានឯករាជ្យ។
កាលពីខែមេសា គណៈកម្មាធិការក្រុមអ្នកច្បាប់អន្តរជាតិបានអំពាវនាវឲ្យគណៈមេធាវីកម្ពុជាធ្វើការបញ្ជាក់អំពីភាពមិនច្បាស់លាស់ក្នុងមាត្រា១៧នៃក្រមសីលធម៌ដែលទើបអនុម័តថ្មីៗរបស់ខ្លួន ដែលចែងថា មេធាវីទាំងអស់គួរធ្វើសេចក្ដីថ្លែងការណ៍ជាសាធារណៈ ឬនិយាយជាមួយប្រព័ន្ធផ្សព្វផ្សាយ “តែក្នុងកិច្ចការពាក់ព័ន្ធតួនាទី និងវិជ្ជាជីវៈរបស់ខ្លួន”។
នៅក្នុងលិខិតចំហមួយចុះថ្ងៃទីសុក្ររបស់លោក សាម ហ្សារីហ្វី (Sam Zarifi) នាយកគណៈកម្មាធិការក្រុមអ្នកច្បាប់អន្តរជាតិប្រចាំតំបន់អាស៊ី និងប៉ាស៊ីហ្វិក ផ្ញើជូនអគ្គលេខាធិការនៃគណៈមេធាវីកម្ពុជា លោក សាង សុធន បានថ្លែងអំណរគុណចំពោះលោក សុធន ចំពោះការបញ្ជាក់ពីមាត្រានេះនៅក្នុងកិច្ចប្រជុំមួយក្នុងរាជធានីភ្នំពេញ កាលពីថ្ងៃទី២៦ ខែកក្កដា ។
លោក ហ្សារីហ្វី បានសរសេរថា “យើងមានសេចក្ដីរីករាយណាស់ដោយបានឮថា គណៈមេធាវីកម្ពុជាមិនបកស្រាយមាត្រា១៧តាមរបៀបមួយដែលធ្វើឲ្យមេធាវីស្វែងរកការអនុញ្ញាតពីគណៈមេធាវីមុនពេលនិយាយទៅកាន់ប្រព័ន្ធផ្សព្វផ្សាយនោះ”។ លោក ហ្សារីហ្វី បានសរសេរបន្តថា “ជាងនោះទៅទៀតលោកបានបញ្ជាក់ថា តាមមាត្រា១៧មេធាវីទាំងអស់មានសិទ្ធិក្នុងការបញ្ចេញមតិរបស់ខ្លួនតាមកម្មវិធីវិទ្យុ ឬតាមកម្មវិធីទូរទស្សន៍ដោយសេរី ដោយមិនចាំបាច់សុំការអនុញ្ញាតពីប្រធានគណៈមេធាវី ឬមនុស្សផ្សេងទៀត ក្នុងគណៈមេធាវីនោះឡើយ”។
ក្នុងលិខិតដដែលនោះក៏បានសរសើរគណៈមេធាវីកម្ពុជាផងដែរដែលរហូតមកដល់សព្វថ្ងៃនេះ មិនបានដាក់ទណ្ឌកម្មមេធាវីណាមួយចំពោះការបំពានមាត្រា១៧។ ទោះជាយ៉ាងលោក ហ្សារីហ្វី ក៏បានបង្ហាញពីអនុសាសន៍ដែលគណៈកម្មាធិការក្រុមអ្នកច្បាប់អន្តរជាតិបានស្នើឲ្យគណៈមេធាវីកម្ពុជា” អនុវត្ត និងលើកតម្កើងបទដ្ឋាន និងធានានូវឯករាជ្យភាពរបស់មេធាវីឲ្យសមស្របតាមបទដ្ឋានអន្តរជាតិ និងគោរពសិទ្ធិរបស់មេធាវី។
គណៈកម្មាធិការក្រុមអ្នកច្បាប់អន្តរជាតិបានស្នើឲ្យគណៈមេធាវីកម្ពុជាអនុវត្ត “លក្ខណៈវិនិច្ឆ័យ ដោយមិនមានការរើសអើង ដោយសត្យានុម័ត ច្បាស់លាស់ និងមានលក្ខណៈដូចគ្នាពាក់ព័ន្ធនឹងការទទួលសមាជិករបស់ខ្លួន”។លោកបន្ថែមថា ការសុំចូលជាសមាជិកគួរតម្រូវឲ្យមេធាវីទាំងអស់ទទួលបាននូវការបណ្តុះបណ្តាលឲ្យបានត្រឹមត្រូវផ្នែកច្បាប់ ឯករាជភាពតុលាការ និងក្រមសីលធម៌ ព្រមទាំងសិទ្ធិមនុស្ស។
អង្គការនេះក៏បានផ្ដល់អនុសាសន៍ឲ្យមានការបំពាក់បំប៉នវិជ្ជាជីវៈមេធាវីជាទៀងទាត់ និងបង្កើតគណៈកម្មាធិការឯករាជ្យមួយដើម្បីត្រួតពិនិត្យមើលការជំនុំជម្រះដាក់វិន័យចំពោះមេធាវីណាដែលរងការចោទប្រកាន់ថា បានប្រព្រឹត្តខុសច្បាប់។
ទោះជាលិខិតនោះបានចុះផ្សាយលើប្រព័ន្ធអ៊ីនធើណិតក៏ដោយ ក៏លោក ប៊ុន ហុន ប្រធាគណៈមេធាវីកម្ពុជាបានថ្លែងកាលពីម្សិលមិញថា លោកមិនទាន់បានឃើញលិខិតនោះនៅឡើយទេ ដូច្នេះ លោកមិនអាចធ្វើអត្ថាធិប្បាយអំពីអនុសាសន៍ទាំងនោះបានទេ។
លោក ប៊ុន ហុន ជាអតីតអនុរដ្ឋលេខាធិការនៃក្រសួងយុត្តិធម៌ និងជាសមាជិកនៃស្ថាប័នប្រឹក្សាផ្នែកច្បាប់របស់រដ្ឋាភិបាល គឺក្រុមប្រឹក្សាអ្នកច្បាប់កម្ពុជានោះ បាននិយាយការពារម្ដងទៀតនូវឯករាជ្យភាពរបស់គណៈមេធាវីកម្ពុជា។ លោកថ្លែងបន្តថា “ពួកគេគួរតែសិក្សាអំពីគណៈមេធាវីរបស់ប្រទេសផ្សេងទៀត។ យើងមិនយល់ថា ហេតុអ្វីបានជាពួកគេលើកឡើងថា គណៈមេធាវីកម្ពុជាមិនឯករាជ្យ”។លោកបន្ថែមថា មាត្រា១៧ត្រូវបានបង្កើតឡើងដោយមានជំនួយពីអង្គការសហប្រជាជាតិហើយមិនបានហាមឃាត់មេធាវីមិនឲ្យនិយាយជាមួយប្រព័ន្ធផ្សព្វផ្សាយឡើយ៕
ប្រែសម្រួលដោយ ឃិន ណៃ