31 C
Phnom Penh

អ្នក​គាំទ្រ​គណបក្ស​សង្គ្រោះ​ជាតិ​ហាត់សម​​​សម្រាប់មហា​បាតុកម្ម​​នៅ​ថ្ងៃ​សៅរ៍​

ដោយ ឌឹ ខេមបូឌា ដេលី

បទវិភាគ

កាល​ពី​ម្សិលមិញ​គឺ​ជា​ថ្ងៃ​ទី​២ និង​​ជា​ថ្ងៃ​ចុង​ក្រោយនៃ​ការ​ហាត់​សម​សម្រាប់​​អ្នក​គាំទ្រ​​គណបក្ស​សង្គ្រោះជាតិ​នៅ​មុន​ថ្ងៃមហា​បាតុកម្ម​ដែល​គ្រោង​ធ្វើ​នៅ​ថ្ងៃ​សៅរ៍​នេះ​ ដើម្បី​បង្ហាញ​​​សារ​សន្ដិភាព​ និង​អហិង្សា​របស់​ខ្លួន​។

អ្នក​​​គាំទ្រ​​​គណបក្ស​​​សង្គ្រោះ​​​ជាតិ​​​សម្តែង​​​ពី​​​របៀប​​​ប៉ះ​​​ទង្គិច​​​​​​គ្នា​​​រវាង​​​អ្នក​​​តវ៉ា​​​ និង​​​នគរបាល​​​នៅ​​​ទីលាន​​​​​​ប្រជាធិប​​​តេយ្យក្នុង​​​រាជធានី​​​ភ្នំពេញ កាលពី​​​ម្សិលមិញ។ ការ​​​ហាត់​​​សមនេះជា​ការ​ត្រៀម​សម្រាប់​​​​មហាបាតុកម្ម នៅ​ថ្ងៃ​សៅរ៍​។ (ស៊ីវ ចាន់ណា)
អ្នក​​​គាំទ្រ​​​គណបក្ស​​​សង្គ្រោះ​​​ជាតិ​​​សម្តែង​​​ពី​​​របៀប​​​ប៉ះ​​​ទង្គិច​​​​​​គ្នា​​​រវាង​​​អ្នក​​​តវ៉ា​​​ និង​​​នគរបាល​​​នៅ​​​ទីលាន​​​​​​ប្រជាធិប​​​តេយ្យក្នុង​​​រាជធានី​​​ភ្នំពេញ កាលពី​​​ម្សិលមិញ។ ការ​​​ហាត់​​​សមនេះជា​ការ​ត្រៀម​សម្រាប់​​​​មហាបាតុកម្ម នៅ​ថ្ងៃ​សៅរ៍​។ (ស៊ីវ ចាន់ណា)

ចំពេល​មាន​ការ​​ព្រមាន​ធ្ងន់​ៗ​ពី​សំណាក់​រដ្ឋាភិបាល​ថា មហា​បាតុកម្ម​នេះ​ប្រហែល​ជា​​នឹង​ផ្ទុះ​អំពើ​ហិង្សា​  និង​​ជុំ​ដំបូង​​នៃ​ការ​ហាត់​សម​សម្រាប់​អ្នក​គាំទ្រ​គណបក្ស​សង្គ្រោះ​ជាតិ​ដែល​បាន​បង្ហាញ​ថា មាន​ការ​ពិបាក​ក្នុង​ការ​គ្រប់គ្រងនោះ ​ការ​ហាត់​សម​កាល​ពី​ម្សិល​មិញ​គឺជា​កិច្ច​ការ​ដែល​​សុំាទៅ​ហើយ​។ នៅ​ពេល​ហាត់​សម​​កាល​ពី​ថ្ងៃ​អាទិត្យ​អ្នក​ស្ម័គ្រចិត្ត​រាប់​សិប​នាក់​បាន​ដើរ​តួ​​ធ្វើ​ជា​ “បាតុ​ករ​” ឬ​ “នគរបាល​” រុញ និង​ទាញ​គ្នា​ទៅ​វិញ​ទៅ​មក​ ដោយ​មាន​គោល​បំណង​​ជាក់​ស្ដែង​​តិច​តួច​ណាស់។

ដោយ​ធ្លាប់​ទទួល​មេរៀន​ពី​បរាជ័យកន្លង​មក​​ នៅ​ពេល​ហាត់​សម​កាល​ពី​ម្សិលមិញ​ គណបក្ស​សង្គ្រោះជាតិ​មាន​អ្នក​ស្ម័គ្រ​ចិត្ត​ប្រហែល​២០០​នាក់ទាញ​​ខ្សែព័ទ្ធ​​ធ្វើ​ជា​របង​ ហើយ​​អង្គុយ​​ចុះ​ក្នុង​ព្រឹត្តិការណ៍​​នោះ​ដោយ​​ស្ងាត់​ស្ងៀម ខណៈ​ពេល​ពួក​គេ​ និង​​អ្នក​ឈរ​មើល​ប្រហែល​១.០០០​នាក់​ មើល​អ្នក​សម្ដែង​ប្រាំមួយ​​នាក់​​បង្ហាញ​ពួក​គេ​​ពី​របៀប​ធ្វើ​អារម្មណ៍​ឲ្យ​ស្ងប់​ មិន​ប្រើ​អំពើ​ហិង្សា​​ទៅ​លើ​ “នគរបាល​” មុន​ពេល​​បំបែក​គ្នា​។ “ បាតុ​ករ​” បាន​អនុវត្ត​​តាម​ដោយ​ការ​អង្គុយ​នៅ​មុខ​ប៉ូលិស​ដោយ​ភាព​ស្ងៀម​ស្ងាត់។

លោក សម រង្ស៊ី ប្រធាន​គណបក្ស​​សង្គ្រោះ​ជាតិ​បាន​ថ្លែង​ទៅ​កាន់​​អ្នក​ចូល​រួម​ថា “ថ្ងៃ​នេះ​យើង​ហាត់​​សម​ពី​វិធី​​ធ្វើ​យ៉ាង​ណា​ឲ្យ​ទទួល​​បាន​ជោគ​ជ័យ​នៅ​ក្នុង​បាតុកម្ម​អហិង្សា​នៅ​ថ្ងៃ​ទី​៧ ខែ​កញ្ញា ខាង​មុខ​នេះ​។ យើង​ហាត់​សម​​ពី​របៀប​​កាន់​ធូប​​ ទៀន​ និង​ផ្កា​។ យើង​នឹង​​បួង​សួង​ ហើយ​ធ្វើ​ចិត្ត​ឲ្យ​ស្ងប់​”។​ ទាំង​គណបក្ស​សង្គ្រោះជាតិ​ និង​គណ​បក្ស​​ប្រជាជន​កម្ពុជា​កំពុង​កាន់​អំណាច​​សុទ្ធ​តែ​អះអាង​រៀងៗ​ខ្លួន​​ថា ខ្លួន​​ជា​អ្នក​ទទួល​ជ័យ​ជម្នះ​នៅ​ក្នុង​ការ​​បោះឆ្នោត​ជាតិ​កាល​ពី​ថ្ងៃ​ទី​២៨ ខែ​កក្កដា។

គណៈកម្មាធិការ​ជាតិ​រៀប​ចំ​ការ​បោះឆ្នោត​ (គ.ជ.ប.) ស្ទើរតែ​ប្រាកដ​ក្នុង​ចិត្ត​ណាស់​ថា លទ្ធផល​របស់​ខ្លួន​នឹង​បង្ហាញ​​ថា គណបក្ស​ប្រជាជន​កម្ពុជា​ជា​អ្នក​ទទួល​ជ័យ​ជម្នះ​នៅ​​ថ្ងៃ​អាទិត្យនេះ​​ ប៉ុន្តែ​គណ​បក្ស​សង្គ្រោះ​ជាតិ​នៅ​តែ​សង្ឃឹម​ថា ខ្លួន​នឹង​អាច​ដាក់​សម្ពាធ​​ឲ្យ​រដ្ឋាភិបាល​ឯកភាព​​ឲ្យ​មាន​ការ​​ស៊ើប​អង្កេត​​ឯករាជ្យ​​មួយ​លើ​ការ​បោះ​ឆ្នោត​​ ដែល​​​​​មាន​សេចក្ដី​រាយ​ការណ៍​យ៉ាង​ច្រើន​អំពី​ភាព​មិន​ប្រក្រតី​ តាម​រយៈ​​ការ​ធ្វើ​មហា​បាតុកម្ម​ ដែលនឹង​​ចាប់​​ផ្ដើម​នៅ​ថ្ងៃ​សៅរ៍​​នេះ​។

តែ​ទោះ​ជាយ៉ាង​ណា​ ចំពេល​​រដ្ឋាភិបាល​​ព្រមាន​​ធ្ងន់ៗ​ចំពោះ​ការ​ផ្ទុះ​អំពើ​ហិង្សា​ គណ​បក្ស​​សង្គ្រោះជាតិ​ក្នុង​ពេល​ថ្មីៗ​នេះ​បាន​ចាប់​ផ្ដើម​បំផ្លើស​ថា ព្រឹត្តិការ​ណ៍​នេះ​ជា​ថ្ងៃ​បួង​សួង​​។

លោក កឹម សុខា អនុប្រធាន​គណបក្ស​សង្គ្រោះជាតិ​បាន​មាន​ប្រសាសន៍​ថា “បាតុ​កម្ម​អហិង្សា​ នឹង​ទទួល​ជ័យ​ជម្នះ​ច្រើន​ជាង​បាតុកម្ម​ហិង្សា​។ យើង​សូម​ជំរុញ​លើក​ទឹក​ចិត្ត​អ្នក​ដែល​ស្រឡាញ់​យុត្តិធម៌ និង​ប្រទេស​​ជាតិ​ឲ្យ​មក​ចូល​រួម​។ បើ​យើង​រួប​រួម​គ្នា​ យើង​នឹង​ទទួល​ជ័យ​ជម្នះ​”។

លោក​ក៏​បាន​​ណែនាំ​ដល់​អ្នក​ចូល​រួម​ដែរ​​ថា ពួក​គេ​អាច​ជួយ​​រក្សា​ភាព​តាន​តឹង​ឲ្យ​ថយ​ចុះ​​បាន​នៅ​ថ្ងៃ​សៅរ៍​​ខាង​មុខ​នេះ​​តាម​រយៈ​ការ​ជ្រើស​រើស​ស្ត្រី​ៗ ដែល​មាន​វ័យ​ចាស់់​កាន់​តែ​ល្អ ឲ្យ​និយាយ​ជា​មួយ​នគរបាល​។ លោក​បាន​មាន​ប្រសាសន៍​ថា “ចូរ​ធ្វើ​ឲ្យ​អ្នក​​កាន់​អាវុធ​ឃើញ​ថា បើ​ពួក​គេ​បាញ់​យើង​ ពួក​គេ​ក៏​ដូច​ជា​បាញ់​ម្ដាយ​របស់​ខ្លួន​ឯង​អ៊ីចឹង​ដែរ​ ហើយ​បើ​​ពួក​គេ​ចាប់​ខ្លួន​ក្មេង​ស្រី​ៗ ពួក​គេ​ក៏​ដូច​ជា​​​ចាប់​កូន​ស្រី​របស់​ខ្លួន​ដែរ​”។

ក្នុង​ចំណោម​អ្នក​ចូល​រួម​ទាំង​នោះ​​ហាក់​ដូច​ជា​​គាំទ្រ​វិធី​​​មិន​​តតាំង​របស់​គណ​បក្ស​ប្រឆាំង​។ លោក​ យី សុខា ដែល​មើល​​​ការ​ហាត់​សម​បាតុ​កម្ម​​នេះ​ពី​ខាង​ក្រៅ​បាន​និយាយ​​ថា “យើង​អាច​កាត់​បន្ថយ​​ហិង្សាបាន​​តាម​រយៈ​ការ​មិន​ស្រែក​​ឡូឡា​។ ការ​បួង​សួង​ និង​ការ​ធ្វើ​សមា​ធិ​មិន​មែន​​ធ្វើ​ឲ្យ​យើង​ខ្សោយ​ ឬ​ខ្លាច​នោះ​ទេ​ គឺ​វា​ធ្វើ​ឲ្យ​យើងក្លាហាន​និង​មិន​ខ្លាច​ទៅ​វិញ​ទេ”។

លោក​ ឈឿន​ សុគន្ធា ក៏​បាន​យល់​ស្រប​បែប​នេះ​ដែរ​។ គាត់​និយាយ​ថា “​វា​​ជា​គំនិត​ល្អ​ ពីព្រោះ​ប្រទេស​កម្ពុជា​​មាន​បទ​ពិសោធ​ច្រើន​​ណាស់​មក​ហើយ​​​ពាក់​ព័ន្ធ​នឹង​ការ​ឈឺ​ចាប់​ ហើយ​រដ្ឋាភិ​បាល​តែង​តែ​វាយ​ដំ​បាតុករ”។

ទោះបី​ជា​លោក​ ឈឿន សុគន្ធា​ មាន​​គម្រោង​ចូលរួម​បាតុកម្ម​នៅ​ថ្ងៃ​សៅរ៍​នេះ​​ក៏​ដោយ ​ក៏​គាត់​គិត​ដែរ​ថា បាតុកម្ម​នេះ​អាច​​នឹង​​បរាជ័យ​ ហើយ​មាន​សង្ឃឹម​តិច​តួច​ណាស់​ដែល​ថា អាច​បង្ខំ​ឲ្យ​រដ្ឋាភិបាល​​ទទួ​ល​​យក​កា​រ​ស៊ើប​អង្កេត​ឯករាជ្យ​លើ​ការ​បោះ​ឆ្នោត​។

នៅ​ពេល​សាកសួរ​ថា តើ​បាតុកម្ម​នេះ​អាច​នឹង​ទទួល​បាន​ជោគ​ជ័យ​ឬ​យ៉ាង​ណា​នោះ​ គាត់​បាន​ឆ្លើយ​ថា “ខ្ញុំ​មិន​គិត​ដូច្នេះ​ទេ​ ខ្ញុំ​គិត​ថា រដ្ឋាភិបាលមិន​ព្រម​ចុះ​ញ៉ម​ឡើយ​។ ពួក​គេធ្វើ​អ្វី​គ្រប់​យ៉ាងតាម​ចិត្ត​ពួក​គេ​​ចង់​”៕

ប្រែសម្រួលដោយ តែម​ សុខុម​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស