29 C
Phnom Penh

លោក សម រង្ស៊ី ថាព្រះមហាក្សត្រ​មិន​ទាន់​កំណត់​ថ្ងៃ​ប្រជុំ​សភាទេ

ដោយ ឌឹ ខេមបូឌា ដេលី

បទវិភាគ

លោក​ សម រង្ស៊ី មេដឹកនាំគណបក្ស​ប្រឆាំង​​បាន​មាន​ប្រសាសន៍​កាល​ពីម្សិល​មិញ​ថា លោក​​មិន​ជឿថា ព្រះមហាក្សត្រ​ នរោត្តម​ សីហមុនី  ​បាន​ប្រកាស​ជាផ្លូវការ​ពីកាល​បរិច្ឆេទ​ដែល​ព្រះ​​អង្គ​នឹង​បើក​សម័យ​ប្រជុំ​សភា​នៅ​ចុង​ខែ​នេះ​ទេ​ ថ្វីបើ​ព្រះ​មហាក្សត្រ​បាន​ឡាយ​ព្រះ​ហត្ត​​លេខា​លើ​ព្រះសារ​លិខិត​មួយ​ប្រកាស​ថា ព្រះ​​អង្គ​នឹង​កោះប្រជុំ​សភា​លើក​ដំបូង​នៅ​ថ្ងៃ​ទី​២៣​ ខែកញ្ញា​ក្តី​។

លោក​ សម រង្ស៊ី ប្រ​ធាន​គណ​បក្ស​សង្រោ្គះ​ជាតិ​ចុះ​ជួប​អាជីវករ និង​អ្នក​គាំទ្រ​នៅ​ផ្សារ​អូរប្ញស្សី កាល​ពីម្សិល​មិញ​ក្នុង​រាជ​ធា​នី​ភ្នំ​ពេញ​​ ដើម្បី​ប្រកាស​ពីគម្រោង​ធ្វើ​ម​ហា​បាតុកម្ម​អហិង្សា​​។ ( ស៊ីវ ចាន់​ណា)
លោក​ សម រង្ស៊ី ប្រ​ធាន​គណ​បក្ស​សង្រោ្គះ​ជាតិ​ចុះ​ជួប​អាជីវករ និង​អ្នក​គាំទ្រ​នៅ​ផ្សារ​អូរប្ញស្សី កាល​ពីម្សិល​មិញ​ក្នុង​រាជ​ធា​នី​ភ្នំ​ពេញ​​ ដើម្បី​ប្រកាស​ពីគម្រោង​ធ្វើ​ម​ហា​បាតុកម្ម​អហិង្សា​​។ ( ស៊ីវ ចាន់​ណា)

លោក​ សម រង្ស៊ី បាន​ថ្លែង​ទៅកាន់​អ្នក​យក​ព័ត៌មាន​ បន្ទាប់​ពីធ្វើ​ដំណើរ​ទៅផ្សារ​អូរ​ប្ញស្សី ដើម្បីជួប​អាជីវករ​ និងអ្នក​គាំទ្រថា លិខិត​​ដែល​ចេញ​ដោយ​គណៈកម្មាធិការជាតិ​រៀប​ចំការ​បោះឆ្នោត​ (គ.ជ.ប.) នោះគឺគ្រាន់តែ​ជាលិខិត​ឆ្លើយ​ឆ្លង​រវាង​ព្រះមហាក្សត្រ​ និង​លោក​ អ៊ឹម សួស្តី ប្រធាន​ គ.ជ.ប. តែ​ប៉ុណ្ណោះ​ មិន​មែន​ជា​ការ​កោះ​ប្រជុំ​សភា​​លើក​ដំបូង​​ទេ​។

លោក​បាន​មាន​ប្រសាសន៍ថា “ខ្ញុំមិន​ជឿ​ថា វាជា​សារលិខិត​របស់​ព្រះមហាក្សត្រ​កោះហៅ​សមាជិក​សភា​នោះទេ​” ដោយ​លោក​ពន្យល់ថា ប្រសិន​បើ​ព្រះ​មហា​ក្សត្រ​ សីហមុនី ចង់​កោះ​ប្រជុំសភា​​លើក​ដំបូង​នេះ​ ព្រះអង្គ​មិន​ធ្វើ​តាម​រយៈ​ គ.ជ.ប. ​ដូច្នេះ​ទេ​។ លោក​បាន​មាន​ប្រសាសន៍ថា “ព្រះ​មហា​ក្សត្រ​មិន​ទាន់​បាន​កោះ​ប្រជុំ​សភា​ទេ​។ ប្រសិន​បើ​ព្រះ​អង្គ​ត្រូវ​កោះ​ប្រជុំ​សភា​នោះ ​ព្រះ​អង្គ​​នឹង​ឡាយ​ព្រះសារលិខិត​ជូន​សមាជិក​សភា​ ​ទៅ​ហើយ ព្រះអង្គនឹង​មិន​ឡាយ​ព្រះសារ​លិខិត​តាម​រយៈ​ចោរ​ដូច អ៊ឹម សួស្តី ទេ​”។

ទោះជាយ៉ាង​ណា​ លោក​ សម រង្ស៊ី បាន​មាន​ប្រសាសន៍ថា ប្រសិន​បើ​ព្រះ​មហា​ក្សត្រ​បាន​ស្នើ​សុំ​ដោយ​ផ្ទាល់​​ឲ្យ​សមាជិក​សភា​គណ​បក្ស​ប្រឆាំង​ទទួល​យក​អាសនៈ​របស់​ខ្លួន​នោះ​គណបក្ស​សង្គ្រោះជាតិ​នឹង​ពិចារណាពី​សំណើ​​នេះ​ គឺ​អា​ចមានការ​ផ្លាស់​ប្តូរពីការ​សន្យា​របស់​ខ្លួន​ជាយូរ​មក​ហើយ​​ ដើម្បីធ្វើ​ពហិការ​សម័យ​ប្រជុំសភា​ ប្រសិនបើ​មិន​មាន​ការ​ស៊ើប​អង្កេត​ឲ្យ​បាន​ត្រឹម​ត្រូវ​លើការ​ចោទ​ប្រកាន់​ពីភាព​មិន​​ប្រក្រតី​នៃការ​បោះឆ្នោត​ទេនោះ​។

លោក​ សម រង្ស៊ី​ បាន​ថ្លែង​សាជាថ្មី​ បន្ទាប់​ពីការ​ធ្វើ​ដំណើរ​ទៅ​ផ្សារ​អូរប្ញស្សី​ថា ព្រះ​រាជ​សារ​​របស់​ព្រះមហាក្សត្រ​ នរោត្តម​ សីហមុនី កាល​ពី​ថ្ងៃ​ច័ន្ទ មិន​បញ្ជាក់​ពីកាល​បរិច្ឆេទ​ណា​មួយ​ទេ​ ហើយ​ថា ព្រះ​មហាក្សត្រ​ត្រូវ​ឡាយ​ព្រះ​លិខិត​ដោយ​ផ្ទាល់​ផ្ញើ​ជូន​សមាជិក​សភា​ជាប់​ឆ្នោត​ ដើម្បី​ប្រកាស​ជាផ្លូវការ​អំពីការ​បើក​សម័យ​ប្រជុំ​សភា​។

លោក​បាន​មាន​ប្រសាសន៍ថា “ប្រសិន​បើ​យើង​ទទួល​បាន​ព្រះ​សារលិខិត​ដោយ​ផ្ទាល់ ​យើង​អាច​ពិចារណា​ពីសម័យ​ប្រជុំនេះ​…នេះ​ទើ​ប​ជាសំណើដែល​ត្រូវ​ពិចារណា​។ ប៉ុន្តែ ផ្អែក​តាម​សារ​លិខិត​ផ្ញើ​ទៅ​លោក អ៊ឹម សួស្តី នេះ លិខិត​នេះមិន​មែន​សម្រាប់​យើង​ទេ​ យើង​មិន​អាច​ធ្វើ​សេចក្តីសម្រេច​ណា​មួយ​​បាន​ឡើយ”។

លោក​ សុន ឆ័យ ប្រធាន​តំណាង​រាស្ត្រ​គណបក្ស​សង្គ្រោះជាតិ​បានមាន​ប្រសាសន៍​ថា វាមិន​អាច​ទៅ​រួច​ទេដែល​ថា សូម្បីតែ​ព្រះ​សារលិខិត​ផ្លូវការ​ពីព្រះ​មហាក្សត្រ​ដើម្បី​​អញ្ជើញ​សមាជិក​សភា​គណបក្ស​ប្រឆាំង​ឲ្យ​ទទួល​យក​អាសនៈ​របស់​ខ្លួន​ អាច​កែ​ប្រែ​សេចក្តីសម្រេចរបស់​គណបក្ស​ប្រឆាំង​ក្នុង​ការ​ធ្វើ​ពហិការ​សម័យ​ប្រជុំ​សភា​នោះ​។

លោក​បាន​មាន​ប្រសាសន៍ថា “យើង​បាន​ផ្ញើ​លិខិត​មួយ​ថ្វាយ​ព្រះមហាក្សត្រ​រួច​ហើយ​កាល​ពីថ្ងៃ​ទី​៨​ ខែកញ្ញា​ ដើម្បីទូល​ថ្វាយ​ព្រះ​អង្គ​ថា  ត្រូវ​មាន​ការ​ដោះស្រាយ​ភាព​មិន​ប្រក្រតី​ឲ្យ​បាន​ត្រឹម​ត្រូវ​សិន​ មុន​ពេល​យើង​អាច​ចូល​រួម​សម័យ​ប្រជុំ​នេះ​”។ លោក​បាន​មាន​ប្រសាសន៍ថា “គណបក្ស​ត្រូវ​ពិភាក្សា​អ្វីៗ​គ្រប់​យ៉ាងរួម​ទាំងលិខិត​របស់​ព្រះ​មហាក្សត្រ​​ស្នើ​សុំ [ឲ្យយើង​ចូល​រួម] ប៉ុន្តែ ខ្ញុំគិតថា អារម្មណ៍​របស់​យើង​គឺថា យើង​នឹង​មិន​ចូល​រួម​សម័យ​ប្រជុំ​សភា​នេះទេ​​។ យើង​នឹង​រក​មធ្យោបាយ​ពន្យល់ព្រះ​មហាក្សត្រ​អំពី​មូល​ហេតុ​របស់​យើង​ ដើម្បី​ជាការ​គោរព​របស់​យើង​​ចំពោះ​ព្រះអង្គ​”។

លោក អ៊ឹម សួស្តី បាន​បដិសេធមិន​ធ្វើ​ការ​អត្ថាធិប្បាយ​អំពី​​សារលិខិត​របស់​ព្រះ​មហា​ក្សត្រ​ទេ ដោយ​និយាយ​ថា លោក​ទើ​បតែ​បាន​ទទួល​​សារ​លិខិត​នោះ​ ហើយ​ថា ការ​ចោទ​សួរណា​មួយ​អំពី​សារៈសំខាន់​នៃ​សារ​លិខិត​នោះ​ គឺ​ស្ថិតនៅ​ក្រៅសមត្ថកិច្ច​របស់​លោក​។

លោក​​ ផៃ ស៊ីផាន​ អ្នក​នាំពាក្យ​ទី​ស្តីការ​គណៈ​រដ្ឋ​មន្ត្រី​បាន​ច្រាន​ចោល​ការ​អះអាង​របស់​លោក​ សម រង្ស៊ី ដែល​ថា កាល​​បរិច្ឆេទ​ថ្ងៃ​ទី ២៣​ ខែ​កញ្ញា​ ដែល​ព្រះ​អង្គបាន​ដាក់​នៅ​​ក្នុង​សារលិខិត​របស់​ព្រះអង្គ​នេះ​មិន​​ផ្លូវ​ការ​។ លោក​បាន​មាន​ប្រសាសន៍ថា “ព្រះ​អង្គ​បាន​ផ្ញើ​ព្រះរាជសារ​​ឲ្យ​ គ.ជ.ប. ហើយ​វា​មាន​ន័យ​ថា ព្រះ​មហាក្សត្រ​នឹងកោះ​ប្រជុំ​​នៅ  ​ថ្ងៃ​នោះ ដូច្នេះ​ព្រះមហាក្សត្រ​បាន​សម្រេច​រួច​ហើយ​។ វាគឺជា​ផ្នែក​មួយ​នៃដំណើរ​ការ​បោះ​ឆ្នោត​”។​ “នៅ​ពេល​ចប់​ដំណើរ​ការ​បោះឆ្នោត​ គ.ជ.ប. សរសេរលិខិត​មួយ​ទូល​ថ្វាយ​ព្រះ​មហាក្សត្រ​អំពី​លទ្ធផល​បោះឆ្នោត​ ហើយ​ព្រះ​អង្គ​បាន​ឡាយសារលិខិតតប​វិញ​។ សារ​លិខិត​​ដែល​ព្រះមហា​ក្សត្រ​​ឆ្លើយ​តប​មក​វិញនោះ​គឺ​ជាសារ​លិខិត​ផ្លូវ​ការ​”។

លោក​ គល់​ បញ្ញា នាយក​ប្រតិបត្តិ​គណៈ​កម្មាធិការ​ដើម្បីការ​បោះឆ្នោត​ដោយ​សេរី និង​យុត្តិធម៌​នៅកម្ពុជា (ខុមហ្វ្រែល) បាន​យល់​ស្រប​តាម​ការ​វាយ​តម្លៃ​របស់​លោក​ សម​ រង្ស៊ី ហើយ​បាន​មាន​ប្រសាសន៍ថា ព្រះ​មហាក្សត្រ សីហមុនី ប្រហែល​ជា​​នៅ​មិន​ទាន់​សម្រេចព្រះទ័យ​​កោះ​ប្រជុំ​សភា​លើក​ដំបូង​ទេ ប្រសិន​បើ​គណបក្ស​សង្គ្រោះជាតិ​នៅ​តែ​អនុ​វត្ត​តាម​គម្រោង​ធ្វើ​ពហិការ​របស់​ខ្លួន​នោះ​។

លោក​ គល់​ បញ្ញា បាន​មាន​ប្រសាសន៍ថា “ព្រះមហាក្សត្រ​ សីហមុនី គ្រាន់តែ​ឆ្លើយ​តប​ទៅ ​ប្រធាន​ គ.ជ.ប.​ តែ​ប៉ុណ្ណោះ ដើម្បី​ប្រាប់​គាត់​​ថា ព្រះ​អង្គ​មាន​បំណង​កោះ​ប្រជុំ​សភា​។​ ព្រះ​មហា​ក្សត្រ​ក៏​បាន​លើក​ឡើង​ពី​សមាជិក​សភា​ទាំង​១២៣​រូប [នៅក្នុង​សារលិខិត​របស់​ព្រះ​អង្គ​] ​ផង​ដែរ  ដូច្នេះ​ព្រះអង្គចង់​ឲ្យ​សមា​ជិក​សភា​ទាំងអស់​ចូលរួម​ ហើយ​នេះ គឺជា​លក្ខ​ខណ្ឌ​​នៃ​កិច្ច​ប្រជុំ​សភា​”។

រដ្ឋ​ធម្មនុញ្ញ​តម្រូវ​ឲ្យ​ព្រះមហាក្សត្រ​ដែល​​នឹង​យាង​ត្រឡប់​ពី​ទីក្រុង​ប៉េកាំង​​ ដើម្បី​ត្រួត​ពិនិត្យ​ព្រះរាជសុខភាព​នៅ​ថ្ងៃ​នេះ​​ កោះ​ប្រជុំ​​​សភា​លើក​ដំបូង​ក្នុង​រយៈ​ពេល​៦០ថ្ងៃ​ បន្ទាប់​ពីការ​បោះឆ្នោត​។ ទោះជាយ៉ា​ង​ណា​  ចន្លោះពីការ​បោះ​ឆ្នោត​​​​ឆ្នាំ​១៩៩៣​ និង​ការ​បង្កើត​រដ្ឋ​សភា​ មាន​រយៈ​ពេល​​១២៨​ថ្ងៃ​​ ចំណែក​ឯការ​បោះ​ឆ្នោត​​ឆ្នាំ​២០០៣​ មាន​រយៈ​ពេល​​៣៥៥ថ្ងៃ​ ហើយ​ក្រោ​យ​ការ​បោះ​ឆ្នោត​ឆ្នាំ​២០០៨​​មាន​រយៈ​ពេល​​៦០ថ្ងៃ​គត់​។ បន្ទាប់​ពីការ​បោះឆ្នោត​ជាតិ​១៩៩៣​ ដែល​​បាន​ធ្វើ​ឡើង​មុន​ពេល​អនុម័ត​រដ្ឋ​ធម្ម​នុញ្ញ​​ គឺមាន​រយៈ​ពេល​១១៩​ថ្ងៃ​មុនពេល​បើក​​សម័យ​ប្រជុំ​សភា​លើក​ដំបូង​។

លោក​ សម រង្ស៊ី បាន​ទៅដល់​ផ្សារ​អូរ​ប្ញស្សី ក្រោយ​ម៉ោង​៩ព្រឹក​បន្តិច​កាល​ពីម្សិល​មិញ ដើម្បីជួប​ជាមួយ​អាជីវករ​នៅ​ផ្សារនោះ​​ និង​ផ្សព្វផ្សាយ​​ពី​គម្រោង​របស់​គណបក្ស​ប្រឆាំង​ក្នុង​ការ​​ធ្វើ​មហា​បាតុកម្ម​រយៈ​ពេល​បីថ្ងៃ​នៅ​សួន​សេរី​ភាព​ ដើម្បីទាម​ទារ​ឲ្យ​មាន​ការ​ស៊ើបអង្កេត​ដោយ​ឯករាជ្យ​លើ​ភាព​មិន​ប្រក្រតីដែល​គេ​ចោទ​ថា បាន​កើត​មាន​​ឡើង​​ក្នុងពេល​បោះ​ឆ្នោត។

លោក​ស្រី មូរ សុខហួរ សមាជិក​សភា​ជាប់​ឆ្នោត​គណបក្ស​សង្គ្រោះជាតិ​បាន​ស្វា​គមន៍​ប្រជាពល​រដ្ឋ​ទាំង​នោះមុន​ពេល​លោក សម រង្ស៊ី ទៅ​ដល់​​​ និង​បាន​ផ្សព្វ​ផ្សាយ​ពីការ​ធ្វើ​បាតុ​កម្ម​នេះ​។ លោ​កស្រី​បាន​មាន​ប្រសាសន៍ថា “សូម​​បង​ប្អូន​ទាំង​អស់​គ្នា​ចូល​រួម​ជាមួយ​យើង​ទៅ​ធ្វើ​បាតុកម្ម​នៅថ្ងៃអាទិត្យ ហើយ​យើង​នឹង​ទូល​ថ្វាយ​ព្រះមហាក្សត្រ សីហមុនី អំពីអ្វី​ដែល​​ប្រជាពល​រដ្ឋ​ចង់​បាន​”។

ដោយ​សំដៅ​ដល់​ការ​អះអាង​ម្តង​ហើយ​ម្តង​ទៀត​របស់​គណបក្ស​សង្គ្រោះជាតិ​ដែល​ថា តាម​ពិត​ខ្លួន​ទទួល​បាន​​៦៣​អាសនៈ​នៅ​ក្នុង​រដ្ឋ​សភាដែល​មាន​១២៣​​អាសនៈ​នេះ លោក​ស្រី​បាន​សួរ​ថា “យើង​ត្រូវ​តែ​ទទួល​បាន​៦៣​អាសនៈ​មែន​ ឬមិនមែន?”។ លោក​​ស្រីបាន​មាន​ប្រសាសន៍ថា  “ពិត​មែន​ហើយ ​​យើង​ទាម​ទារ​៦៣​អាសនៈ”៕

ប្រែសម្រួល​ដោយ មូល គឹមហឿន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស