28 C
Phnom Penh

កង្វះ​ឆន្ទៈ​នយោបាយ​ជា​មូលហតុ​នាំឲ្យ​មានវិបត្តិ​មូលនិធិ​នៅសាលាក្តី

ដោយ ឌឹ ខេមបូឌា ដេលី

បទវិភាគ

កាល​ពី​ម្សិលមិញ​​រដ្ឋាភិបាល​បាន​និយាយ​ការពារ​គោល​ជំហរ​របស់​ខ្លួន​ក្នុង​ការ​មិន​បំពេញ​កាតព្វកិច្ច​ហិរញ្ញវត្ថុ​ចំពោះ​សាលាក្ដី​ឧក្រិដ្ឋ​កម្ម​សង្គ្រាម​ខ្មែរ​ក្រហម ដែល​​បុគ្គ​លិក​កម្ពុជា​ ប្រហែល​២០០​នាក់​​កំពុង​ធ្វើ​កូដ​កម្ម​ ដោយ​សារ​អត់​បាន​បើក​ប្រាក់​ខែ​​ជា​ច្រើន​ខែ​ ហើយ​បាន​បដិសេធ​ថា ខ្លួន​មិន​បាន​បំពាន​​កិច្ច​ព្រម​ព្រៀង​ណា​មួយ​ជា​មួយ​អង្គការ​សហប្រ​ជាជាតិ​នោះ​ទេ។

តែ​ទោះ​ជា​យ៉ាង​ណា បណ្ដា​អ្នក​ជំនាញ​ខាង​​​​ច្បាប់​​​លើក​ឡើង​ថា តាមរយៈការ​មិន​ទទួល​ខុស​​​​​​​​​​ត្រូវ​របស់​ខ្លួន​ចំពោះ​តុលាការ​ឧក្រិដ្ឋ​កម្ម​​សង្គ្រាម​មួយនេះ​ រដ្ឋាភិបាល​បាន​បំពាន​កិច្ច​ព្រម​ព្រៀង​មុន​ៗ​របស់​អង្គការ​សហ​ប្រជា​ជាតិ​ ហើយ​ប្រឈម​នឹងទស្សនដែល​គេ​​​យល់​​​​​​​​​​​​ថា​ខ្លួន​ មិន​គាំទ្រ​អាណត្តិ​របស់​តុលាការ​ ដែល​រងការ​រិះគន់​យ៉ាង​ខ្លាំង​នេះ​ ក្នុង​ការ​កាត់​ទោស​​អតីត​មន្ត្រី​ក្នុង​របប​ប៉ុលពត។

លោក ឯក ថា អ្នក​នាំពាក្យ​រដ្ឋាភិបាល​​នៅ​​អង្គភាព​ប្រតិកម្ម​រហ័ស​​នៃ​ទីស្ដីការ​គណៈ​រដ្ឋ​មន្ត្រី​បាន​មាន​ប្រសាសន៍​ថា “ រដ្ឋាភិបាល​​គ្មាន​ថវិកា​​សម្រាប់​ភាគី​ជាតិ​នៃ​ [អង្គជំនុំ​ជម្រះ​វិសាមញ្ញ​​ក្នុង​តុលាការ​​កម្ពុជា] ECCC ទេ”។    លោក​បាន​បន្ត​ថា “​ យើង​មិន​បាន​​បំពាន​កិច្ច​ព្រម​ព្រៀង​ណាមួយ​ជាមួយ​អង្គការ​សហ​ប្រជាជាតិ​ទេ​ ហើយ​កន្លង​មក​យើង​បាន​រួម​ចំណែក​ជួយ​ដល់​ភាគី​ជាតិ​នៃ​តុលាការ​នេះ​ ហើយ​យើង​មាន​សិទ្ធិ​ស្វែង​រក​ជំនួយ​ពី​ម្ចាស់​ជំនួយ​ក្រៅ​ប្រទេស​កម្ពុជា​”។

