មន្ត្រីនគរបាលម្នាក់បានឲ្យដឹងថាសាកសពផ្សោត ជាប្រភេទសត្វកម្រ ជិតផុតពូជមួយក្បាលមានទម្ងន់២១៥គីឡូក្រាមត្រូវបានគេប្រទះឃើញអណ្ដែតក្នុងទឹកទន្លេមេគង្គ នៅក្នុងស្រុកល្វាឯម ខេត្តកណ្ដាល កាលពីព្រឹកម្សិលមិញ។
លោក ជា ថុល អធិការនគរបាលស្រុក បានមានប្រសាសន៍ថាផ្សោតញីមួយក្បាលមានប្រវែង២,៣៥ម៉ែត្របានងាប់នៅពេលណាមួយកាលពីថ្ងៃអង្គារបន្ទាប់ពីបានជាប់មងនៅក្នុងខេត្តក្រចេះ ឬ នៅក្នុងខេត្តកំពង់ចាម។ លោក ជា ថុល មានប្រសាសន៍បន្តថាយើងបានប្រទះឃើញផ្សោតនេះនៅពេលប្រជាពលរដ្ឋនៅក្នុងសង្កាត់អារីយក្សត្របានរាយការណ៍ប្រាប់នគរបាលប៉ុស្តិ៍ ហើយនគរបាលបានប្រាប់មន្ត្រីជលផលដើម្បីធ្វើការស៊ើបអង្កេតថា តើផ្សោតនេះងាប់យ៉ាងដូចម្ដេច។
អង្គការមច្ឆាជាតិពិភពលោក (WWWF) បានចេញសេចក្ដីថ្លែងការណ៍មួយកាលពីម្សិលមិញដោយលើកឡើងថា ពួកគេកំពុងតែពិនិត្យមើលពីមូលហេតុដែលបណ្ដាលឲ្យផ្សោតនេះងាប់។ ការស៊ើបអង្កេតបឋមបានបញ្ជាក់ថាផ្សោតនេះងាប់ដោយសារជាប់មង ដែលជាមូលហេតុចម្បងបណ្ដាលឲ្យផ្សោតងាប់នៅក្នុងទន្លេមេគង្គ។
លោក យុន វ៉េង ប្រធានក្រុមអភិរក្សផ្សោតទន្លេកាំពីក្នុងខេត្តក្រចេះ បានមានប្រសាសន៍ថា កាលពីឆ្នាំពី២០១២ ផ្សោតចំនួន៤ក្បាលបានងាប់ដោយសារជាប់មង និង ដោយសារការឆក់ដោយចរន្តអគ្គិសនី ហើយផ្សោតចំនួន១១ក្បាលទៀត បានងាប់ក្នុងឆ្នាំ២០១១។ លោកមានប្រសាសន៍បន្តថា យើងបានសង្គ្រោះផ្សោតជាច្រើនដោយការពារកុំឲ្យមានការនេសាទខុសច្បាប់ដោយមងធំៗ និង នេសាទដោយការឆក់ដោយចរន្តអគ្គិសនី៕
ប្រែសម្រួលដោយ ឃិន ណៃ