យោងតាមលទ្ធផលដែលក្រសួងអប់រំយុវជន និងកីឡា បានប្រកាសកាលពីចុងសប្តាហ៍មុនបានបង្ហាញថា សិស្សវិទ្យាល័យជាង៨០ភាគរយទូទាំងប្រទេសបានប្រឡងជាប់ឆ្នាំនេះ។
ក្នុងចំណោមបេក្ខជនជាង១០៥.០០០នាក់ ដែលចូលរួមប្រឡងកាលពីថ្ងៃទី៥ ខែសីហា មានចំនួន៩១.៣៧០នាក់ បានប្រឡងជាប់ ពោលគឺបានកើន០,២៩ភាគរយ បើធៀបនឹងឆ្នាំមុន។
ទោះបីជាមានលទ្ធផលវិជ្ជមានក៏ដោយ ក៏លោក រ៉ុង ឈុន ប្រធានសមាគមគ្រូបង្រៀនឯករាជ្យកម្ពុជាបានលើកឡើងថា ការលួចចម្លង ក៏ដូចជាការលក់ឯកសារចម្លើយមុនការប្រឡងជាដើមនោះ ធ្វើឲ្យស្ថិតិបែបនេះគ្មានន័យ។
លោក រ៉ុង ឈុន បានមានប្រសាសន៍កាលពីម្សិលមិញថា “ ខ្ញុំគិតថា ក្រសួងអប់រំ មិនគួរឲ្យភាពមិនប្រក្រតីទាំងនេះបន្តកើតឡើងទេ ពីព្រោះកម្ពុជាត្រូវការគុណភាពល្អក្នុងការអប់រំ។ យើងមានតែបរិមាណ [នៃលទ្ធផលល្អ] ប៉ុណ្ណោះ ប៉ុន្តែគ្មានគុណភាព។ បញ្ហានេះនឹងនាំឲ្យមានគ្រោះថ្នាក់ដល់សង្គមរបស់យើង”។
ការលួចចម្លងនៅក្នុងបន្ទប់ប្រឡង កើតមានជាទូទៅនៅក្នុងប្រទេសកម្ពុជា ដោយសិស្សជារឿយៗតែងតែសូកប៉ាន់មេប្រយោគ ឬគ្រូបង្រៀនដើម្បីអនុញ្ញាតឲ្យពួកគេយកឯកសារចម្លើយចូលក្នុងបន្ទប់ប្រឡង ឬក៏ប្រើទូរស័ព្ទដៃរបស់ខ្លួន ដើម្បីលួចចម្លង៕
ប្រែសម្រួលដោយ ចេវ ប៊ុននី