29 C
Phnom Penh

ព្រះ​សង្ឃ​ទទួល​រង​ការ​វាយ​ដំ​ដោយ​សារចូល​រួម​​ក្នុងការ​ជួប​ជុំរបស់​គណបក្សប្រឆាំង​​​

ដោយ ឌឹ ខេមបូឌា ដេលី

បទវិភាគ

ព្រះ​គ្រូ​សូត្រ​ស្ដាំ​មួយ​អង្គ ដែល​បាន​វាយ​ព្រះ​សង្ឃ​​នៅ​ក្រោម​ឱវាទ​ពីរ​អង្គ​កាលពី​ព្រឹក​ថ្ងៃ​សៅរ៍​ ដោយសារ​​ព្រះ​សង្ឃ​អង្គ​នោះ​មាន​គម្រោង​​ទៅ​ចូល​រួម​​ក្នុង​មហា​បាតុកម្មរបស់ គណ​​​បក្សសង្គ្រោះ​ជាតិ​នៅ​ទីលានប្រជាធិប​​​តេយ្យ​នោះបាន​ការពារ​សកម្ម​ភាព​របស់​ខ្លួន​កាល​ពី​ម្សិល​មិញ​។

ព្រះសង្ឃ​ទាំង​បី​អង្គ​នោះមាន ភិក្ខុ​ សម ចន  ហែម ភក្ត្រា និង ង៉ែត វីសា ដែល​គង់​នៅ​វត្តសន្សំ​កុសល​ក្នុង​ខណ្ឌ​មាន​ជ័យ បាន​មាន​សង្ឃ​​​​ដី​កាថា ព្រះ​អង្គ ហៀបនឹង​ចាក​ចេញ​ពី​វត្ត​ទៅ​ហើយ​ដើម្បី​ចូល​រួម​​ក្នុង​មហា​បាតុកម្ម ​ស្រាប់​តែនៅ​ពេល​នោះ​ព្រះ​គ្រូ​សូត្រ​ស្ដាំ​​​នាម ​​​យឹម ចំរើន បាន​យក​ទូរស័ព្ទ​ដៃ​វាយ​ព្រះ​កេស និង​លើ​​ផ្ទៃ​មុខ​របស់​ព្រះ​អង្គ​។

ព្រះ​តេជ​គុណ សម ចន និង ហែម ភក្ត្រា ត្រូវ​បាន​វាយ​ ប៉ុន្តែ ព្រះ​តេជគុណ ង៉ែត វីសា មាន​សង្ឃដីកា​ថា​ ព្រះ​អង្គ​អាច​​​គេច​ផុត​ពី​ការ​វាយ​របស់​ព្រះ​គ្រូ​សូត្រ​ស្ដាំ​នេះ​។ ព្រះ​តេជគុណ សម ចន មាន​សង្ឃដីកា​ ថា “ព្រះគ្រូសូត្រ​បាន​កាន់​ទូរស័ព្ទ​នៅ​ក្នុង​ដៃ​ ហើយ​​​​​បាន​វាយ​ព្រះ​តេជគុណ​ ភក្ត្រា​ ចំមុខ​ចំនួន​បួន​ដៃ និងបន្ទាប់​មក​បាន​វាយ​អាត្មា​មួយ​ដៃ​។ព្រះ​អង្គ​មិន​ចង់​ឲ្យ​យើង​ទៅ​ចូល​រួម​ធ្វើ​បាតុកម្ម ទេ​”។

មាន​ស្នាម​ជាំ​បន្តិច​ដោយ​ការ​វាយ​ដំ​នោះ ព្រះ​សង្ឃ​ទាំង​បី​អង្គ​មាន​សង្ឃ​ដី​កា​ថា​ព្រះ​អង្គ​បាន​រង់​ចាំ​រហូត​ដល់​ក្រោយ​មក​ទៀត ទើប​បាន​ចាក​ចេញ​ដោយ​ស្ងាត់​ៗ​ដើម្បី​ទៅ​ចូល​រួម​ធ្វើ​បាតុកម្ម​។ ព្រះ​តេជគុណ ហម ភក្ត្រា មាន​សង្ឃដីកា អំពី​ទឹក​ចិត្ត​របស់​​ព្រះ​អង្គ​​ក្នុង​ការ​ចូល​រួម​​ក្នុង​ពិធី​បួងសួង​ដោយ​សន្តិវិធី​ដែល​មាន​ព្រះ​សង្ឃ​រាប់​រយ​អង្គ​បាន​ចូល​រួម​ដែរ​នោះ​ថា​ “អាត្មា​ចង់​ស្វែង​រក​យុត្តិ​ធម៌​​ជូន​ប្រ​ជា​ពលរដ្ឋ​ដែល​បាន​បាត់​សន្លឹក​ឆ្នោត​របស់​ខ្លួន ក្នុង​ការ​បោះ​ឆ្នោត​នេះ”។

ពេលទាក់​ទង​កាលពី​ម្សិល​មិញ ព្រះ​គ្រូ​សូត្រ​ស្ដាំ យឹម ចំរើន បាន​មាន​សង្ឃដីកា ថា ព្រះ​អង្គ​បាន​វាយ​ព្រះ​សង្ឃ​ក្មេងៗ​ទាំង​នោះ​ ដែលមាន​ព្រះ​​​ជន្ម ២០​ព្រះ​វស្សា ដោយ​សារ​​ព្រះ​សង្ឃ​ទាំង នោះ​បាន​គេច​ពី​ថ្នាក់​រៀន​នៅ​ពេល​​​​ព្រឹក​នៅ​ក្នុង​វត្ត​នេះ។ព្រះ​អង្គ​ក៏​បាន​បន្ថែម​ថា ព្រះ​សង្ឃ​មិនគួ​រធ្វើ​ការ​តវ៉ា​ទេ​។

ព្រះអង្គ​មាន​សង្ឃដីកា​បន្ត​ ថា “អាត្មា​មិន​ចង់​ឲ្យ​ព្រះ​សង្ឃ​ចូល​រួម​ធ្វើ​បាតុកម្ម​ទេ​។ យើង​ត្រូវ​តែ​រក្សា​នូវ​ភាព​អព្យាក្រឹត្យ​​សម្រាប់​ប្រ​ជា​ពល​រដ្ឋ ហើយសម្រាប់​ប្រ​ជា​ពលរដ្ឋជា​ពុទ្ធ​​​បរិស័ទ​ទាំង​អស់​។យើង​មិន​គួ​រចូល​រួម​នយោ​​​បាយ​ទេ​ដូច្នេះ ហើយ ប្រ​ជា​ពលរដ្ឋ​នឹង​បន្ត​ទុក​ចិត្ត​លើ​យើង​”។

ព្រះ​តេជគុណ សម ចន មាន​សង្ឃដីកា ថា​ព្រះអង្គ​ និងមិត្តភក្ដិ​របស់​ព្រះអង្គ​ពីរ​អង្គ​ទៀត​​មិន​មាន​គម្រោង​ដាក់​ពាក្យ​បណ្ដឹង​​ព្រហ្មទណ្ឌ​ប្រឆាំង​នឹង​ព្រះ​គ្រូ​សូត្រ​ស្ដាំ​ យឹម ចំរើន ដែល​​បាន​យល់​ព្រម​មិនធ្វើ​ការ​បំភិត​បំភ័យ​​ព្រះ​អង្គ​បន្ត​ទៀត​នោះ​ទេ​​។

ព្រះ​អគ្គ​មហាសង្ឃរាជ​នៃ​ប្រទេស​កម្ពុជា មាន​ទំនាក់​ទំនង​យ៉ាង​ជិត​ស្និទ្ធ​ជា​គណបក្ស​ប្រ​ជា​ជន​កម្ពុជាកំពុង​កាន់​អំណាច​របស់​លោក​​​នាយក​រដ្ឋ​មន្ត្រី​ ហ៊ុន សែន ប៉ុន្តែ​ បន្ទាប់ពី​គណ​​​បក្ស​នេះ​បាន​បាត់​បង់​អាសនៈ​សភា​យ៉ាង​ច្រើន​​ក្នុង​ការ​បោះ​ឆ្នោត​ជាតិ​កាល​ពី​ថ្ងៃ​ទី​២៨​​​​ខែ​​កក្កដា​ នោះ​មក ព្រះ​សង្ឃ​តែង​​តែ​​មាន​​​​វត្ត​មាន​ជា​ទៀង​ទាត់​នៅ​ក្នុង​ពិធី​ជួបជុំ​គ្នា​របស់​គណបក្ស​ប្រ​ឆាំង​។ព្រះ​សង្ឃ​​រាប់​រយ​អង្គ​បាន​ចូល​រួម​ក្នុង​មហា​​​​បាតុកម្ម​កាល​ពី​ថ្ងៃ​សៅរ៍​។

លោក យឹម សុវណ្ណ អ្នក​នាំ​ពាក្យ​គណបក្ស សង្គ្រោះ​ជាតិ បាន​មាន​ប្រសាសន៍​ថា​ព្រះ​សង្ឃ​​​​ក៏​ដូច​ជា​ប្រជា​ពល​រដ្ឋ​គ្រាប់​រូប​នៅ​ក្នុង​ប្រទេស​​​​ដែរ ​មាន​សិទ្ធិបញ្ចេញ​មតិ​របស់​ព្រះអង្គ​។ លោក មាន​ប្រ​សាសន៍​ថា​ “ ​​ព្រះ​សង្ឃ​មាន​​​​សិទ្ធិ និង កាតព្វកិច្ច​​ស្វែង​រក​យុត្តិធម៌​ជូនប្រជា​​​​ពលរដ្ឋ​។​ ដូច្នេះ​ព្រះ​សង្ឃ​អាច​ចូល​រួម​​​ក្នុង​បាតុ   ​​​​​​​​​ក​​​ម្ម ឬ ការ​តវ៉ា ឬ ការ​ជួប​ជុំ​ណា​មួយ​​បាន​”៕​

ប្រែសម្រួលដោយ ឃិន ណៃ​​​​​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស