34 C
Phnom Penh

គេសង្ឃឹមថា​ មន្ត្រី​ពន្ធនាគារ​ដែលមាន​ចំណេះដឹង​ខ្ពស់នឹង​បញ្ចប់​ការ​រំលោភ​បំពាន​ក្នុង​ពន្ធនាគារ​​

ដោយ ឌឹ ខេមបូឌា ដេលី

បទវិភាគ

យោង​តាម​ព្រះ​រាជក្រឹត្យ​​ដែល​សំដៅ​លើក​​​​កម្ពស់​បទដ្ឋាន​នៅ​ក្នុ​ងប្រព័ន្ធ​ពន្ធនា​គារ​ និង​ដើម្បី​ទប់​ស្កាត់​វប្បធម៌​នៃការ​រំលោភ​បំពាន​ និង​អំពើ​ពុក​រលួយ​ដ៏​រាល​ដាល​​នោះ​ យ៉ាង​ហោច​​​​ណាស់​មន្ត្រី​ពន្ធនា​គារ​ត្រូវ​មាន​សញ្ញា​​​បត្រ​ទុ​តិយភូមិ​ ហើយ​​លើក​ទឹក​ចិត្ត​ពួក​គេឲ្យ​មាន​បរិញ្ញាបត្រ​ទៀត​។

យោង​ទៅ​​​តាម​ព្រះ​រាជក្រឹត្យ ដែល​ឡាយ​ព្រហស្តលេខា​ដោយ​​ព្រះ​មហាក្សត្រ​ នរោ​ត្តម សីហមុនី កាល​ពីថ្ងៃ​ទី​៧​ខែ​សីហា បាន​ឲ្យ​ដឹង​ថា  ​​​មន្ត្រីសន្តិសុខ​ពន្ធនាគារ​និង​មន្ត្រី​ផ្សេង​ៗ​ទៀត​​​​មិន​ត្រូវ​ប្រើ​ប្រាស់​តួនាទី​របស់​ខ្លួន​ដើម្បី​ប្រយោជន៍​ផ្ទាល់​ខ្លួន​ឡើយ​ ត្រូវ​ធ្វើ​ការ​ប្រឡង​​​​មុន​ពេល​ចូល​បម្រើ​ការ​ងារ​ ហើយមន្ត្រី​ទាំង​នោះ​ត្រូវ​មាន​អាយុ​ចាប់ពី២៥​ឆ្នាំឡើងទៅ​។

ព្រះ​រាជក្រឹត្យមាន​ខ្លឹម​សារ​ថា “មន្ត្រី​ពន្ធនា​​​គារ​ត្រូវ​ហាម​ឃាត់​ដាច់​ខាត​មិន​ឲ្យ​​៖​ប្រើ​​​​ប្រាស់​ម៉ោង​ការងារ​ទៅ​ធ្វើ​ការ​ងារ​ផ្ទាល់​ខ្លួន​ប្រើ​ប្រាស់​តួនាទី​ និង​អំណាច​​ដើម្បី​ប្រយោជន៍​​​​ផ្ទាល់ខ្លួន​ ឬ​គំរាម​កំហែង​ និង​រំលោភ​​​​បំពាន​សិទ្ធិប្រជាពល​រដ្ឋ​ ឬ​ទណ្ឌិត​ឡើយ​”។

ទោះជាព្រះ​រាជក្រឹត្យនេះ​មាន​ខ្លឹម​សារ​​ថា មន្ត្រី​សន្តិសុខ​ពន្ធនាគារ​ថ្មី​ៗ​នឹង​តម្រូវ​ឲ្យ​​ធ្វើ​​​​ការ​ប្រឡងក៏ដោយ ក៏ព្រះរាជ​ក្រឹត្យនេះ​មិន​បាន​ចែងលម្អិត​ពាក់​ព័ន្ធ​នឹង​ការ​ប្រឡង​​ ឬ​ថា តើ​ត្រូវ​ដោះស្រាយ​ការ​អនុវត្ត​​ទូទៅ​របស់​អ្នក​ដាក់​ពាក្យ​ប្រឡង​​ដែល​បង់ប្រាក់​ដើម្បី​ទទួល​​​​បាន​តួនាទី​នៅ​​​ក្នុង​រដ្ឋាភិបាល​ដូច​​​ម្តេច​​​ឡើយ​។

នៅ​​​ពេល​​សួរ​អំពី​តម្រូវ​ការ​ថ្មីៗ​ផ្នែក​អប់រំ​ លោក​ ស្រ៊ុន  លាង ប្រធាន​មណ្ឌល​កែ​ប្រែ១​នៅ​​​​​ពន្ធ​នាគារ​ព្រៃ​ស​បាន​បដិសេធ​  មិន​ធ្វើ​អត្ថា​ធិប្បាយ​ទេ  តែ​លោក​បាន​មាន​ប្រសាសន៍​​​​​​​ថា “ នៅថ្នាក់ក្រោម​បំផុត មន្ត្រី​ពន្ធនា​គារ​​ទទួល​​​​បាន​ប្រាក់​ខែ​ប្រហែល​៧៥​ដុល្លារ​ក្នុង​មួយ​ខែ​”។

លោក​ ហ៊ិន​  សុផល​  ប្រធាន​ពន្ធនា​គារ​ខេត្ត​បន្ទាយ​មាន​ជ័យ​បាន​មាន​ប្រសាសន៍​ថា យ៉ាង​ហោច​ណាស់​នៅ​ពន្ធនា​គារ​របស់​លោក​​​​​​​ មាន​​​មន្ត្រី​ពន្ធនាគារ​ភាគច្រើន​​បាន​បំពេញ​ ការ​ងារ​ប្រកប​ដោយ​វិជ្ជាជីវៈ​ ប៉ុន្តែ  លោក​បាន​ស្វាគមន៍​​​ពីតម្រូវ​ការ​​ប្រឡង​ចូល​ធ្វើ​ការ​ងារ​ដ៏​តឹង​រ៉ឹង​​​នេះ។ លោក​បាន​អះអាង​ថា “ខ្ញុំគិត​ថា លក្ខន្តិកៈ​​​​​​នេះ​គឺល្អណាស់…​។ នៅ​ក្នុ​ងពន្ធនា​គារ​របស់​ខ្ញុំ​ ដែល​ខ្ញុំ​បាន​បម្រើ​ការ​ងារ​នៅ​ទីនេះ​ចាប់​តាំង​ពីឆ្នាំ​២០១១​មកនោះ​ មិន​ដែល​មាន​បញ្ហា​ខុស​ច្បាប់​កើតឡើ​ងទេ​”។

មន្ត្រី​ដែលបម្រើការក្នុង​ប្រព័ន្ធ​ពន្ធនាគារ​ដែល​មាន​កេរ្តិ៍​ឈ្មោះ​អសោច​​ត្រូវ​បាន​​ចោទ​ប្រកាន់​ជាយូរ​មកហើយ​ពីសំណាក់​អង្គការ​សិទ្ធិ​មនុស្ស​អំពីបញ្ហាជា​ច្រើន​ចាប់​ពីអស​មត្ថ​ភាព​រហូត​ដល់​ការ​ធ្វើ​ទារុណ​កម្ម​​អ្នក​ទោស​ដោយ​ផ្ទាល់​។

កាល​ពីឆ្នាំ​២០១០​ លោក នួន វណ្ណា​ អតីត​ប្រធាន​ពន្ធនាគារខេត្ត​​បន្ទាយ​​មាន​ជ័យ​ត្រូវ​បាន​ចាប់​ខ្លួន​ ហើយ​​បណ្តេញ​ចេញ​ពីការងារ​បន្ទាប់​ពី​មាន​ការ​ចោទ​ប្រ​កាន់​ថា លោកបាន​ទទួល​សំណូក​ ហើយ​បណ្តោយឲ្យ​អ្នក​ទោស​រត់​គេច​ខ្លួន​។ អ្នក​កាន់​តំណែង​មុន​រូប​លោក​​ ដែលបាន​បំពេញ​ការ​ងារ​រយៈ​ពេល​តែ​ប្រាំពីរ​ខែ​ប៉ុណ្ណោះ​មុន​ពេល​ត្រូវ​បាន​ដក​ចេញពី​តំណែង​​​​បន្ទាប់ពី​អ្នក​ទោស​មួយ​ចំនួន​​ត្រូវ​គេ​ធ្វើ​តេស្ត​រក​ឃើញថា មាន​ប្រើ​ប្រាស់​ថ្នាំ​ញៀន​។

អង្គការ​ឃ្លាំ​មើល​សិទ្ធិ​មនុស្ស​ និង​អង្គការ​លីកាដូ​ ដែ​ល​ជា​អង្គការ​សិទ្ធិ​មនុស្ស​ក្នុ​ងស្រុក​បាន​លើក​ឡើង​ថា មាន​​ការ​ធ្វើ​ទារុណកម្ម​​ទៅ​លើ​អ្នក​ទោស​ជា​ច្រើន​​​ក្នុង​ពន្ធនាគារ​នៅ​​​ក្នុង​​​ប្រទេស​​​​កម្ពុជា​។

លោក អំ  សំអាត​​​  អ្នក​គ្រប់​គ្រង​បច្ចេក ទេ​ស​​​​​​របស់​អង្គការ​សិទ្ធិ​មនុស្ស​លីកាដូ​បាន​មាន​ប្រសាសន៍​កាល​ពីម្សិល​មិញថា  លោក​បាន​ស្វាគមន៍​មន្ត្រី​ដែល​មាន​ចំណេះ​ដឹង​ខ្ពស់​ ប៉ុន្តែ ការ​ធ្វើ​ឲ្យ​មន្ត្រីដែល​​បំពាន​តួនាទី​របស់​ខ្លួន​​ទទួល​ខុស​ត្រូវ  នៅ​តែ​ជា​បញ្ហា​ដ៏​សំខាន់​បំផុត​​​។
លោក​ អំ សំអាត​ បា​ន​មាន​ប្រសាសន៍​ថា “ ប្រសិន​បើ​មាន​បទ​ឧក្រិដ្ឋ​​កើត​ឡើង​ ពួក​គេ​គួរ​​​​​​​ធ្វើ​ការ​ស៊ើបអង្កេត​ឲ្យ​បាន​​ត្រឹម​ត្រូវ ហើយ​​​​ដាក់​ទោស​មន្ត្រី​ទាំង​នោះ​តាម​ច្បាប់​”។

លោក​ មឿន តុលា ប្រធាន​កម្ម​វិធី​ការ​ងារ​នៅមជ្ឈមណ្ឌលអប់រំ​ច្បាប់​សម្រាប់​សហ​គមន៍​បាន​គាំទ្រការលើកឡើងរបស់​លោក​ អំ សំអាត ដែលថា ការអនុវត្ត​​ច្បាប់​ មិន​មែនតែមន្ត្រី​ដែល​មាន​ចំណេះ​ដឹង​ខ្ពស់​ទេ​  គឺជា​បញ្ហា​ដ៏​សំខាន់​បំផុតចំពោះ​ការ​​បញ្ឈប់​​វប្បធម៌​ពុក​រលួយ​ និង​ការ​រំលោភ​បំពាន​​ក្នុង​ពន្ធនាគារ​​​​ លោក​ មឿន​ តុលា បាន​មាន​ប្រសា​សន៍​ថា “ការ​ដំឡើង​ប្រាក់​ខែ​ដល់​មន្ត្រី​ពន្ធ​នា​​គារ​គឺ​ជាការ​ចាំបាច់​​ដើម្បី​ធ្វើ​ឲ្យលក្ខន្តិកៈថ្មី​នេះ​​​មាន​ប្រសិទ្ធភាព។

លោក មឿន តុលា បាន​សួរ​ថា “ហេតុ​អ្វី​បាន​ជារដ្ឋាភិបាល​មិន​ដំឡើង​ប្រាក់​ខែ​ដល់​មន្ត្រី​ទាំងនោះ  ដែលប្រហែលជា​មិន​មាន​ជម្រើស​ក្រៅ​តែ​ពី​​ទទួល​សំណូក​នោះ​?” ដោយ​​​​លោកបញ្ជាក់​ថា ប្រសិន​បើ​សាច់​ញាតិ​របស់​អ្នក​ទោស​ចង់​មក​សួរ​សុខ​ទុក្ខ​អ្នក​ទោស​ ជារឿយៗ​ពួកគាត់​ត្រូវចំណាយ​​​លុយ​​​សូក​​​ប៉ាន់​​​​​សន្តិសុខ​ពន្ធនារ​​​​​​​ចំន​ួន​១០​ដុល្លារ​ទើប​​​​​​ មាន​​​​​សិទ្ធិ​ចូល​​​បាន​​​៕

ប្រែសម្រួលដោយ សោម សារុន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស