28 C
Phnom Penh

​វត្តមាន​នគរបាល​តិច​តួច​អំឡុង​​​​ពិធី​ជួប​ជុំ​របស់​​​​​​​គណបក្ស​ប្រឆាំង​

ដោយ ឌឹ ខេមបូឌា ដេលី

បទវិភាគ

នគរបាល​​​​ដែល​​​បាន​​​បង្ហាញ​​​​វត្ត​មាន​​​អំឡុង​​​ពិធី​ជួប​​ជុំ​គ្នា​​យ៉ាង​​​អធិក​​​អធម​​​​របស់​គណបក្ស​ប្រឆាំង​នៅ​ទីលាន​ប្រជាធិបតេយ្យ​ក្នុង​រាជ ធានី​ភ្នំពេញ​ កាលពី​ម្សិលមិញ ​​​មាន​​​ចំនួន​​​មិន​​​ច្រើន​​​ទេ​​​ហើយ​​​ភាគ​​ច្រើន​​គឺ​​​ពុំ​​​​មាន​អាវុធ​​ឡើយ​​​ ទោះ​​​​បី​ជា​មាន​ភាព​តាន​តឹង​ជុំ​វិញ​លទ្ធផល​នៃ​ការ​បោះ​ឆ្នោត​ជាតិ​កាលពី​ខែមុន​ និង​​ការ​​បង្កើន​​​កម្លាំង​សន្តិសុខ​​​នៅ​ជុំ​វិញ​រាជធានី​​​​នេះ​​​ក៏​ដោយ។

ទោះបី​​​ជា​​​​​ក្រុមអ្នក​​​ចូលរួម​​​បាន​កើន​ឡើង​យ៉ាង​ច្រើន​លើស​​​ចំនួន​កំណត់​​របស់​​ក្រសួង​មហាផ្ទៃ​​ដែល​បាន​កំណត់​​​ឲ្យ​មានអ្នក​​​​​​​​​ចូល​រួម​ត្រឹមតែ​៦.០០០​នាក់​ក៏​ដោយ​​ ក៏​​នគរបាល​​​​និង​កង​រាជ​អាវុធ​ហត្ថ​​​​ដែល​​​ត្រូវ​បាន​ដាក់​ពង្រាយ​នៅ​​​​​​​​​​ជុំ​វិញ​ទីលាន​ប្រជាធិបតេយ្យ​​​​​​ក្នុង​​​​​​ចំនួន​​​តិច​តួច​​​​បើ​​​ធៀប​​​នឹង​​​ចំនួន​​​អ្នក​​​ចូលរួម​​​​នេះ​​ ​មិន​​បាន​​​បង្ហាញ​​ពី​​​ការ​ប៉ុនប៉ង​​ណា​មួយក្នុងការ​​​បណ្ដេញ​​​​ក្រុម​អ្នក​គាំ​ទ្រ​ឲ្យ​ត្រ​ឡប់​ទៅ​វិញ​ ​ឬ​ក៏​​​បំបែក​ពួកគេ​​​​ទេ​។

លោក ពង្ស សាវរិទ្ធ មេ​​បញ្ជា​​​ការ​​​​រង​នៃ​​​កង​​​រាជ​​​អាវុធ​​​ហត្ថ​​​រាជធានី​ភ្នំពេញ​ បាន​ឲ្យ​​​ដឹង​​​ថា ភាគ​ច្រើន​​​​នៃ​​​មន្ត្រី​​របស់​លោក​ដែល​​​បាន​​​​មក​ទី​លាន​​​ប្រជាធិបតេយ្យ​​​នេះ គឺ​​​​ពុំ​​​​​​​មាន​អាវុធ​​​​ទេ​ ដើម្បី​ជៀស​វាងការ​ចោទ​ប្រកាន់​​​​ពី​​​ការ​​​ប្រើ​កម្លាំង​ហួស​ហេតុ​ពេក​​​ ហើយ​ណាមួយ​​​គឺ​​​ដោយ​សារ​​​ពួកគេ​មិន​រំពឹង​ថា​នឹង​មាន​បញ្ហា​​​​​​​បង្ក​​​​​​ឡើង​​​ដោយ​​​ក្រុម​អ្នក​​​ចូលរួម​​​ដែល​គ្រាន់​តែ​មក​ស្ដាប់​លោក​ សម រង្ស៊ី ​​​សំណេះ​​​សំណាល​​​ជាមួយ​​​ម្ចាស់​​​ឆ្នោត​​​នោះ​​​។

