ក្រុមមន្ត្រីបាននិយាយកាលពីម្សិលមិញថា សាលាដំបូងរាជធានីភ្នំពេញបានចោទប្រកាន់ប្រធានក្រុមហ៊ុនក្នុងស្រុកដ៏ធំមួយដែលជាជនជាតិខ្មែរ និងពាណិជ្ជករជនជាតិចិនម្នាក់ទៀតពីបទឆបោកនិងក្លែងបន្លំឯកសារសាធារណៈ។
លោក អាល់ រមណី អាយុ៤១ឆ្នាំនិងលោក ជីន ម៉ុងស៊ីន អាយុ៤៥ឆ្នាំជាជនជាតិចិនត្រូវបានចាប់ខ្លួនកាលពីថ្ងៃសៅរ៍ បន្ទាប់ពីអ្នកដាក់ពាក្យបណ្តឹងអនាមិកម្នាក់បាននិយាយថា ពួកគេទាំងពីរនាក់បានប្រើប្រាស់ឯកសារក្លែង ក្លាយ រួមមានការក្លែងហត្ថលេខាលោកនាយករដ្ឋមន្ត្រី ហ៊ុន សែន ដើម្បីបោកប្រាស់យកប្រាក់ពីដៃគូម្នាក់ចំនួន៨១០.០០០ដុល្លារក្នុងកិច្ចព្រមព្រៀងមួយដើម្បីទទួលបានអាជ្ញាប័ណ្ណរុករករែ៉នៅក្នុងខេត្តមណ្ឌលគិរី។
ក្រុមហ៊ុន ACICA ជាក្រុមហ៊ុនដែលមានលោក អាល់ រមណី ជាប្រធាននោះ កាលពីម្សិលមិញបានព្យាយាមដកខ្លួនចេញពីរឿងក្តីនេះ ដោយក្រុមហ៊ុនលើកឡើងថា លោកធ្វើការងារនេះដោយខ្លួនឯងនៅក្នុងកិច្ចព្រមព្រៀងរុករករ៉ែនេះ។
លោក តែ សំអាង ចៅក្រមសាលាដំបូងរាជធានីភ្នំពេញបានមានប្រសាសន៍ថា លោកបានបញ្ចប់ការសាកសួរជនទាំងពីរនាក់នេះហើយកាលពីយប់ថ្ងៃអង្គារ។ លោកចៅក្រម តែ សំអាង មានប្រសាសន៍ថា “ខ្ញុំបានចោទប្រកាន់ពួកគេពីបទឆបោក និងប្រើប្រាស់ឯកសារសាធារណៈក្លែងក្លាយ ហើយបានបញ្ជូនពួកគេទាំងពីរនាក់ទៅកាន់ពន្ធនាគារដើម្បីឃុំខ្លួនបណ្តោះអាសន្ន”។
គេបានចោទថា ជនទាំងពីរនេះបានប្រើប្រាស់ឯកសារក្លែងក្លាយ ដែលមានការអះអាងថា ចេញពីក្រសួងឧស្សាហកម្ម រ៉ែ និងថាមពល ក្រសួងទំនាក់ទំនងជាមួយសភា ព្រឹទ្ធសភា និងអធិការកិច្ច និងលោកនាយករដ្ឋមន្ត្រីផ្ទាល់នៅក្នុងការឆបោករបស់ខ្លួនដើម្បីទទួលបានកិច្ចព្រមព្រៀងរុករករ៉ែ ដែលគិតជាទឹកប្រាក់ចំនួន៦លានដុល្លារ។
ក្រុមហ៊ុន ACICA បានអួតអាងពីគម្រោងមួយចំនួនទៀត រួមមានកិច្ចព្រមព្រៀងធ្វើឯកជនភាវូបនីយកម្មទឹកស្អាត និងទឹកកាកសំណល់ដែលអនុម័តយល់ព្រមដោយរដ្ឋាភិបាលនៅក្នុងខេត្តចំនួន១៨។
ដើម្បីឆ្លើយតបទៅនឹងសំណួរដែលបានផ្ញើទៅកាន់អីុម៉េលរបស់ក្រុមហ៊ុននេះ មន្ត្រីរដ្ឋបាលម្នាក់បាននិយាយនៅក្នុងសេចក្តីប្រកាសមួយថា ក្រុមហ៊ុនមិនអាចអត្ថាធិប្បាយអំពីករណីនេះជាក់លាក់បានទេ ប៉ុន្តែ បានបញ្ជាក់ថា គម្រោងរបស់ក្រុមហ៊ុនទាំងអស់មានការអនុម័តយល់ព្រមពិតប្រាកដ។
សេចក្តីប្រកាសដដែលនេះបានសង្កត់ធ្ងន់ថា លោក ជីន ម៉ុងសីុន មិនមែនជាបុគ្គលិក ឬជាដៃគូរបស់ក្រុមហ៊ុន ACICA ទេ។ ការឆ្លើយតបដែលបានផ្ញើមកកាលពីម្សិលមិញ មានខ្លឹមសារថា “ យើងទើបតែស្គាល់គាត់រយៈពេលខ្លីប៉ុណ្ណោះក្នុងនាមជាអ្នកស្គាល់គ្នាជាមួយប្រធានយើង”។
អាជ្ញាប័ណ្ណរុករកនៅក្នុងគម្រោងនៅខេត្តមណ្ឌលគិរីសម្រាប់ក្រុមហ៊ុនសាមីនោះ គឺជាការងារឯករាជ្យរបស់ប្រធានយើងតែម្នាក់ប៉ុណ្ណោះ ហើយមិនជាប់ពាក់ព័ន្ធជាមួយប្រធាន ម្ចាស់ភាគហ៊ុនដទៃ ឬក្រុមហ៊ុនទាំងមូលឡើយ។
ក្រុមហ៊ុនដឹងថា ប្រធានរបស់យើងបានជួយក្រុមហ៊ុនសាមីនេះឲ្យទទួលបានអាជ្ញាប័ណ្ណរុករករ៉ែដោយខ្លួនលោកផ្ទាល់ ប៉ុន្តែ មិនបានដឹងពីការវិវឌ្ឍ ឬការអភិវឌ្ឍការងាររបស់ក្រុមហ៊ុននោះទេរហូតដល់មានព័ត៌មានចាប់ខ្លួនរូបគាត់តែម្តង…។
“យើងក៏មិនបានដឹងពីព័ត៌មានលម្អិតណាមួយពាក់ព័ន្ធនឹងការឆបោក ការឆបោកប្រាក់ ឬឯកសារអនុម័តយល់ព្រមក្លែងក្លាយសម្រាប់អាជ្ញាប័ណ្ណរុករករ៉ែនៅខេត្តមណ្ឌលគិរី ដូចគេអះអាងនេះទេ។ យើងសង្ឃឹមថា នឹងបានដឹងការពិតនៅពេលឆាប់ៗអំពីរឿងក្តីនេះ ហើយសារព័ត៌មាន និងសាធារណជនក៏នឹងបានដឹងដែរ”៕
ប្រែសម្រួលដោយ សោម សារុន