34 C
Phnom Penh

នគរ​​​បាល​​​ និង​​​គណបក្ស​​​សង្គ្រោះ​​​​​​​​​ជាតិ​​​​​​​​​ហាត់​​​សម​​​ត្រៀម​​​សម្រាប់​​​ការ​​​​​​​​​ធ្វើ​​​បាតុកម្ម​​​នា​​​ពេល​​​ខាង​​​មុខ​​​នេះ

ដោយ ឌឹ ខេមបូឌា ដេលី

បទវិភាគ

ដោយ​ការ​តវ៉ា​ដែល​បាន​គ្រោង​ទុក​ប្រឆាំង​នឹង​លទ្ធផល​នៃការ​បោះឆ្នោត​ជាតិ​កាលពី​ខែ​មុន​ខិត​ជិត​មក​ដល់​​នោះ គណ​បក្ស​សង្គ្រោះ​​ជាតិ ដែល​ជា​គណបក្ស​ប្រឆាំង​ និង​នគរ​បាល​​បាន​រៀប​ចំ​ការ​​ហ្វឹក​ហាត់​ដាច់​ដោយ​ឡែក​ពីគ្នា​នៅ​ក្នុងរាជធានី​ភ្នំពេញ កាល​ពី​ម្សិល​​​មិញ ដើម្បី​ទប់​ស្កាត់​​មិន​ឲ្យ​មាន​​អំពើ​ហិង្សា​ ដែល​មនុស្ស​ជា​ច្រើន​បារម្ភ​ថា អាច​នឹង​កើត​មាន​ឡើង​។​
គណបក្ស​សង្គ្រោះ​ជាតិ និយាយ​ថា ខ្លួន​នឹង​ចាប់​ផ្ដើម​ធ្វើ​មហា​បាតុកម្ម​នៅ​ថ្ងៃ​សៅរ៍ ប្រសិន​បើ​រដ្ឋាភិបាល​មិន​យល់​ព្រម​ឲ្យ​មាន​ការ​ស៊ើប​អង្កេត​ដោយ​ឯករាជ្យ​លើ​ការ​បោះ​ឆ្នោត​ថ្ងៃ​ទី​២៨ ខែកក្កដា ដែល​លទ្ធផល​បឋម​បង្ហាញ​ថា គណបក្ស​កាន់​អំណាច​ជា​អ្នក​ឈ្នះ​​ប៉ុន្តែមាន​សេចក្ដី​រាយការណ៍​ពី​ភាព​មិន​ប្រក្រតី​ជា​ច្រើន​នោះទេ។

ទោះ​ជា​យ៉ាង​ណា​ ព្រឹត្តិការណ៍​ហ្វឹក​ហាត់​ចំនួន​ពីរ​កាលពីម្សិលមិញ មិន​មាន​អ្វី​ខុស​គ្នា​ច្រើន​ទេ។

នៅ​ឯកោះ​ពេជ្រ ​​មន្ត្រី​នគរ​បាលរាជធានី​ប្រហែល​២.០០០​នាក់ បាន​ចំណាយ​ពេល​​ជិត​ពេញ​មួយ​ព្រឹក​ធ្វើ​ការ​​ហ្វឹក​ហាត់​ ដែល​មាន​ការ​សម្រប​សម្រួល​​យ៉ាង​យកចិត្តទុកដាក់​និង​យ៉ាង​តឹង​រ៉ឹង​។ នគ​រ​បាល​​​ត្រៀម​ឧស្ម័ន​បង្ហូរ​ទឹក​ភ្នែក​ និង​​ម៉ាស់​ការពារ​ឧស្ម័ន​ ហើយ​នគរ​បាល​បង្ក្រាបបាតុកម្ម​ពាក់​អាវ​ការ​ ​កាន់​ដំបងឆក់ និង ​ខែល​ក៏បាន​ចូល​រួម​ដែរ​។ ពួកគេ​ហ្វឹកហាត់​បច្ចេកទេ​ស ដាក់​របាំង​ផ្លូវ​ និង​បន្លា​លួស​ និង​ប្រើ​ប្រាស​ទុយោ​បាញ់​ទឹក​ចេញពី​រថយន្ត​ពន្លត់​អគ្គិភ័យ​ជា​ច្រើន​គ្រឿង​។

លោក  ជួន សុវណ្ណ ស្នង​ការ​នគរ​បាល​ក្រុង​បាន​ចូល​រួម​​ជា​អធិបតី​ក្នុង​​ការហ្វឹក​ហាត់​នេះ ហើយ​ក្រោយ​មក​បាន​ជំរុញឲ្យ​អ្នក​ដែល​​ចង់​ចូល​រួម​ធ្វើ​បាតុកម្ម​នៅ​ថ្ងៃ​សៅរ៍​នេះ​​ស្នាក់​នៅ​ផ្ទះ​។ លោក ជួន សុវណ្ណ បាន​មាន​ប្រសាសន៍​ថា “ ប្រសិន​បើ​បាតុករ​មិន​ប្រើ​អំពើ​ហិង្សា​ យើង​មិន​ចាំ​បាច់​ប្រើ​អាវុធទេ។ ប៉ុន្តែ​ប្រសិន​បើ​មាន​អ្នក​ឆ្លៀត​ឱកាស​ក្នុង​ចំណោម​បាតុករ​ទាំង​នោះ​​​ ដែល​ប្រើ​​អាវុធ​ដើម្បី​វាយ​ប្រហារ​អាជ្ញាធរ​របស់​យើង​នោះ វា​នឹង​មាន​គ្រោះ​ថ្នាក់​ហើយ​​​”។

លោក​បាន​មាន​ប្រសាសន៍​ថា “ ដូច្នេះ នៅ​ត្រង់​ចំណុច​នេះ​យើង​សូ​ម​អំពាវ​នាវ​ដល់​ប្រជា​ពល​រដ្ឋ​កុំ​ឲ្យ​ចូល​រួម​ធ្វើ​​បាតុកម្ម​ និង​ទុក​ឲ្យ​គណបក្ស​ជា​អ្នក​ដោះស្រាយ​បញ្ហា​​នេះ​។ យើង​មាន​សមត្ថភាព​ដោះ​ស្រាយ​បញ្ហា​នេះ​។ យើង​មាន​ច្បាប់​គ្រប់​គ្រាន់​ ច្បាប់​រដ្ឋ​ធម្មនុញ្ញ និង​ច្បាប់​ផ្សេងៗ​ទៀត ដើម្បី​ដោះស្រាយ​បញ្ហា​នេះ​”។

ប្រសិន​បើ​ការ​តវ៉ា​នេះ​នៅ​តែ​ធ្វើ​ដូច​ការ​គ្រោង​ទុកនោះ លោក សុវណ្ណ ​មាន​ប្រសាសន៍​​ថា វាអាស្រ័យ​លើ​គណបក្ស​សង្គ្រោះជាតិ​​ក្នុងការ​ធ្វើ​ឲ្យ​ពួកគេ​ស្ងប់​ស្ងាត់​ ហើយ​បាន​បន្ទរ​តាម​ការ​ព្រមានរបស់​រដ្ឋាភិបាល​ក្នុង​រយៈ​ពេល​ប៉ុន្មាន​សប្ដាហ៍​ថ្មីៗ​នេះ​ថា អំពើ​ហិង្សា​ណាមួយ​ដែល​​កើត​​ចេញ​ពី​ការ​ធ្វើ​បាតុកម្ម​គឺ​ជា​ការ​ទទួល​ខុស​ត្រូវ​របស់​គណ​​​បក្ស​ប្រឆាំង​តែ​មួយ​​​​គត់​។

លោក ជួន សុវណ្ណ ក៏​បាន​ស្វះស្វែង​និយាយ​សម្រាល​ដល់​ការ​បារម្ភ​របស់​​​​គណ​បក្ស​ប្រឆាំង​ដែល​​ថា មន្ត្រី​របស់​លោក​អាច​ប្រើ​កម្លាំង​​ហួស​ហេតុ​ក្នុងការ​បង្ក្រាប​បាតុកម្ម​នេះ ឬ​ក៏​បង្ករ​ឲ្យ​មាន​អំពើ​ហិង្សាណាមួយ​។

លោក​ ជួន សុវណ្ណ បាន​មាន​ប្រសាសន៍​ថា “ ការ​ហ្វឹក​ហាត់​របស់​យើង​ គឺ​ដើម្បីទប់​ស្កាត់​អំពើ​ហិង្សា និង ដើម្បី​ទប់​ស្កាត់​សកម្ម​ភាព​នៅ​កន្លែង​ហាម​ឃាត់​។​កង​កម្លាំង​របស់​យើង​បំពាក់​ដោយ​ខែល​ ដំបង និង​មួកការ​ពារ​សុវត្ថិ​​​ភាព។​​ នេះ​មាន​ន័យ​ថា ក្រុម​នេះ​បង្កើត​ឡើង​​​​​​​​​​ដើម្បី​រៀប​ចំ​សណ្ដាប់​ធ្នាប់​ មិន​មែន​ដើម្បី​ប្រយុទ្ធ​ទេ”។

កង​រាជ​អាវុធហត្ថ​ជាង​១.០០០​នាក់ បាន​រត់​កាត់​ការ​ហ្វឹក​ហាត​់​របស់​បាតុករ​​ដែល​មាន​ការ​គ្រប់គ្រង​ អំឡុង​ពេល​ហ្វឹក​ហាត់​នៅ​ពហុ​កីឡាដ្ឋាន​អូឡាំពិក​ ក្នុង​ក្រុង​ភ្នំពេញ កាលពី​ពីរ​សប្ដាហ៍​មុន​។ មុន​ពេល​នោះ រថពាស​ដែក​បំពាក់​អាវុធយ៉ាង​ហោច​ណាស់​​ប្រាំមួយ​​គ្រឿង​ និង​ទាហាន​រាប់​រយ​នាក់​​ ក៏​ត្រូវ​បាន​​បញ្ជូន​​មក​​រាជធានីភ្នំពេញ​ផង​ដែរ ដើម្បី​ត្រៀម​សម្រាប់​ការ​ធ្វើ​បាតុកម្ម​ ប៉ុន្តែ​រហូត​មក​ទល់​ពេល​នេះ​មិន​​ឃើញ​មាន​ទៀត​ទេ ​។

គណបក្ស​សង្គ្រោះជាតិ​បាន​ជាប់​រវល់​ក្នុង​ការ​ត្រៀម​លក្ខណៈ​សម្រាប់ការ​តវ៉ា​នេះ​ផង​ដែរ​។ ប៉ុន្តែ​ ការ​ហាត់​សម​ធ្វើ​បាតុកម្ម​របស់​ពួកគេ​នៅ​សួន​សេរី​ភាព​កាលពី​ម្សិលមិញ ​មិន​​​សូវ​ជា​មាន​សណ្ដាប់​ធ្នាប់ប៉ុន្មាន​ទេ។

នៅពេល​ដែល​អ្នក​គាំទ្រ​គណបក្ស​ប្រឆាំង​ប្រហែល​​​៥០០​នាក់ ប្ដូរ​វេន​គ្នា​​ធ្វើ​ជា​អ្នក​តវ៉ា​នោះ​ មាន​អ្នក​ធ្វើ​ជា​បាតុករ​និង​​អ្នក​ធ្វើ​ជា​​នគរ​បាល​មួយ​ចំនួន​មិន​អាច​ទ្រាំ​​សើច​ និង​ញញឹម​បាន​ទេ ហើយ​ហាក់​ដូច​ជា​ការ​ដើរ​តួ​ប្រយុទ្ធ​ជាង​​ការ​ហ្វឹកហាត់​ពិត​ប្រាកដ​។ នៅ​ពេល​ខ្លះទៀត ​ពួកគេ​ហ្វឹកហាត់​អ្នក​ចូល​រួមដាច់​​ដោយ​ឡែក​ពី​គ្នា ដោយកាន់ដៃ​គ្នា​តស៊ូ​នឹង​អ្នក​តវ៉ា​ដែល​ច្រួលច្រាល​ និង​មាន​ការ​គប់​ដប​ទឹក​សុទ្ធ​ទទេ​។

លោក សុខ  នឿន ដែល​បាន​សើច​ពេល​គាត់​ដើរ​តួ​ជា​មន្ត្រី​នគរ​បាល​ម្នាក់​នោះ បាន​និយាយ​​ថា គាត់​រីក​រាយ​ចំពោះ​ការ​ហាត់​សម​នេះ​ ប៉ុន្តែ​បាន​ទទួល​ស្គាល់​ថា ការ​តវ៉ា​ពិត​ប្រាកដ​ច្បាស់​ជា​​មិន​សូវ​សប្បាយ​ប៉ុន្មាន​ទេ។

លោក​បាន​មាន​ប្រសាសន៍​ថា “ នគរ​បាល​មិន​ស្លូត​ដូច​យើ​ងទេ។ វា​នឹង​មាន​ការ​ពិបាក​នៅ​ពេល​ដែល​មាន​ការ​តវ៉ា​ពិត​ប្រាកដ​។ កំហឹង ​​ឆ្លើយ​តប​ដោយ​កំហឹង​​ ហើយ​ប្រជា​ពល​រដ្ឋ​ និង​នគរ​បាល​អាច​ប៉ះទង្គិច​គ្នា​។ ប្រជា​ពល​រដ្ឋ​អាច​រង​ការ​វាយ​ដំក្បាល​ និង​អាច​មានការ​បង្ហូរ​ឈាម”។

អ្នកស្រី​ អ៊ុំ វន្នី ដែល​ដើរ​តួ​ជា​បាតុករ​បាន​យល់​ស្រប​។​ អ្នក​ស្រីបាន​និយាយ​ថា “ តាម​ពិត​វា​នឹង​មាន​ការ​ពិបាក​ជាង​នេះ ដោយសារ​នគរ​បាល​អាច​វាយ​យើង​។ ប៉ុន្តែ​យើង​នឹង​មិន​វាយ​បក​វិញ​ទេ។ យើង​នឹង​អង្គុយអង្វរ​ពួកគេ​”។

ប៉ុន្តែ​មន្ត្រី​គណបក្ស​សង្គ្រោះ​ជាតិ និង​អ្នក​គាំទ្រ​ជា​ច្រើន​មិន​ព្រួយ​បារម្ភអំពីការ​វាយ​ប្រហារ​ពី​​នគរបាល​ទេ ទោះបីជា​​​គណបក្ស​​ប្រជាជន​កម្ពុជា​​ ​អាច​ដាក់​បង្កប់​អ្នក​ស៊ើប​ការ​នៅ​ក្នុង​ក្រុម​អ្នក​តវ៉ា​​ដើម្បី​បង្ករ​បញ្ហា​ ហើយ​ធ្វើ​ជា​ហេតុ​ផល​ចំពោះ​​ការ​​បង្ក្រាប​ពី​នគរ​បាល​ដែល​មាន​អាវុធ​គ្រប់ដៃក៏ដោយ​។ ដើម្បី​ទប់​ទល់​នឹ​ង​បញ្ហា​នេះ​គណបក្ស​សង្គ្រោះជាតិ​មាន​គម្រោង​បែង​ចែក​អ្នក​តវ៉ា​ជា​ក្រុម​ៗ មាន​គ្នា​ពី១០​ទៅ​២០​នាក់ ដែល​ត្រូវ​ស្គាល់​គ្នា​ទាំង​អស់​។

ថារ័ត្ន ជានិស្សិត​​ភាសា​អង់​គ្លេស និង​ជា​អ្នក​គាំទ្រ​គណបក្ស​ប្រឆាំង ដែល​បដិសេធ​មិន​ប្រាប់​ឈ្មោះពេញ​ ដោយសារ​ភ័យ​ខ្លាច​​ការ​ធ្វើ​បាប​ពី​អាជ្ញាធរ​​បាន​និយាយ​ថា ក្រុម​ទាំង​នេះ​នឹង​អាច​រក​ឃើញ​អ្នក​លួច​​បន្លំចូល​។
គាត់​បាន​និយាយ​ថា ប្រសិន​បើ​យើង​ឃើញ​​ពួកគេ ​​យើង​អាច​ចាប់​ពួកគេ​ ហើយ​នាំ​ពួកគេ​ចេញ​ក្រៅ​ក្រុម​អ្នក​តវ៉ា​”។

លោក សម រង្ស៊ី ប្រធាន​គណបក្ស​សង្គ្រោះ​​ជាតិ ដែល​បាន​​មើល​ការ​ហាត់​សម​នេះ​បាន​​ជំរុញឲ្យ​អ្នក​ចូល​រួម​រក្សា​អារម្មណ៍​ឲ្យ​ស្ងប់​ស្ងាត់​អំឡុង​ពេល​ធ្វើ​បាតុកម្ម​នៅ​ក្នុង​ពេល​ខាង​មុខ​នេះ​ ទោះ​បី​ជា​មាន​បញ្ហា​អ្វីកើត​ឡើង​​​​ក៏ដោយ​។

​លោក​បាន​មានប្រសាសន៍​ថា “ សូម​គ្រប់​គ្រង​កំហឹង​របស់​បង​ប្អូន​ និង​ធ្វើ​ខ្លួន​ឲ្យ​ល្អ​ដើម្បី​គោរ​ព​អ្នក​ដទៃ​ ហើយអ្នក​ដទៃ​ក៏​គោរព​បង​ប្អូន​ដែរ​” ​។ លោក​បាន​ជំរុញ​ឲ្យ​ពួកគេ​រក្សា​អាវុធ​ដែល​ពួកគេ​មាន​ទុក​នៅ​ឯផ្ទះ​។

លោក កឹម សុខា អនុ​ប្រធាន​គណបក្ស​សង្គ្រោះជាតិ បាន​បន្ថែម​ថា “សូមគ្រប់​គ្រង​ឥរិ​យាបថ​របស់​បង​ប្អូន​ គំនិត​របស់​បង​ប្អូន​ និង​និយាយ​ដោយ​ប្រុង​ប្រយ័ត្ន ​ពីព្រោះ​យើង​គឺ​ជា​ខ្មែរ​ យើង​ត្រូវ​មាន​ទឹក​ចិត្ត​ស្លូត​បូត ​យើង​ត្រូវ​តែ​ញញឹម​ជា​និច្ច” ។

ទោះជាយ៉ាងណា ពិធីបែប​នេះ​ហាក់​ដូច​ជា​​ធ្វើ​ឲ្យ​​មនុស្ស​រាប់​រយនាក់​​ ដែលបាន​ឈរ​មើល​នៅ​ជុំវិញ​សួន​​នេះ មិនយល់​ទេ​។

អ្នក​ឈរ​មើល​ម្នាក់​ដែល​បដិសេធ​មិន​ប្រាប់​ឈ្មោះ​បាន​និយាយ​ថា​ “ នេះ​ជា​ការ​សម្ដែង​ឲ្យ​គេ​មើល​ ប៉ុន្តែ​គេ​មិន​អាច​មើល​ឃើញ​ទេ ដូច្នេះ​គេ​មិន​ដឹង​ថា ត្រូវ​ធ្វើ​តាម​​ឧទាហរណ៍​នេះ​ដូច​ម្ដេចទេ”។

លោក យ៉េង វីរៈ នាយក​ប្រតិបត្តិ​មជ្ឈ​មណ្ឌល​អប់​រំ​ច្បាប់​សម្រាប់​សហគមន៍​ ដែល​មក​សង្កេត​មើល​ពិធីនេះ​បាន​យល់​ស្រប​ថា មនុស្ស​ភាគ​ច្រើនហាក់​ដូច​ជា​មិន​សប្បាយ​ចិត្ត​ទេ បន្ទាប់ពី​ការ​ហាត់​សម​នេះ​។

​លោក​បាន​សរសើរ​ដល់​ការ​ខំប្រឹង​ប្រែង​​របស់គណបក្ស​សង្គ្រោះ​ជាតិ​ និងការ​ប្ដេជ្ញា​មិន​ប្រើ​ហិង្សា​ ប៉ុន្តែ​បាន​មាន​ប្រសាសន៍​ថា គណបក្ស​នេះ​ត្រូវ​ធ្វើ​ឲ្យ​បាន​ល្អ​ជាង​នេះ​នៅ​ពេល​ហាត់​សម​លើក​ក្រោយ​នៅ​ថ្ងៃ​ពុធ។

លោក​បាន​មាន​ប្រសាសន៍​ថា ការ​ហាត់​សម​នៅ​ថ្ងៃ​ទី​៤ ច្បាស់​ជាល្អ​ជាង​នេះ​។ ខ្ញុំ​សង្ឃឹម​ថា លើក​ក្រោយ​ពួកគេ​ធ្វើ​បាន​ល្អ​ជាង​នេះ​ ប៉ុន្តែ​ការ​ប្ដេជ្ញាចំពោះ​អហិង្សា​ពិត​​ជា​មាន​មែន”។
គណបក្ស​សង្គ្រោះជាតិ​បាន​និយាយ​ថា ខ្លួន​បាន​ទទួល​ការ​ហ្វឹក​ហាត់​អំពីបច្ចេក​ទេស​តវ៉ា​ដោយ​អហិង្សា​ពី​អង្គការ​ក្រៅ​រដ្ឋាភិបាល ប៉ុន្តែ​មិន​ប្រាប់​ថា អង្គការ​មួយ​ណាទេ៕

(រាយការណ៍​បន្ថែម​ដោយ​ ម៉ិច ដារា​)

ប្រែសម្រួលដោយ មូល គឹមហឿន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស