កាលពីម្សិលមិញ គណបក្សសង្គ្រោះជាតិបានគំរាមប្ដឹងគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. ជុំវិញភាពមិនប្រក្រតីក្នុងការបោះឆ្នោតជាតិកាលពីថ្ងៃទី២៨ ខែកក្កដា ដែលគណបក្សប្រជាជនកម្ពុជាកំពុងកាន់អំណាច និងគណបក្សសង្គ្រោះជាតិសុទ្ធតែអះអាងអំពីជ័យជម្នះរៀងៗខ្លួន បើទោះជាលទ្ធផលបឋមនៃការបោះឆ្នោតរបស់ គ.ជ.ប. បង្ហាញថា គណបក្សប្រជាជនកម្ពុជាគឺជាអ្នកឈ្នះក៏ដោយ។
លោក កឹម សុខា អនុប្រធានគណបក្សសង្គ្រោះជាតិ បានសន្យាប្ដឹង គ.ជ.ប. តាមរយៈតុលាការកម្ពុជា ប្រសិនបើលទ្ធផលបឋមនៃការបោះឆ្នោតដែលគណបក្សសង្គ្រោះជាតិអះអាងថា មានការលួចបន្លំ ត្រូវក្រុមប្រឹក្សាធម្មនុញ្ញកម្ពុជាតម្កល់នោះ។
លោក កឹម សុខា បានថ្លែងនៅឯសន្និសីទកាសែតមួយនៅទីស្នាក់ការកណ្ដាលរបស់គណបក្សសង្គ្រោះជាតិក្នុងរាជធានីភ្នំពេញថា “ប្រសិនបើគណៈកម្មាធិការជាតិរៀបចំការបោះឆ្នោត គណបក្សប្រជាជនកម្ពុជា និងក្រុមប្រឹក្សាធម្មនុញ្ញកម្ពុជា មិនផ្ដល់យុត្តិធម៌ឲ្យប្រជាពលរដ្ឋទេនោះ យើងនឹងប្រើច្បាប់ដើម្បីប្ដឹងអស់លោក”។
លោកបានបន្ថែមថា “ខ្ញុំសូមផ្ញើសារទៅមេដឹកនាំមួយចំនួននៅ គ.ជ.ប. យើងនឹងមិនឈប់ទេ គឺទាល់តែយើងប្ដឹងអស់លោកតាមរយៈតុលាការរួច។ យើងនឹងពិនិត្យមើលច្បាប់អន្តរជាតិ ហើយជួលមេធាវី ប្រសិនបើពួកគេបដិសេធមិនព្រមធ្វើការស៊ើបអង្កេតប្រកបដោយតម្លាភាពនោះ”។
ដោយលើកឡើងពីសុភាសិតខ្មែរ លោក កឹម សុខា បានថ្លែងថា តាមរយៈការទទួលស្គាល់លទ្ធផលបឋមនៃការបោះឆ្នោតចេញដោយ គ.ជ.ប. កាលពីថ្ងៃទី១២ សីហា ដែលស្រដៀងស្ទើរតែទាំងស្រុងទៅនឹងលទ្ធផលដែលចេញដោយគណបក្សប្រជាជនកម្ពុជារយៈពេលតែប៉ុន្មានម៉ោងក្រោយការបោះឆ្នោតនោះ ក្រុមប្រឹក្សាធម្មនុញ្ញកំពុងតែ “ព្យាយាមយកចង្អេរបាំងដំរីងាប់”។
គ.ជ.ប. បានបើកកញ្ចប់សុវត្ថិភាព “ក” មួយចំនួនរបស់ខ្លួនឲ្យសាធារណជនឃើញជាលើកដំបូងកាលពីថ្ងៃអាទិត្យតាមការបញ្ជារបស់ក្រុមប្រឹក្សាធម្មនុញ្ញ។
កញ្ចប់សុវត្ថិភាពចំនួនប្រាំបីក្នុងចំណោមកញ្ចប់សុវត្ថិភាពចំនួន១៣នៅមណ្ឌលខេត្តក្រចេះ ដែលនៅក្នុងនោះ ឯកសារកត់ត្រាសំឡេងឆ្នោតច្បាប់ដើមត្រូវបិទឲ្យជិតនិងត្រូវរក្សាទុកនៅកន្លែងមានសុវត្ថិភាពនោះ បើមិនចំហទេ គឺបិទមិនបានត្រឹមត្រូវឡើយ។ ឯកសារនៅក្នុងកញ្ចប់សុវត្ថិភាពនោះក៏មិនដូចនឹងទម្រង់ដោយឡែកដែលគណៈកម្មាធិការជាតិរៀបចំការបោះឆ្នោតបានបញ្ជូនទៅឲ្យគណបក្សនយោបាយនីមួយៗដែលបានចូលរួមក្នុងការបោះឆ្នោតដែរ។
លោក ទេព នីថា អគ្គលេខាធិការ គ.ជ.ប. បានអះអាងកាលពីថ្ងៃអាទិត្យថា ហេតុផលដែលនាំឲ្យមានកំហុសនេះ គឺដោយសារតែបុគ្គលិក គ.ជ.ប. នៅការិយាល័យបោះឆ្នោតនីមួយ ភាគច្រើនមិនបានទទួលនូវការបណ្ដុះបណ្ដាលត្រឹមត្រូវ ហើយមិនបានអនុវត្តតាមនីតិវិធីឲ្យបានត្រឹមត្រូវ ហើយលោកបានធ្វើការបដិសេធថា គ្មានឯកសារណាមួយត្រូវបានគេប៉ះពាល់ក្រោយការបោះឆ្នោតទេ។
រយៈពេលមិនដល់ពីរម៉ោងផងបន្ទាប់ពីបានស៊ើបអង្កេតបណ្ដឹងជាច្រើនដែលគណបក្សសង្គ្រោះជាតិបានដាក់ប្ដឹងកាលពីដើមខែនេះ គ.ជ.ប. បានច្រានចោលរបាយការណ៍ទាំងអស់ពីភាពមិនប្រក្រតីនៃការបោះឆ្នោតដោយបានលើកហេតុផលថា ខ្វះភ័ស្ដុតាង ហើយបានប្រកាសថា ខ្លួនលែងជាប់ពាក់ព័ន្ធនៅក្នុងដំណើរការសម្របសម្រួលរវាងគណបក្សប្រជាជនកម្ពុជា និងគណបក្សសង្គ្រោះជាតិជុំវិញវិវាទនៃការបោះឆ្នោតរបស់គណបក្សទាំងពីរទៀតហើយ។
នៅឯសន្និសីទកាសែតកាលពីម្សិលមិញ លោក សម រង្ស៊ី មេដឹកនាំគណបក្សប្រឆាំងបានលើកឡើងថា ដោយសារតែពេលនេះអសមត្ថភាពរបស់ គ.ជ.ប.ត្រូវបានគេលាតត្រដាងទៅហើយនោះ ការស៊ើបអង្កេតសមស្របមួយលើភាពមិនប្រក្រតីទាំងអស់ត្រូវតែធ្វើឡើងជាចាំបាច់។
លោក សម រង្ស៊ី បានមានប្រសាសន៍ថា “ការដែលយើងបានឃើញការលេចធ្លាយមួយ មិនមែនមានន័យថា ពួកគេគួរព្យាយាមលាក់បាំង ឬក៏បញ្ឈប់ការស៊ើបអង្កេតតទៅទៀតនោះទេ… ដើម្បីស្វែងរកឲ្យឃើញនូវការលួចបន្លំជាប្រព័ន្ធ យើងចាំបាច់ត្រូវតែបន្តបើក [កញ្ចប់សុវត្ថិភាព] ហើយយើងនឹងឃើញលទ្ធផលពិតនៃការបោះឆ្នោត”៕
ប្រែសម្រួលដោយ ស៊ា ស៊ុយឈាង