29 C
Phnom Penh

បក្ស​ប្រជាជន​កម្ពុជាច្រាន​ចោល​​សំណើ​ថ្មី​របស់​​​អង្គការ​​​ក្រៅរដ្ឋាភិបាល​​​

ដោយ ឌឹ ខេមបូឌា ដេលី

បទវិភាគ

កាល​ពី​ម្សិលមិញ​ គណបក្ស​ប្រជាជន​កម្ពុជា​​បាន​ច្រាន​ចោល​​សំណើ​ចុង​ក្រោយ​​​របស់​អង្គការ​ក្រៅ​រដ្ឋាភិ​បាល​ភ្លាមៗ​ ដែល​មាន​បំណង​ទម្លាយ​ភា​ព​ជាប់​គាំង​ផ្នែក​នយោ​បាយ​​ជុំ​វិញ​អំពី​របៀបការ​​​​ស៊ើប​អង្កេត​ភាព​មិន​ប្រក្រតី​នៃ​ការ​បោះឆ្នោត​ជាតិ​ ដែល​មាន​ជម្លោះ​កាល​ពី​ខែ​មុន​។

ដើម្បី​ទម្លាយ​ភាព​ជាប់​គាំង​ អង្គការ​​​​​ក្រៅ​​​រដ្ឋា​​​ភិបាល​​​​​​បាន​​​ចាត់​​​ទុក​​​​ក្រុមដែល​​​ខ្លួន​​​បង្កើត​​​ឡើង​​​ដើម្បីឃ្លាំ​មើល​ការ​​​​បោះឆ្នោត​​​ថាជា​​​បន្ទប់​​​ស្ថានការណ៍ ​​​កាល​ពីព្រឹក​ម្សិលមិញ​ បាន​ផ្ដល់​អនុសាស្ត្រ​ថា ការ​បង្កើត​​​​គណៈកម្មការ​​ស៊ើប​អង្កេត​​ត្រូវ​តែ​ធ្វើ​ឡើង​​ ដោយ​គណ​​​បក្ស​​​​ទាំង​ពីរ​ ហើយ​​ភាគី​នីមួយ​ៗ​ត្រូវ​តធ្វើ​​​ជា​​​ប្រធាន​​​​​​ប្តូរ​​​វេនគ្នា​​​​នៃ​ស្ថាប័ន​នេះ​។

អនុសាស្ត្រ​នេះ​ក៏បាន​លើក​ឡើង​ដែរ​ថា ​គណៈកម្មាធិការ​ជាតិ​រៀប​ចំ​កា​រ​បោះ​ឆ្នោត​ (គ.ជ.ប.) គួរ​តែ​ដើរ​តួជា​​​អ្នក​​​សម្រប​​សម្រួល​គណៈ​កម្មការ​​នេះ​ ហើយ​អនុវត្តន៍​សកម្ម​​​ភាព​​​​មួយ​ចំនួន​ដូច​ជា រៀបចំ​​​ពេល​​​វេលា និង​​​ទី​​​កន្លែង​​​​ប្រជុំ​ និងរក្សា​​​ទុក​​​កំណត់​​​ហេតុ​​​នៃ​​​​កិច្ច​ប្រជុំ​។ ​​​អនុ​​​សាស្ត្រ​​​នេះ​​​​ក៏​បាន​លើកឡើ​ង​ដែរ​ថា គណៈ​​​កម្មការ​​​នេះ​​​គួរ​តែ​រួម​បញ្ជូល​អង្គការ​សហ​ប្រជា​ជាតិ និង​អង្គការ​​​​អន្តរជាតិឲ្យ​​​ធ្វើ​​​​ជា​អ្នក​ឃ្លាំ​មើល​​​​ផ​​​ងដែរ​​​។

លោក គល់​ បញ្ញា នាយក​​​ប្រតិបត្តិ​​​គណៈ​​​កម្មា​​​ធិការ​ដើម្បី​ការ​បោះឆ្នោត​​ដោយ​សេរី​​ និង​​​​​​​យុត្តិធម៌​នៅ​កម្ពុជា​​ (ខុម​ហ្វ្រែល​​​​) បាន​លើក​ឡើង​ថា ​អង្គ​ការ​ក្រៅ​រដ្ឋាភិបាល​ដែល​បាន​ដាក់​សំណើ​នេះ​ គឺ​ជា​មធ្យោបាយ​មួយ​ដ៏​ល្អ​បំផុត និង​​​អាច​​​ចាត់​​​ទុក​​​ថា ជាសមទ្ធផល​​​មួយ​​​។

លោក​​មាន​ប្រសាសន៍​ថា “ គណបក្ស​ប្រជា​​​ជន​កម្ពុជា​មិ​ន​ចង់​ឲ្យ​អង្គការ​សហ​ប្រជា​ជាតិ​​​​ដើរ​តួ​នាទី​នេះ​ឡើយ​ ហេតុ​ដូច្នេះ​វា​មិន​​​ប្រាកដ​​​និយម​​​​នោះ​ទេ​។ ពួក​គេ​​ចង់​ឲ្យ​គ.ជ.ប. ដោះ​​​​​​​​​ស្រាយ​រឿង​នេះ​ ប៉ុន្តែ​គណបក្ស​សង្គ្រោះ​​​ជាតិ​​មិន​ជឿ​ជាក់លើ​គ.ជ.ប.​​ឡើយ​”។ លោក​ ​​​គល់​ បញ្ញា បាន​​​បន្ថែម​​​ថា “ អ៊ីចឹងហើយ​​​​ត្រូវ​​​​​​​​​​ការ​​​អង្គការ​​​ឯករាជ្យ​មួយ​ចំនួន​ ប៉ុន្តែ​ វា​មិន​មែន​ជា​រឿង​ងាយ​ស្រួល​​នោះ​ទេ​។

​គណបក្ស​សង្គ្រោះ ជាតិ​​គ្រោង​នឹង​​ធ្វើ​បាតុ​​​កម្ម​នៅ​ថ្ងៃ​ទី​៧ ខែ​កញ្ញា​នេះ​ ប្រសិន​បើ​រដ្ឋា​​​ភិបាល​មិនយល់​​​​ព្រមឲ្យ​​​មាន​​​ការ​​​​ស៊ើប​​អង្កេត​​ពី​ភាព​មិន​ប្រក្រតី​នៃ​ការ​បោះ​ឆ្នោត​​​​​​​​កាល​ពី​ថ្ងៃ​ទី​២៨ ខែ​កក្កដា ដោយ​ឯករាជ្យ​នោះ​។

គណបក្ស​ប្រជាជន​កម្ពុជា​បាន​ច្រាន​ចោល​​​​​​​​​​​សំណើរបស់​​គណបក្ស​ប្រឆាំង​ ដែល​ស្នើ​ឲ្យ​អង្គការ​សហប្រជាជាតិ​ដឹក​នាំ​ការ​​ស៊ើប​អង្កេត​នេះ ហើយ​បាន​លើក​ឡើង​ថា រាល់​ការ​ស៊ើប​អង្កេត​ណា​មួយ​​នៃ​ការ​បោះ​ឆ្នោត​ត្រូវ​តែ​ធ្វើ​ឡើង​ដោយ​គ.ជ.ប. និង​ក្រុម​ប្រឹក្សា​ធម្មនុញ្ញ​កម្ពុជា​ ដែល​គណបក្ស​ប្រឆាំង​សុទ្ធ​តែ​ច្រាន​ចោល​មិន​ទទួល​យក​​ ដោយ​សារ​តែ​មាន​សម្ព័ន្ធ​ភាព​ជា​មួយ​គណបក្ស​ប្រជា​​​​​​ជន​កម្ពុជា​កំពុង​កាន់​អំណាច​នោះ​។

នៅ​ពេល​គជ.ប. គ្រោង​នឹង​ចេញ​លទ្ធ​ផល​​​​​​​​​​​​​​​​ផ្លូវការ​​​នៃ​ការ​បោះ​ឆ្នោត​នៅ​ថ្ងៃ​ទី​៨ ខែ​កញ្ញា​ ដែល​លទ្ធផល​​​ស្ទើរ​​​តែ​​​ទាំងអស់​​​សម្រេច​​​ផ្ដល់​​​ជ័យជម្នះ​​​ទៅ​​​ឲ្យ​​​​គណ​បក្ស​ប្រជាជន​កម្ពុជា​ លោក គល់​ បញ្ញា បាន​ស្នើ​ឲ្យ​គណបក្ស​ទាំង​ពីរ​​ធ្វើ​​​ជា​​​ប្រធាន​​​​ប្ដូរវេន​​​គ្នា​​​​នៃ​គណៈ​​​កម្មា​​​ធិការ​​​​​​​ជា​រៀង​រាល់​ថ្ងៃ​។

ប៉ុន្តែលោក ជាម យៀប អ្នក​នាំពាក្យ​និង​ជា​​សមាជិក​សភា​ជាន់​ខ្ពស់​​មក​ពី​គណ​បក្ស​ប្រជាជន​កម្ពុជា​ កាល​ពី​ម្សិលមិញ​បាន​ច្រាន​ចោល​សំណើនេះ​ភ្លាមៗ។ លោក​បាន​មាន​ប្រសាសន៍​ថា “ខ្ញុំ​គិត​ថា ប្រសិន​បើ​យើង​​ពិភាក្សា​គ្នា​ពី​ការ​បង្កើត​គណៈកម្មការ​នេះ​ វា​ហាក់​បី​ដូច​ជា​យឺត​ពេល​ហើយ​។ លោក​បាន​បន្ថែម​ថា គណបក្ស​ប្រជាជន​កម្ពុជា​នៅ​តែបើក​ចំហរ​សម្រាប់​ការ​បើក​កិច្ច​ពិភាក្សា​ជាមួយ​គណបក្ស​ប្រឆាំង​។លោកថ្លែង​បន្ត​ថា “ ប្រសិន​​​​​ឯកឧត្តម​ សម រង្ស៊ី ស្នើទៅ​​​​មេ​ដឹក​នាំ​កំពូល​ៗ​របស់​គណបក្ស​ខ្ញុំ​ ខ្ញុំ​គិត​ថា យើង​នឹង​អា​ច​បើក​​កិច្ច​ប្រជុំ​នៅ​ពេល​ណា​មួយ​ក៏​បាន​ ប៉ុន្តែ​ខ្ញុំ​មិន​ដឹង​ថា ថ្ងៃ​ណា​នោះ​ទេ​​។

នៅ​ឯ​សន្និសីទ​កាសែត​របស់​គណបក្ស​សង្គ្រោះជាតិ​កាល​ពី​ថ្ងៃម្សិលមិញ លោក​ សម រង្ស៊ី មេដឹកនាំ​បក្ស​ប្រឆាំង​បាន​លើក​ឡើង​ថា លោក​កំពុង​តែ​រង់ចាំ​ការ​ឆ្លើយ​តប​​ពីគណបក្ស​ប្រជាជន​កម្ពុជា​ពាក់​ព័ន្ធ​នឹង​សំណើ ដែល​ស្នើ​​​ឲ្យ​​​មន្ត្រី​កំពូល​ៗ​មក​ពី​គណ​​​បក្ស​ទាំង​ពីរ​បាន​​​​ជួប​ពិភាក្សា​គ្នា​ក្នុង​ពេល​ឆាប់​ ដើម្បី​ដោះស្រាយ​ភាព​ជាប់​គាំងផ្នែក​នយោ​បាយ​នា​ពេល​បច្ចុប្បន្ន៕

ប្រែសម្រួលដោយ ស៊ា ស៊ុយឈាង​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស