29 C
Phnom Penh

តុលាការ​គ្រោង​នឹង​ប្រកាស​សាលក្រម​ក្នុង​រឿង​ក្តី​សម្លាប់​អ្នក​កាសែត​វីរជន​ខ្មែរ

ដោយ ឌឹ ខេមបូឌា ដេលី

បទវិភាគ

សាលាដំបូង​ខេត្តរតនគិរីគ្រោង​នឹង​ធ្វើការ​ប្រកាស​​​សាលក្រម​នៅ​ថ្ងៃនេះពាក់ព័ន្ធ​ការ​សម្លាប់​អ្នក​កាសែតវីរជន​ខ្មែរ​​ម្នាក់​ដ៏សា​ហាវ​​ព្រៃផ្សៃកាលពី​ឆ្នាំមុន​នៅក្នុង​ខេត្ត​រតនគិរី ​បន្ទាប់​ពី​ធ្វើការ​ស៊ើប​អង្កេត​ឡើង​​វិញពាក់​ព័ន្ធ​​​រឿង​​ក្តីនេះ។

លោក ហង្ស សេរី​ឧត្តម អាយុ៤២ឆ្នាំ ជា អ្នក​យក​ព័ត៌មាន​ឲ្យ​កាសែត​វីរជន​ខ្មែរ​  ត្រូវ​បាន​ជនដៃដល់​​កាប់សម្លាប់ ហើយ​យក​សាក​សពទៅ​ដាក់​ក្នុ​ងឃ្លុប​រថយន្ត​តូយ៉ូតា​កាមរី​របស់​លោក​នៅក្នុង​ស្រុក​អូរ​ជុំ កាលពី​ថ្ងៃ​ទី​១១ ខែ​កញ្ញា។

រយៈពេល​ប៉ុន្មានខែ​មុន​ពេល​លោក​ត្រូវគេ​សម្លាប់ លោក​បាន​សរសេរ​អត្ថ​បទ​អំពី​មន្ត្រី​មួយ​ចំនួន​ដែល​ជាប់​ពាក់ព័ន្ធ​នឹង   ​ការ​រក​ស៊ី​ឈើ​ខុស​ច្បាប់។ បន្ទាប់ពី​តុលាការបាន​​បើក​សវនាការ​ជា​លើក​ដំបូង កាលពី​ខែ​មេសា និង​​ខែ​ឧសភា​ឆ្នាំ​​នេះមក​ ចៅក្រម​មួយ​ក្រុមដែល​​មានគ្នា​បីនាក់​បាន​សម្រេច ថា មាន​ភ័ស្តុតាង​មិនគ្រប់​គ្រាន់ទេ ហើយ​បាន​បង្គាប់​ឲ្យ​លោក សួស ឡា ប្រធាន​តុលាការ​ធ្វើ​ការ​ស៊ើប​អង្កេត​ឡើង​វិញ ហើយ​ឥឡូវនេះ​ការ​ស៊ើបអង្កេត​បាន​បញ្ចប់​ហើយ។

លោក​ចៅក្រម សួស ឡា  ​មាន​ប្រសាសន៍​ ឲ្យ​ដឹង​កាលពី​ម្សិលមិញថា “ខ្ញុំ​ត្រូវ​បាន​ចាត់​តាំង​ឲ្យ​ស៊ើបអង្កេត​ឡើងវិញ​ពី​ការ​ខ្វះ​ចន្លោះ​​មួយ​ចំនួន​ ដើម្បី​ធ្វើការ​សាក​សួរ​សាក្សី​បន្ថែម​ទៀត​ និង​ដើម្បី​​ពិនិត្យមើល​ការ​ថត​​សំឡេង​សន្ទនា​តាម​ទូរស័ព្ទ  តែ​លោក​បាន​បដិសេធ​មិន​ផ្ត​ល់​ព័ត៌​មាន​លម្អិត​បន្ថែម​អំពី​ភ័ស្តុតាង​ថ្មី​ណាមួយ​ឡើយ។

លោក រស់ សារាំ ព្រះរាជ​អាជ្ញារងអម​សាលាដំបូង​ខេត្ត​រតនគិរី​បាន​អះ​អាង​ថា តុលាការ​គ្រោង​នឹង​​ប្រកាស​សាលក្រម​នៅ​ថ្ងៃ​នេះ។ រយៈពេល​ពីរថ្ងៃ​បន្ទាប់ ពីឃាត​កម្ម​នេះ​កើតឡើង​កាលពី​ឆ្នាំ​មុន លោក អាន ប៊ុន​ហេង អនុសេនីយ៍​ឯកកងរាជ​អាវុធ​ហត្ថ​ និង​ប្រពន្ធ​របស់​លោក ឈ្មោះ ស៊ឹម វី ​ត្រូវ​បាន​ចាប់​ខ្លួន​បន្ទាប់​ពី​នគរបាល​បាន​រកឃើញស្បែកជើង​​មួយ​គូ របស់​លោក​ ហង្ស​ សេរីឧត្តម នៅក្នុង​ភោជនីយ​ដ្ឋាន​របស់​ប្តីប្រពន្ធនេះ ដែល​អ្នក​យកព័ត៌មាន​រូបនេះ​បាន​ស៊ីផឹក​នៅ​យប់​មុន​ពេល​លោក​បាន​បាត់​ខ្លួននោះ។

បើទោះ​ជា​ការ​ស៊ើប​អង្កេត​ដំបូង​បាន​សន្និដ្ឋាន​ថា ប្តីប្រពន្ធ​នេះ​គឺ​ជាជន​សង្ស័យ​ក៏​ដោយ ក៏អង្គការ​សិទ្ធិ​មនុស្ស និង​ក្រុម​គ្រួសារ​ជន​រងគ្រោះបាន​លើកឡើង​​ថា ពួកគេ​ជឿ​ថា យ៉ាងហោចណាស់​ក៏មាន​មនុស្ស​ដទៃទៀត​ដឹង​ពី​ការ​សម្លាប់​នេះ​ដែរ។ ​​អង្គការ​សិទ្ធិមនុស្សនានា​​ និង​អង្គការ​សហ​ប្រជា​ជាតិ​បានធ្វើ​ការ​​ថ្កោល​​ទោស​ចំពោះ​អំពើ​​ឃាត​កម្ម​នេះ។

អ្នកស្រី អ៊ឹម ចន្ធី ប្រពន្ធ​របស់​អ្នក​កាសែត​ដែល​ស្លាប់នោះ​បាន​មាន​ប្រសាសន៍​ថា អ្នក​ស្រី​​សង្ឃឹម​​ថា សាលក្រមនេះ​នឹង​គួរ​ជាទី​​ពេញ​ចិត្ត។ អ្នក​ស្រី​បានមាន​ប្រសាសន៍​បន្ថែម​ទៀត​ថា “ ខ្ញុំ​បាន​​រង់ចាំ​ថ្ងៃ​នេះ​មកដល់ ពីព្រោះ​ខ្ញុំចង់​ឃើញ​យុត្តិធម៌”។​អ្នកយក​ព័ត៌មាន​ឲ្យ​កាសែត​ក្នុងស្រុក​ដែល​យក​ព័ត៌​មាន​អំពី​ការ​រកស៊ីឈើប្រណីត​​ខុសច្បាប់​ដ៏កាក់​កបនោះ ជារឿយៗមាន​ទំនាក់​​ទំនង​ជា​មួយ​អ្នក​មាន​អំណាច​ ឬ​អ្នក​មាន​ខ្នង​ក្រាស់នោះ តែង​តែ​ប្រឈម​ការ​គំរាម​កំហែង​ ​និងការ​​គាប​សង្កត់ ដោយ​សារ​តែ​​ការ​ងារ​របស់​ពួក​គេ​៕

ប្រែសម្រួលដោយ សោម សារុន​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស