នគរបាលបាននិយាយកាលពីម្សិលមិញថា មន្ត្រីម្នាក់មកពីមន្ទីរកសិកម្មខេត្តបាត់ដំបងត្រូវបានចាប់ខ្លួន និងចោទប្រកាន់ពីបទរំលោភសេចក្តីទុកចិត្តកាលពីថ្ងៃច័ន្ទ តាមការចោទប្រកាន់ថា បានយកប្រាក់ចំនួនប្រហែល២០០.០០០ដុល្លារដាក់ហោប៉ៅដែលបានពីការលក់ជីគីមី ជាអំណាយរបស់រដ្ឋាភិបាលជប៉ុនផ្តល់ដល់ប្រទេសកម្ពុជា។
លោក មាន ឡាយ នាយការិយាល័យនគរបាលព្រហ្មទណ្ឌកម្រិតស្រាលខេត្តបានមានប្រសាសន៍ថា លោក សេង រតនៈ អាយុ៣៨ឆ្នាំជាអនុប្រធានការិយាល័យមន្ទីរកសិកម្មខេត្តបាត់ដំបងត្រូវបានចាប់ខ្លួន បន្ទាប់ពីនគរបាលទទួលបានព័ត៌មានថា លោកបានយកប្រាក់ដែលបានមកពីការលក់ជីគីមី ដែលជាអំណោយរបស់ទីភ្នាក់ងារសហប្រតិបត្តិការអន្តរជាតិជប៉ុន (JICA) ដាក់ហោប៉ៅខ្លួនឯងកាលពីដើមឆ្នាំនេះ។
លោក មាន ឡាយ បានមានប្រសាសន៍ថា លោក សេង រតនៈ បានទទួលជីគីមីចំនួន ៥០០តោនពីអង្គការ JICA យកទៅលក់ឲ្យកសិករក្នុងមូលដ្ឋាននៅខេត្តបាត់ដំបងក្នុងតម្លៃថោក។
ប៉ុន្តែ លោក រតនៈ បានសារភាពថា បានលក់ជីនេះក្នុងតម្លៃខ្ពស់ ហើយបានទុកប្រាក់ចំណេញមួយចំណែកធំជាជាងបញ្ជូនទៅឲ្យក្រសួងពាណិជ្ជកម្មតាមការគ្រោងទុក។
លោក យូគីកូ គីតាហ្សាវ៉ា ប្រធានទំនាក់ទំនងសាធារណៈនៅអង្គការ JICA បានមានប្រសាសន៍ថា ជីគីមីនេះត្រូវបានផ្តល់ដល់ប្រទេសកម្ពុជាដើម្បីសុវត្ថិភាពស្បៀងអាហារដល់កសិករក្រីក្រដែលមានចំនួនសរុប៦៥០តោន។
លោក មាន ឡាយ បានមានប្រសាសន៍ថា “ នគរបាលបានចាប់ខ្លួនលោក រតនៈ នៅក្នុងការិយាល័យរបស់លោក ក្រោយពីទទួលបានពាក្យបណ្តឹងពីលោក ជឹម វិជ្ជរ៉ា ប្រធានមន្ទីរកសិកម្ម”។
លោក មាន ឡាយ បានមានប្រសាសន៍ថា លោក រតនៈ បានសារភាពប្រាប់នគរបាលថា លោកបានទុកប្រាក់ចំនួន៨០០លានរៀល…ហើយបានបញ្ជូនទៅក្រសួងពាណិជ្ជកម្មតែ២០០លានរៀលប៉ុណ្ណោះ។
លោក មាន ឡាយ បានបន្ថែមថា ជំនួសឲ្យការលក់ជីនេះក្នុងតម្លៃថោកទៅ ឲ្យកសិករក្រីក្រតាមការបង្គាប់ពីក្រសួងកសិកម្ម រុក្ខាប្រមាញ់ និងនេសាទនោះ លោក រតនៈ បានលក់ជីទាំងនេះក្នុងតម្លៃខ្ពស់។
លោក ឡុង ហុកម៉េង ព្រះរាជអាជ្ញារងអមសាលាដំបូងខេត្តបាត់ដំបងបានមានប្រសាសន៍ថា លោកបានចោទប្រកាន់លោករតនៈ រួចហើយ ហើយបានបញ្ជូនរឿងក្តីនេះទៅឲ្យចៅក្រមស៊ើបសួរ។
លោក ឡុង ហុកម៉េង បានមានប្រសាសន៍ថា “ ខ្ញុំបានចោទប្រកាន់គាត់ពីបទរំលោភសេចក្តី ទុកចិត្ត ហើយបានបញ្ជូនគាត់ទៅ ឲ្យចៅក្រមសើុបសួរ ប៉ុន្តែ ខ្ញុំមិនទាន់ដឹងថា តើគាត់ត្រូវបានបញ្ជូនទៅឃុំខ្លួនបណ្តោះអាសន្ន រួចហើយ ឬយ៉ាងណានោះទេ”៕
(រាយការណ៍បន្ថែមដោយ Matt Blomberg)
ប្រែសម្រួលដោយ សោម សារុន