កាលពីម្សិលមិញ សាលាដំបូងរាជធានីភ្នំពេញបានចេញដីកាចាប់ខ្លួនប្តីប្រពន្ធពីរនាក់ដែលគេជឿថា បានឆបោកមនុស្សរាប់រយនាក់ឲ្យប្រគល់រថយន្តរបស់ខ្លួនឲ្យពួកគេយកទៅជួលបន្ត ប៉ុន្តែបែរជាត្រូវពួកគេយកទៅលក់ទៅវិញ។
លោក ជួន ណារិន ស្នងការរងនគរបាលរាជធានីភ្នំពេញ បានមានប្រសាសន៍ថា អាជ្ញាធរកំពុងតែតាមចាប់ខ្លួនឈ្មោះ យូ សុខហ៊ុនអាយុ៣៣ឆ្នាំ ភរិយារបស់គាត់ឈ្មោះ កែវស្រីនីត អាយុ២៤ឆ្នាំ និងឈ្មោះ តែម ប៉ូនីតានិងភរិយារបស់គាត់ឈ្មោះ ថារិទ្ធ សុខបូរាម៉ី បន្ទាប់ពីទទួលពាក្យបណ្តឹងចំនួន២៥៥ករណីពីអ្នកដែលបាត់រថយន្តជាង៣០០គ្រឿង។
លោកបានមានប្រសាសន៍ថា “នគរបាលកំពុងតែតាមរកចាប់ខ្លួនមនុស្សចំនួនបួននាក់ បន្ទាប់ពីទទួលបានដីកាចាប់ខ្លួនពីតុលាការ” ដោយលោកបានបន្ថែមថា រថយន្តជាង១០០គ្រឿងត្រូវបានរកឃើញក្នុងរាជធានីភ្នំពេញនិងខេត្តកណ្តាលក្នុងខែនេះ។
លោកបានបន្តថា “ខ្ញុំដឹងថា មកទល់នឹងពេលនេះ នគរបាលបានរកឃើញរថយន្តចំនួន១២០គ្រឿងទាក់ទងនឹងពាក្យបណ្តឹងពីជនរងគ្រោះចំនួន៦០នាក់ ហើយយើងកំពុងធ្វើការស៊ើបអង្កេតដើម្បីចាប់ខ្លួនជនសង្ស័យ ពីព្រោះពួកគេត្រូវបានចោទប្រកាន់ថា បានបោកប្រាស់ជនរងគ្រោះ”។
ក្នុងហេតុការណ៍ដោយឡែកមួយកាលពីសប្តាហ៍មុន មនុស្សមួយក្រុមដែលមានកំហឹងក្រេវក្រោតបាននិយាយថា រថយន្តរបស់ខ្លួនដែលពួកគេបានអនុញ្ញាតឲ្យគេយកទៅប្រើក្រោមកិច្ចសន្យាជួល ត្រូវបានលក់ឲ្យទៅហាងបញ្ចាំមួយ៕
ប្រែសម្រួលដោយ ចេវ ប៊ុននី