កាលពីម្សិលមិញ មន្ត្រីមូលដ្ឋានក្នុងខេត្តរតនគិរី និងអង្គការសិទ្ធិមនុស្សអាដហុកបានលើកឡើកថា ពួកគេកំពុងស៊ើបអង្កេតពីការអះអាងរបស់អ្នកភូមិដែលថា ក្រុមហ៊ុនកសិពាណិជ្ជកម្មមួយកំពុងកាប់ឈើនៅក្នុងព្រៃសហគមន៍ដែលមានការអនុម័តយល់ព្រម ពីរដ្ឋាភិបាល។
លោក ខាំ ឡេ អ្នកតវ៉ាម្នាក់ក្នុងចំណោមអ្នកតវ៉ាជាច្រើនបាននិយាយថា អ្នកភូមិជនជាតិភាគតិចព្រៅជាង១០០នាក់មកពីភូមិផៅ ក្នុងស្រុកតាវែង បានធ្វើការតវ៉ានៅមុខសាលាឃុំតាវែងក្រោមកាលពីថ្ងៃច័ន្ទ នៅពេលដែលរថយន្តធុនធ្ងន់បួនគ្រឿង និងត្រាក់ទ័រកាយដីមួយគ្រឿងបានមកដល់ភូមិនេះនៅព្រឹកនោះ ដើម្បីបន្តកាប់ឈើក្នុងព្រៃរបស់ពួកគាត់។
លោក ខាំ ឡេ បាននិយាយបន្ទាប់ពីការតវ៉ាថា “ យើងបានមកធ្វើការតវ៉ានៅសាលាឃុំនេះដើម្បីឲ្យបញ្ឈប់ការកាប់ឈើដោយខុសច្បាប់ ពីព្រោះខ្ញុំទទួលបានព័ត៌មានថា មានអ្នកកាប់ឈើជាច្រើនកំពុងធ្វើការកាប់ឈើ… ប៉ុន្តែ អាជ្ញាធរមិនបានចេញមកជួបពួកយើងទេ”។
លោក ភឿក ត្រួក អ្នកតវ៉ាម្នាក់ទៀតបានអះអាងថា អ្នកកាប់ឈើជាច្រើននាក់បានកាប់ឈើធ្នង់ រាប់រយដើមដែលជាប្រភេទឈើប្រណីត ចាប់តាំងពីខែមិថុនាមកម្ល៉េះ ហើយបានដឹកឈើដែលអារជាក្តាររួចតាមទន្លេឆ្ពោះទៅកាន់ប្រទេសវៀតណាម។
លោក ភឿក ត្រួក បាននិយាយថា “ កម្មករជាច្រើនកំពុងកាប់ឈើ និងបាញ់ថ្នាំសម្គាល់ដើមឈើដែលពួកគេត្រូវកាប់”។
លោកមេឃុំ មឿង សួន បានអះអាងថា ការកាប់ឈើនេះកើតឡើងតែនៅក្នុងព្រៃសហគមន៍ប៉ុណ្ណោះ។
លោកបានមានប្រសាសន៍ថា “ យើងមិនទាន់បានដោះស្រាយបញ្ហានេះនៅឡើយទេ ពីព្រោះខ្ញុំកំពុងប្រមូលព័ត៌មានអំពីការកាប់ឈើទាំងនេះ”។
លោក មឿង សួន បានមានប្រសាសន៍ថា លោកសង្ស័យពីការអះអាងរបស់អ្នកតវ៉ាទាំងនេះដែលថា អ្នកកំពុងកាប់ឈើនោះធ្វើការឲ្យលោក ទ្រី ភាព។
លោក មឿង សួន ក៏បានចោទប្រកាន់អ្នកតវ៉ាទាំងនោះពីបទញុះញង់ឲ្យមានការប្រមូលឈ្មោះសរសេរជាញត្តិប្រឆាំងការកាប់ឈើទាំងនេះ។
គេមិនអាចទាក់ទងតំណាងក្រុមហ៊ុន ទ្រី ភាព ដើម្បីសុំការអត្ថាធិប្បាយបានទេ។
កាលពីខែកុម្ភៈ ក្រសួងកសិកម្មបានផ្តល់សិទ្ធិផ្តាច់មុខឲ្យក្រុមហ៊ុន ទ្រី ភាព អាហរ័ណនីហរ័ណទិញឈើដែលកាប់រួចទាំងអស់ក្នុងតំបន់ដីសម្បទានសេដ្ឋកិច្ចក្នុងខេត្តរតនគិរី។
មន្ត្រីរដ្ឋាភិបាលបានលើកឡើងថា កិច្ចព្រមព្រៀងនេះនឹងជួយបញ្ឈប់ការកាប់ឈើខុសច្បាប់ក្នុងតំបន់នេះតាមរយៈការផ្តល់សិទ្ធិដល់ក្រុមហ៊ុនសម្បទានដីសេដ្ឋកិច្ចជាអ្នកទិញឈើរបស់ខ្លួន ប៉ុន្តែ សកម្មជនសិទ្ធិមនុស្សបានព្រមានថា តាមពិតវាជាការជំរុញទឹកចិត្ត និងបង្កើនសកម្មភាពកាប់ឈើខុសច្បាប់ទៅវិញទេ។
លោក ឆាយ ធី អ្នកស៊ើបអង្កេតប្រចាំខេត្តរតនគិរីរបស់អង្គការសិទ្ធិមនុស្សអាដហុកបានមានប្រសាសន៍ថា លោក និងបុគ្គលិករបស់លោកកំពុងធ្វើការស៊ើបអង្កេតលើពាក្យបណ្តឹងរបស់អ្នកភូមិ ប៉ុន្តែ មិនទាន់អាចសន្និដ្ឋានបាននៅឡើយថា តើអ្នកណាខ្លះជាប់ពាក់ព័ន្ធនៅក្នុងការកាប់ឈើនេះទេ៕
ប្រែសម្រួលដោយ សោម សារុន