រថយន្តដឹកផ្លែឈើប្រហែល៣០គ្រឿងបានបិទផ្លូវជាតិលេខ៥ក្នុងស្រុកអូរជ្រៅ ខេត្តបន្ទាយមានជ័យ អស់រយៈពេលមួយម៉ោងកាលពីម្សិលមិញ បន្ទាប់ពីមន្ត្រីគយបានឃាត់ខ្លួនអ្នកបើកបររថយន្តជាមិត្តភក្តិរបស់ខ្លួនចំនួនប្រាំមួយនាក់ដោយសារពួកគេបានបដិសេធមិនបង់ប្រាក់ដែលខ្លួនគិតថា មិនសមហេតុផល។
លោក នូ សាល ដែលដឹកផ្លែឈើពីក្រុងប៉ោយប៉ែតកាត់តាមខេត្តបន្ទាយមានជ័យឆ្ពោះទៅកាន់ខេត្តសៀមរាប បានឲ្យដឹងថា អ្នកបើកបរទាំងនោះមានការនឿយណាយនឹងមន្ត្រីគយនិងមន្ត្រីពន្ធដារដែលចាំជម្រិតទារប្រាក់ ដោយសកម្មភាពបែបនេះបានកើតមានកាន់តែច្រើនឡើងៗក្នុងរយៈពេលបួនឆ្នាំចុងក្រោយនេះ។
លោក នូ សាល ដែលបានប៉ាន់ប្រមាណថា បច្ចុប្បន្ននេះមានប៉ុស្តិ៍ត្រួតពិនិត្យពន្ធគយចំនួនប្រាំមួយ ឬប្រាំពីរកន្លែងនៅចន្លោះក្រុងប៉ោយប៉ែត និងខេត្តសៀមរាបនោះ បានឲ្យដឹងថាមន្ត្រីទាំងនោះបានឃាត់ខ្លួនមិត្តរួមការងាររបស់លោកចំនួនបួននាក់ដោយសារពួកគេបានបដិសេធមិនព្រមបង់ប្រាក់នៅកន្លែងមួយចំនួនផ្សេងគ្នា។
លោក នូ សាល បានឲ្យដឹងបន្ថែមទៀតថា “យើងបានយល់ព្រមបង់ប្រាក់ឲ្យមន្ត្រីគយចំនួន២០០.០០០រៀល ក៏ប៉ុន្តែ ពួកគេបានទាមទារចំនួន៥០០ដុល្លារ។ យើងអស់ភាពអត់ធ្មត់ចំពោះការជំរិតទារប្រាក់បែបនេះទៀតហើយ ដូច្នេះយើងក៏បានធ្វើការតវ៉ា”។
លោក ទ្រី ណារិន អភិបាលខេត្តបន្ទាយមានជ័យ បានឲ្យដឹងថា លោកបានធ្វើអន្តរាគមន៍ឲ្យមានការដោះលែងអ្នកបើកបររថយន្តដែលត្រូវបានឃាត់ខ្លួនទាំងនោះ ប៉ុន្តែ លោកបានបដិសេធមិនធ្វើអត្ថាធិប្បាយបន្ថែមឡើយ។
លោក ស៊ុន ធឿន អាយុ៣៨ឆ្នាំ ជាអ្នកបើកបររថយន្តម្នាក់ទៀត បាននិយាយថា លោកសង្ឃឹមថា អាជ្ញាធរនឹងលប់បំបាត់ប៉ុស្តិ៍ត្រួតពិនិត្យពន្ធគយក្រៅផ្លូវការទាំងនោះ ដែលលោកប៉ាន់ប្រមាណថា បានធ្វើឲ្យលោកខាតបង់ប្រាក់ចំណេញចំនួន២០ភាគរយ។លោកបាននិយាយថា “យើងចង់បង់ពន្ធត្រឹមតែម្តង និងតែមួយកន្លែង”៕
ប្រែសម្រួលដោយ ឃិន ណៃ