លោកបាន​​​​មាន​ប្រសាសន៍​​ថា​ “ពួកគេ​គឺ​​​ជា​ប្រជា​ពលរដ្ឋ​សាមញ្ញ​​​ ដូច្នេះ​ពុំ​​​មាន​​​ភាព​​​​​​ចាំ​បាច់​សម្រាប់​យើង​ក្នុង​ការ​នាំ​អាវុធ​មក​ឡើយ​។ យើង​បាន​ហ្វឹក​ហ្វឺន​ពី​​​ការ​​​ប្រើប្រាស់​ដៃ​ទទេ​​​​សម្រាប់​​​បទ​ល្មើស​​​​ប្រភេទនេះ។​​​​​​ យើង​អាច​ចាប់​ខ្លួន​ពួកគេ​ដោយ​ប្រើ​​​ដៃ​ទទេ​ទាំង​ពីរ​របស់​យើង​បាន​​”។

កង​យោធពល​ខេមរភូមិន្ទ​ក៏​ត្រូវ​បាន​​ដាក់​ពង្រាយ​នៅ​ទី​​​​លាន​​​ប្រជាធិបតេយ្យ​​​នេះផង​​​​​​​ដែរ​។ លោក ឌួង សំណាង​ បានឲ្យ​​​ដឹង​​​ថា ខ្លួន​​​ស្ថិត​​​​​ក្នុង​​​​​​​ចំណោម​កង​យោធពល​ខេមរភូមិន្ទ​ចំនួន​១២០​​​​​​នាក់​មក​ពី​ខេត្ត​បាត់​ដំបង​ដែល​​ត្រូវ​បាន​ដាក់​ពង្រាយ​ក្នុង​រាជធានី​ភ្នំពេញ ក្នុង​ពេល​ថ្មី​ៗ​នេះ​ ហើយ​លោក​ក៏​​​ត្រូវ​បាន​ចាត់​តាំង​ឲ្យ​ជួយ​ឃ្លាំ​មើល​ការ​ជួប​ជុំ​គ្នា​នេះ​​​។

លោក​​និយាយ​ថា “យើង​មក​ទីនេះ​ដើម្បី​រក្សា​​​សណ្តាប់​​​ធ្នាប់​​​​សាធារណៈ​។ យើង​មក​​​​ទី​​​នេះ​ដើម្បី​ការពារ​ និង​បង្ក្រាប​ចោរ​ប្លន់​។ល។​​​​​​ ​​​​​​​​​យើង​មក​​​​ទីនេះ​ដើម្បី​បង្ក្រាប​អ្នក​ណា​​​ដែល​អាច​ជា​ជន​​​​ឱកាស​និយម​ ហើយ​ព្យាយាម​ប្រព្រឹត្ត​​​​បទ​ឧក្រិដ្ឋ​ ឬ​អំពើ​​​ប្លន់​”។

សូម្បី​​​តែ​​​​សន្តិសុខ​​ខណ្ឌ​ដូន​ពេញ​​​ក៏​​​​ត្រូវ​បាន​ដាក់​ពង្រាយ​នៅ​​​​ទីលាន​ប្រជាធិបតេយ្យ​​​នេះ​​​​ដើម្បី​​កុំ​ឲ្យ​​​​មាន​​​អ្នក​លក់​ដូរ​ចល័ត​​​នៅ​តាម​​​​ផ្លូវ​ជុំ​វិញ​​​​ទីនេះ​​​ដែរ​​​​​​ ប៉ុន្តែ​​​​​​​​​​​នៅ​តែ​មាន​រទេះ​លក់​ចំណី​​​​អាហារ​គ្រប់​​​ប្រភេទ​​​​​​​នៅ​​​ពាសពេញ​​​ទីនោះ​​​​។

លោក​ ប៉ោ សេង ដែល​​​ស្ថិត​​​ក្នុង​​​ចំណោម​​​សន្តិសុខ​​​ខណ្ឌ​​​ដូនពេញ​​​ទាំងនោះ​​​ បាន​និយាយ​​​​​​​ថា “ការ​ទទួល​ខុស​ត្រូវ​របស់​យើង​គឺ​​ធានា​ឲ្យ​​​បាន​​​ថា ​​​ពុំមាន​អ្នក​លក់​ដូរ​តាម​ដង​ផ្លូវ​ណា​ម្នាក់​ធ្វើ​ឲ្យ​ស្ទះ​ចរាចរណ៍​នៅ​តាម​ផ្លូវ​។​ប្រសិន​បើ​យើង​ឃើញ​អ្នក​​លក់​ដូរ​ណា​​ម្នាក់​​ធ្វើ​ឲ្យ​ស្ទះ​ចរាចរ​ណ៍​​ យើង​គ្រាន់​តែ​ប្រាប់​ពួកគេ​ឲ្យ​បន្ត​ដំណើរ​ទៅមុខ​ទៀត​ ហើយចេញ​​​ឲ្យ​​​ផុត​ពី​​តំបន់​នេះ​”។

លោក​ គៀត ច័ន្ទថា​រិទ្ធ អ្នក​នាំ​ពាក្យ​នគរ​​​បាល​ជាតិ​បាន​ឲ្យ​​​ដឹង​​​​ថា នគរបាល​ជាតិ​ប្រហែល​២០០នាក់​​ក៏​ត្រូវ​បាន​ចាត់​តាំង​ឲ្យ​​​មក​​​​ការពារ​សន្តិសុខ​​​ក្នុង​ព្រឹត្តិការណ៍​នេះ​​​ដែរ​​។

​គណបក្ស​សង្គ្រោះ​ជាតិ​បាន​​​ឲ្យ​ដឹង​ថា​ អ្នក​ស្ម័គ្រ​ចិត្ត​របស់​គណបក្ស​នេះ​​​​ជាង​២០០នាក់​បាន​​​ត្រៀម​​​រួចជាស្រេច​​​ក្នុងការ​​​ជួយ​សម្រួល​ចរាចរ​ណ៍​។ ប៉ុន្តែ​​​ដូច​ជា​សន្តិសុខ​ខណ្ឌ​ដែរ ការ​​​ប្រឹងប្រែង​​​របស់​​​ពួកគេ​ដូច​ជា​​ពុំ​​​មាន​​​ប្រសិទ្ធ​​​ភាព​​​នោះទេ​​​ ដោយ​​​ផ្លូវ​នៅ​​ជុំ​វិញ​ទី​លាន​ប្រជា​​​ធិប​​​តេយ្យ​​ គឺ​​​​ធ្វើ​​​ចរាចរណ៍​​​ស្ទើរ​​​តែ​​​មិន​​​បាន​​​ដដែល​​​​។

ក្នុង​​​ពេល​​​ជាមួយ​​​គ្នា​​​នោះ​​​ កង​​កម្លាំង​​សន្តិ​​​សុខ​រដ្ឋ​​​​ក៏​​​បាន​ឃ្លាំ​មើលត្រឹម​​​​​ពី​ចម្ងាយ​​​​ដែរ​​​។ លោក ពង្ស​ សាវរិទ្ធ ​មាន​ប្រសាសន៍​ថា “ប្រសិន​បើ​យើង​ទៅ​ជិត​ពួកគេ​ពេក​​​​ ពួកគេ​​​​នឹង​ចោទ​យើង​ថា ទៅ​​​​បំភិត​បំភ័យ​។​ ដូច្នេះ​​​យើង​សុខ​​​ចិត្ត​​​ឈរ​​​ឃ្លាំ​មើល​​​​ពី ចម្ងាយ​​​​វិញ។ យើង​មក​​​​ទីនេះ​ដើម្បី​ការពារ​ប្រជាពលរដ្ឋ​ មិន​មែន​មក​​​ធ្វើការ​ឲ្យ​គណបក្ស​ណា​មួយ​ឡើយ​”៕

ប្រែសម្រួលដោយ ឃិន ណៃ​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស