28 C
Phnom Penh

​រដ្ឋាភិបាល​សម្រេច​​​ដំឡើង​ប្រាក់​ខែ​គោល​សម្រាប់​មន្ត្រីរដ្ឋាភិបាល​​​នៅថ្នាក់​ភូមិ ឃុំ-សង្កាត់​

ដោយ ឌឹ ខេមបូឌា ដេលី

បទវិភាគ

យោង​តាម​អនុក្រឹត្យ​មួយ​​របស់​រដ្ឋា​ភិ​បាល​​ដែល​ចុះ​ហត្ថលេខា​ដោយ​លោក​នាយក​រដ្ឋ​មន្ត្រី ហ៊ុន សែន នៅ​មុន​ការ​បោះ​ឆ្នោត​ជាតិ​បន្តិច​ឲ្យ​ដឹង​ថា​ រដ្ឋាភិបាល​បាន​សម្រេច​ដំឡើង​​​ប្រាក់​ខែ​ចំនួន​​ទ្វេ​ដង​សម្រាប់​មន្ត្រី​រដ្ឋាភិបាល​​ថ្នាក់​មូលដ្ឋានថ្នាក់​ឃុំ​ និងភូមិ​ ចាប់​ពី​ដើម​ឆ្នាំ​ក្រោយ​នេះ​តទៅ​។

អនុក្រឹត្យ​ដែល​បាន​ចេញ​ផ្សាយ​ក្នុង​សៀវ​ភៅ​រាជ​កិច្ច​ កាលពី​ថ្ងៃ​ទី​៣១​ខែ​សីហា ប៉ុន្តែ​បាន​ចុះ​ហត្ថលេខា​នៅ​ថ្ងៃ​ទី​១១​ខែ​កក្កដា​នោះ​​​​បាន​បញ្ជាក់​ថា មេឃុំ​នឹង​ត្រូវ​ដំឡើង​ប្រាក់​ខែ​របស់​ខ្លួន​ពី​៣៧,៥ ទៅ​៧៥​ដុល្លារ​ក្នុង​មួយ​ខែ​ រីឯ​អនុ​ប្រធាន​របស់​ខ្លួន​ក៏​នឹង​​ត្រូវ​ដំឡើង​​ប្រាក់​ខែ​របស់​ខ្លួន​ពី​៣០​ទៅ​៦០​ដុល្លារ​ផង​ដែរ​។

មន្ត្រី​នៅ​ថ្នាក់​ក្រោម​​នោះ​ទៀត​​សម្រាប់​កាំ​ប្រាក់​ ក្រុមប្រឹក្សា​ឃុំ​សង្កាត់​​​នឹង​​មាន​​ការ​ដំឡើង​​ប្រាក់​ខែ​របស់​ខ្លួន​​ទ្វេ​ដង​​​គឺ​ទទួល​បាន​​៣០ដុល្លារ​​ក្នុង​មួយ​ខែ​ ហើយ​អនុ​ប្រ​ធាន​ក្រុម​ប្រឹក្សា​ឃុំសង្កាត់​​ នឹង​ទទួល​បាន​​២៥ដុល្លារ​ រីឯ​មន្ត្រី​ថ្នាក់​ភូមិ​ នឹង​ទទួល​បាន​ប្រាក់​ខែ​២០​ដុល្លារ​ ក្នុង​មួយ​ខែ​​ ដែល​ពី​មុន​ទទួល​បាន​តែ​១០​ដុល្លារ​​​​ក្នុង​​មួយ​ខែ​ប៉ុណ្ណោះ​។

យោង​តាម​អនុក្រឹត្យ​ដដែល​ឲ្យ​ដឹង​ថា“ ការ​​ដំឡើង​ប្រាក់​ខែ​នេះ​នឹង​​ត្រូវបញ្ចូល​​ទៅ​​ក្នុង​​គម្រោង​ថវិកា​​ប្រចាំ​ឆ្នាំរបស់​​ឃុំ​សង្កាត់​ចាប់​ពី​ខែ​មករា​ ឆ្នាំ២០១៤​តទៅ​”។

ទោះ​បី​ការ​សម្រេច​​​ដំឡើង​ប្រាក់​ខែ​នេះ​បាន​កើត​ឡើង​នៅ​មុន​ការ​បោះ​ឆ្នោត​ខែ​កក្កដា ក៏​ដោយ​ ក៏​គណបក្ស​សង្គ្រោះ​ជាតិ​បាន​ទទួល​ការ​គាំទ្រ​យ៉ាង​​ច្រើន​លើស​លប់​នៅ​តាម​តំបន់​ជន​បទ​ មួយ​ផ្នែកដោយ​សារ​មាន​ការ​គាំទ្រ​គម្រោង​ដំឡើង​ប្រាក់​ខែ​សម្រាប់​មន្ត្រី​រាជ​ការ​ និង​កម្មករ​រោង​ចក្រ​ឲ្យ​ដល់​១៥០​ដុល្លារ​ក្នុង​មួយ​ខែ​របស់​គណបក្ស​សង្គ្រោះ​ជាតិ​។

ទោះ​បី​ជា​ ​​មន្ត្រី​មូលដ្ឋាន​បាន​ស្វាគមន៍​ការ​សម្រេច​ដំឡើង​ប្រាក់​ខែ​នេះ​ កាល​ពី​ម្សិលមិញ​ក៏​ដោយ​ ក៏​ពួកគេ​បាន​លើក​ឡើង​ថា ការ​ដំឡើង​ប្រាក់​ខែ​នេះ​​​នៅ​តែ​មិន​អាច​​គ្រប់​គ្រាន់​ ដើម្បី​ឲ្យ​ពួកគាត់​រស់​នៅ​សមរម្យ​បាន​ឡើយ​។

លោក សុទ្ធ សាត ចៅសង្កាត់​ចោមចៅ ​ក្នុង​​ខណ្ឌពោធិ៍​សែន​ជ័យ​ រាជធានី​ភ្នំ​ពេញ​បាន​មាន​ប្រសាសន៍​ថា “ ខ្ញុំ​គិត​ថា ការ​សម្រេច​​ដំឡើង​ប្រាក់​ខែ​នេះ គឺ​ធ្វើ​ឡើង​ដើម្បី​​លើក​ទឹក​ចិត្ត​សម្រាប់​​យើង​​ទាំង​អស់​គ្នា​ដែល​បាន​​​ធ្វើ​ការ​បម្រើ​ប្រជាពលរដ្ឋ​ ហើយ​ទោះ​បី​ជា​វា​នៅ​តែ​​មិនទាន់​​គ្រប់​គ្រាន់​សម្រាប់​ទ្រទ្រង់​គ្រួសារ​របស់​ខ្ញុំ​ក៏​ដោយ​ ក៏​វា​ប្រសើរ​ជាង​អ្វី​ដែល​យើង​​ទទួល​បាន​ពី​មុន​ដែរ”។

ចៅ​សង្កាត់​ភ្នំពេញ​ថ្មី ក្នុង​ខណ្ឌ សែន​សុខ បាន​យល់​ស្រប​ថា ទោះ​បី​ជា​មាន​ការ​​ដំឡើង​ប្រាក់​ខែ​១០០​ភាគ​រយ​ក៏​ដោយ​ ក៏​នៅ​តែ​មិន​គ្រប់​គ្រាន់​សម្រាប់​ទ្រទ្រង់​គ្រួសារ​របស់​គាត់​ដែរ ប៉ុន្តែ លោក​បាន​លើក​ឡើង​ថា លោក​សប្បាយ​ចិត្ត​ដែល​រដ្ឋាភិបាល​​ប្រឹង​ប្រែង​ក្នុង​ការ​ដំឡើង​ប្រាក់ខែ​នេះ​។

លោក​​ថ្លែង​​​បន្ត​ថា “យើង​សប្បាយ​​​ចិត្ត​ចំពោះ​ការ​ដំឡើង​ប្រាក់​ខែ​នេះ​ ហើយ​ខ្ញុំ​គិត​ថា វា​​មាន​​ចំនួន​ទឹក​ប្រាក់​ដ៏​ច្រើន​ ដោយ​សារ​នៅ​កម្ពុជា​មាន​មន្ត្រី​ជា​ច្រើន​រូប​​”។

ក្នុងរយៈ​ពេល​១០​ថ្ងៃ​ប៉ុណ្ណោះ​បន្ទាប់​ពី​គណបក្ស​ប្រជាជន​កម្ពុជា ​បាន​​បាត់​បង់​អាសនៈ​​សភា​យ៉ាង​ច្រើន​របស់​ខ្លួន​នោះ ​រដ្ឋាភិបាល​បាន​ប្រកាស​ដំឡើង​ប្រាក់​ខែ​ចំនួន​៣០​ភាគ​រយ​សម្រាប់​មន្ត្រី​រាជការដែល​មាន​ប្រាក់​ខែ​ទាប​ប្រហែល​៩០.០០០​នាក់​ ហើយ​ទោះបី​ជា​អនុក្រឹត្យ​ថ្មី​នេះ​ ត្រូវ​បាន​ចុះ​ហត្ថលេខា​នៅ​មុន​ថ្ងៃ​បោះ​ឆ្នោតក្តី​ ក៏​ការ​ប្រកាស ​ការ​ដំឡើង​ប្រាក់​ខែ​ទាំង​ពីរ​លើក​នេះ​ត្រូវ​បាន​បក​ស្រាយ​​ថា ជា​ការ​ឆ្លើយ​តប​​​ចំពោះ​​ការ​ចាញ់​ឆ្នោត​។

លោក គល់ បញ្ញា នាយក​ប្រតិបត្តិ​នៃ​គណៈ​កម្មាធិការ​ដើម្បី​ការ​បោះ​ឆ្នោត​ដោយ​សេរី​ និង​យុត្តិធម៌​នៅ​កម្ពុជា​ ដែល​ជួយ​​ជំរុញ​ដល់​ការ​ធ្វើ​​វិ​មជ្ឈការអំណាច​​ទៅ​ឲ្យ​រដ្ឋាភិបាល​នៅ​ថ្នាក់​​មូល​ដ្ឋាន​នោះ ​មាន​ប្រសាសន៍​ថា “ នេះ​គឺ​ជា​ជំហាន​​វិជ្ជមាន​មួយ​​និង​មាន​សារៈសំខាន់​​ពីព្រោះ​មេ​​ឃុំ​-ចៅសង្កាត់ និង​សមាជិកក្រុម​ប្រឹក្សា​​ឃុំ​-សង្កាត់​​​បាន​ធ្វើការ​យ៉ាង​សកម្ម​ដើម្បី​​​​បម្រើ​ប្រជាពលរដ្ឋ​នៅ​មូលដ្ឋាន​។ប៉ុន្តែ​កាល​ពី​លើក​មុន​​គណបក្ស​ប្រជាជន​កម្ពុជា​ចូល​ចិត្ត​ដំឡើង​ប្រាក់​ខែ​បន្តិច​ម្តង​ៗ​ពី​១០​ទៅ​២០​ភាគ​រយ​ ដូច្នេះ​​នេះ​គឺ​ជា​ការ​សម្រេច​មួយ​ដ៏​ធំ”។

លោក បញ្ញា មាន​ប្រសាសន៍​បន្ត​ថា “ នេះ​​ជា​ពេល​វេលា​ល្អ​ដោយសារថា វាជា​គំនិត​ល្អ​​មួយ​ដើម្បី​ធ្វើ​ឲ្យ​មានឥទ្ធិពល​ភ្លាមៗ​បន្ទាប់​ពី​ការប្រកាស​លទ្ធផល​នៃ​ការ​បោះ​ឆ្នោត​ ប៉ុន្តែ​ វា​ក៏​បាន​​ឆ្លុះ​បញ្ចាំង​ពី​​ឥទ្ធិពល​របស់​គណបក្ស​សង្គ្រោះ​ជាតិ​ ជា​​​គណបក្ស​​ប្រឆាំង​ថា ​​​ការ​លើក​ទឹក​ចិត្ត​របស់​​​​គណបក្ស​ប្រជាជន​កម្ពុជា​បា​ន​ផ្លាស់​ប្តូរ​ហើយ”។

លោក យឹម សុវណ្ណ អ្នក​នាំ​ពាក្យ​​គណបក្ស​សង្គ្រោះ​ជាតិ​ថ្លែង​ថា ទោះ​បី​មាន​ការ​សម្រេច​​​ដំឡើង​ប្រាក់​ខែ​នេះ​នៅ​មុន​ថ្ងៃ​បោះ​ឆ្នោត​ក៏​ដោយ​ ក៏​វា​ជា​ការ​ឆ្លើយ​តប​ដោយ​​ផ្ទាល់​ទៅ​នឹង​បញ្ហា​ដែល​គណបក្ស​សង្គ្រោះ​ជាតិ​បាន​ធ្វើ​​យុទ្ធនាការ​ឃោសនា​​យ៉ាង​គគ្រឹក​គគ្រេង។

លោក យឹម សុវណ្ណ​ មាន​ប្រសាសន៍​បន្ត​ថា “ គណបក្ស​ប្រជាជន​កម្ពុជា​ចូល​ចិត្ត​ដំឡើង​ប្រាក់​ខែ​បន្តិច​ម្តង​ៗ ហើយ​ពន្យារ​ប្រាក់​ខែ​នោះ​ ដូច្នេះ​ហើយ​​​បើ​គ្មាន​ការ​បង្ហាញ​​ជំហ​រ​យ៉ាង​រឹង​​មាំ​របស់​យើង​ទេ​ យើង​នឹង​មិន​អាចទទួល​បាន​​ការ​ដំឡើង​ប្រាក់​ខែ​នេះ​ទេ។ វា​គឺ​ជា​វេទិកា​នៃ​យុទ្ធនាការ​ឃោសនា​បោះ​ឆ្នោត​របស់​គណ​បក្ស​​​សង្គ្រោះ​ជាតិ​ក្នុង​ការ​ដំឡើង​ប្រាក់​ខែ​​ឲ្យ​មន្ត្រី​រាជការ​​ ដូច្នេះ​វា​​បាន​បង្ហាញ​យ៉ាង​ច្បាស់​ថា យើង​កំពុង​ធ្វើ​ត្រូវ​ ហើយ​វា​​បង្ហាញ​ពី​ឥទ្ធិពល​ដែល​​គណបក្ស​ប្រឆាំងអាចទទួលបាន​”។

លោក​ថ្លែង​បន្ត​ថា “ ពេលនេះ​ខ្ញុំ​ដឹង​​ច្បាស់​​ថា ​​​គណបក្ស​ប្រជាជន​កម្ពុជា​មាន​គម្រោង​​ដំឡើង​ប្រាក់​ខែ​ឲ្យ​កម្មករ​រោង​ចក្រ​​កាត់​ដេរ ​ជា​ចំណុច​មួយទៀត​​នៃ​យុទ្ធនាការ​​ឃោសនា​​របស់​យើង​”។

លោក​បាន​ថ្លែងបន្តទៀត​​ថា “យើង​សប្បាយ​ចិត្ត​ចំពោះ​​ការ​ដំឡើង​ប្រាក់​ខែ​នេះ ប៉ុន្តែ វា​នៅ​​តែ​មិនទាន់​​គ្រប់​គ្រាន់​នៅ​ឡើយ​ទេ​ ជា​ពិសេស​នៅ​ក្នុង​រាជ​ធានី​ភ្នំពេញ បងប្អូន​​ត្រូវ​ការ​ប្រាក់​ខែ​យ៉ាង​ហោច​ណាស់​១លាន​រៀល​ ដើម្បី​រស់​នៅ​ឲ្យ​បាន​សមរម្យ​៕

ប្រែសម្រួលដោយ ឃិន ណៃ

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស