29 C
Phnom Penh

បាត់​ខ្លួន​បុរសពីរ​នាក់​បន្ទាប់​ពី​លិច​ទូក​​ក្នុងខេត្ត​កំពង់​ចាម​​

ដោយ ឌឹ ខេមបូឌា ដេលី

បទវិភាគ

នគរបាល​បាន​ឲ្យ​ដឹង​កាលពី​ម្សិលមិញ​ថា ពួកគេ​កំពុង​ស្វែងរក​បុរស​ពីរ​នាក់​ ដែល​បាន​បាត់​ខ្លួន​បន្ទាប់​ពី​​ពួក​គាត់​ធ្វើ​ដំណើរ​តាម​ទូក​មួយ​គ្រឿង​​​​បាន​លិច​​ក្នុង​ទន្លេ​មេគង្គ​នៅ​ក្នុង​ស្រុក​កោះ​សូទិន ​ខេត្ត​កំពង់​ចាម​ ដោយ​សារ​មាន​ភ្លៀង​ធ្លាក់​យ៉ាង​ខ្លាំង កាលពី​ថ្ងៃអង្គារ​។

លោក ម៉ា ចន្តា អធិការ​នគរបាល​ស្រុក​មាន​​​​​​​ប្រសាសន៍​ថា ទូក​​នោះ​មាន​​មនុស្ស​ជិះ​ប្រាំបី​នាក់​ដែល​បាន​ធ្វើ​ដំណើរ​វិល​ត្រឡប់​មក​ផ្ទះ​វិញ​បន្ទាប់​ពី​បាន​ទៅចូល​រួម​​ក្នុង​ពិធី​បុណ្យ​សព​សាច់​ញាតិ​ម្នាក់​ក្នុង​ស្រុក​កោះ​សូទិន​ស្រាប់តែ​ជួបបញ្ហានៅ​ម៉ោង​ប្រហែល​៣​រសៀល​។
មនុស្ស​ប្រាំមួយ​នាក់​ត្រូវ​បាន​ជួយ​សង្គ្រោះ​​​​​​​ដោយ​ក្រុម​អ្នក​នេសាទ​ខ្មែរ​អ៊ីស្លាម​ ដែល​​បាន​​​​ចត​ទូក​នៅ​ក្បែរ​នោះ​។ លោក ម៉ា ចន្តា បាន​​​ថ្លែង​​​​ថា “ទូក​របស់​ពួក​​​គាត់​បាន​លិច​អំឡុង​ពេល​មាន​ព្យុះ​​យ៉ាង​​ខ្លាំង​​ពេល​កំពុង​ធ្វើ​ដំណើរ​ដល់​ពាក់​កណ្ដាល​ទន្លេ”​​​។

បុរសដែលបាន​បាត់​ខ្លួន​ទាំង​ពីរ​នាក់​នោះ​​​ត្រូវ​បាន​ស្គាល់អត្តសញ្ញាណហើយ​គឺ​ឈ្មោះ​ ឈាន ណេត​ អាយុ​៥២ឆ្នាំ និង​ ឈ្មោះ នី គួន អាយុ​៦៨ឆ្នាំ ជា​អតីត​ប្រធាន​ភូមិ​។​ លោក​​មាន​ប្រសាសន៍​បន្ត​ទៀត​ថា “នគរ​បាល​ និង​ប្រជា​ពលរដ្ឋ​មក​ពី​ក្រុមគ្រួសារ​របស់​ជន​រង​គ្រោះ​ប្រហែល​៣០​នាក់​បាន​ព្យាយាម​ស្វែង​រក​ពួកគាត់​​រហូត​ដល់​ល្ងាច​ថ្ងៃពុធ​នេះ​ ប៉ុន្តែ ពួកគេ​មិន​អាច​រក​ពួកគាត​់​​​ទាំងពីរ​​ឃើញ​ឡើយ​”។

លោក ឈាន វឿន នាយ​​ប៉ុស្តិ៍​នគរបាល ឃុំ​​​​មាន​ប្រសាសន៍​​ថា នគរបាល​បាន​សន្និ​​​ដ្ឋាន​ថា បុរស​ទាំង​ពីរ​នាក់​នោះ​​បាន​ស្លាប់​ហើយ​​។ លោក កែវ វី អនុប្រធាន​គណៈកម្មាធិការ​ជាតិ​គ្រប់​គ្រង​គ្រោះ​មហន្ត​រាយ ​​មាន​ប្រសា​ស​​​ន៍​ថា “យើង​មិន​អាច​ស្វែង​រក​ពួកគាត់​ឃើញ​ទេ​ក្នុង​រយៈពេល​ពីរ​ថ្ងៃ​កន្លង​មក​នេះ” ដោយ​លោក​​បន្ថែម​ថា​​​ប្រជាពលរដ្ឋ​ចំនួន​២៨នាក់​បាន​ស្លាប់ និង​​​​ប្រ​ជា​ពលរដ្ឋ​ចំនួន​៩៥នាក់​​ទៀត​បាន​រង​របួស​ដោយ​សារ​ព្យុះ​ក្នុង​រយៈ​​​ពេល​ប្រាំពីរ​ខែ​ដំបូង​ក្នុង​ឆ្នាំ​នេះ៕

ប្រែសម្រួលដោយ ឃិន ណៃ​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស