កាលពីថ្ងៃព្រហស្បតិ៍ ក្រុមប្រឹក្សាធម្មនុញ្ញបានតម្កល់សេចក្ដីសម្រេចមួយផ្សេងទៀតរបស់គណៈកម្មាធិការជាតិរៀបចំការបោះឆ្នោត (គ.ជ.ប.) ដែលបានច្រានចោលពាក្យបណ្ដឹងពាក់ព័ន្ធនឹងការចោទប្រកាន់ពីភាពមិនប្រក្រតីនៃការបោះឆ្នោត ប៉ុន្តែ ក្រុមប្រឹក្សាធម្មនុញ្ញក៏បានបង្ហាញដែរថា គ.ជ.ប. មិនបានដាក់ជូនផ្នែកខ្លះនៃពាក្យបណ្ដឹងរបស់គណបក្សសង្គ្រោះជាតិមកឲ្យខ្លួនឡើយ ហើយ គ.ជ.ប. ត្រូវតែផ្ដល់ការពន្យល់ បើពុំដូច្នោះទេនឹងត្រូវប្រឈមមុខនឹងវិធានការផ្លូវច្បាប់។
លោក ឯក សំអុល ប្រធានក្រុមប្រឹក្សាធម្មនុញ្ញបានលើកឡើងកាលពីម្សិលមិញថា នៅពេលក្រុមប្រឹក្សាធម្មនុញ្ញបានតម្កល់សេចក្តីសម្រេចកាលពីថ្ងៃទី១៦ ខែសីហា របស់ គ.ជ.ប. ដែលបានច្រានចោលការចោទប្រកាន់ពីភាពមិនប្រក្រតីនៅមណ្ឌលខេត្តសៀមរាប នៅពេលនោះ គ.ជ.ប. មិនបានដាក់ភ័ស្តុតាងដែលចោទប្រកាន់ថា មន្ត្រីយោធាត្រូវបានគេដឹកតាមរថយន្តទៅកាន់ការិយាល័យចំនួនប្រាំពីរដើម្បីបោះឆ្នោតនៅក្នុងសំណុំរឿងរបស់ខ្លួនឡើយ។
លោកបានមានប្រសាសន៍ថា “គ.ជ.ប. ត្រូវតែទទួលខុសត្រូវ ហើយត្រូវតែប្រឈមមុខនឹងច្បាប់ ហេតុដូច្នេះហើយក្រុមប្រឹក្សាធម្មនុញ្ញបានបង្គាប់ឲ្យ គ.ជ.ប. ចាត់វិធានការដើម្បីដាក់ទោសលើមន្ត្រីរបស់ខ្លួននៅការិយាល័យបោះឆ្នោតចំនួនប្រាំពីរ មានដូចជានៅក្នុងឃុំរើល ស្រុកពួក និងនៅក្នុងសង្កាត់ក្របីរៀល សង្កាត់ស្វាយដង្គុំ និងសង្កាត់ស្លក្រាម ក្នុងក្រុងសៀមរាប ជាដើម”។
លោក ឯម សូផាត សមាជិក នឹងជាតំណាង គ.ជ.ប. បានលើកឡើងថា គ.ជ.ប. និងធ្វើតាមការណែនាំរបស់ក្រុមប្រឹក្សាធម្មនុញ្ញ ហើយនឹងអនុវត្តការស៊ើបអង្កេត។ លោកបានមានប្រសាសន៍ថា “គ.ជ.ប. នឹងស្រាវជ្រាវ ហើយគោរពតាមសេចក្ដីសម្រេចរបស់ក្រុមប្រឹក្សាធម្មនុញ្ញ”។
មណ្ឌលខេត្តសៀមរាបគឺជាមណ្ឌលដែលត្រូវបានច្រានចោលទី១៤ក្នុងចំណោមមណ្ឌលនៅរាជធានី និងខេត្តចំនួន១៥ ដែលគណបក្សសង្គ្រោះជាតិបានដាក់ពាក្យបណ្ដឹងដោយក្រុមប្រឹក្សាធម្មនុញ្ញបានអះអាងថា គណបក្សសង្គ្រោះជាតិមិនមានភ័ស្តុតាងគ្រប់គ្រាន់ដើម្បីគាំទ្រការអះអាងរបស់ខ្លួន ចំពោះការលួចបន្លំសន្លឹកឆ្នោតនៅថ្ងៃទី២៨ ខែកក្កដា នោះឡើយ។
វិធានការដែលក្រុមប្រឹក្សាធម្មនុញ្ញបានចាត់ចំពោះ គ.ជ.ប. ដោយណែនាំឲ្យ គ.ជ.ប. ចាត់វិធានការតឹងរ៉ឹងចំពោះបុគ្គលិកថ្នាក់ទាបរបស់ខ្លួនដែលបិទកញ្ចប់សុវត្ថិភាពមិនបានត្រឹមត្រូវនៅការិយាល័យយ៉ាងតិចចំនួនប្រាំបីនៅមណ្ឌលខេត្តក្រចេះ ត្រូវបានថ្កោលទោសថា ជាវិធានការមិនតឹងរ៉ឹងឡើយ ប្រឆាំងនឹងភាពដែលអាចមានការប៉ះពាល់សន្លឹកឆ្នោត។
លោក កែ សុវណ្ណរ័ត្ន បេក្ខជនឈរឈ្មោះជាតំណាងរាស្ត្ររបស់គណបក្សសង្គ្រោះជាតិមណ្ឌលខេត្តសៀមរាបបានលើកឡើងថា ខ្ញុំនៅមិនទាន់យល់ពីរបៀបដែលគេដាក់ទោសលើមន្ត្រី គ.ជ.ប. ឡើយ ពីព្រោះមន្ត្រីយោធាទាំងនេះត្រូវបានដឹកពីខេត្តព្រះវិហារ និងខេត្តឧត្តរមានជ័យ”។
លោកបានមានប្រសាសន៍បន្តថា ជាការពិតណាស់ យោធាមានសិទ្ធិបោះឆ្នោត ប៉ុន្តែ ប្រសិនបើពួកគេត្រូវបានដឹកទៅទីនោះដើម្បីបោះឆ្នោត អ៊ីចឹងហេតុអ្វីបានជាកម្មករកម្មការិនីរោងចក្រកាត់ដេរមិនអាចបោះឆ្នោតនៅក្នុងរាជធានីភ្នំពេញបាន?”។
ក្រុមប្រឹក្សាធម្មនុញ្ញនឹងបើកសវនាការដោះស្រាយពាក្យបណ្ដឹងរបស់គណបក្សសង្គ្រោះជាតិនៅថ្ងៃនេះ។ បណ្ដឹងចុងក្រោយនេះ គឺពាក់ព័ន្ធនឹងមណ្ឌលខេត្តកណ្ដាល៕
ប្រែសម្រួលដោយ ស៊ា ស៊ុយឈាង