​លោក​បាន​មាន​ប្រសាសន៍​ទៀត​ថា រដ្ឋា​ភិ​បាល​បាន​បរិច្ចាគ​ប្រហែល​១៦,៩​លាន​ដុល្លារ​​ដល់​តុលាការ​នេះ​ ហើយ​ពេល​នេះ​លែង​មាន​លទ្ធភាព​ផ្ដល់​បន្ថែម​ទៀត​ហើយ​។ យោង​តាម​គេហទំព័រ​របស់​ ECCC បានឲ្យ​ដឹង​ថា ការ​បរិច្ចាគ​​របស់​រដ្ឋាភិបាល​មាន​ចំនួន​ស្មើ​នឹង​ប្រហែល​៤,៨​លាន​ដុល្លារ​។

តែ​ទោះ​ជា​យ៉ាង​ណា​ ចាប់​តាំ​ងពី​តុលា​ការ​ឧក្រិដ្ឋកម្ម​សង្គ្រាម​​នេះ​បាន​​ចាប់​ផ្ដើម​ដំណើរ​ការ​កាល​ពី​ប្រាំពីរ​ឆ្នាំ​មុន​មក​ រដ្ឋាភិ​បាល​បាន​ពឹង​ផ្អែក​​ភាគ​ច្រើន​លើ​មូលនិធិ​​របស់​ម្ចាស់​ជំនួយ​បរទេស​ ដើម្បី​រ៉ាប់​រង​ផ្នែក​ហិរញ្ញ​វត្ថុ​សម្រាប់​ភាគី​ជាតិ​​នៃ​តុលាការ​នេះ​។ សាលាក្ដី​នៅ​ឆ្នាំ​នេះ​បាន​ពុះពារ​ធ្វើ​យ៉ាង​ណា​ឲ្យទទួល​បាន​​ជំនួយ​គ្រប់​គ្រាន់​ ដើម្បី​​បើក​ប្រាក់​ខែ​ឲ្យ​បុគ្គលិក​កម្ពុជា​។​ ស្ថានភាព​នេះ​​កាន់តែ​អាក្រក់​ទៅ​ កាល​ពី​ថ្ងៃ​អាទិត្យ​ នៅ​ពេល​បុគ្គ​លិក​ជាតិ​ប្រហែល​២០០​នាក់​​ក្នុង​ចំណោម​បុគ្គលិក​ជាតិ​២៥០​​នាក់​នៃ​តុលាការ​នេះ​បាន​ចាប់​ផ្ដើម​ធ្វើ​កូដកម្ម​​គ្មាន​ពេល​កំណត់​​​ ដោយ​សារ​តែ​​អត់​បាន​បើក​ប្រាក់​ខែ​ចំនួន​បីខែ​ ហើយ​ការ​ធ្វើ​កូដកម្ម​​បែប​នេះ​គឺ​ជា​លើក​ទី​២​ហើយ​នៅ​ឆ្នាំ​នេះ​។

លោក​ ឯក ថា បាន​មាន​ប្រសាសន៍​បន្ត​ថា “ កម្ពុជា ​ជា​ប្រទេស​ក្រីក្រ​។ យើង​មាន​អ្វី​ជា​ច្រើនដែល​ត្រូវ​ផ្ដោត​យក​ចិត្ត​ទុក​ដាក់​។ យើង​ក៏ត្រូវ​ផ្ដោត​លើ​​ការ​កសាង​ប្រទេស​​របស់​យើង​ឡើង​វិញដែរ ចាប់​ពី​វិស័យ​អប់​រំ​ សុខាភិបាល​ ការ​អភិវឌ្ឍ​ជន​បទ​ និង​កសិកម្ម​។ ខ្ញុំ​ពិត​ជា​​មាន​សុទិដ្ឋិនិយម​ថា ម្ចាស់​ជំនួយ​ និង​មិត្ត​របស់​ ECCC នឹង​មិន​ធ្វើ​ឲ្យ​តុលាការ​នេះ​​​អស់​សង្ឃឹម​ឡើយ​”។

លោកបាន​លើក​ឡើង​ថា លោក​ឧបនា​យក​រដ្ឋ​មន្ត្រី​ សុខ អាន  នឹង​ជួប​ជាមួយ​​ឯក​អគ្គរាជ​ទូត​ជប៉ុន និង​អូស្ដ្រាលី ប្រចាំ​ប្រទេស​កម្ពុជា​ នៅ​ក្នុង​ជំនួប​ដាច់​ដោយ​ឡែក​ពី​គ្នា​នៅថ្ងៃ​ស្អែក​នៅ​ក្នុង​កិច្ច​ប្រឹងប្រែង​ ដើម្បី​សុំ​ជំនួយ​​​សម្រាប់​ភាគី​ជាតិ​​នៃ​តុលាការ​នេះ​ ជា​ផ្នែក​នៃ​ការ​អំពាវនាវ​រៃ​អង្គាស​មូល​និធិ​ដ៏​ធំ​មួយដែល​ក្នុង​នោះ​​តំណាង​រដ្ឋាភិបាល​ និង​អង្គការ​សហប្រជាជាតិ​បាន​ធ្វើ​ដំណើរ​ទស្សន​​កិច្ច​ទៅ​កាន់​ប្រទេស​ជាសមាជិក​​អាស៊ាន​ ចំនួន​​ប្រាំកាល​ពី​ខែ​មុន​ ដើម្បី​ស្វែង​រក​ជំនួយ​។​

រហូត​មក​ទល់​ពេល​នេះ​ សាលាក្ដី​ខ្មែរ​ក្រហម​បាន​ចេញ​សាល​ក្រម​ផ្ដន្ទាទោស​តែ​​មួយ​ប៉ុណ្ណោះ​ គឺ​ទោស​​ជាប់​ពន្ធនាគារ​មួយ​ជីវិត​សម្រាប់ ឌុច​ អតីត​ប្រធាន​​មន្ទីរ​ឃុំ​ឃាំង​​ស​-២១ នៅ​ក្នុង​សំណុំ​រឿង​០០១។ បច្ចុប្បន្ន​​ដោយ​សារ​តែ​ដំណើរ​ការ​នីតិវិធី​​អូស​បន្លាយ​​និង​វ័យកាន់​តែ​​ចាស់​របស់ចុង​ចោទ​ ដែលមា​ន​តែ​​ពីរ​នាក់​ក្នុង​ចំណោម​អតីត​មេដឹកនាំ​​ជាន់​ខ្ពស់​បួននាក់​ក្នុង​សម័យ​ខ្មែរ​ក្រហម​ ដែលដំបូង​ឡើយ​​ត្រូវ​បាន​ចោទ​ប្រកាន់​នោះ​ កំពុង​ឡើង​សវនាការ​ក្នុង​​សំណុំ​រឿង​០០២​នៅ​ឡើយ ដោយ​មាន​ការ​រំពឹង​ថា សាល​ក្រម​ផ្ដន្ទាទោស​មួយ​នឹង​ចេញ​នៅ​ឆ្នាំ​ក្រោយ​។

លោក​ ឡុង​ បញ្ញាវុធ​ មន្ត្រី​សម្រប​សម្រួល​​​កម្ម​វិធី​នៃ​គម្រោងយុត្តិធម៌​នៅ​កម្ពុជា​ ដែល​ជា​អង្គការ​ឃ្លាំ​មើល​តុលាការ​បាន​មាន​ប្រសា​សន៍​ថា ដោយ​សំណុំ​រឿង​នេះ​​បាន​ឈាន​ដល់​ទីបញ្ចប់​ ការ​បដិសេធ​របស់​រដ្ឋាភិបាល​មិន​ផ្ដល់​​មូលនិធិចាំ​បាច់​ដើម្បី​រក្សា​ឲ្យ​តុលាការ​នេះ​​រស់រាន​បន្ត​ទៀត​​បាននោះ​ ក៏ប្រហែល​ជា​ឆ្លុះ​បញ្ចាំង​ឲ្យ​ឃើញ​នូវ​គោល​ជំហរ​​មិន​កែ​ប្រែ​របស់​ខ្លួន​ដែល​ថា​ តុលាការ​មិន​​ស៊ើប​អង្កេត​ក្នុង​សំណុំ​រឿង​​០០៣ និង​សំណុំ​រឿង​០០៤​ផងដែរ។

លោក​​ បញ្ញាវុធ​ បាន​មាន​ប្រសាសន៍​បន្ថែម​ទៀត​ថា រដ្ឋាភិបាល​កម្ពុជា​ ភ័យ​ខ្លាច​ចំពោះ​​ការ​គាំទ្រ​ ឬ​ការ​ផ្ដល់​មូលនិធិ​ដល់​ភាគី​ជាតិ​ ពីព្រោះ​ពួក​គេ​មិន​ចង់​ឃើញ​សាលាក្ដី​ខ្មែរ​ក្រហម​បន្ត​សំណុំ​រឿង​០០៣ និង​សំណុំ​រឿង​០០៤” ដែល​ពាក់​ព័ន្ធ​នឹង​មន្ត្រី​ថ្នាក់​ក្រោម​​នៃ​របប​ខ្មែរ​ក្រហ​ម​ដែល​មានអំណាច​នយោបាយ​តិច​តួច​នោះ​ឡើយ។

លោក​នាយក​រដ្ឋ​មន្ត្រី​ ហ៊ុន សែន​ ត្រូវ​បាន​​មេធាវី​ការពារ​ចុង​​ចោទ​នៅ​ ECCC និង​អ្នក​​សង្កេត​​ការណ៍​ផ្នែក​ច្បាប់​​ចោទ​ប្រកាន់​ថា បាន​ជ្រៀត​ជ្រែក​​ក្នុង​តុលាការ​នេះ​​តាម​រយៈ​សេចក្ដី​​ថ្លែង​ការណ៍​ជា​សាធារណៈដែល​ក្នុង​នោះ​លោក​​បាន​សន្មត​ទោស​របស់​ចុងចោទ​ ហើយ​​បាន​អះអាង​ថា អាណត្តិ​របស់​តុលា​ការ​​នេះ​បញ្ចប់​ បន្ទាប់ពី​​ការបញ្ចប់សំណុំ​រឿង​០០២។

លោក បញ្ញាវុធ បាន​មាន​ប្រសាសន៍​ទៀត​ថា ការ​អំពាវនាវ​ជា​សាធារណៈ​របស់​អង្គការ​សហប្រជាជាតិ​​ឲ្យ​រដ្ឋាភិបាល​​កម្ពុជា​​ បំពេញ​​តួនាទី​ផ្ដល់​មូលនិធិ​ ដែល​មិន​ធ្លាប់មានការ​រំពឹង​ទុក​​ពី​មុ​ន​មក​ថា រដ្ឋាភិបាល​នឹង​​បំពេញ​នោះ​ ក៏​អាច​ជា​ការ​​ប៉ន់​ប៉ង​​ទម្លាក់​កំហុស​លើ​រដ្ឋាភិបាលផងដែរ នៅ​​មុន​​ពេល​តុលា​ការ​នេះ​​ជាប់​គាំង​លែង​ដំណើរ​ការ​ទាំង​ស្រុង​។

លោក​បាន​មាន​ប្រសាសន៍​ថា “អង្គការ​សហ​ប្រជាជាតិ​ប្រហែល​ជា​​​គិត​ថា គ្មាន​​ផ្លូវ​ដែល​​រដ្ឋាភិបាល​​នឹង​​ទទួល​បាន​មូលនិធិទេ​ ប៉ុន្តែ​ប្រសិន​បើ​​តុលាការ​នេះ​គាំង​លែង​​ដំណើរ​ការ​​​ អង្គការ​សហប្រជាជាតិ​ នឹង​មិន​ត្រូវ​គេ​បន្ទោស​ឡើយ​ ដោយ​សារ​តែ​រដ្ឋា​ភិ​បាល​កម្ពុជា​មិន​ជួយ​ផ្តល់ប្រាក់​បន្ថែម​។

ខណៈ​ពេល​ដែល​​អង្គការ​សហប្រជា​ជាតិ​ នឹង​បន្ត​បំពេញ​ថវិកា​ខ្វះខាត​២,៩​លាន​ដុល្លារ​នៃថវិកា​​ខាង​ភាគី​ជាតិ​​នៅ​ឆ្នាំ​នេះ​ លោក ដេវីដ ស្កេហ្វើ (David Scheffer) ជា​អ្នក​ឯក​ទេស​ពិសេស​របស់​អង្គការ​សហ​ប្រជា​ជាតិ​ប្រចាំ​សាលាក្ដី​ខ្មែរ​ក្រហម​​បាន​អំពាវនាវ​កាល​ពី​ម្សិលមិញ​​ឲ្យ​រដ្ឋាភិបាល​បំពេញ​កាតព្វ​កិច្ច​របស់​ខ្លួន​ចំពោះ​តុលាការ​ដែល​មាន​បញ្ហា​ថវិកា​នេះ។ លោក​បានលើក​ឡើង​តាម​អ៊ីម៉េល​​ថា “យើង​កំពុងខិតខំ​​យ៉ាង​ខ្លាំង​ជា​មួយ​​រដ្ឋា​ភិបាល​កម្ពុជា​ ដែល​មាន​កាតព្វកិច្ច​ច្បាប់រ៉ាប់​រង​​ការបើក​​ប្រាក់​ខែ​ឲ្យ​បុគ្គលិក​ជាតិ​ ហើយ​ម្ចាស់​ជំនួយ​​បរទេស​នានា​ត្រូវ​តែ​​ដោះ​ស្រាយ​​បញ្ហា​នេះ​”។

លោក​បាន​មាន​ប្រសាសន៍​ទៀត​ថា ការ​លើក​ឡើង​ថា ម្ចាស់​ជំនួយ​ស្ទាក់​ស្ទើរ​ក្នុង​ការ​ផ្ដល់​ជំនួយ​ដល់​ភាគី​ជាតិ​​នៃតុលា​កា​រ​នេះ​ ដោយសារ​តែ​មាន​​ការ​ចោទ​ប្រកាន់​លើក​មុនៗ​ថា រដ្ឋាភិបាល​បាន​ជ្រៀត​ជ្រែក​ក្នុង​កិច្ច​ការ​របស់តុលាការ​នេះនិងអំពើ​ពុក​រលួយ​នោះ​ មិនមែន​ជា​រឿង​ថ្មីទេ។

លោក​បាន​មាន​ប្រសាសន៍​ថា “ការ​​ចោទ​ប្រកាន់​ចាស់​ចំពោះ​ការ​ជ្រៀត​ជ្រែក​ផ្នែក​នយោបាយ​​ និង​អំពើ​ពុក​រលួយ​​គ្មាន​អ្វី​ពាក់​ព័ន្ធ​​នឹង​​ការ​លំបាក​ផ្នែក​ហិរញ្ញវត្ថុ​នាពេល​បច្ចុ​ប្បន្ន​ទេ​។ ការ​លែង​ចង់​ផ្ដល់​ជំនួយ​របស់​ម្ចាស់ជំនួយ​ពាក់​ព័ន្ធ​នឹង​កាតព្វកិច្ច​ផ្លូវ​ច្បាប់​របស់​កម្ពុជា​​ វា​ពាក់​ព័ន្ធ​នឹង​​ការ​ត្បិត​ត្បៀត​​ហិរញ្ញវត្ថុ​ក្រោយ​វិបត្តិ​សេដ្ឋកិច្ច​ពី​សំណាក់​ម្ចាស់​ជំនួយ​បរទេស​ច្រើន​ជាង​ការ​ចោទ​ប្រកានចាស់់​”។

លោក ឡៅ ម៉ុង​ហៃ សាស្ត្រាចារ្យ​ច្បាប់​និង​ជា​អ្នក​វិភាគ​នយោបាយ​ឯក​រាជ្យ​បាន​លើក​ឡើង​ថា រដ្ឋាភិបាល​កម្ពុជា​ត្រូវ​តែ​ធ្វើ​ឲ្យ​ប្រាកដ​ថា ភាគី​ជាតិ​បន្ត​ដំណើ​រការ​ប្រសិន​បើ​ខ្លួន​​សង្ឃឹម​​ចង់​រក្សា​ការ​ជឿ​ទុក​ចិត្ត​ពី​អន្តរជាតិ​។

លោក​បាន​មាន​ប្រសាសន៍​ថា “វា​មិន​ពាក់​ព័ន្ធ​នឹង​ឆន្ទៈ​នយោបាយ​ទេ​។ រដ្ឋាភិបាល​មាន​កាតព្វកិច្ច​ជាក់​លាក់​យោង​ទៅ​តាម​ច្បាប់​ និង​តាម​កិច្ច​ព្រម​ព្រៀង​ជាមួយ​អង្គការ​សហ​ប្រជាជាតិ​ ហើយ​យើង​ត្រូវតែ​គោរ​ព​កាតព្វ​កិច្ច​របស់​យើង​”។

លោក​បាន​មាន​ប្រសាសន៍​ទៀត​​ថា “ [មេ​ដឹកនាំ​រដ្ឋាភិបាល​] មាន​ការ​យឺត​យ៉ាវ​ក្នុង​ការ​សម្រេច​ចិត្ត​។ ជា​ដំបូង​ព្យាយាម​មិន​បង្កើត​​សាលា​ក្ដី​ ក្រោយ​ពី​បង្កើត​រួច​នាយក​រដ្ឋ​មន្ត្រី​របស់​យើង​មិន​ចង់​មើល​ឃើញ​ដំណើរ​ការ​ទាំង​មូល​ទេ​”។

លោក​ ឆាំង យុ ប្រធាន​មជ្ឈមណ្ឌលឯក​សារ​កម្ពុជា ​​​បានថ្លែង​​ថា បើ​គ្មាន​ការ​គាំទ្រ​​និង​ការ​ជឿ​ទុក​ចិត្ត​​របស់​សាធារណ​ជន​កម្ពុជា​ទេ​ ​តុលាការនេះ​​មិន​រំពឹង​ថា នឹង​បន្ត​ទទួល​បាន​ការ​អាណិត​អាសូរ​ពី​អន្តរជាតិ​​ឡើយ។

ដោយ​​លើក​ឡើង​ពី​ការ​ស្លាប់​របស់​លោក អៀង​ សារី អតីត​រដ្ឋ​មន្ត្រី​ខ្មែរ​ក្រហ​ម​កាល​ពី​ដើមឆ្នាំនេះ​ និង​សេចក្ដី​សម្រេច​កាល​ពី​ឆ្នាំ​២០១២​ថា លោក​ស្រី​ អៀង ធីរិទ្ធ​ អតីត​រដ្ឋ​មន្ត្រី​សង្គម​កិច្ចខ្មែរ​ក្រហម​​ ដែល​ត្រូវ​ជា​ភរិយា​របស់​លោក អៀង សារី មិន​អាច​ឡើង​សវនាការ​បាន​​តទៅទៀត​នោះ បាន​ធ្វើឲ្យ​មាន​អ្នក​ដើរ​ចេញ​ពី​សាលាក្ដី​នេះ​។

លោក​ស្រី ហេនលែន ចាវីស (Helen Jarvis) ដែល​​ជា​អ្នក​​ផ្ដល់​អនុសាសន៍​ដល់​​រដ្ឋាភិបាល​​ក្នុង​ការ​បង្កើត​តុលាការ​នេះ​ឡើង​ និង​ដែល​ពី​មុន​ធ្លាប់​​ធ្វើ​ជា​​អ្នក​នាំពាក្យ​តុលា​ការ​នេះ​បាន​​មាន​ប្រសាសន៍​ថា ទាំង​អង្គការ​សហប្រជាជាតិ​​ ទាំង​រដ្ឋាភិបាល​​តែង​តែ​ពឹង​ផ្អែក​​លើ​ម្ចាស់​ជំនួយ​ផ្ដល់​មូលនិធិ​ ដើម្បី​រក្សា​ឲ្យ​ភាគី​របស់​ខ្លួន​ក្នុង​តុលាការ​នេះ​អាច​ដំណើរ​​ការ​ទៅ​បាន​ ហើយ​បាន​មាន​ប្រសា​សន៍​ថា ការ​​លែង​ចង់​ផ្ដល់​ជំនួយ​ត​ទៅ​ទៀត​គឺ​ ដោយសារ​តែ​ដំណើរ​ការ​នីតិវិធី​អូស​បន្លាយ​។

លោក​ស្រី ចាវីស បាន​មាន​ប្រសាសន៍​ថា “កិច្ច​ព្រមព្រៀង [ដើម្បី​បង្កើត​តុលាការ​នេះ​] ចែង​ថា អង្គការ​សហប្រជាជាតិត្រូវចំណាយ​លើ​ភាគី​អន្តរជាតិ​ ហើយ​រដ្ឋាភិបាល​ត្រូវ​​ចំណាយ​លើ​ភាគី​ជាតិ​ ប៉ុន្តែ​​ទាំង​អង្គការ​សហ​ប្រជាជាតិ​ ទាំង​រដ្ឋាភិបាល​មិន​បាន​ចំណាយ​លើ​ភាគី​របស់​ខ្លួន​ទេ​។ ភាគី​ទាំង​ពីរ​បាន​ពឹង​ផ្អែក​លើ​ជំនួយ​ស្ម័គ្រ​ចិត្ត​”។

លោក​ស្រី​បាន​មាន​ប្រសាសន៍​ទៀត​ថា “អ្នក​គ្រប់គ្នា​មាន​ការ​ព្រួយ​បារម្ភ​ថា ដំណើរ​ការ​នេះ​ចំណាយ​ពេល​យូរ​ជាង​ការ​រំពឹង​ទុក​ខ្លាំងពេក។ នេះ​គឺ​ជា​បញ្ហា​ធំ​បំផុត​។ ពេល​នេះ​យើង​ឈាន​ចូល​ដល់​ឆ្នាំ​ទី​៧​ហើយ​នៅ​ក្នុង​ដំណើរ​ការ​នេះ ដែល​ដំបូង​ឡើយ​គ្រោង​សម្រាប់​រយៈ​ពេល​បី​ឆ្នាំប៉ុណ្ណោះ​​។ នេះ​ជា​បញ្ហា​ដ៏​ធំ​មួយ​ ទាំង​​ផ្នែក​ហិរញ្ញវត្ថុ​ និងក៏​ដោយ​សារ​តែ​វ័យកាន់​តែ​ចាស់​​របស់​ជន​ជាប់​ចោទ​ និង​ជន​រងគ្រោះផង​ដែរ”​៕

ប្រែសម្រួលដោយ តែម សុខុម   

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស