កាលពីម្សិលមិញ លោក ប៉ា សុជាតិវង្ស អភិបាលរាជធានីភ្នំពេញ បានស្តីបន្ទោសលោកសម រង្ស៊ី ប្រធានគណបក្សសង្គ្រោះជាតិថាក្បត់ពាក្យសន្យារបស់ខ្លួនក្នុងការរក្សាការជួបជុំគ្នារបស់គណបក្សសង្គ្រោះជាតិកាលពីថ្ងៃច័ន្ទនៅសួនសេរីភាព ដែលកំណត់មនុស្សចំនួន៦.០០០នាក់ និងរារំាងមិនឲ្យមានការចូលរួមរបស់អ្នកគាំទ្រពីក្រៅរាជធានី។
អ្នកគាំទ្រគណបក្សសង្គ្រោះជាតិជាង១០.០០០នាក់បានចូលរួមក្នុងការជួបជុំនោះហើយលោក សម រង្ស៊ី បានអំពាវនាវឲ្យមានការតវ៉ាទូទាំងប្រទេសយ៉ាងយូរត្រឹមថ្ងៃទី៨ ខែកញ្ញា ប្រសិនរដ្ឋាភិបាលមិនព្រមឲ្យមានការស៊ើបអង្កេតឯករាជ្យមួយពីការបោះឆ្នោត ជ្រើសតាំងតំណាងរាស្ត្រកាលពីខែមុន ដែលទាំងគណបក្សសង្គ្រោះជាតិ និងគណបក្សប្រជាជនសុទ្ធតែអះអាងថា ខ្លួនឈ្នះឆ្នោត។ បើទោះជាអ្នកគាំទ្រមានចំនួនច្រើនជាង៦.០០០នាក់ដែលរដ្ឋាភិបាលកំណត់តែ៦.០០០នាក់នោះ ក៏ព្រឹត្តិការណ៍នេះនៅតែមានសណ្តាប់ធ្នាប់ និងប្រកបដោយសន្តិភាពដែរ។
ទោះជាយ៉ាងក៏ដោយ លោក សុជាតិវង្ស បានស្វែងរកការដាក់ទោសលោក សម រង្ស៊ី ដែលបានរំលោភលើការសន្យារបស់ខ្លួន។
លោកបានលើកឡើងក្នុងលិខិតមួយច្បាប់ផ្ញើជូនលោក សម រង្ស៊ី ដែលបង្ហោះតាមគេហទំព័ររបស់សាលារាជធានីថា “តាមពិតប្រជាពលរដ្ឋមកពីខេត្តនានាក៏បានចូលរួមដែរហើយចំនួនអ្នកចូលរួមលើសកំណត់រហូតដល់ជិត២០.០០០នាក់”។ នេះបង្ហាញថា គណបក្សសង្គ្រោះជាតិមានសមត្ថភាពធ្វើការជួបជុំគ្នាជាមួយសមាជិក ក៏ប៉ុន្តែគ្មានសមត្ថភាពគ្រប់គ្រងដើម្បីកំណត់ទំហំអ្នកចូលរួមទេ។ នេះធ្វើឲ្យប្រជាពលរដ្ឋព្រួយបារម្ភអះពីគ្រោះថ្នាក់ ដែលអាចកើតឡើង នៅពេលពួកគេមានការជួបជុំគ្នានៅពេលខាងមុខ ដែលអាចប៉ះពាល់ធ្ងន់ធ្ងរដល់សន្តិសុខ សណ្តាប់ធ្នាប់សាធារណៈនិងសុវត្ថិភាពសង្គម។
“ព្រោះហេតុនោះហើយ ខ្ញុំបានស្នើលោក សម រង្ស៊ី ប្រធានគណបក្សសង្គ្រោះជាតិឲ្យយកចិត្តទុកដាក់ចំពោះសកម្មភាពរបស់ពួកគេទាំងអស់ និងនៅពេលខាងមុខពួកគេមានការជួបជុំមួយដោយត្រូវអនុវត្តតាមច្បាប់ធ្វើបាតុកម្ម”។
លិខិតនេះត្រូវបានចេញផ្សាយ បន្ទាប់ពីមានការព្រមានម្តងហើយម្តងទៀតពីមន្ត្រីរដ្ឋាភិបាលកំពូលៗថា ការប្រើអំពើហិង្សាណាមួយដែលកើតចេញពីការតវ៉ារបស់គណបក្សសង្គ្រោះជាតិ នឹងជាកំហុសរបស់គណបក្សប្រឆាំងនេះ និងនាំទៅរកការដាក់ទោសមេដឹកនាំរបស់ខ្លួន។ ផ្ទុយទៅវិញ គណបក្សប្រឆាំង បានលើកឡើងឲ្យដឹងពីកង្វល់ថា គណបក្សប្រជាជនកម្ពុជា ប្រហែលជាព្យាយាមដាក់កម្លាំងចារកម្មក្នុងចំណោមអ្នកតវ៉ាដើម្បីបង្កអំពើហិង្សា ហើយស្តីបន្ទោសលើគណបក្សសង្គ្រោះជាតិ។
លោកស្រី មូរ សុខហួរ តំណាងរាស្ត្រគណបក្សប្រឆាំង មានប្រសាសន៍ថា ការកំណត់របស់រដ្ឋាភិបាលទៅលើការជួបជុំគ្នាកាលពីថ្ងៃច័ន្ទ មិនអាចទទួលយកបានទេ។ លោកស្រីបានមានប្រសាសន៍ថា “នេះជាឆន្ទៈរបស់ប្រជាពលរដ្ឋ ដូច្នេះយើងមិនអាចរារំាងពួកគេមិនឲ្យចូលរួមបានទេ។ គណបក្សប្រឆាំងស្វាគមន៍ពួកគេ។ ការកំណត់ការចូលរួមរបស់ប្រជាពលរដ្ឋ គឺជាការដាក់សម្ពាធលើសេរីភាពរបស់ប្រជាពលរដ្ឋ ដូច្នេះគណបក្សសង្គ្រោះជាតិមិនអាចទទួលយកបានទេ”៕
ប្រែសម្រួលដោយ ចេវ ប៊ុននី