29 C
Phnom Penh

គណបក្ស​​​ប្រជាជន​​​តែង​​​តាំង​​​សមាជិក​​​សភា​​​ថ្មីបន្ទាប់​​​ពី​​​​​​បាន​​​ឈ្នះ​​​ឆ្នោត​​​

ដោយ ឌឹ ខេមបូឌា ដេលី

បទវិភាគ

យោង​​​តាម​​​លទ្ធផល​​​បោះ​​​ឆ្នោតជា​​​ផ្លូវ​​​ការ​​​ដែល​​​ គ.ជ.ប. បាន​​​ប្រកាសកាល​​​ពីម្សិល​​​មិញ​​​ បង្ហាញថា នៅ​​​ពេល​​​ដែល​​​គណ​​​បក្ស​​​ប្រជា​​​ជន​​​កម្ពុជា​​​ទទួល​​​បាន​​​អាសនៈ​​​នៅក្នុង​​​រដ្ឋសភា​​​​ ដែលបានបញ្ចូលសមាជិកថ្មី​​​​​​របស់​​​ខ្លួន​​​​​​​​ពីរបីនាក់​​​​​ និងបាន​​​​បាត់​​​បង់​​​សមាជិ​​​កសភា​ចាស់​​​ៗជា​ច្រើន​រូប​​​​។

ការ​​​ទទួល​​​បាន​​​លទ្ធផល​​​មិន​​​ល្អ​​​របស់​​​គណ​​​បក្ស​​​ប្រជាជន​​​កម្ពុជា​​​នៅ​​​ក្នុង​​​ការ​​​បោះ​​​ឆ្នោត​​​កាល​​​ពី​​​ថ្ងៃ​​​ទី​​​២៨​​​ខែកក្កដា​​​នេះ​​​ មាន​​​ន័យ​​​ថា ​​​ទេស​​​រដ្ឋ​​​មន្ត្រី​​​​​​មក​​​ពី​​​គណ​​​បក្ស​​​ប្រជា​​​ជន​​​កម្ពុជា​​​​​​មួយ​​​ចំនួន​​​ និង​​​សមាជិក​​​សភា​​​ចាស់​​​ៗមួយចំនួនទៀត បាន​​​បាត់​​​ពី​​​បញ្ចី​​ឈ្មោះ​​​គួរ​​​ឲ្យគត់​​​សម្គាល់​​​ពីសមាជិក​​​សភា​​​របស់​​​គណបក្ស​​​កាន់​​​អំណាច​​​ ដែល​​​ត្រូវ​​​បាន​​​​​​ គ.ជ.ប.​​​ ប្រកាសតាម​​​ទូរទស្សន៍​​​ និង​​​វិទ្យុ​​​ជាតិ​​​។

ក្នុង​​​ចំណោម​​​មន្ត្រី​​​ជាន់​​​ខ្ពស់​​​របស់​​​​​​គណ​​​បក្ស​​​ប្រជា​​​ជន​​​កម្ពុជា​​​​​​ដែល​​បាត់​​​ឈ្មោះ​​​ពី​​​បញ្ជី​​​ឈ្មោះ​​​​​សមាជិក​​​សភា​​​នោះគឺ​​​ លោក  ចម​​​  ប្រសិទ្ធ​​​ រដ្ឋ​​​មន្ត្រី​​​ក្រសួង​​​ពាណិជ្ជកម្ម លោក​​​ ម៉ម ប៊ុន​​​ហេង រដ្ឋ​​​មន្ត្រី​​​ក្រសួង​​​សុខាភិបាល​​​ លោក​​​ ខៀវ​​​  កាញារីទ្ធ ​​​​​​រដ្ឋ​​​មន្ត្រី​​​ក្រសួង​​​ព័ត៌​​​មាន​​​ លោក ​​​ច័ន្ទ សារុន រដ្ឋ​​​មន្ត្រី​​​ក្រសួង​​​កសិ​​​កម្ម​​​ និង​​​លោក​​​ ឆាយ​​​ ថន រដ្ឋ​​​មន្ត្រី​​​ក្រសួង​​​ផែន​​​ការ​​​។

តំណាង​រាស្ត្រ​ចូល​ថ្មី  ​​គឺកូន​​​ប្រុស​​​របស់​​​លោក​​​នាយក​​​រដ្ឋ​​​មន្ត្រី​​​ ហ៊ុន​​​ សែន និង​​​កូន​​​ប្រុស​​​របស់​​​លោក​​​ ស ខេង​​​ រដ្ឋ​​​មន្ត្រី​​​ក្រសួង​​​មហា​​​ផ្ទៃ​​​ ដែល​​​អ្នក​​​ទាំង​​​ពីរនាក់​​សុទ្ធ​​​តែ​​​ជា​បេក្ខជន​​​តំណាង​​​​​​រាស្ត្រ​​​​​​លើក​​​ដំបូង​​​។

លោក ឆាយ​​​ ថន​​​ រដ្ឋ​​​មន្ត្រី​​​ក្រសួង​​​ផែន​​​ការ​​​ និង​​​ឥឡូវ​​​នេះជា​​​អតីត​​​តំណាង​​​រាស្ត្រ​​​គណ​​​បក្ស​​​​​​ប្រជា​​​ជន​​​កម្ពុជា​​​​​​បាន​​​មាន​​​ប្រសាសន៍​​​កាល​​​​​​ពីម្សិលមិញ​​​ថា “ខ្ញុំ​​​លា​​​ឈប់​​​ដើម្បី​​​ទុក​​​ការ​​​ងារ​​​នេះឲ្យ​​​​មនុស្ស​​​ជំនាន់​​​ថ្មី​​​​​​។ វា​​​ដូចជា​​​រលក​​​​​​ក្រោយ​​​​​​​រុញ​​​រលក​​​មុខ​​​អ៊ី​​​ចឹង​​​ដែរ​​​”។ លោក​​​បាន​​​មានប្រសាសន៍ថា “យើង​​​ជា​​បក្ស​​​ទុក​​​ការ​​​ងារ​​​នេះ​​​ឲ្យ​​​អ្នក​ជំនាន់​​​ថ្មី​​​។​​​ពួក​​​គេ​​​លឿន​​​ និង​​​មាន​​​សុខភាព​​​មាំមួន​​​ជាង​​​”។ លោក​​​​​​បាន​​​បន្ថែម​​​ថា លោក​​​មិន​​​ដឹង​​​ថា តើ​​​លោក​​​​​​នឹង​​​រក្សា​​​តំណែង​​​នយោបាយ​​​របស់​​​លោក​​​ជា​​​រដ្ឋ​​​មន្ត្រី​​​ក្រសួង​​​ផែនការ​​​បាន​​​ ឬអត់​​​ទេ​​​។ លោក​​​​​​ថ្លែង​​​​​​ថា “ពាក់​​​ព័ន្ធ​​​នឹង​​​រឿង​​​​​​នេះ ខ្ញុំ​​​មិន​​​ដឹង​​​ទេ។ មាន​​​តែ​​​នាយក​​​រដ្ឋ​​​មន្ត្រី​​​ទេ​​​ដែល​​​ដឹង​​​”។

លោក​​​ ជាម យៀប​​​ តំណាង​​​រាស្ត្រ​​​គណ​​​បក្ស​​​ប្រជា​​​ជន​​​កម្ពុជា​​​​​​បាន​​​មាន​​​ប្រសាសន៍ថា រដ្ឋ​​​មន្ត្រី​​​​​​ដែល​​​បាត់​​​បង់​​​អាសនៈ​​​នៅរដ្ឋ​​​សភា​​​​​​នឹង​​​មិន​​​បាត់​​​បង់​​​តំណែង​​​របស់​​​ខ្លួន​​​នៅខុទ្ទ​​​កាល័យ​​​របស់​​​នាយក​​​រដ្ឋ​​​មន្ត្រី​​​ទេ​​​។ លោក​​​បាន​​​មាន​​​ប្រសាសន៍ថា អ្នក​​​ទាំង​​​នេះ​​​​​​នៅ​​​តែ​​​ស្ថិត​​​នៅ​​​ក្នុង​​​រដ្ឋាភិបាល​​​ ប៉ុន្តែ ពួក​​​គាត់​​​នឹង​​​មិន​​​ស្ថិត​​​នៅ​​​ក្នុង​​​រដ្ឋសភា​​​ទេ​​​។ តំណែង​​​រដ្ឋ​​​មន្ត្រី​​​ត្រូវ​​​បាន​​​តែង​​​តាំង​​​ដោយ​​​គណបក្ស​​​។ ហើយ​​​​​​មាន​​​មនុស្ស​​ច្រើន​​​ណាស់​​​នៅក្នុង​​​គណ​​​បក្ស​​​នេះ”។

លោក​​​ ហ៊ុន​​​ ម៉ានី​​​ កូនប្រុស​​​​​របស់​​​លោក​​​ ហ៊ុន សែន​​​ ដែល​​​បាន​​​ឈរឈ្មោះ​​​ជា​​​បេក្ខ​​​ជន​​​តំណាង​​​រាស្ត្រ​​​មណ្ឌល​​​កំពង់​​​ស្ពឺ​​​រួម​​​ជា​​​មួយ​​​លោក​​​ ស សុខា កូន​​​ប្រុស​​​របស់​​​លោក ស ខេង​​​ ដែល​​​បាន​​​ឈរ​​​ឈ្មោះ​​​ជាបេក្ខ​​​ជន​​​មណ្ឌល​​​ព្រៃ​​​វែង​​​សុទ្ធ​​​តែ​​​បាន​​​ទទួល​​​អាសនៈ​​​រដ្ឋ​​​សភា​​​ ថ្វី​​​បើ​​​មាន​​​ឈ្មោះនៅ​​​ក្រោម​​​គេ​​​​​​ក្នុង​​​​​​បញ្ជីឈ្មោះ​​​បេក្ខជន​​​របស់​​​គណបក្ស​​​​​​ប្រជា​​​ជន​​​កម្ពុជា​​​​​​នៅ​​​តាម​​​មណ្ឌល​​​របស់​​​ខ្លួន​​​ក៏​​​ដោយ​​​។

លោក​ ស សុខា  គឺ​​​ជា​​​អតីត​​​ស្នង​​​ការ​​​​​​រង​​​នគរ​​​បាល​​​រាជធានី​​​ភ្នំពេញ​​​ រីឯលោក​​​ ហ៊ុន​​​ ម៉ានី​​​ គឺ​​​ជា​​​ប្រធាន​​​សហព័ន្ធ​​​សហជីព​​​យុវជន​​​កម្ពុជា​​​ដែល​​​ធ្វើ​​​ជា​​​ក្រុម​​​យុវជន​​​ដ៏​​​មាន​​​ប្រសិទ្ធ​​​ភាព​​​របស់​​​គណ​​​បក្ស​​​ប្រជា​​​ជន​​​កម្ពុជា​​​​​​។

លោក​​​ស្រី ជា វណ្ណាត​​​ អ្នក​​​វិភាគ​​​នយោ​​​បាយ​​​​​​ឯករាជ្យ​​​បាន​​​មាន​​​ប្រសាសន៍ថា ការ​​​បាត់​​​បង់​​​អាសនៈ​​​សភា​​​របស់​​​គណ​​​បក្ស​​​ប្រជា​​​ជន​​​កម្ពុជា​​​​​​ ព្រម​ទាំង​​​​ការ​​​ដំឡើង​​​តួនាទី អ្នក​​​នយោបា​​​យ​​​​វ័យ​​​ក្មេង​​​នេះ​​​អា​​​ច​​​ជា​​​ឱកាស​​​មួ​​​យ​​​សម្រាប់​​​លោក​​​ ហ៊ុន​​​ សែន​​​ ដើម្បីចាប់​​​ផ្តើម​​​​​​ធ្វើ​​​ការ​​​កែទម្រង់​​​ចាំបាច់​​​នៅ​​​ក្នុ​​​ងគណបក្ស​​​មួយ​​​ដែល​​​បាត់​​​បង់​​​ប្រជាប្រិយ​​​ភាព​​​យ៉ាង​​​ច្រើន​​​​​​នៅ​​​ក្នុង​​​ការ​​​បោះ​​​ឆ្នោត​​​កាល​​​ពីថ្ងៃ​​​ទី​​​២៨​​​ ខែកក្កដា​​​។

លោក​​​ស្រី​​​ថ្លែង​​​ថា “ប្រសិន​​​បើ​​​​​​អ្នក​ដឹក​នាំ​ទទួល​​​យក​​​ [ការ​​​អំពាវ​​​នាវ​​​ឲ្យ​​​មាន​​​​​​កំណែ​​​ទម្រង់​​​​​​]​​​ និង​​​ឆ្លៀត​​​ឱកាស​​​បោះ​​​ចោល​ឈើ​​​ងាប់​​​​​​​​​នោះ វា​​​អាច​​​ធ្វើ​​​ឲ្យ​​​គណ​​​បក្ស​​​ប្រជា​​​ជន​​​កម្ពុជា​​​​​​ខ្លាំង​​​ឡើង​​​វិញ​​​។ វា​​​ជា​​​ឱកាស​​​មួយ​​​ដើម្បី​​​កែ​​​ទម្រង់​​​នៅ​​​ក្នុង​​​គណបក្ស​​​ពី​​​ព្រោះ​​​​​​​​​មនុស្ស​​​គ្រប់​​​គ្នា​​​យល់ស្រប​​​ថា គណ​​​បក្ស​​​នេះ​​​ត្រូវ​​​កែ​​​ទម្រង់​​​ដោយសារ​​​ការ​​​បាត់​​​បង់​​​អាសនៈ​​​​​​ទាំង​​​នេះ​​​”។

ទោះជាយ៉ាង​​​ណា​​​លោកស្រី ជា  វណ្ណាត បាន​​​មាន​​​​​​ប្រសាសន៍ថា  គេ​​​មិន​​​ទាន់​​​ដឹង​​​ថា លោក ហ៊ុន​​​ សែន នឹង​​​ឆ្លើយ​​​តប​​​ដោយ​​​របៀប​​​ណា​​​ចំពោះ​​​ “ក្តី​​​រន្ធត់​​​” ដោយ​​​សារ​​​ការធ្លាក់​​​ចុះ​​​យ៉ាង​​​ច្រើន​​​លើក​​​ដំបូង​​​របស់​​​លោក​​​នៅ​​​ក្នុង​​​​រយៈ​​​ពេល​​​​​​កាន់​​​អំណាច​​​ជិត​​​បី​​​ទសវត្សរ៍​​​នេះ។

លោក​​​ស្រី​​​បាន​​​បន្ថែម​​​ទៀត​​​ថា “គាត់​​​មិន​​​ដែល​​​ប្រឈម​​​មុខ​​​នឹង​​​តម្រូវ​​​ការដាក់​អ្នក​ថ្មី​​​​ ឬ​​​កែ​​​ទម្រង់​​​ឡើយ​​​។ សម្រាប់​​​រយៈ​​​ពេល​​​៣០​​​ឆ្នាំ​​​មក​​​នេះ​​​តែង​​​តែ​​​មាន​​​ការ​​​​កើន​ឡើង​ជា​​​និច្ច​​​។​​​ការ​កើន​ឡើង​នោះគឺ​​​មាន​​​ការ​​​ងាយ​​​ស្រួល​​​ជាង​​​ពេល​​​​​​ដែល​​​វា​​​​ធ្លាក់​​​ចុះ​​​ទៅ​​​ទៀត​​​។ វា​​​ពិបាក​​​ដឹង​​​ថា​ តើ​​​​​​ដាក់​អ្នក​ថ្មី​ដោយ​របៀបណា​​ និង​​​​ថា  តើ​នរណា​ជា​អ្នក​​​ជំនួស​​​ ហើយ​​​គាត់​​​មិន​​​​​​ដែល​​​មាន​​​បទ​​​ពិសោធ​​​ធ្វើ​​​ដូច្នេះ​​​ទេ​​​ពីមុន​​​។ ​​​នេះគឺជាការ​​​សាក​​​ល្បង​​​ដ៏​​​ធំ​​​មួយ​​របស់​​​គាត់”​​​៕

(រាយការណ៍​​​បន្ថែម​​​ដោយ Colin Meyn)
ប្រែសម្រួល​ដោយ មូល គឹមហឿន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស