32 C
Phnom Penh

គណបក្ស​សង្គ្រោះ​ជាតិ​មាន​គម្រោង​ចាត់​វិធាន​ការ​តាម​ផ្លូវ​ច្បាប់​ប្រឆាំង​នឹង​ថ្នាក់​ដឹក​នាំ​ គ.ជ.ប.

ដោយ ឌឹ ខេមបូឌា ដេលី

បទវិភាគ

គណបក្ស​សង្គ្រោះ​ជាតិ​​បាន​សន្យា​​ចាត់​វិធានការ​តាម​ផ្លូវ​ច្បាប់​ប្រឆាំង​ នឹង​ថ្នាក់​ដឹក​នាំ​របស់​គណៈកម្មាធិការ​ជាតិ​រៀប​ចំ​ការ​បោះ​ឆ្នោត​​ (គ​.ជ.ប​.) បន្ទាប់​ពី​ក្រុម​ប្រឹក្សា​ធម្មនុញ្ញ​កម្ពុជា​បាន​ប្រកាស​កាលពី​ថ្ងៃសៅរ៍​ថា ​ភាព​មិន​ប្រក្រតី​ក្នុង​ការ​បោះ​ឆ្នោត​នៅ​ក្នុង​ខេត្ត​ក្រចេះ​នោះ​ គឺ​មិន​​អាច​ធ្វើ​ឲ្យ​ប៉ះពាល់​ដល់​លទ្ធ​​​ផល​ឆ្នោត​បឋម​​ដែល​ចេញ​ដោយ​គណៈ​​​កម្មា​​​ធិ​​​ការ​ជាតិ​រៀប​ចំ​ការ​បោះ​ឆ្នោត​នោះ​ទេ​។​

ទោះ​បី​ជា​ក្រុម​ប្រឹក្សា​ធម្មនុញ្ញ​កម្ពុជា​ បាន​ចេញ​​​បញ្ជា​​ថា​​ត្រូវ​​ចាត់​វិធានការ​ដាក់​ពិន័យ​​ចំពោះ​អ្នក​ទាំង​ឡាយ​ណា​ដែល​​ខក​ខាន​មិន​បាន​បិទ​កញ្ចប់​សុវត្ថិភាព​​ដាក់​ឯកសារ​កត់​ត្រា​ផ្លូវ​ការ​នៅ​តាម​ការិយាល័យ​បោះ​ឆ្នោត​ឲ្យ​បាន​ត្រឹម​ត្រូវ​នៅ​​ការិយាល័យ​បោះ​ឆ្នោត​យ៉ាង​ហោច​ណាស់​ចំនួន​​៨​​កន្លែង​​នៅ​ក្នុង​ខេត្ត​ក្រចេះ​នេះ​ក៏​ដោយ​ ក៏​លោក​ គួយ​ ប៊ុន​រឿន តំណាង​រាស្រ្ត​​គណបក្ស​សង្គ្រោះ​ជាតិ​មាន​​​ប្រសាសន៍ថា ការ​សម្រេច​​របស់​ក្រុម​ប្រឹក្សា​ធម្មនុញ្ញ​កម្ពុជា​ គឺ​មិន​អាច​ទទួល​យក​បាន​ទេ​។

លោក​ គួយ ប៊ុនរឿន បាន​ថ្លែង​ក្នុង​ពិធី​បើក​​​​សវនាការ​ជា​សាធារណៈ​នៅ​ក្រុម​ប្រឹក្សា​ធម្ម​​​នុញ្ញ​ កាលពី​ថ្ងៃសៅរ៍​ ដែល​គណៈម្មាធិការ​ជាតិរៀប​ចំ​ការ​បោះ​ឆ្នោត​មាន​ឱកាស​មួយ​ដើម្បី​ការពារ​ខ្លួន​ប្រឆាំង​នឹង​ការ​ចោទ​ប្រកាន់​របស់​គណបក្ស​សង្គ្រោះ​ជាតិ​​ថា “ការ​សម្រេច​​របស់​​​​ក្រុម​ប្រឹក្សា​ធម្មនុញ្ញ​កម្ពុជា​ គឺ​អយុត្តិធម៌​ចំពោះ​គណបក្ស​សង្គ្រោះ​ជាតិ​”។

លោក ប៊ុនរឿន​ បាន​បន្ថែម​ថា ការ​សម្រេច​​​​​របស់​ក្រុម​ប្រឹក្សា​ធម្មនុញ្ញ​កម្ពុជា​ ដើម្បី​ឲ្យ​គណៈ​​​កម្មាធិការ​ជាតិ​រៀប​ចំ​ការ​បោះ​ឆ្នោត​ធ្វើការ​ដាក់​ពិន័យ​​ចំពោះ​​ប្រ​ធាន​​ការិយាល័យ​បោះ​ឆ្នោត​មួយ​ចំនួន​ដែល​មិន​បាន​លើក​ឡើង​នៅ​ក្នុង​ពាក្យ​បណ្ដឹង​របស់​គណបក្ស​សង្គ្រោះ​ជាតិ​នោះ​ថា ​គណៈកម្មាធិការ​ជាតិ​រៀប​ចំ​ការ​បោះ​​​​​​​ឆ្នោត​បាន​ធ្វើការ​ជាមួយ​គណបក្ស​ប្រជាជន​កម្ពុជា​ ដើម្បី​លួច​បន្លំ​ការ​បោះ​ឆ្នោត​ក្នុង​ថ្ងៃ​បោះ​ឆ្នោត​។

លោក ប៊ុនរឿន បាន​ថ្លែង​បន្ត​ថា “ ការ​បញ្ជា​ឲ្យ​ [គណៈកម្មាធិការ​ជាតិ​រៀបចំ​ការ​បោះ​​​​ឆ្នោត]​​​​​ធ្វើការ​ដាក់​ពិន័យ​​ចំពោះ​​​មន្ត្រី​នៅ​តាម​ការិ​​​យា​​​ល័យ​បោះ​ឆ្នោត​នោះ​ ក៏​ជា​រឿង​អយុត្តិធម៌​ចំពោះ​ពួកគេ​ដែរ​។ ពួកគេ​មិន​បាន​ធ្វើ​ឲ្យ​មាន​​កំហុស​នេះ​ដោយ​ខ្លួន​ឯង​ទេ​ ​ប៉ុន្តែ​ពួកគេ​បាន​ទទួល​បញ្ជា​ពី​ថ្នាក់​លើ​របស់​ពួក​គេ​”។

លោក​បាន​ថ្លែង​បន្ត​ថា​​ “ ឥឡូវ​នេះ​ ពេល​វេលា​សម្រាប់​ដាក់​ពាក្យ​បណ្ដឹង​ពាក់​ព័ន្ធ​នឹង​ការ​បោះ​ឆ្នោត​បាន​​ចប់​ហើយ​ ហើយ​យើង​បច្ចុប្បន្ន​នេះ​កំពុង​ពិចារណា​​ក្នុង​ការ​[ដាក់​ពាក្យ​​​​បណ្ដឹង​ប្រឆាំង ​គ.ជ.ប.] ទៅ​តុលាការ​​ជុំ​វិញ​ការ​​​​លួច​បន្លំ​ ក្នុង​ការ​បោះ​ឆ្នោត​។ ក្រុម​មេធាវី​កំពុង​រៀប​ចំ​ពាក្យ​បណ្ដឹង​​ប្ដឹង​​​​​គណៈកម្មាធិការ​ជាតិ​រៀប​ចំ​ការ​បោះ​ឆ្នោត​​ដែល​មាន​សមា​​​ជិក​​​​ចំនួន​ប្រាំបួន​​រូប​ នេះ​​”។

នៅ​ក្នុង​ខេត្ត​ក្រ​ចេះ​ដែល​លទ្ធផល​បឋម​គណបក្ស​ប្រជាជន​កម្ពុជា​​​បាន​ឈ្នះ​អាសនៈ​សភា​ចំនួន​២​ក្នុង​ចំណោម​អាសនៈ​សភា​ចំនួន​៣​ក្នុង​ខេត្ត​នេះ​។ លទ្ធផល​ចុង​ក្រោយ​នឹង​ត្រូវ​​​​ប្រកាស​នៅ​ថ្ងៃ​ទី​៨ ខែ​កញ្ញា​​។

លោក ឯក សំអុល ប្រធាន​ក្រុម​ប្រឹក្សា​ធម្ម​​​នុញ្ញ​បាន​លើក​ឡើង​ក្នុង​សេចក្ដី​ថ្លែង​ការណ៍​​​​មួយ​កាលពី​ថ្ងៃសៅរ៍​ថា ក្រុម​ប្រឹក្សា​ធម្មនុញ្ញ​កម្ពុជា​បាន​បញ្ជា​ឲ្យ​​ គ.ជ.ប.​ ធានា​ថា ត្រូវ​តែ​​ចាត់​វិធាន​ការ​​ដាក់​ពិន័យ​ចំពោះ​​អ្នក​​ដែល​ទទួល​ខុស​ត្រូវ​ក្នុង​ខេត្ត​ក្រចេះ​។

លោក​ ឯក សំអុល បាន​លើក​ឡើង​បន្ត​ថា “ [ក្រុម​ប្រឹក្សា​ធម្មនុញ្ញ​​កម្ពុជា​] ​បាន​ប្រគល់​ការ​​​ងារ​នេះ​ឲ្យ​​គ.ជ.ប. ដើម្បី​ចាត់​វិធានការ​ដាក់​ទោស​ចំពោះ​មន្ត្រី​ទាំង​នោះ​ ដែល​បាន​ប្រព្រឹត្ដខុស​ច្បាប់​”។

លោក ទេព នីថា អគ្គលេខា​ធិការ​នៃ​គណៈ​​​កម្មាធិការ​ជាតិ​រៀប​ចំ​ការ​បោះ​ឆ្នោតបាន​មាន​ប្រសាសន៍​ថា គ.ជ.ប. អាច​ធ្វើ​តាម​បទ​បញ្ជា​របស់​ក្រុម​ប្រឹក្សា​ធម្មនុញ្ញ​កម្ពុជា​ដើម្បី​ស៊ើប​អង្កេត​ និង​ដាក់​ពិន័យ​​​មន្ត្រី​ គ.ជ.ប. នៅ​ថ្នាក់​មូល​​​ដ្ឋាន​ ដែល​អនុញ្ញាត​ឲ្យ​មាន​ភាព​មិន​ប្រក្រតី​កើត​ឡើង​នៅ​ការិយាល័យ​បោះ​ឆ្នោត​របស់​ពួកគេ​ ប៉ុន្តែ​លោក​​បាន​​ថ្លែង​ថា ការ​ដាក់​ពិន័យ​នេះ​មិន​គួរ​ធ្ងន់​ពេក​ទេ។

លោក​មាន​ប្រសាសន៍​បន្ត​ថា “ យើង​នឹង​ធ្វើការ​ស៊ើប​អង្កេត​ករណី​នេះ​ ស្រប​តាម​ការ​សម្រេច​​របស់​ក្រុម​ប្រឹក្សា​ធម្មនុញ្ញ​​កម្ពុជា​ ហើយ​​​​យើង​នឹង​រក​ឲ្យ​ឃើញ​ថា នរណា​ខ្លះ​ជាប់​ពាក់​ព័ន្ធ​ក្នុង​ករណី​ទាំង​នេះ។ ប៉ុន្តែ ប្រសិន​បើ​យើង​​ពិន័យ​ពួកគេ​​ហើយ​ដាក់​ទោស​ពួកគេ​ធ្ងន់​ពេក​​​​តាម​ការ​ទាម​ទារ​របស់​គណបក្ស​ប្រឆាំង​ នោះ​ ពួកគេ​​នឹង​មិន​អាច​ធ្វើការ​ឲ្យ​ គ.ជ.ប. អំឡុង​ពេល​បោះ​ឆ្នោត​លើក​ក្រោយ​ទៀត​ទេ​ ពី​ព្រោះ​ពួក​​​គេ​គ្រាន់​តែ​ជា​បុគ្គលិក​បណ្ដោះ​អាសន្ន​ ហើយ​​​​ទទួល​បាន​ប្រាក់​ខែ​បន្តិច​បន្តួច​ប៉ុណ្ណោះ​”។

កាលពី​ថ្ងៃ​ទី​២៥ ខែ​សីហា ក្រុម​ប្រឹក្សា​ធម្ម​​​​​​នុញ្ញ​បាន​បញ្ជា​ឲ្យ​ គ.ជ.ប. បើក​កញ្ចប់​សុវត្ថិ​​​ភាព “ ក” នៅ​តាម​ការិយាល័យ​បោះ​ឆ្នោត​ចំនួន​១៣ កន្លែង​នៅ​ក្នុង​ខេត្ត​ក្រចេះ​ ដែល​នៅ​ទី​​​នោះ​គណបក្ស​សង្គ្រោះ​ជាតិ​ជា​គណបក្ស​ប្រឆាំង​បាន​ចោទ​ប្រកាន់​ថា មាន​​ការ​លួច​បន្លំ​​​ក្នុង​ការ​បោះ​ឆ្នោត​។ នៅ​ក្នុង​ពិធី​បើក​កញ្ចប់​សុវត្ថិភាព “ ក” ​ជា​សាធារណៈ​គណបក្ស​សង្គ្រោះ​​​​ជាតិ​បាន​រក​ឃើញ​ថា កញ្ចប់​សុវត្ថិភាព​ “ ក” ​ចំនួន​៨​ត្រូវ​បាន​គេ​បើក​រួច​ហើយ​ ឬ​បិទ​មិន​ត្រឹម​ត្រូវ​ដែល​នាំ​ឲ្យ​គណបក្ស​សង្គ្រោះ​ជាតិ​ដាក់​ពាក្យ​បណ្ដឹង​បន្ថែម​ទៀត​ទៅ​ក្រុម​ប្រឹក្សា​​​​ធម្មនុញ្ញ​។

គណៈកម្មាធិការ​ជាតិ​​រៀប​ចំ​ការ​បោះ​ឆ្នោត​ ក៏​បាន​បើក​កញ្ចប់​សុវត្ថិភាព “ ក” ​នៅ​តាម​ការិយា​​​ល័យ​បោះ​ឆ្នោត​នៅ​​​​ខេត្ត​បាត់​ដំបង​ សៀម​​​រាប និង​ខេត្ត​កណ្ដាល ផង​ដែរ​។
នៅ​ក្នុង​ក្រុង​បាត់​ដំបង​ទម្រង់​១១០២​មួយ​ចំនួន​​​សម្រាប់​​​កត់​ត្រា​​សំឡេង​​ឆ្នោត​នោះ​​មិន​មាន​កត់​ត្រា​​អ្វីទេ​។ នៅ​ខេត្ត​សៀមរាប​ មាន​កញ្ចប់​សុវត្ថិភាព​ខ្លះ​បិទ​មិន​ត្រឹម​ត្រូវ​ ហើយ​​​​ទម្រង់​ច្បាប់​ដើម​ និងទម្រង់​ផ្សេង​ទៀត​បាន​បង្ហាញ​ពី​ភាព​ខុស​គ្នា​នៃ​ការ​​រាប់​សន្លឹកឆ្នោត​​​​​នៅ​តាម​​​​ការិយាល័យ​មួយ​ចំនួន​៕

ប្រែសម្រួល​ដោយ ឃិន ណៃ​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស