មន្ត្រីខេត្តស្វាយរៀងបានឲ្យដឹងថា កម្មករកម្មការិនីជាង៥០នាក់បានរងរបួសដោយមានម្នាក់ក្នុងចំណោមនោះបានរងរបួសធ្ងន់នៅក្នុងខេត្តស្វាយរៀងកាលពីម្សិលមិញ នៅពេលរថយន្តដឹកកម្មករមួយគ្រឿងដែលបានដឹកពួកគេទៅកាន់តំបន់ឧស្សាហកម្មមួយ បានក្រឡាប់។
លោក កែ រដ្ឋា ប្រធានមន្ទីរសុខាភិបាលខេត្តស្វាយរៀង បានមានប្រសាសន៍ថា ស្ត្រីម្នាក់បានរងរបួសធ្ងន់ត្រង់ទ្រូង ហើយត្រូវបានបញ្ជូនទៅមន្ទីរពេទ្យកាល់ម៉ែតភ្លាមៗ។ លោកបានបន្ថែមថា ជនរងគ្រោះប្រមាណ៥០នាក់ផ្សេងទៀតត្រូវបញ្ជូនទៅកាន់មន្ទីរពេទ្យបង្អែកខេត្ត និងបីនាក់បន្ថែមទៀតបញ្ជូនទៅកាន់គ្លីនិកឯកជន។
លោក រដ្ឋា បានថ្លែងថា “យើងមានការព្រួយបារម្ភពីជនរងគ្រោះដែលត្រូវបានបញ្ជូនទៅកាន់មន្ទីរពេទ្យក្នុងរាជធានីភ្នំពេញ ពីព្រោះរបួសរបស់នាងអាចមានគ្រោះថ្នាក់ដល់ជីវិត។ ជនរងគ្រោះមានរបួសធ្ងន់ត្រង់ទ្រូង និងបាក់ឆ្អឹងឆ្អែង”។ លោកបានថ្លែងបន្ថែមថា កម្មករកម្មការិនីដែលរងរបួសជាច្រើននាក់ផ្សេងទៀត មានអ្នកខ្លះបាក់ធ្មេញ និងបែកច្រមុះនៅក្នុងគ្រោះថ្នាក់ចរាចរណ៍នេះ។
លោក រាម សារឿន នាយនគរបាលប៉ុស្ដិ៍ សង្កាត់ស្វាយតឿ លើកឡើងថា យោងតាមសាក្សីបានឲ្យដឹងថា រថយន្តនេះបានរេចង្កូតម្ដងទៅឆ្វេងម្ដងទៅស្ដាំមុនពេលក្រឡាប់នៅក្នុងសង្កាត់ស្វាយតឿ ក្នុងក្រុងស្វាយរៀងនៅម៉ោងប្រហែល៦ និង៣០នាទីព្រឹក។ លោក សារឿន បានមានប្រសាសន៍ថា “អ្នកបើកបររថយន្តដឹកកម្មករនេះទើបតែរៀនបើកបរប៉ុណ្ណោះ។ អ្នកបើកបររូបនេះក៏បានដឹកអ្នកដំណើរយ៉ាងច្រើនផងដែរ ហើយគាត់មិនយកចិត្តទុកដាក់ក្នុងការបើកបររបស់ខ្លួនឡើយ”។
លោកបានបន្ថែមថា អ្នកបើកបរអាយុ៣០ឆ្នាំរូបនេះកំពុងត្រូវបានឃុំខ្លួននៅស្នងការដ្ឋាននគរបាលខេត្តដើម្បីសាកសួរ។ ឧបទ្ទវហេតុពាក់ព័ន្ធនឹងកម្មករកម្មការិនីរោងចក្រដែលត្រូវបានដឹកទៅកាន់ និងត្រឡប់ពីធ្វើការមកវិញតាមរថយន្តដែលដឹកលើសចំណុះ តែងតែកើតមានជារឿយៗនៅទីនេះដោយមានគ្រោះថ្នាក់យ៉ាងតិចណាស់ចំនួនបីបានកើតឡើងកាលពីឆ្នាំមុនគ្រាន់តែនៅក្នុងខេត្តស្វាយរៀងមួយ។
លោក ខូវ សាវុធ អាយុ៤០ឆ្នាំអ្នកបើកបររថយន្តដឹកកម្មករនៅក្នុងខណ្ឌមានជ័យ រាជធានីភ្នំពេញ បាននិយាយថា គាត់ត្រូវតែដឹកអ្នកដំណើរយ៉ាងតិចណាស់៧០នាក់ជារៀងរាល់ថ្ងៃក្នុងមួយជើង ដើម្បីឲ្យសល់ប្រាក់ចំណេញ។ នៅពេលគាត់ប្រមូលប្រាក់ពីអ្នកដំណើររបស់គាត់បានក្នុងចំនួន៨០០ដុល្លារក្នុងមួយខែៗ គាត់បាននិយាយថា គាត់ត្រូវចំណាយប្រហែល៥០០ដុល្លារទៅលើប្រេងសាំង។
លោក សាវុធ បានលើកឡើងនៅពេលកម្មករកម្មការិនីជាច្រើននៅខាងក្រោយរថយន្តរបស់គាត់កំពុងតោងជញ្ជាំងរថយន្តថា “ប្រសិនបើដឹកអ្នកដំណើរប្រហែលពី៤០នាក់ទៅ ៥០នាក់អាចនឹងមានសុវត្ថិភាព ប៉ុន្តែខ្ញុំបានដឹកអ្នកដំណើរប្រហែលពី៧០ទៅ៨០នាក់”។ គាត់បានបន្ថែមថា “ ខ្ញុំពិតជាព្រួយបារម្ភអំពីគ្រោះថ្នាក់ណាស់ ប៉ុន្តែ ខ្ញុំតែងតែប្រុងប្រយ័ត្នជានិច្ច”។
ទោះបីជាមានគ្រោះថ្នាក់ក៏ដោយ ក៏កម្មកររោងចក្រកាត់ដេរម្នាក់ឈ្មោះ ប៊ី វី អាយុ២២ឆ្នាំ បាននិយាយថា ខ្លួននឹងមិនឈប់ជិះរថយន្តដឹកកម្មករទៅធ្វើការឡើយ ពីព្រោះរថយន្តតាក់ស៊ី ឬក៏រថយន្តផ្សេងៗអាចនឹងថ្លៃជាងនេះ។
កម្មកររោងចក្ររូបនេះបាននិយាយថា “ខ្ញុំមានអារម្មណ៍ភ័យខ្លាច ពីព្រោះនៅក្នុងរថយន្តតែងតែមានអ្នកដំណើរច្រើនពេក ហើយខ្ញុំមិនអាចរើខ្លួនបានឡើយ។ ប៉ុន្តែ បើខ្ញុំជិះរថយន្តតាក់ស៊ី ឬរថយន្តផ្សេង វាត្រូវចំណាយប្រាក់ច្រើនណាស់”។
លោក អៀ ចរិយា អ្នកគ្រប់កម្មវិធីសុវត្ថិភាពចរាចរណ៍ផ្លូវគោកនៅអង្គការជនពិការអន្តរជាតិ បានលើកឡើងថា បញ្ហានេះកើតឡើង គឺដោយសារតែអ្នកបើកបរដែលប្រកួតប្រជែងគ្នាចង់រក្សាតម្លៃទាបដើម្បីធ្វើឲ្យកម្មករកម្មការិនីអាចមានលទ្ធភាពជិះរថយន្តរបស់ខ្លួនបាន។
លោក ចរិយា បានថ្លែងថា “កម្មករកម្មការិនី ពួកគេចង់ជិះរថយន្តដែលយកតម្លៃទាប ហើយក្រុមហ៊ុនដឹកជញ្ជូនក៏ចង់រក្សាតម្លៃរបស់ខ្លួនទាបដែរ ហេតុដូច្នេះហើយក្រុមហ៊ុនទាំងនេះត្រូវតែដឹកមនុស្សឲ្យបានច្រើនតាមដែលអាចទៅរួច ធ្វើដូច្នេះទើបអាចទទួលបានប្រាក់ចំណេញខ្ពស់”។ លោកបានបន្ថែមថា រដ្ឋាភិបាលគួរតែខិតខំប្រឹងប្រែងដើម្បីបង្កើតប្រព័ន្ធដឹកជញ្ជូនសាធារណមួយដែលកម្មករកម្មការិនីអាចប្រើប្រាស់បាន៕
ប្រែសម្រួលដោយ ស៊ា ស៊ុយឈាង